Devarim (Hebrew)

Devarim 1:1-3:22
Dev 1:1 אלה הדברים אשׁר דבר משׁה אל־כל־ישׂראל בעבר הירדן במדבר בערבה מול סוף בין־פארן ובין־תפל ולבן וחצרת ודי זהב׃
Dev 1:2 אחד עשׂר יום מחרב דרך הר־שׂעיר עד קדשׁ ברנע׃
Dev 1:3 ויהי בארבעים שׁנה בעשׁתי־עשׂר חדשׁ באחד לחדשׁ דבר משׁה אל־בני ישׂראל ככל אשׁר צוה יהוה אתו אלהם׃
Dev 1:4 אחרי הכתו את סיחן מלך האמרי אשׁר יושׁב בחשׁבון ואת עוג מלך הבשׁן אשׁר־יושׁב בעשׁתרת באדרעי׃
Dev 1:5 בעבר הירדן בארץ מואב הואיל משׁה באר את־התורה הזאת לאמר׃
Dev 1:6 יהוה אלהינו דבר אלינו בחרב לאמר רב־לכם שׁבת בהר הזה׃
Dev 1:7 פנו וסעו לכם ובאו הר האמרי ואל־כל־שׁכניו בערבה בהר ובשׁפלה ובנגב ובחוף הים ארץ הכנעני והלבנון עד־הנהר הגדל נהר־פרת׃
Dev 1:8 ראה נתתי לפניכם את־הארץ באו ורשׁו את־הארץ אשׁר נשׁבע יהוה לאבתיכם לאברהם ליצחק וליעקב לתת להם ולזרעם אחריהם׃
Dev 1:9 ואמר אלכם בעת ההוא לאמר לא־אוכל לבדי שׂאת אתכם׃
Dev 1:10 יהוה אלהיכם הרבה אתכם והנכם היום ככוכבי השׁמים לרב׃
Dev 1:11 יהוה אלהי אבותכם יסף עליכם ככם אלף פעמים ויברך אתכם כאשׁר דבר לכם׃
Dev 1:12 איכה אשׂא לבדי טרחכם ומשׂאכם וריבכם׃
Dev 1:13 הבו לכם אנשׁים חכמים ונבנים וידעים לשׁבטיכם ואשׂימם בראשׁיכם׃
Dev 1:14 ותענו אתי ותאמרו טוב־הדבר אשׁר־דברת לעשׂות׃
Dev 1:15 ואקח את־ראשׁי שׁבטיכם אנשׁים חכמים וידעים ואתן אותם ראשׁים עליכם שׂרי אלפים ושׂרי מאות ושׂרי חמשׁים ושׂרי עשׂרת ושׁטרים לשׁבטיכם׃
Dev 1:16 ואצוה את־שׁפטיכם בעת ההוא לאמר שׁמע בין־אחיכם ושׁפטתם צדק בין־אישׁ ובין־אחיו ובין גרו׃
Dev 1:17 לא־תכירו פנים במשׁפט כקטן כגדל תשׁמעון לא תגורו מפני־אישׁ כי המשׁפט לאלהים הוא והדבר אשׁר יקשׁה מכם תקרבון אלי ושׁמעתיו׃
Dev 1:18 ואצוה אתכם בעת ההוא את כל־הדברים אשׁר תעשׂון׃
Dev 1:19 ונסע מחרב ונלך את כל־המדבר הגדול והנורא ההוא אשׁר ראיתם דרך הר האמרי כאשׁר צוה יהוה אלהינו אתנו ונבא עד קדשׁ ברנע׃
Dev 1:20 ואמר אלכם באתם עד־הר האמרי אשׁר־יהוה אלהינו נתן לנו׃
Dev 1:21 ראה נתן יהוה אלהיך לפניך את־הארץ עלה רשׁ כאשׁר דבר יהוה אלהי אבתיך לך אל־תירא ואל־תחת׃
Dev 1:22 ותקרבון אלי כלכם ותאמרו נשׁלחה אנשׁים לפנינו ויחפרו־לנו את־הארץ וישׁבו אתנו דבר את־הדרך אשׁר נעלה־בה ואת הערים אשׁר נבא אליהן׃
Dev 1:23 וייטב בעיני הדבר ואקח מכם שׁנים עשׂר אנשׁים אישׁ אחד לשׁבט׃
Dev 1:24 ויפנו ויעלו ההרה ויבאו עד־נחל אשׁכל וירגלו אתה׃
Dev 1:25 ויקחו בידם מפרי הארץ ויורדו אלינו וישׁבו אתנו דבר ויאמרו טובה הארץ אשׁר־יהוה אלהינו נתן לנו׃
