Korach Gospel (Hebrew)

Yochanan 9-10
Joh 9:1 ויהי בעברו וירא איש והוא עור מיום הולדו׃
Joh 9:2 וישאלו אתו תלמידיו לאמר רבי מי החטא הוא או ילדיו כי נולד עור׃
Joh 9:3 ויען ישוע לא הוא חטא ולא יולדיו אך למען יגלו־בו מעללי־אל׃
Joh 9:4 עלי לעשות מעשי שלחי בעוד יום יבוא הלילה אשר־בו לא־יכל איש לעשות׃
Joh 9:5 בעודני בעולם אור העולם אני׃
Joh 9:6 ויהי כדברו זאת וירק על־הארץ ויעש טיט מן־הרוק וימרח את־הטיט על־עיני העור׃
Joh 9:7 ויאמר אליו לך ורחץ בברכת השלח הוא שלוח וילך וירחץ ויבא ועיניו ראות׃
Joh 9:8 ויאמרו שכניו ואשר ראו אתו לפנים כי־עור הוא הלא הוא הישב ושאל צדקה׃
Joh 9:9 אלה אמרו כי־זה הוא ואלה אמרו אך־דומה לו והוא אמר אני הוא׃
Joh 9:10 ויאמרו אליו ואיך נפקחו עיניך׃
Joh 9:11 ויען ויאמר איש אשר־נקרא שמו ישוע עשה טיט וימרח על־עיני ויאמר אלי לך ורחץ בברכת השלח ואלך וארחץ ותפקחנה עיני׃
Joh 9:12 ויאמרו אליו ואיו ויאמר לא ידעתי׃
Joh 9:13 ויביאו את־האיש אשר היה עור לפנים אל־הפרושים׃
Joh 9:14 והיום אשר עשה־בו ישוע את־הטיט ויפקח את־עיניו היה יום השבת׃
Joh 9:15 ויוסיפו לשאל אתו גם־הפרושים איך נפקחו עיניו ויאמר אליהם טיט שם על־עיני וארחץ והנני ראה׃
Joh 9:16 ויאמרו מקצת הפרושים זה האיש לא מאת אלהים הוא כי לא־ישמר את־השבת ואחרים אמרו איכה יוכל איש חטא לעשות אתות כאלה ותהי־מחלקת ביניהם׃
Joh 9:17 ויוסיפו ויאמרו אל־העור ואתה מה־תאמר לו כי פקח עיניך ויאמר נביא הוא׃
Joh 9:18 ולא־האמינו היהודים כי עור היה וארו עיניו עד־אשר קראו אל־יולדי הנרפא׃
Joh 9:19 וישאלו אתם לאמר הזה בנכם אשר אמרתם נולד עור ואיכה הוא ראה עתה׃
Joh 9:20 ויענו אתם יולדיו ויאמרו ידענו כי זה הוא בננו וכי נולד עור׃
Joh 9:21 אבל לא ידענו איך הוא ראה עתה ולא ידענו מי פקח את־עיניו הלא בן־דעת הוא שאלו את־פיהו והוא יגיד מה־היה לו׃
Joh 9:22 כזאת דברו יולדיו מיראתם את־היהודים כי היהודים כבר נועצו לנדות את־כל־אשר יודה כי הוא המשיח׃
Joh 9:23 על־כן אמרו יולדיו בן־דעת הוא שאלו את־פיהו׃
Joh 9:24 ויקראו שנית לאיש אשר היה עור ויאמרו אליו תן כבוד לאלהים אנחנו ידענו כי־האיש הזה חטא הוא׃
Joh 9:25 ויען ויאמר אם־חטא האיש לא ידעתי אחת ידעתי כי עור הייתי ועתה הנני ראה׃
Joh 9:26 ויאמרו אליו עוד מה־עשה לך איך פקח עיניך׃
Joh 9:27 ויען אתם כבר אמרתי לכם הלא שמעתם ומה־לכם לשמע שנית התחפצו גם־אתם להיות תלמידיו׃
Joh 9:28 ויחרפו אתו ויאמרו אתה תלמידו ואנחנו תלמידיו של־משה׃
Joh 9:29 אנחנו יודעים כי אל־משה דבר האלהים ואת־זה לא ידענו מאין הוא׃
Joh 9:30 ויען האיש ויאמר אליהם דבר נפלא הוא אשר אתם לא ידעתם מאין הוא והוא פקח את־עיני׃
Joh 9:31 והנה ידענו כי את־החטאים לא־ישמע אל כי אם־את־ירא אלהים ועשה רצונו אתו ישמע׃
Joh 9:32 מעולם לא נשמע אשר־פקח איש עיני עור מרחם׃
Joh 9:33 לולא היה זה מאת אלהים לא היה יכל לעשות מאומה׃
Joh 9:34 ויענו ויאמרו אליו הן בחטאים נולדת כלך ואתה תלמדנו ויהדפהו החוצה׃
Joh 9:35 וישמע ישוע כי הדפהו החוצה ויפגשהו ויאמר אליו התאמין בבן־האדם׃
Joh 9:36 ויען ויאמר מי הוא־זה אדני ואאמין בו׃
Joh 9:37 ויאמר אליו ישוע הן־ראית אתו והמדבר אליך הנה זה הוא׃
Joh 9:38 ויאמר אני מאמין אדני וישתחו לו׃
Joh 9:39 ויאמר ישוע אני באתי לעולם הזה לדין למען יראו העורים והראים יהיו לעורים׃
Joh 9:40 ואשר היו עמו מן־הפרושים שמעו דבריו ויאמרו אליו הגם אנחנו עורים׃
Joh 9:41 ויאמר אליהם לו הייתם עורים לא־היה בכם חטא ועתה אמרתם פקחים אנחנו ותעמד חטאתכם׃
