Mattot-Massei Gospel (Hebrew)

Yochanan 18-21
Yochanan 18:1 ויהי ככלות ישוע לדבר את־הדברים האלה ויצא החוצה עם־תלמידיו אל־עבר לנחל קדרון ושם היה גן ויבא בו הוא ותלמידיו׃
Yochanan 18:2 וגם־יהודה מוסרו ידע את־המקום כי־פעמים רבות נועד שמה ישוע עם־תלמידיו׃
Yochanan 18:3 ויקח יהודה את־הגדוד ומשרתים מאת ראשי הכהנים והפרושים ויבא שמה בנרות ובלפידים ובכלי־נשק׃
Yochanan 18:4 וישוע ידע את כל־אשר יבא עליו ויצא ויאמר אליהם את־מי תבקשו׃
Yochanan 18:5 ויענו ויאמרו את־ישוע הנצרי ויאמר אליהם ישוע אני הוא וגם־יהודה מוסרו עמד אצלם׃
Yochanan 18:6 ויהי באמר ישוע אליהם אני הוא ויסגו אחור ויפלו ארצה׃
Yochanan 18:7 ויסף ויאמר אליהם את־מי תבקשו ויאמרו את־ישוע הנצרי׃
Yochanan 18:8 ויען ישוע ויאמר הלא אמרתי לכם אני הוא לכן אם־אתי תבקשו הניחו לאלה וילכו׃
Yochanan 18:9 למלאת הדבר אשר דבר אשר נתתם לי מאלה לא־אבד לי אף־אחד׃
Yochanan 18:10 ולשמעון פטרוס חרב וישלפה ויך את־עבד הכהן הגדול ויקצץ את־אזנו הימנית ושם העבד מלכוס׃
Yochanan 18:11 ויאמר ישוע אל־פטרוס השב חרבך אל־נדנה הלא־אשתה את־הכוס אשר נתן־לי אבי׃
Yochanan 18:12 אז תפשו הגדוד ושר האלף ומשרתי היהודים את־ישוע ויאסרהו׃
Yochanan 18:13 ויוליכהו בראשונה אל־חנן כי הוא היה חותן קיפא אשר שמש בכהנה גדולה בשנה ההיא׃
Yochanan 18:14 הוא קיפא אשר יעץ את־היהודים לאמר טוב אשר איש־אחד יאבד בעד כל־העם׃
Yochanan 18:15 ושמעון פטרוס ותלמיד אחר הלכו אחרי ישוע והתלמיד ההוא היה נודע לכהן הגדול ויבא עם־ישוע לחצר הכהן הגדול׃
Yochanan 18:16 ופטרוס עמד מחוץ לשער ויצא התלמיד האחר הנודע לכהן הגדול וידבר אל־השערת ויבא את־פטרוס הביתה׃
Yochanan 18:17 ותאמר האמה השערת אל־פטרוס הלא גם־אתה מתלמידי האיש הזה ויאמר לא׃
Yochanan 18:18 והעבדים והמשרתים הדליקו אש גחלים מפני הקר ויעמדו ויתחממו וגם־פטרוס עמד עמם ומתחמם׃
Yochanan 18:19 וישאל הכהן הגדול את־ישוע על־תלמידיו ועל־לקחו׃
Yochanan 18:20 ויען ישוע ויאמר אליו אנכי דברתי באזני כל־העולם ותמיד למדתי בבית כנסת ובבית המקדש אשר כל־היהודים נקהלים שמה ולא־דברתי דבר בסתר׃
Yochanan 18:21 ומה־תשאל אתי שאל־נא את־השמעים מה־שדברתי אליהם הנם יודעים את־אשר אמרתי׃
Yochanan 18:22 ויהי כדברו הדברים האלה ויך אחד המשרתים העמד שמה את־ישוע על־הלחי ויאמר הכזאת תענה את־הכהן הגדול׃
Yochanan 18:23 ויען אותו ישוע אם־רעה דברתי הגד רעתי ואם־טוב מדוע תכה לחיי׃
Yochanan 18:24 וישלחהו חנן אסור באזיקים אל־קיפא הכהן הגדול׃
Yochanan 18:25 ושמעון פטרוס עמד ומתחמם ויאמרו אליו הלא גם־אתה מתלמידיו ויכחש ויאמר לא׃
Yochanan 18:26 ויאמר איש מעבדי הכהן הגדול והוא מודע לאשר קצץ פטרוס את־אזנו הלא ראיתיך עמו בגן׃
Yochanan 18:27 ויסף פטרוס ויכחש ופתאם קרא התרנגול׃
Yochanan 18:28 ויהי בבקר השכם ויוליכו את־ישוע מבית קיפא אל־בית המשפט והמה לא נכנסו שמה למען אשר לא־יטמאו כי אם־יאכלו את־הפסח׃
