Balak (Hebrew)

B'midbar 22:2-25:9
Num 22:2 וירא בלק בן־צפור את כל־אשׁר־עשׂה ישׂראל לאמרי׃
Num 22:3 ויגר מואב מפני העם מאד כי רב־הוא ויקץ מואב מפני בני ישׂראל׃
Num 22:4 ויאמר מואב אל־זקני מדין עתה ילחכו הקהל את־כל־סביבתינו כלחך השׁור את ירק השׂדה ובלק בן־צפור מלך למואב בעת ההוא׃
Num 22:5 וישׁלח מלאכים אל־בלעם בן־בעור פתורה אשׁר על־הנהר ארץ בני־עמו לקרא־לו לאמר הנה עם יצא ממצרים הנה כסה את־עין הארץ והוא ישׁב ממלי׃
Num 22:6 ועתה לכה־נא ארה־לי את־העם הזה כי־עצום הוא ממני אולי אוכל נכה־בו ואגרשׁנו מן־הארץ כי ידעתי את אשׁר־תברך מברך ואשׁר תאר יואר׃
Num 22:7 וילכו זקני מואב וזקני מדין וקסמים בידם ויבאו אל־בלעם וידברו אליו דברי בלק׃
Num 22:8 ויאמר אליהם לינו פה הלילה והשׁבתי אתכם דבר כאשׁר ידבר יהוה אלי וישׁבו שׂרי־מואב עם־בלעם׃
Num 22:9 ויבא אלהים אל־בלעם ויאמר מי האנשׁים האלה עמך׃
Num 22:10 ויאמר בלעם אל־האלהים בלק בן־צפר מלך מואב שׁלח אלי׃
Num 22:11 הנה העם היצא ממצרים ויכס את־עין הארץ עתה לכה קבה־לי אתו אולי אוכל להלחם בו וגרשׁתיו׃
Num 22:12 ויאמר אלהים אל־בלעם לא תלך עמהם לא תאר את־העם כי ברוך הוא׃
Num 22:13 ויקם בלעם בבקר ויאמר אל־שׂרי בלק לכו אל־ארצכם כי מאן יהוה לתתי להלך עמכם׃
Num 22:14 ויקומו שׂרי מואב ויבאו אל־בלק ויאמרו מאן בלעם הלך עמנו׃
Num 22:15 ויסף עוד בלק שׁלח שׂרים רבים ונכבדים מאלה׃
Num 22:16 ויבאו אל־בלעם ויאמרו לו כה אמר בלק בן־צפור אל־נא תמנע מהלך אלי׃
Num 22:17 כי־כבד אכבדך מאד וכל אשׁר־תאמר אלי אעשׂה ולכה־נא קבה־לי את העם הזה׃
Num 22:18 ויען בלעם ויאמר אל־עבדי בלק אם־יתן־לי בלק מלא ביתו כסף וזהב לא אוכל לעבר את־פי יהוה אלהי לעשׂות קטנה או גדולה׃
Num 22:19 ועתה שׁבו נא בזה גם־אתם הלילה ואדעה מה־יסף יהוה דבר עמי׃
Num 22:20 ויבא אלהים אל־בלעם לילה ויאמר לו אם־לקרא לך באו האנשׁים קום לך אתם ואך את־הדבר אשׁר־אדבר אליך אתו תעשׂה׃
Num 22:21 ויקם בלעם בבקר ויחבשׁ את־אתנו וילך עם־שׂרי מואב׃
Num 22:22 ויחר־אף אלהים כי־הולך הוא ויתיצב מלאך יהוה בדרך לשׂטן לו והוא רכב על־אתנו ושׁני נעריו עמו׃
Num 22:23 ותרא האתון את־מלאך יהוה נצב בדרך וחרבו שׁלופה בידו ותט האתון מן־הדרך ותלך בשׂדה ויך בלעם את־האתון להטתה הדרך׃
Num 22:24 ויעמד מלאך יהוה במשׁעול הכרמים גדר מזה וגדר מזה׃
