Korach (Hebrew)

B'midbar 16:1 - 18:32
Num 16:1 ויקח קרח בן־יצהר בן־קהת בן־לוי ודתן ואבירם בני אליאב ואון בן־פלת בני ראובן׃
Num 16:2 ויקמו לפני משׁה ואנשׁים מבני־ישׂראל חמשׁים ומאתים נשׂיאי עדה קראי מועד אנשׁי־שׁם׃
Num 16:3 ויקהלו על־משׁה ועל־אהרן ויאמרו אלהם רב־לכם כי כל־העדה כלם קדשׁים ובתוכם יהוה ומדוע תתנשׂאו על־קהל יהוה׃
Num 16:4 וישׁמע משׁה ויפל על־פניו׃
Num 16:5 וידבר אל־קרח ואל־כל־עדתו לאמר בקר וידע יהוה את־אשׁר־לו ואת־הקדושׁ והקריב אליו ואת אשׁר יבחר־בו יקריב אליו׃
Num 16:6 זאת עשׂו קחו־לכם מחתות קרח וכל־עדתו׃
Num 16:7 ותנו בהן אשׁ ושׂימו עליהן קטרת לפני יהוה מחר והיה האישׁ אשׁר־יבחר יהוה הוא הקדושׁ רב־לכם בני לוי׃
Num 16:8 ויאמר משׁה אל־קרח שׁמעו־נא בני לוי׃
Num 16:9 המעט מכם כי־הבדיל אלהי ישׂראל אתכם מעדת ישׂראל להקריב אתכם אליו לעבד את־עבדת משׁכן יהוה ולעמד לפני העדה לשׁרתם׃
Num 16:10 ויקרב אתך ואת־כל־אחיך בני־לוי אתך ובקשׁתם גם־כהנה׃
Num 16:11 לכן אתה וכל־עדתך הנעדים על־יהוה ואהרן מה־הוא כי תלונו עליו׃
Num 16:12 וישׁלח משׁה לקרא לדתן ולאבירם בני אליאב ויאמרו לא נעלה׃
Num 16:13 המעט כי העליתנו מארץ זבת חלב ודבשׁ להמיתנו במדבר כי־תשׂתרר עלינו גם־השׂתרר׃
Num 16:14 אף לא אל־ארץ זבת חלב ודבשׁ הביאתנו ותתן־לנו נחלת שׂדה וכרם העיני האנשׁים ההם תנקר לא נעלה׃
Num 16:15 ויחר למשׁה מאד ויאמר אל־יהוה אל־תפן אל־מנחתם לא חמור אחד מהם נשׂאתי ולא הרעתי את־אחד מהם׃
Num 16:16 ויאמר משׁה אל־קרח אתה וכל־עדתך היו לפני יהוה אתה והם ואהרן מחר׃
Num 16:17 וקחו אישׁ מחתתו ונתתם עליהם קטרת והקרבתם לפני יהוה אישׁ מחתתו חמשׁים ומאתים מחתת ואתה ואהרן אישׁ מחתתו׃
Num 16:18 ויקחו אישׁ מחתתו ויתנו עליהם אשׁ וישׂימו עליהם קטרת ויעמדו פתח אהל מועד ומשׁה ואהרן׃
Num 16:19 ויקהל עליהם קרח את־כל־העדה אל־פתח אהל מועד וירא כבוד־יהוה אל־כל־העדה׃
Num 16:20 וידבר יהוה אל־משׁה ואל־אהרן לאמר׃
Num 16:21 הבדלו מתוך העדה הזאת ואכלה אתם כרגע׃
Num 16:22 ויפלו על־פניהם ויאמרו אל אלהי הרוחת לכל־בשׂר האישׁ אחד יחטא ועל כל־העדה תקצף׃
Num 16:23 וידבר יהוה אל־משׁה לאמר׃
Num 16:24 דבר אל־העדה לאמר העלו מסביב למשׁכן־קרח דתן ואבירם׃
Num 16:25 ויקם משׁה וילך אל־דתן ואבירם וילכו אחריו זקני ישׂראל׃
Num 16:26 וידבר אל־העדה לאמר סורו נא מעל אהלי האנשׁים הרשׁעים האלה ואל־תגעו בכל־אשׁר להם פן־תספו בכל־חטאתם׃
