Ekev Haftarah (Hebrew)

Yesha'Yahu 49:14 - 51:3
Yes 49:14 ותאמר ציון עזבני יהוה ואדני שׁכחני׃
Yes 49:15 התשׁכח אשׁה עולה מרחם בן־בטנה גם־אלה תשׁכחנה ואנכי לא אשׁכחך׃
Yes 49:16 הן על־כפים חקתיך חומתיך נגדי תמיד׃
Yes 49:17 מהרו בניך מהרסיך ומחרביך ממך יצאו׃
Yes 49:18 שׂאי־סביב עיניך וראי כלם נקבצו באו־לך חי־אני נאם־יהוה כי כלם כעדי תלבשׁי ותקשׁרים ככלה׃
Yes 49:19 כי חרבתיך ושׁממתיך וארץ הרסתיך כי עתה תצרי מיושׁב ורחקו מבלעיך׃
Yes 49:20 עוד יאמרו באזניך בני שׁכליך צר־לי המקום גשׁה־לי ואשׁבה׃
Yes 49:21 ואמרת בלבבך מי ילד־לי את־אלה ואני שׁכולה וגלמודה גלה וסורה ואלה מי גדל הן אני נשׁארתי לבדי אלה איפה הם׃
Yes 49:22 כה־אמר אדני יהוה הנה אשׂא אל־גוים ידי ואל־עמים ארים נסי והביאו בניך בחצן ובנתיך על־כתף תנשׂאנה׃
Yes 49:23 והיו מלכים אמניך ושׂרותיהם מיניקתיך אפים ארץ ישׁתחוו לך ועפר רגליך ילחכו וידעת כי־אני יהוה אשׁר לא־יבשׁו קוי׃
Yes 49:24 היקח מגבור מלקוח ואם־שׁבי צדיק ימלט׃
Yes 49:25 כי־כה אמר יהוה גם־שׁבי גבור יקח ומלקוח עריץ ימלט ואת־יריבך אנכי אריב ואת־בניך אנכי אושׁיע׃
Yes 49:26 והאכלתי את־מוניך את־בשׂרם וכעסיס דמם ישׁכרון וידעו כל־בשׂר כי אני יהוה מושׁיעך וגאלך אביר יעקב׃
Yes 50:1 כה אמר יהוה אי זה ספר כריתות אמכם אשׁר שׁלחתיה או מי מנושׁי אשׁר־מכרתי אתכם לו הן בעונתיכם נמכרתם ובפשׁעיכם שׁלחה אמכם׃
Yes 50:2 מדוע באתי ואין אישׁ קראתי ואין עונה הקצור קצרה ידי מפדות ואם־אין־בי כח להציל הן בגערתי אחריב ים אשׂים נהרות מדבר תבאשׁ דגתם מאין מים ותמת בצמא׃
Yes 50:3 אלבישׁ שׁמים קדרות ושׂק אשׂים כסותם׃
Yes 50:4 אדני יהוה נתן לי לשׁון למודים לדעת לעות את־יעף דבר יעיר בבקר בבקר יעיר לי אזן לשׁמע כלמודים׃
Yes 50:5 אדני יהוה פתח־לי אזן ואנכי לא מריתי אחור לא נסוגתי׃
Yes 50:6 גוי נתתי למכים ולחיי למרטים פני לא הסתרתי מכלמות ורק׃
Yes 50:7 ואדני יהוה יעזר־לי על־כן לא נכלמתי על־כן שׂמתי פני כחלמישׁ ואדע כי־לא אבושׁ׃
Yes 50:8 קרוב מצדיקי מי־יריב אתי נעמדה יחד מי־בעל משׁפטי יגשׁ אלי׃
Yes 50:9 הן אדני יהוה יעזר־לי מי־הוא ירשׁיעני הן כלם כבגד יבלו עשׁ יאכלם׃
Yes 50:10 מי בכם ירא יהוה שׁמע בקול עבדו אשׁר הלך חשׁכים ואין נגה לו יבטח בשׁם יהוה וישׁען באלהיו׃
Yes 50:11 הן כלכם קדחי אשׁ מאזרי זיקות לכו באור אשׁכם ובזיקות בערתם מידי היתה־זאת לכם למעצבה תשׁכבון׃
Yes 51:1 שׁמעו אלי רדפי צדק מבקשׁי יהוה הביטו אל־צור חצבתם ואל־מקבת בור נקרתם׃
Yes 51:2 הביטו אל־אברהם אביכם ואל־שׂרה תחוללכם כי־אחד קראתיו ואברכהו וארבהו׃
Yes 51:3 כי־נחם יהוה ציון נחם כל־חרבתיה וישׂם מדברה כעדן וערבתה כגן־יהוה שׂשׂון ושׂמחה ימצא בה תודה וקול זמרה׃