Yochanan 18:29 ויצא פילטוס אליהם ויאמר מה־תאשימו את־האיש הזה׃
Yochanan 18:30 ויענו ויאמרו אליו לולא היה זה עשה רע כי עתה לא הסגרנהו אליך׃
Yochanan 18:31 ויאמר אליהם פילטוס קחו אתו אתם ושפטהו כתורתכם ויאמרו אליו היהודים אין־לנו רשות להמית איש׃
Yochanan 18:32 למלאת דבר ישוע אשר דבר לרמז אי־זו מיתה סופו למות׃
Yochanan 18:33 וישב פילטוס אל־בית המשפט ויקרא אל־ישוע ויאמר אליו האתה הוא מלך היהודים׃
Yochanan 18:34 ויען אתו ישוע לאמר המלבך תדבר זאת או אחרים הגידו־לך עלי׃
Yochanan 18:35 ויאמר פילטוס הכי אנכי יהודי הלא עמך וראשי הכהנים הסגירוך אלי מה עשית׃
Yochanan 18:36 ויען ישוע ויאמר מלכותי איננה מן־העולם הזה לו־היתה מלכותי מן־העולם הזה כי אז נלחמו לי משרתי לבלתי המסר ביד היהודים אבל עתה מלכותי איננה מפה׃
Yochanan 18:37 ויאמר אליו פילטוס אם־כן אפוא מלך אתה ויען ישוע לאמר אתה אמרת כי־מלך אנכי לזאת נולדתי ולזאת באתי בעולם להעיד לאמת כל־אשר הוא מן־האמת ישמע בקולי׃
Yochanan 18:38 ויאמר אליו פילטוס מה היא האמת ואחרי דברו זאת יצא שנית אל־היהודים ויאמר אליהם אני לא־מצאתי בו כל־עון׃
Yochanan 18:39 הן מנהג הוא לכם שאשלח לכם איש אחד חפשי בפסח רצונכם שאשלח לכם את־מלך היהודים׃
Yochanan 18:40 ויוסיפו ויצעקו לאמר לא את־האיש הזה אלא את־בר־אבא ובר־אבא היה שדד׃
Yochanan 19:1 אז לקח פילטוס את־ישוע וייסרהו בשוטים׃
Yochanan 19:2 וישרגו אנשי הצבא עטרת קצים וישימו על־ראשו ויעטהו לבוש ארגמן׃
Yochanan 19:3 ויאמרו שלום לך מלך היהודים ויכהו על־הלחי׃
Yochanan 19:4 ויצא פילטוס עוד החוצה ויאמר אליהם הנני מוציא אתו אליכם למען תדעו כי לא־מצאתי בו כל־עון׃
Yochanan 19:5 וישוע יצא החוץ ועליו עטרת הקצים ולבוש הארגמן ויאמר אליהם פילטוס הנה האדם׃
Yochanan 19:6 ויהי כאשר ראהו ראשי הכהנים והמשרתים ויצעקו לאמר הצלב הצלב ויאמר אליהם פילטוס קחהו אתם והצליבהו כי אנכי לא־מצאתי בו אשמה׃
Yochanan 19:7 ויענו היהודים ויאמרו תורה יש־לנו ועל־פי תורתנו חיב־מיתה הוא כי־עשה עצמו בן־אלהים׃
Yochanan 19:8 ויהי כשמע פילטוס את־הדבר הזה ויאסף לרא עוד׃
Yochanan 19:9 וישב ויבא אל־בית המשפט ויאמר אל־ישוע מאין אתה ולא־השיבו ישוע דבר׃
Yochanan 19:10 ויאמר אליו פילטוס אלי לא תדבר הלא ידעת כי יש־לאל ידי לצלבך ויש־לאל ידי לשלח׃
Yochanan 19:11 ויען ישוע לאמר לא היתה־לך רשות עלי לולא נתן־לך מלמעלה לכן עון המסגיר אתי אליך גדול מעונך׃
Yochanan 19:12 אז יבקש פילטוס לשלחו והיהודים קראו ויאמרו אם־תשלח את־זה אינך אהב לקיסר כי כל־העשה עצמו מלך מרד בקיסר הוא׃
Yochanan 19:13 ויהי כשמע פילטוס את־הדבר הזה הוציא את־ישוע וישב על־כסא המשפט במקום הנקרא רצפה ובלשונם גבתא׃
Yochanan 19:14 והעת ערב פסח וכשעה הששית ויאמר אל־היהודים הנה מלככם והם זעקו טול טול צלב אתו׃