Dev 1:26 ולא אביתם לעלת ותמרו את־פי יהוה אלהיכם׃
Dev 1:27 ותרגנו באהליכם ותאמרו בשׂנאת יהוה אתנו הוציאנו מארץ מצרים לתת אתנו ביד האמרי להשׁמידנו׃
Dev 1:28 אנה אנחנו עלים אחינו המסו את־לבבנו לאמר עם גדול ורם ממנו ערים גדלת ובצורת בשׁמים וגם־בני ענקים ראינו שׁם׃
Dev 1:29 ואמר אלכם לא־תערצון ולא־תיראון מהם׃
Dev 1:30 יהוה אלהיכם ההלך לפניכם הוא ילחם לכם ככל אשׁר עשׂה אתכם במצרים לעיניכם׃
Dev 1:31 ובמדבר אשׁר ראית אשׁר נשׂאך יהוה אלהיך כאשׁר ישׂא־אישׁ את־בנו בכל־הדרך אשׁר הלכתם עד־באכם עד־המקום הזה׃
Dev 1:32 ובדבר הזה אינכם מאמינם ביהוה אלהיכם׃
Dev 1:33 ההלך לפניכם בדרך לתור לכם מקום לחנתכם באשׁ לילה לראתכם בדרך אשׁר תלכו־בה ובענן יומם׃
Dev 1:34 וישׁמע יהוה את־קול דבריכם ויקצף וישׁבע לאמר׃
Dev 1:35 אם־יראה אישׁ באנשׁים האלה הדור הרע הזה את הארץ הטובה אשׁר נשׁבעתי לתת לאבתיכם׃
Dev 1:36 זולתי כלב בן־יפנה הוא יראנה ולו־אתן את־הארץ אשׁר דרך־בה ולבניו יען אשׁר מלא אחרי יהוה׃
Dev 1:37 גם־בי התאנף יהוה בגללכם לאמר גם־אתה לא־תבא שׁם׃
Dev 1:38 יהושׁע בן־נון העמד לפניך הוא יבא שׁמה אתו חזק כי־הוא ינחלנה את־ישׂראל׃
Dev 1:39 וטפכם אשׁר אמרתם לבז יהיה ובניכם אשׁר לא־ידעו היום טוב ורע המה יבאו שׁמה ולהם אתננה והם יירשׁוה׃
Dev 1:40 ואתם פנו לכם וסעו המדברה דרך ים־סוף׃
Dev 1:41 ותענו ותאמרו אלי חטאנו ליהוה אנחנו נעלה ונלחמנו ככל אשׁר־צונו יהוה אלהינו ותחגרו אישׁ את־כלי מלחמתו ותהינו לעלת ההרה׃
Dev 1:42 ויאמר יהוה אלי אמר להם לא תעלו ולא־תלחמו כי אינני בקרבכם ולא תנגפו לפני איביכם׃
Dev 1:43 ואדבר אליכם ולא שׁמעתם ותמרו את־פי יהוה ותזדו ותעלו ההרה׃
Dev 1:44 ויצא האמרי הישׁב בהר ההוא לקראתכם וירדפו אתכם כאשׁר תעשׂינה הדברים ויכתו אתכם בשׂעיר עד־חרמה׃
Dev 1:45 ותשׁבו ותבכו לפני יהוה ולא־שׁמע יהוה בקלכם ולא האזין אליכם׃
Dev 1:46 ותשׁבו בקדשׁ ימים רבים כימים אשׁר ישׁבתם׃
Dev 2:1 ונפן ונסע המדברה דרך ים־סוף כאשׁר דבר יהוה אלי ונסב את־הר־שׂעיר ימים רבים׃
Dev 2:2 ויאמר יהוה אלי לאמר׃
Dev 2:3 רב־לכם סב את־ההר הזה פנו לכם צפנה׃
Dev 2:4 ואת־העם צו לאמר אתם עברים בגבול אחיכם בני־עשׂו הישׁבים בשׂעיר וייראו מכם ונשׁמרתם מאד׃
Dev 2:5 אל־תתגרו בם כי לא־אתן לכם מארצם עד מדרך כף־רגל כי־ירשׁה לעשׂו נתתי את־הר שׂעיר׃
Dev 2:6 אכל תשׁברו מאתם בכסף ואכלתם וגם־מים תכרו מאתם בכסף ושׁתיתם׃
Dev 2:7 כי יהוה אלהיך ברכך בכל מעשׂה ידך ידע לכתך את־המדבר הגדל הזה זה ארבעים שׁנה יהוה אלהיך עמך לא חסרת דבר׃