Num 22:25 ותרא האתון את־מלאך יהוה ותלחץ אל־הקיר ותלחץ את־רגל בלעם אל־הקיר ויסף להכתה׃
Num 22:26 ויוסף מלאך־יהוה עבור ויעמד במקום צר אשׁר אין־דרך לנטות ימין ושׂמאול׃
Num 22:27 ותרא האתון את־מלאך יהוה ותרבץ תחת בלעם ויחר־אף בלעם ויך את־האתון במקל׃
Num 22:28 ויפתח יהוה את־פי האתון ותאמר לבלעם מה־עשׂיתי לך כי הכיתני זה שׁלשׁ רגלים׃
Num 22:29 ויאמר בלעם לאתון כי התעללת בי לו ישׁ־חרב בידי כי עתה הרגתיך׃
Num 22:30 ותאמר האתון אל־בלעם הלוא אנכי אתנך אשׁר־רכבת עלי מעודך עד־היום הזה ההסכן הסכנתי לעשׂות לך כה ויאמר לא׃
Num 22:31 ויגל יהוה את־עיני בלעם וירא את־מלאך יהוה נצב בדרך וחרבו שׁלפה בידו ויקד וישׁתחו לאפיו׃
Num 22:32 ויאמר אליו מלאך יהוה על־מה הכית את־אתנך זה שׁלושׁ רגלים הנה אנכי יצאתי לשׂטן כי־ירט הדרך לנגדי׃
Num 22:33 ותראני האתון ותט לפני זה שׁלשׁ רגלים אולי נטתה מפני כי עתה גם־אתכה הרגתי ואותה החייתי׃
Num 22:34 ויאמר בלעם אל־מלאך יהוה חטאתי כי לא ידעתי כי אתה נצב לקראתי בדרך ועתה אם־רע בעיניך אשׁובה לי׃
Num 22:35 ויאמר מלאך יהוה אל־בלעם לך עם־האנשׁים ואפס את־הדבר אשׁר־אדבר אליך אתו תדבר וילך בלעם עם־שׂרי בלק׃
Num 22:36 וישׁמע בלק כי בא בלעם ויצא לקראתו אל־עיר מואב אשׁר על־גבול ארנן אשׁר בקצה הגבול׃
Num 22:37 ויאמר בלק אל־בלעם הלא שׁלח שׁלחתי אליך לקרא־לך למה לא־הלכת אלי האמנם לא אוכל כבדך׃
Num 22:38 ויאמר בלעם אל־בלק הנה־באתי אליך עתה היכל אוכל דבר מאומה הדבר אשׁר ישׂים אלהים בפי אתו אדבר׃
Num 22:39 וילך בלעם עם־בלק ויבאו קרית חצות׃
Num 22:40 ויזבח בלק בקר וצאן וישׁלח לבלעם ולשׂרים אשׁר אתו׃
Num 22:41 ויהי בבקר ויקח בלק את־בלעם ויעלהו במות בעל וירא משׁם קצה העם׃
Num 23:1 ויאמר בלעם אל־בלק בנה־לי בזה שׁבעה מזבחת והכן לי בזה שׁבעה פרים ושׁבעה אילים׃
Num 23:2 ויעשׂ בלק כאשׁר דבר בלעם ויעל בלק ובלעם פר ואיל במזבח׃
Num 23:3 ויאמר בלעם לבלק התיצב על־עלתך ואלכה אולי יקרה יהוה לקראתי ודבר מה־יראני והגדתי לך וילך שׁפי׃
Num 23:4 ויקר אלהים אל־בלעם ויאמר אליו את־שׁבעת המזבחת ערכתי ואעל פר ואיל במזבח׃
Num 23:5 וישׂם יהוה דבר בפי בלעם ויאמר שׁוב אל־בלק וכה תדבר׃
Num 23:6 וישׁב אליו והנה נצב על־עלתו הוא וכל־שׂרי מואב׃
Num 23:7 וישׂא משׁלו ויאמר מן־ארם ינחני בלק מלך־מואב מהררי־קדם לכה ארה־לי יעקב ולכה זעמה ישׂראל׃
Num 23:8 מה אקב לא קבה אל ומה אזעם לא זעם יהוה׃
