Chukat (Hebrew)

B'midbar 19:1 - 22:1
Num 19:1 וידבר יהוה אל־משׁה ואל־אהרן לאמר׃
Num 19:2 זאת חקת התורה אשׁר־צוה יהוה לאמר דבר אל־בני ישׂראל ויקחו אליך פרה אדמה תמימה אשׁר אין־בה מום אשׁר לא־עלה עליה על׃
Num 19:3 ונתתם אתה אל־אלעזר הכהן והוציא אתה אל־מחוץ למחנה ושׁחט אתה לפניו׃
Num 19:4 ולקח אלעזר הכהן מדמה באצבעו והזה אל־נכח פני אהל־מועד מדמה שׁבע פעמים׃
Num 19:5 ושׂרף את־הפרה לעיניו את־ערה ואת־בשׂרה ואת־דמה על־פרשׁה ישׂרף׃
Num 19:6 ולקח הכהן עץ ארז ואזוב ושׁני תולעת והשׁליך אל־תוך שׂרפת הפרה׃
Num 19:7 וכבס בגדיו הכהן ורחץ בשׂרו במים ואחר יבא אל־המחנה וטמא הכהן עד־הערב׃
Num 19:8 והשׂרף אתה יכבס בגדיו במים ורחץ בשׂרו במים וטמא עד־הערב׃
Num 19:9 ואסף אישׁ טהור את אפר הפרה והניח מחוץ למחנה במקום טהור והיתה לעדת בני־ישׂראל למשׁמרת למי נדה חטאת הוא׃
Num 19:10 וכבס האסף את־אפר הפרה את־בגדיו וטמא עד־הערב והיתה לבני ישׂראל ולגר הגר בתוכם לחקת עולם׃
Num 19:11 הנגע במת לכל־נפשׁ אדם וטמא שׁבעת ימים׃
Num 19:12 הוא יתחטא־בו ביום השׁלישׁי וביום השׁביעי יטהר ואם־לא יתחטא ביום השׁלישׁי וביום השׁביעי לא יטהר׃
Num 19:13 כל־הנגע במת בנפשׁ האדם אשׁר־ימות ולא יתחטא את־משׁכן יהוה טמא ונכרתה הנפשׁ ההוא מישׂראל כי מי נדה לא־זרק עליו טמא יהיה עוד טמאתו בו׃
Num 19:14 זאת התורה אדם כי־ימות באהל כל־הבא אל־האהל וכל־אשׁר באהל יטמא שׁבעת ימים׃
Num 19:15 וכל כלי פתוח אשׁר אין־צמיד פתיל עליו טמא הוא׃
Num 19:16 וכל אשׁר־יגע על־פני השׂדה בחלל־חרב או במת או־בעצם אדם או בקבר יטמא שׁבעת ימים׃
Num 19:17 ולקחו לטמא מעפר שׂרפת החטאת ונתן עליו מים חיים אל־כלי׃
Num 19:18 ולקח אזוב וטבל במים אישׁ טהור והזה על־האהל ועל־כל־הכלים ועל־הנפשׁות אשׁר היו־שׁם ועל־הנגע בעצם או בחלל או במת או בקבר׃
Num 19:19 והזה הטהר על־הטמא ביום השׁלישׁי וביום השׁביעי וחטאו ביום השׁביעי וכבס בגדיו ורחץ במים וטהר בערב׃
Num 19:20 ואישׁ אשׁר־יטמא ולא יתחטא ונכרתה הנפשׁ ההוא מתוך הקהל כי את־מקדשׁ יהוה טמא מי נדה לא־זרק עליו טמא הוא׃
Num 19:21 והיתה להם לחקת עולם ומזה מי־הנדה יכבס בגדיו והנגע במי הנדה יטמא עד־הערב׃
Num 19:22 וכל אשׁר־יגע־בו הטמא יטמא והנפשׁ הנגעת תטמא עד־הערב׃
Num 20:1 ויבאו בני־ישׂראל כל־העדה מדבר־צן בחדשׁ הראשׁון וישׁב העם בקדשׁ ותמת שׁם מרים ותקבר שׁם׃
Num 20:2 ולא־היה מים לעדה ויקהלו על־משׁה ועל־אהרן׃
Num 20:3 וירב העם עם־משׁה ויאמרו לאמר ולו גוענו בגוע אחינו לפני יהוה׃
Num 20:4 ולמה הבאתם את־קהל יהוה אל־המדבר הזה למות שׁם אנחנו ובעירנו׃
Num 20:5 ולמה העליתנו ממצרים להביא אתנו אל־המקום הרע הזה לא מקום זרע ותאנה וגפן ורמון ומים אין לשׁתות׃