Dev 2:8 ונעבר מאת אחינו בני־עשׂו הישׁבים בשׂעיר מדרך הערבה מאילת ומעצין גבר ונפן ונעבר דרך מדבר מואב׃
Dev 2:9 ויאמר יהוה אלי אל־תצר את־מואב ואל־תתגר בם מלחמה כי לא־אתן לך מארצו ירשׁה כי לבני־לוט נתתי את־ער ירשׁה׃
Dev 2:10 האמים לפנים ישׁבו בה עם גדול ורב ורם כענקים׃
Dev 2:11 רפאים יחשׁבו אף־הם כענקים והמאבים יקראו להם אמים׃
Dev 2:12 ובשׂעיר ישׁבו החרים לפנים ובני עשׂו יירשׁום וישׁמידום מפניהם וישׁבו תחתם כאשׁר עשׂה ישׂראל לארץ ירשׁתו אשׁר־נתן יהוה להם׃
Dev 2:13 עתה קמו ועברו לכם את־נחל זרד ונעבר את־נחל זרד׃
Dev 2:14 והימים אשׁר־הלכנו מקדשׁ ברנע עד אשׁר־עברנו את־נחל זרד שׁלשׁים ושׁמנה שׁנה עד־תם כל־הדור אנשׁי המלחמה מקרב המחנה כאשׁר נשׁבע יהוה להם׃
Dev 2:15 וגם יד־יהוה היתה בם להמם מקרב המחנה עד תמם׃
Dev 2:16 ויהי כאשׁר־תמו כל־אנשׁי המלחמה למות מקרב העם׃
Dev 2:17 וידבר יהוה אלי לאמר׃
Dev 2:18 אתה עבר היום את־גבול מואב את־ער׃
Dev 2:19 וקרבת מול בני עמון אל־תצרם ואל־תתגר בם כי לא־אתן מארץ בני־עמון לך ירשׁה כי לבני־לוט נתתיה ירשׁה׃
Dev 2:20 ארץ־רפאים תחשׁב אף־הוא רפאים ישׁבו־בה לפנים והעמנים יקראו להם זמזמים׃
Dev 2:21 עם גדול ורב ורם כענקים וישׁמידם יהוה מפניהם ויירשׁם וישׁבו תחתם׃
Dev 2:22 כאשׁר עשׂה לבני עשׂו הישׁבים בשׂעיר אשׁר השׁמיד את־החרי מפניהם ויירשׁם וישׁבו תחתם עד היום הזה׃
Dev 2:23 והעוים הישׁבים בחצרים עד־עזה כפתרים היצאים מכפתר השׁמידם וישׁבו תחתם׃
Dev 2:24 קומו סעו ועברו את־נחל ארנן ראה נתתי בידך את־סיחן מלך־חשׁבון האמרי ואת־ארצו החל רשׁ והתגר בו מלחמה׃
Dev 2:25 היום הזה אחל תת פחדך ויראתך על־פני העמים תחת כל־השׁמים אשׁר ישׁמעון שׁמעך ורגזו וחלו מפניך׃
Dev 2:26 ואשׁלח מלאכים ממדבר קדמות אל־סיחון מלך חשׁבון דברי שׁלום לאמר׃
Dev 2:27 אעברה בארצך בדרך בדרך אלך לא אסור ימין ושׂמאול׃
Dev 2:28 אכל בכסף תשׁברני ואכלתי ומים בכסף תתן־לי ושׁתיתי רק אעברה ברגלי׃
Dev 2:29 כאשׁר עשׂו־לי בני עשׂו הישׁבים בשׂעיר והמואבים הישׁבים בער עד אשׁר־אעבר את־הירדן אל־הארץ אשׁר־יהוה אלהינו נתן לנו׃
Dev 2:30 ולא אבה סיחן מלך חשׁבון העברנו בו כי־הקשׁה יהוה אלהיך את־רוחו ואמץ את־לבבו למען תתו בידך כיום הזה׃
Dev 2:31 ויאמר יהוה אלי ראה החלתי תת לפניך את־סיחן ואת־ארצו החל רשׁ לרשׁת את־ארצו׃
Dev 2:32 ויצא סיחן לקראתנו הוא וכל־עמו למלחמה יהצה׃
Dev 2:33 ויתנהו יהוה אלהינו לפנינו ונך אתו ואת־בנו ואת־כל־עמו׃
Dev 2:34 ונלכד את־כל־עריו בעת ההוא ונחרם את־כל־עיר מתם והנשׁים והטף לא השׁארנו שׂריד׃
Dev 2:35 רק הבהמה בזזנו לנו ושׁלל הערים אשׁר לכדנו׃