Joh 10:1 אמן אמן אני אמר לכם איש אשר לא־יבוא דרך השער אל־מכלא הצאן כי אם־יעלה בדרך אחר גנב הוא ופריץ׃
Joh 10:2 ואשר יבוא דרך השער הוא רעה הצאן׃
Joh 10:3 לו יפתח שמר הפתח והצאן את־קלו תשמענה והוא לצאנו בשם יקרא ויוציאם׃
Joh 10:4 ואחרי הוציאו את־צאנו יעבר לפניהן והצאן הלכות אחריו כי ידעו את־קולו׃
Joh 10:5 ואחרי זר לא תלכנה כי אם תברחנה מפניו את־קול הזרים לא ידעו׃
Joh 10:6 המשל הזה דבר ישוע באזניהם והמה לא ידעו מה הדבר אשר דבר אליהם׃
Joh 10:7 ויוסף ישוע וידבר אליהם אמן אמן אני אמר לכם אני הוא פתח הצאן׃
Joh 10:8 כל אשר באו לפני גנבים המה ופריצים והצאן לא־שמעו לקולם׃
Joh 10:9 אנכי הפתח איש כי־יבוא בי יושע ובצאתו ובבואו ימצא מרעה׃
Joh 10:10 הגנב לא יבוא כי אם־לגנוב ולהרוג ולאבד ואני באתי להביא להם חיים ומלא ספקם׃
Joh 10:11 אנכי הוא הרעה הטוב הרעה הטוב יתן את־נפשו בעד צאנו׃
Joh 10:12 והשכיר אשר לא רעה הוא והצאן לא־צאנו הוא יראה כי־בא הזאב ועזב את־הצאן ונס והזאב יחטף והפיץ את־הצאן׃
Joh 10:13 השכיר ינוס כי שכיר הוא ולא ידאג לצאן׃
Joh 10:14 אני הרעה הטוב וידעתי את אשר־לי ונודעתי לאשר לי׃
Joh 10:15 כאשר האב ידע אתי ואני ידעתי את־האב ואת־נפשי אתן בעד הצאן׃
Joh 10:16 וצאן אחרות יש־לי אשר אינן מן־המכלה הזאת ועלי לנהל גם־אתן ותשמענה קולי והיה עדר אחד ורעה אחד׃
Joh 10:17 על־כן אהב אתי אבי כי את־נפשי אתן למען אשוב ואקחה׃
Joh 10:18 ואיש לא יקחנה מאתי כי אם־אני מעצמי אתננה יש־בידי לתת אתה ובידי לשוב לקחתה המצוה הזאת קבלתי מעם אבי׃
Joh 10:19 ותהי מחלקת גם־בפעם הזאת בין היהודים על־הדברים האלה׃
Joh 10:20 ויאמרו רבים מהם שד בו ומשגע הוא למה תשמעו אליו׃
Joh 10:21 ואחרים אמרו דבריו אינם כדברי איש אשר שד בו היוכל שד לפקח עיני עורים׃
Joh 10:22 ויהי חנכה בירושלים והעת סתיו׃
Joh 10:23 וישוע מתהלך במקדש באולם של־שלמה׃
Joh 10:24 ויסבו אתו היהודים ויאמרו אליו עד־אנה תתלה את־נפשנו אם־המשיח אתה אמר־נא ונשמעה באזנינו׃
Joh 10:25 ויען אתם ישוע הן הגדתי אליכם ולא האמנתם בי המעשים אשר־אני עשה בשם אבי הם יעידו עלי׃
Joh 10:26 ואתם לא תאמינו כי לא מצאני אתם כאשר אמרתי לכם׃
Joh 10:27 צאני תשמענה את־קולי ואני ידעתין ואחרי תלכנה׃
Joh 10:28 ואני אתן להן חיי עולם ולא תאבדנה לנצח ואיש לא־יחטף אתהן מידי׃
Joh 10:29 האב אשר נתנן לי גדול הוא על־כל ואיש לא־יחטף אתהן מיד האב׃
Joh 10:30 אני ואבי אחד אנחנו׃
Joh 10:31 אז ירימו היהודים אבנים כפעם־בפעם לסקלו׃
Joh 10:32 ויען אתם ישוע מעשים טובים רבים הראיתי אתכם מאת אבי מה המעשה אשר עליו תסקלני׃
Joh 10:33 ויענו היהודים אתו לאמר על־מעשה טוב לא נסקל אתך כי אם־על־גדפך את־אלהים ועל־אשר אדם אתה ותעש עצמך אלהים׃
Joh 10:34 ויען אתם ישוע הלא כתוב בתורתכם אני אמרתי אלהים אתם׃
Joh 10:35 הן יקרא אלהים למי שהיה דבר האלהים אליהם והכתוב לא־יופר׃
Joh 10:36 ואיך תאמרו לאשר קדשו האב וישלחהו לעולם מגדף אתה יען אמרתי בן־אלהים אני׃
Joh 10:37 אם־לא אעשה את־מעשי אבי אל־תאמינו לי׃
Joh 10:38 ואם־עשה אני גם אם לא־תאמינו לי האמינו למעשי למען תדעו ותאמינו כי־בי האב ואני בו׃
Joh 10:39 אז ישובו ויבקשו לתפשו וימלט מידם׃
Joh 10:40 וילך וישב אל־עבר הירדן אל־המקום אשר הטביל־שם יוחנן בתחלה וישב שם׃
Joh 10:41 ויבאו אליו רבים ויאמרו הנה יוחנן לא־עשה אות אבל כל־אשר דבר יוחנן על־האיש הזה אמת הוא׃
Joh 10:42 ויאמינו בו רבים במקום ההוא׃