Num 20:6 ויבא משׁה ואהרן מפני הקהל אל־פתח אהל מועד ויפלו על־פניהם וירא כבוד־יהוה אליהם׃
Num 20:7 וידבר יהוה אל־משׁה לאמר׃
Num 20:8 קח את־המטה והקהל את־העדה אתה ואהרן אחיך ודברתם אל־הסלע לעיניהם ונתן מימיו והוצאת להם מים מן־הסלע והשׁקית את־העדה ואת־בעירם׃
Num 20:9 ויקח משׁה את־המטה מלפני יהוה כאשׁר צוהו׃
Num 20:10 ויקהלו משׁה ואהרן את־הקהל אל־פני הסלע ויאמר להם שׁמעו־נא המרים המן־הסלע הזה נוציא לכם מים׃
Num 20:11 וירם משׁה את־ידו ויך את־הסלע במטהו פעמים ויצאו מים רבים ותשׁת העדה ובעירם׃
Num 20:12 ויאמר יהוה אל־משׁה ואל־אהרן יען לא־האמנתם בי להקדישׁני לעיני בני ישׂראל לכן לא תביאו את־הקהל הזה אל־הארץ אשׁר־נתתי להם׃
Num 20:13 המה מי מריבה אשׁר־רבו בני־ישׂראל את־יהוה ויקדשׁ בם׃
Num 20:14 וישׁלח משׁה מלאכים מקדשׁ אל־מלך אדום כה אמר אחיך ישׂראל אתה ידעת את כל־התלאה אשׁר מצאתנו׃
Num 20:15 וירדו אבתינו מצרימה ונשׁב במצרים ימים רבים וירעו לנו מצרים ולאבתינו׃
Num 20:16 ונצעק אל־יהוה וישׁמע קלנו וישׁלח מלאך ויצאנו ממצרים והנה אנחנו בקדשׁ עיר קצה גבולך׃
Num 20:17 נעברה־נא בארצך לא נעבר בשׂדה ובכרם ולא נשׁתה מי באר דרך המלך נלך לא נטה ימין ושׂמאול עד אשׁר־נעבר גבלך׃
Num 20:18 ויאמר אליו אדום לא תעבר בי פן־בחרב אצא לקראתך׃
Num 20:19 ויאמרו אליו בני־ישׂראל במסלה נעלה ואם־מימיך נשׁתה אני ומקני ונתתי מכרם רק אין־דבר ברגלי אעברה׃
Num 20:20 ויאמר לא תעבר ויצא אדום לקראתו בעם כבד וביד חזקה׃
Num 20:21 וימאן אדום נתן את־ישׂראל עבר בגבלו ויט ישׂראל מעליו׃
Num 20:22 ויסעו מקדשׁ ויבאו בני־ישׂראל כל־העדה הר ההר׃
Num 20:23 ויאמר יהוה אל־משׁה ואל־אהרן בהר ההר על־גבול ארץ־אדום לאמר׃
Num 20:24 יאסף אהרן אל־עמיו כי לא יבא אל־הארץ אשׁר נתתי לבני ישׂראל על אשׁר־מריתם את־פי למי מריבה׃
Num 20:25 קח את־אהרן ואת־אלעזר בנו והעל אתם הר ההר׃
Num 20:26 והפשׁט את־אהרן את־בגדיו והלבשׁתם את־אלעזר בנו ואהרן יאסף ומת שׁם׃
Num 20:27 ויעשׂ משׁה כאשׁר צוה יהוה ויעלו אל־הר ההר לעיני כל־העדה׃
Num 20:28 ויפשׁט משׁה את־אהרן את־בגדיו וילבשׁ אתם את־אלעזר בנו וימת אהרן שׁם בראשׁ ההר וירד משׁה ואלעזר מן־ההר׃
Num 20:29 ויראו כל־העדה כי גוע אהרן ויבכו את־אהרן שׁלשׁים יום כל בית ישׂראל׃
Num 21:1 וישׁמע הכנעני מלך־ערד ישׁב הנגב כי בא ישׂראל דרך האתרים וילחם בישׂראל וישׁב ממנו שׁבי׃
Num 21:2 וידר ישׂראל נדר ליהוה ויאמר אם־נתן תתן את־העם הזה בידי והחרמתי את־עריהם׃
Num 21:3 וישׁמע יהוה בקול ישׂראל ויתן את־הכנעני ויחרם אתהם ואת־עריהם ויקרא שׁם־המקום חרמה׃
Num 21:4 ויסעו מהר ההר דרך ים־סוף לסבב את־ארץ אדום ותקצר נפשׁ־העם בדרך׃
Num 21:5 וידבר העם באלהים ובמשׁה למה העליתנו ממצרים למות במדבר כי אין לחם ואין מים ונפשׁנו קצה בלחם הקלקל׃