Num 16:27 ויעלו מעל משׁכן־קרח דתן ואבירם מסביב ודתן ואבירם יצאו נצבים פתח אהליהם ונשׁיהם ובניהם וטפם׃
Num 16:28 ויאמר משׁה בזאת תדעון כי־יהוה שׁלחני לעשׂות את כל־המעשׂים האלה כי־לא מלבי׃
Num 16:29 אם־כמות כל־האדם ימתון אלה ופקדת כל־האדם יפקד עליהם לא יהוה שׁלחני׃
Num 16:30 ואם־בריאה יברא יהוה ופצתה האדמה את־פיה ובלעה אתם ואת־כל־אשׁר להם וירדו חיים שׁאלה וידעתם כי נאצו האנשׁים האלה את־יהוה׃
Num 16:31 ויהי ככלתו לדבר את כל־הדברים האלה ותבקע האדמה אשׁר תחתיהם׃
Num 16:32 ותפתח הארץ את־פיה ותבלע אתם ואת־בתיהם ואת כל־האדם אשׁר לקרח ואת כל־הרכושׁ׃
Num 16:33 וירדו הם וכל־אשׁר להם חיים שׁאלה ותכס עליהם הארץ ויאבדו מתוך הקהל׃
Num 16:34 וכל־ישׂראל אשׁר סביבתיהם נסו לקלם כי אמרו פן־תבלענו הארץ׃
Num 16:35 ואשׁ יצאה מאת יהוה ותאכל את החמשׁים ומאתים אישׁ מקריבי הקטרת׃
Num 16:36 (17:1) וידבר יהוה אל־משׁה לאמר׃
Num 16:37 (17:2) אמר אל־אלעזר בן־אהרן הכהן וירם את־המחתת מבין השׂרפה ואת־האשׁ זרה־הלאה כי קדשׁו׃
Num 16:38 (17:3) את מחתות החטאים האלה בנפשׁתם ועשׂו אתם רקעי פחים צפוי למזבח כי־הקריבם לפני־יהוה ויקדשׁו ויהיו לאות לבני ישׂראל׃
Num 16:39 (17:4) ויקח אלעזר הכהן את מחתות הנחשׁת אשׁר הקריבו השׂרפים וירקעום צפוי למזבח׃
Num 16:40 (17:5) זכרון לבני ישׂראל למען אשׁר לא־יקרב אישׁ זר אשׁר לא מזרע אהרן הוא להקטיר קטרת לפני יהוה ולא־יהיה כקרח וכעדתו כאשׁר דבר יהוה ביד־משׁה לו׃
Num 16:41 (17:6) וילנו כל־עדת בני־ישׂראל ממחרת על־משׁה ועל־אהרן לאמר אתם המתם את־עם יהוה׃
Num 16:42 (17:7) ויהי בהקהל העדה על־משׁה ועל־אהרן ויפנו אל־אהל מועד והנה כסהו הענן וירא כבוד יהוה׃
Num 16:43 (17:8) ויבא משׁה ואהרן אל־פני אהל מועד׃
Num 16:44 (17:9) וידבר יהוה אל־משׁה לאמר׃
Num 16:45 (17:10) הרמו מתוך העדה הזאת ואכלה אתם כרגע ויפלו על־פניהם׃
Num 16:46 (17:11) ויאמר משׁה אל־אהרן קח את־המחתה ותן־עליה אשׁ מעל המזבח ושׂים קטרת והולך מהרה אל־העדה וכפר עליהם כי־יצא הקצף מלפני יהוה החל הנגף׃
Num 16:47 (17:12) ויקח אהרן כאשׁר דבר משׁה וירץ אל־תוך הקהל והנה החל הנגף בעם ויתן את־הקטרת ויכפר על־העם׃
Num 16:48 (17:13) ויעמד בין־המתים ובין החיים ותעצר המגפה׃
Num 16:49 (17:14) ויהיו המתים במגפה ארבעה עשׂר אלף ושׁבע מאות מלבד המתים על־דבר־קרח׃