Num 23:9 כי־מראשׁ צרים אראנו ומגבעות אשׁורנו הן־עם לבדד ישׁכן ובגוים לא יתחשׁב׃
Num 23:10 מי מנה עפר יעקב ומספר את־רבע ישׂראל תמת נפשׁי מות ישׁרים ותהי אחריתי כמהו׃
Num 23:11 ויאמר בלק אל־בלעם מה עשׂית לי לקב איבי לקחתיך והנה ברכת ברך׃
Num 23:12 ויען ויאמר הלא את אשׁר ישׂים יהוה בפי אתו אשׁמר לדבר׃
Num 23:13 ויאמר אליו בלק לך־נא אתי אל־מקום אחר אשׁר תראנו משׁם אפס קצהו תראה וכלו לא תראה וקבנו־לי משׁם׃
Num 23:14 ויקחהו שׂדה צפים אל־ראשׁ הפסגה ויבן שׁבעה מזבחת ויעל פר ואיל במזבח׃
Num 23:15 ויאמר אל־בלק התיצב כה על־עלתך ואנכי אקרה כה׃
Num 23:16 ויקר יהוה אל־בלעם וישׂם דבר בפיו ויאמר שׁוב אל־בלק וכה תדבר׃
Num 23:17 ויבא אליו והנו נצב על־עלתו ושׂרי מואב אתו ויאמר לו בלק מה־דבר יהוה׃
Num 23:18 וישׂא משׁלו ויאמר קום בלק ושׁמע האזינה עדי בנו צפר׃
Num 23:19 לא אישׁ אל ויכזב ובן־אדם ויתנחם ההוא אמר ולא יעשׂה ודבר ולא יקימנה׃
Num 23:20 הנה ברך לקחתי וברך ולא אשׁיבנה׃
Num 23:21 לא־הביט און ביעקב ולא־ראה עמל בישׂראל יהוה אלהיו עמו ותרועת מלך בו׃
Num 23:22 אל מוציאם ממצרים כתועפת ראם לו׃
Num 23:23 כי לא־נחשׁ ביעקב ולא־קסם בישׂראל כעת יאמר ליעקב ולישׂראל מה־פעל אל׃
Num 23:24 הן־עם כלביא יקום וכארי יתנשׂא לא ישׁכב עד־יאכל טרף ודם־חללים ישׁתה׃
Num 23:25 ויאמר בלק אל־בלעם גם־קב לא תקבנו גם־ברך לא תברכנו׃
Num 23:26 ויען בלעם ויאמר אל־בלק הלא דברתי אליך לאמר כל אשׁר־ידבר יהוה אתו אעשׂה׃
Num 23:27 ויאמר בלק אל־בלעם לכה־נא אקחך אל־מקום אחר אולי יישׁר בעיני האלהים וקבתו לי משׁם׃
Num 23:28 ויקח בלק את־בלעם ראשׁ הפעור הנשׁקף על־פני הישׁימן׃
Num 23:29 ויאמר בלעם אל־בלק בנה־לי בזה שׁבעה מזבחת והכן לי בזה שׁבעה פרים ושׁבעה אילם׃
Num 23:30 ויעשׂ בלק כאשׁר אמר בלעם ויעל פר ואיל במזבח׃
Num 24:1 וירא בלעם כי טוב בעיני יהוה לברך את־ישׂראל ולא־הלך כפעם־בפעם לקראת נחשׁים וישׁת אל־המדבר פניו׃
Num 24:2 וישׂא בלעם את־עיניו וירא את־ישׂראל שׁכן לשׁבטיו ותהי עליו רוח אלהים׃
Num 24:3 וישׂא משׁלו ויאמר נאם בלעם בנו בער ונאם הגבר שׁתם העין׃
Num 24:4 נאם שׁמע אמרי־אל אשׁר מחזה שׁדי יחזה נפל וגלוי עינים׃
Num 24:5 מה־טבו אהליך יעקב משׁכנתיך ישׂראל׃
Num 24:6 כנחלים נטיו כגנת עלי נהר כאהלים נטע יהוה כארזים עלי־מים׃