Num 21:6 וישׁלח יהוה בעם את הנחשׁים השׂרפים וינשׁכו את־העם וימת עם־רב מישׂראל׃
Num 21:7 ויבא העם אל־משׁה ויאמרו חטאנו כי־דברנו ביהוה ובך התפלל אל־יהוה ויסר מעלינו את־הנחשׁ ויתפלל משׁה בעד העם׃
Num 21:8 ויאמר יהוה אל־משׁה עשׂה לך שׂרף ושׂים אתו על־נס והיה כל־הנשׁוך וראה אתו וחי׃
Num 21:9 ויעשׂ משׁה נחשׁ נחשׁת וישׂמהו על־הנס והיה אם־נשׁך הנחשׁ את־אישׁ והביט אל־נחשׁ הנחשׁת וחי׃
Num 21:10 ויסעו בני ישׂראל ויחנו באבת׃
Num 21:11 ויסעו מאבת ויחנו בעיי העברים במדבר אשׁר על־פני מואב ממזרח השׁמשׁ׃
Num 21:12 משׁם נסעו ויחנו בנחל זרד׃
Num 21:13 משׁם נסעו ויחנו מעבר ארנון אשׁר במדבר היצא מגבל האמרי כי ארנון גבול מואב בין מואב ובין האמרי׃
Num 21:14 על־כן יאמר בספר מלחמת יהוה את־והב בסופה ואת־הנחלים ארנון׃
Num 21:15 ואשׁד הנחלים אשׁר נטה לשׁבת ער ונשׁען לגבול מואב׃
Num 21:16 ומשׁם בארה הוא הבאר אשׁר אמר יהוה למשׁה אסף את־העם ואתנה להם מים׃
Num 21:17 אז ישׁיר ישׂראל את־השׁירה הזאת עלי באר ענו־לה׃
Num 21:18 באר חפרוה שׂרים כרוה נדיבי העם במחקק במשׁענתם וממדבר מתנה׃
Num 21:19 וממתנה נחליאל ומנחליאל במות׃
Num 21:20 ומבמות הגיא אשׁר בשׂדה מואב ראשׁ הפסגה ונשׁקפה על־פני הישׁימן׃
Num 21:21 וישׁלח ישׂראל מלאכים אל־סיחן מלך־האמרי לאמר׃
Num 21:22 אעברה בארצך לא נטה בשׂדה ובכרם לא נשׁתה מי באר בדרך המלך נלך עד אשׁר־נעבר גבלך׃
Num 21:23 ולא־נתן סיחן את־ישׂראל עבר בגבלו ויאסף סיחן את־כל־עמו ויצא לקראת ישׂראל המדברה ויבא יהצה וילחם בישׂראל׃
Num 21:24 ויכהו ישׂראל לפי־חרב ויירשׁ את־ארצו מארנן עד־יבק עד־בני עמון כי עז גבול בני עמון׃
Num 21:25 ויקח ישׂראל את כל־הערים האלה וישׁב ישׂראל בכל־ערי האמרי בחשׁבון ובכל־בנתיה׃
Num 21:26 כי חשׁבון עיר סיחן מלך האמרי הוא והוא נלחם במלך מואב הראשׁון ויקח את־כל־ארצו מידו עד־ארנן׃
Num 21:27 על־כן יאמרו המשׁלים באו חשׁבון תבנה ותכונן עיר סיחון׃
Num 21:28 כי־אשׁ יצאה מחשׁבון להבה מקרית סיחן אכלה ער מואב בעלי במות ארנן׃
Num 21:29 אוי־לך מואב אבדת עם־כמושׁ נתן בניו פליטם ובנתיו בשׁבית למלך אמרי סיחון׃
Num 21:30 ונירם אבד חשׁבון עד־דיבן ונשׁים עד־נפח אשׁר עד־מידבא׃
Num 21:31 וישׁב ישׂראל בארץ האמרי׃
Num 21:32 וישׁלח משׁה לרגל את־יעזר וילכדו בנתיה ויירשׁ את־האמרי אשׁר־שׁם׃
Num 21:33 ויפנו ויעלו דרך הבשׁן ויצא עוג מלך־הבשׁן לקראתם הוא וכל־עמו למלחמה אדרעי׃
Num 21:34 ויאמר יהוה אל־משׁה אל־תירא אתו כי בידך נתתי אתו ואת־כל־עמו ואת־ארצו ועשׂית לו כאשׁר עשׂית לסיחן מלך האמרי אשׁר יושׁב בחשׁבון׃
Num 21:35 ויכו אתו ואת־בניו ואת־כל־עמו עד־בלתי השׁאיר־לו שׂריד ויירשׁו את־ארצו׃
Num 22:1 ויסעו בני ישׂראל ויחנו בערבות מואב מעבר לירדן ירחו׃