Num 16:50 (17:15) וישׁב אהרן אל־משׁה אל־פתח אהל מועד והמגפה נעצרה׃
Num 17:1 (17:16) וידבר יהוה אל־משׁה לאמר׃
Num 17:2 (17:17) דבר אל־בני ישׂראל וקח מאתם מטה מטה לבית אב מאת כל־נשׂיאהם לבית אבתם שׁנים עשׂר מטות אישׁ את־שׁמו תכתב על־מטהו׃
Num 17:3 (17:18) ואת שׁם אהרן תכתב על־מטה לוי כי מטה אחד לראשׁ בית אבותם׃
Num 17:4 (17:19) והנחתם באהל מועד לפני העדות אשׁר אועד לכם שׁמה׃
Num 17:5 (17:20) והיה האישׁ אשׁר אבחר־בו מטהו יפרח והשׁכתי מעלי את־תלנות בני ישׂראל אשׁר הם מלינם עליכם׃
Num 17:6 (17:21) וידבר משׁה אל־בני ישׂראל ויתנו אליו כל־נשׂיאיהם מטה לנשׂיא אחד מטה לנשׂיא אחד לבית אבתם שׁנים עשׂר מטות ומטה אהרן בתוך מטותם׃
Num 17:7 (17:22) וינח משׁה את־המטת לפני יהוה באהל העדת׃
Num 17:8 (17:23) ויהי ממחרת ויבא משׁה אל־אהל העדות והנה פרח מטה־אהרן לבית לוי ויצא פרח ויצץ ציץ ויגמל שׁקדים׃
Num 17:9 (17:24) ויצא משׁה את־כל־המטת מלפני יהוה אל־כל־בני ישׂראל ויראו ויקחו אישׁ מטהו׃
Num 17:10 (17:25) ויאמר יהוה אל־משׁה השׁב את־מטה אהרן לפני העדות למשׁמרת לאות לבני־מרי ותכל תלונתם מעלי ולא ימתו׃
Num 17:11 (17:26) ויעשׂ משׁה כאשׁר צוה יהוה אתו כן עשׂה׃
Num 17:12 (17:27) ויאמרו בני ישׂראל אל־משׁה לאמר הן גוענו אבדנו כלנו אבדנו׃
Num 17:13 (17:28) כל הקרב הקרב אל־משׁכן יהוה ימות האם תמנו לגוע׃
Num 18:1 ויאמר יהוה אל־אהרן אתה ובניך ובית־אביך אתך תשׂאו את־עון המקדשׁ ואתה ובניך אתך תשׂאו את־עון כהנתכם׃
Num 18:2 וגם את־אחיך מטה לוי שׁבט אביך הקרב אתך וילוו עליך וישׁרתוך ואתה ובניך אתך לפני אהל העדת׃
Num 18:3 ושׁמרו משׁמרתך ומשׁמרת כל־האהל אך אל־כלי הקדשׁ ואל־המזבח לא יקרבו ולא־ימתו גם־הם גם־אתם׃
Num 18:4 ונלוו עליך ושׁמרו את־משׁמרת אהל מועד לכל עבדת האהל וזר לא־יקרב אליכם׃
Num 18:5 ושׁמרתם את משׁמרת הקדשׁ ואת משׁמרת המזבח ולא־יהיה עוד קצף על־בני ישׂראל׃
Num 18:6 ואני הנה לקחתי את־אחיכם הלוים מתוך בני ישׂראל לכם מתנה נתנים ליהוה לעבד את־עבדת אהל מועד׃
Num 18:7 ואתה ובניך אתך תשׁמרו את־כהנתכם לכל־דבר המזבח ולמבית לפרכת ועבדתם עבדת מתנה אתן את־כהנתכם והזר הקרב יומת׃
Num 18:8 וידבר יהוה אל־אהרן ואני הנה נתתי לך את־משׁמרת תרומתי לכל־קדשׁי בני־ישׂראל לך נתתים למשׁחה ולבניך לחק־עולם׃
Num 18:9 זה־יהיה לך מקדשׁ הקדשׁים מן־האשׁ כל־קרבנם לכל־מנחתם ולכל־חטאתם ולכל־אשׁמם אשׁר ישׁיבו לי קדשׁ קדשׁים לך הוא ולבניך׃