Num 24:7 יזל־מים מדליו וזרעו במים רבים וירם מאגג מלכו ותנשׂא מלכתו׃
Num 24:8 אל מוציאו ממצרים כתועפת ראם לו יאכל גוים צריו ועצמתיהם יגרם וחציו ימחץ׃
Num 24:9 כרע שׁכב כארי וכלביא מי יקימנו מברכיך ברוך וארריך ארור׃
Num 24:10 ויחר־אף בלק אל־בלעם ויספק את־כפיו ויאמר בלק אל־בלעם לקב איבי קראתיך והנה ברכת ברך זה שׁלשׁ פעמים׃
Num 24:11 ועתה ברח־לך אל־מקומך אמרתי כבד אכבדך והנה מנעך יהוה מכבוד׃
Num 24:12 ויאמר בלעם אל־בלק הלא גם אל־מלאכיך אשׁר־שׁלחת אלי דברתי לאמר׃
Num 24:13 אם־יתן־לי בלק מלא ביתו כסף וזהב לא אוכל לעבר את־פי יהוה לעשׂות טובה או רעה מלבי אשׁר־ידבר יהוה אתו אדבר׃
Num 24:14 ועתה הנני הולך לעמי לכה איעצך אשׁר יעשׂה העם הזה לעמך באחרית הימים׃
Num 24:15 וישׂא משׁלו ויאמר נאם בלעם בנו בער ונאם הגבר שׁתם העין׃
Num 24:16 נאם שׁמע אמרי־אל וידע דעת עליון מחזה שׁדי יחזה נפל וגלוי עינים׃
Num 24:17 אראנו ולא עתה אשׁורנו ולא קרוב דרך כוכב מיעקב וקם שׁבט מישׂראל ומחץ פאתי מואב וקרקר כל־בני־שׁת׃
Num 24:18 והיה אדום ירשׁה והיה ירשׁה שׂעיר איביו וישׂראל עשׂה חיל׃
Num 24:19 וירד מיעקב והאביד שׂריד מעיר׃
Num 24:20 וירא את־עמלק וישׂא משׁלו ויאמר ראשׁית גוים עמלק ואחריתו עדי אבד׃
Num 24:21 וירא את־הקיני וישׂא משׁלו ויאמר איתן מושׁבך ושׂים בסלע קנך׃
Num 24:22 כי אם־יהיה לבער קין עד־מה אשׁור תשׁבך׃
Num 24:23 וישׂא משׁלו ויאמר אוי מי יחיה משׂמו אל׃
Num 24:24 וצים מיד כתים וענו אשׁור וענו־עבר וגם־הוא עדי אבד׃
Num 24:25 ויקם בלעם וילך וישׁב למקמו וגם־בלק הלך לדרכו׃
Num 25:1 וישׁב ישׂראל בשׁטים ויחל העם לזנות אל־בנות מואב׃
Num 25:2 ותקראן לעם לזבחי אלהיהן ויאכל העם וישׁתחוו לאלהיהן׃
Num 25:3 ויצמד ישׂראל לבעל פעור ויחר־אף יהוה בישׂראל׃
Num 25:4 ויאמר יהוה אל־משׁה קח את־כל־ראשׁי העם והוקע אותם ליהוה נגד השׁמשׁ וישׁב חרון אף־יהוה מישׂראל׃
Num 25:5 ויאמר משׁה אל־שׁפטי ישׂראל הרגו אישׁ אנשׁיו הנצמדים לבעל פעור׃
Num 25:6 והנה אישׁ מבני ישׂראל בא ויקרב אל־אחיו את־המדינית לעיני משׁה ולעיני כל־עדת בני־ישׂראל והמה בכים פתח אהל מועד׃
Num 25:7 וירא פינחס בן־אלעזר בן־אהרן הכהן ויקם מתוך העדה ויקח רמח בידו׃
Num 25:8 ויבא אחר אישׁ־ישׂראל אל־הקבה וידקר את־שׁניהם את אישׁ ישׂראל ואת־האשׁה אל־קבתה ותעצר המגפה מעל בני ישׂראל׃
Num 25:9 ויהיו המתים במגפה ארבעה ועשׂרים אלף׃