Dev 2:36 מערער אשׁר על־שׂפת־נחל ארנן והעיר אשׁר בנחל ועד־הגלעד לא היתה קריה אשׁר שׂגבה ממנו את־הכל נתן יהוה אלהינו לפנינו׃
Dev 2:37 רק אל־ארץ בני־עמון לא קרבת כל־יד נחל יבק וערי ההר וכל אשׁר־צוה יהוה אלהינו׃
Dev 3:1 ונפן ונעל דרך הבשׁן ויצא עוג מלך־הבשׁן לקראתנו הוא וכל־עמו למלחמה אדרעי׃
Dev 3:2 ויאמר יהוה אלי אל־תירא אתו כי בידך נתתי אתו ואת־כל־עמו ואת־ארצו ועשׂית לו כאשׁר עשׂית לסיחן מלך האמרי אשׁר יושׁב בחשׁבון׃
Dev 3:3 ויתן יהוה אלהינו בידנו גם את־עוג מלך־הבשׁן ואת־כל־עמו ונכהו עד־בלתי השׁאיר־לו שׂריד׃
Dev 3:4 ונלכד את־כל־עריו בעת ההוא לא היתה קריה אשׁר לא־לקחנו מאתם שׁשׁים עיר כל־חבל ארגב ממלכת עוג בבשׁן׃
Dev 3:5 כל־אלה ערים בצרת חומה גבהה דלתים ובריח לבד מערי הפרזי הרבה מאד׃
Dev 3:6 ונחרם אותם כאשׁר עשׂינו לסיחן מלך חשׁבון החרם כל־עיר מתם הנשׁים והטף׃
Dev 3:7 וכל־הבהמה ושׁלל הערים בזונו לנו׃
Dev 3:8 ונקח בעת ההוא את־הארץ מיד שׁני מלכי האמרי אשׁר בעבר הירדן מנחל ארנן עד־הר חרמון׃
Dev 3:9 צידנים יקראו לחרמון שׂרין והאמרי יקראו־לו שׂניר׃
Dev 3:10 כל ערי המישׁר וכל־הגלעד וכל־הבשׁן עד־סלכה ואדרעי ערי ממלכת עוג בבשׁן׃
Dev 3:11 כי רק־עוג מלך הבשׁן נשׁאר מיתר הרפאים הנה ערשׂו ערשׂ ברזל הלה הוא ברבת בני עמון תשׁע אמות ארכה וארבע אמות רחבה באמת־אישׁ׃
Dev 3:12 ואת־הארץ הזאת ירשׁנו בעת ההוא מערער אשׁר־על־נחל ארנן וחצי הר־הגלעד ועריו נתתי לראובני ולגדי׃
Dev 3:13 ויתר הגלעד וכל־הבשׁן ממלכת עוג נתתי לחצי שׁבט המנשׁה כל חבל הארגב לכל־הבשׁן ההוא יקרא ארץ רפאים׃
Dev 3:14 יאיר בן־מנשׁה לקח את־כל־חבל ארגב עד־גבול הגשׁורי והמעכתי ויקרא אתם על־שׁמו את־הבשׁן חות יאיר עד היום הזה׃
Dev 3:15 ולמכיר נתתי את־הגלעד׃
Dev 3:16 ולראובני ולגדי נתתי מן־הגלעד ועד־נחל ארנן תוך הנחל וגבל ועד יבק הנחל גבול בני עמון׃
Dev 3:17 והערבה והירדן וגבל מכנרת ועד ים הערבה ים המלח תחת אשׁדת הפסגה מזרחה׃
Dev 3:18 ואצו אתכם בעת ההוא לאמר יהוה אלהיכם נתן לכם את־הארץ הזאת לרשׁתה חלוצים תעברו לפני אחיכם בני־ישׂראל כל־בני־חיל׃
Dev 3:19 רק נשׁיכם וטפכם ומקנכם ידעתי כי־מקנה רב לכם ישׁבו בעריכם אשׁר נתתי לכם׃
Dev 3:20 עד אשׁר־יניח יהוה לאחיכם ככם וירשׁו גם־הם את־הארץ אשׁר יהוה אלהיכם נתן להם בעבר הירדן ושׁבתם אישׁ לירשׁתו אשׁר נתתי לכם׃
Dev 3:21 ואת־יהושׁוע צויתי בעת ההוא לאמר עיניך הראת את כל־אשׁר עשׂה יהוה אלהיכם לשׁני המלכים האלה כן־יעשׂה יהוה לכל־הממלכות אשׁר אתה עבר שׁמה׃
Dev 3:22 לא תיראום כי יהוה אלהיכם הוא הנלחם לכם׃