Num 18:10 בקדשׁ הקדשׁים תאכלנו כל־זכר יאכל אתו קדשׁ יהיה־לך׃
Num 18:11 וזה־לך תרומת מתנם לכל־תנופת בני ישׂראל לך נתתים ולבניך ולבנתיך אתך לחק־עולם כל־טהור בביתך יאכל אתו׃
Num 18:12 כל חלב יצהר וכל־חלב תירושׁ ודגן ראשׁיתם אשׁר־יתנו ליהוה לך נתתים׃
Num 18:13 בכורי כל־אשׁר בארצם אשׁר־יביאו ליהוה לך יהיה כל־טהור בביתך יאכלנו׃
Num 18:14 כל־חרם בישׂראל לך יהיה׃
Num 18:15 כל־פטר רחם לכל־בשׂר אשׁר־יקריבו ליהוה באדם ובבהמה יהיה־לך אך פדה תפדה את בכור האדם ואת בכור־הבהמה הטמאה תפדה׃
Num 18:16 ופדויו מבן־חדשׁ תפדה בערכך כסף חמשׁת שׁקלים בשׁקל הקדשׁ עשׂרים גרה הוא׃
Num 18:17 אך בכור־שׁור או־בכור כשׂב או־בכור עז לא תפדה קדשׁ הם את־דמם תזרק על־המזבח ואת־חלבם תקטיר אשׁה לריח ניחח ליהוה׃
Num 18:18 ובשׂרם יהיה־לך כחזה התנופה וכשׁוק הימין לך יהיה׃
Num 18:19 כל תרומת הקדשׁים אשׁר ירימו בני־ישׂראל ליהוה נתתי לך ולבניך ולבנתיך אתך לחק־עולם ברית מלח עולם הוא לפני יהוה לך ולזרעך אתך׃
Num 18:20 ויאמר יהוה אל־אהרן בארצם לא תנחל וחלק לא־יהיה לך בתוכם אני חלקך ונחלתך בתוך בני ישׂראל׃
Num 18:21 ולבני לוי הנה נתתי כל־מעשׂר בישׂראל לנחלה חלף עבדתם אשׁר־הם עבדים את־עבדת אהל מועד׃
Num 18:22 ולא־יקרבו עוד בני ישׂראל אל־אהל מועד לשׂאת חטא למות׃
Num 18:23 ועבד הלוי הוא את־עבדת אהל מועד והם ישׂאו עונם חקת עולם לדרתיכם ובתוך בני ישׂראל לא ינחלו נחלה׃
Num 18:24 כי את־מעשׂר בני־ישׂראל אשׁר ירימו ליהוה תרומה נתתי ללוים לנחלה על־כן אמרתי להם בתוך בני ישׂראל לא ינחלו נחלה׃
Num 18:25 וידבר יהוה אל־משׁה לאמר׃
Num 18:26 ואל־הלוים תדבר ואמרת אלהם כי־תקחו מאת בני־ישׂראל את־המעשׂר אשׁר נתתי לכם מאתם בנחלתכם והרמתם ממנו תרומת יהוה מעשׂר מן־המעשׂר׃
Num 18:27 ונחשׁב לכם תרומתכם כדגן מן־הגרן וכמלאה מן־היקב׃
Num 18:28 כן תרימו גם־אתם תרומת יהוה מכל מעשׂרתיכם אשׁר תקחו מאת בני ישׂראל ונתתם ממנו את־תרומת יהוה לאהרן הכהן׃
Num 18:29 מכל מתנתיכם תרימו את כל־תרומת יהוה מכל־חלבו את־מקדשׁו ממנו׃
Num 18:30 ואמרת אלהם בהרימכם את־חלבו ממנו ונחשׁב ללוים כתבואת גרן וכתבואת יקב׃
Num 18:31 ואכלתם אתו בכל־מקום אתם וביתכם כי־שׂכר הוא לכם חלף עבדתכם באהל מועד׃
Num 18:32 ולא־תשׂאו עליו חטא בהרימכם את־חלבו ממנו ואת־קדשׁי בני־ישׂראל לא תחללו ולא תמותו׃