Yochanan 19:15 ויאמר אליהם פילטוס הצלב אצלב את־מלככם ויענו ראשי הכהנים אין־לנו מלך כי אם־קיסר׃
Yochanan 19:16 אז מסרו אליהם להצלב ויקחו את־ישוע ויוליכהו׃
Yochanan 19:17 וישא את־צלובו ויצא אל־המקום הנקרא מקום הגלגלת ובלשונם גלגלתא׃
Yochanan 19:18 ויצלבו אתו שמה ושני אנשים אחרים עמו מזה אחד ומזה אחד וישוע בתוך׃
Yochanan 19:19 ופילטוס כתב על־לוח וישם על־הצלוב וזה־דבר מכתבו ישוע הנצרי מלך היהודים׃
Yochanan 19:20 ויהודים רבים קראו את־המכתב הזה כי המקום אשר נצלב־שם ישוע קרוב אל־העיר והמכתב כתוב עברית ויונית ורומית׃
Yochanan 19:21 ויאמרו ראשי כהני היהודים אל־פילטוס אל־נא תכתב מלך היהודים כי אם־אשר אמר אני מלך היהודים׃
Yochanan 19:22 ויען פילטוס ויאמר את־אשר כתבתי כתבתי׃
Yochanan 19:23 ויהי כאשר צלבו אנשי הצבא את־ישוע ויקחו את־בגדיו ויחלקום לארבעה חלקים חלק לאיש וגם את־כתנתו והכתנת לא־היתה תפורה כי אם־מעשה ארג מפיה ועד־קצה׃
Yochanan 19:24 ויאמרו איש אל־אחיו אל־נא נקרעה לקרעים כי־נפיל עליה גורל למי תהיה למלאת דבר הכתוב יחלקו בגדי להם ועל־לבושי יפילו גורל ויעשו־כן אנשי הצבא׃
Yochanan 19:25 ועל־יד צלוב ישוע עמדו אמו ואחות אמו מרים אשת קלופס ומרים המגדלית׃
Yochanan 19:26 וירא ישוע את־אמו ואת־תלמידו אשר אהב עמדים אצלו ויאמר אל־אמו אשה הנה בנך׃
Yochanan 19:27 ואחר אמר אל־תלמידו הנה אמך ומן־השעה ההיא אסף אתה התלמיד אל־ביתו׃
Yochanan 19:28 ויהי מאחרי־כן כאשר ידע ישוע כי כבר נעשה הכל למען ימלא הכתוב כלו אמר צמאתי׃
Yochanan 19:29 ושם־כלי מלא חמץ ויטבלו ספוג בחמץ וישימו על־אזוב ויקריבו אל־פיו׃
Yochanan 19:30 ויקח ישוע את־החמץ ויאמר כלה ויט את־ראשו ותצא רוחו׃
Yochanan 19:31 והיהודים אמרו לא ילינו הפגרים על־הצלוב ביום השבת כי־ערב שבת היה וגדול יום השבת ההוא וישאלו מן־פילטוס לשבר את־שוקיהם ולהוריד אתם׃
Yochanan 19:32 ויבאו אנשי הצבא וישברו את־שוקי האחד ואת־שוקי השני הנצלבים עמו׃
Yochanan 19:33 ויבאו אל־ישוע ויראו והנה מת ולא שברו את־שוקיו׃
Yochanan 19:34 ואחד מאנשי הצבא דקרו בחנית בצדו ויצא דם ומים׃
Yochanan 19:35 והראה זאת העיד ועדותו קימת והוא יודע כי אמת יגיד למען גם־אתם תאמינו׃
Yochanan 19:36 כי זאת היתה למלאת הכתוב ועצם לא־תשברו בו׃
Yochanan 19:37 ועוד כתוב אחר אמר והביטו אליו את אשר דקרו׃
Yochanan 19:38 ואחר בא יוסף הרמתי והוא תלמיד ישוע בסתר מפני היהודים וישאל מאת פילטוס אשר יתנהו לשאת את־גופת ישוע וינח לו פילטוס ויבא וישא את־גופת ישוע׃
Yochanan 19:39 ויבא גם־נקדימון אשר בא־לפנים בלילה אל־ישוע ויבא תערבת מר־ואהלות כמאה ליטרין׃
Yochanan 19:40 ויקחו את־גופת ישוע ויחתלוה בתכריכין עם־הבשמים כמנהג היהודים לקבר את־מתיהם׃
Yochanan 19:41 ובמקום אשר נצלב היה גן ובגן קבר חדש אשר לא־הנח בו מת עד־הנה׃
Yochanan 19:42 שם שמו את־ישוע כי־ערב שבת היה ליהודים והקבר קרוב׃
Yochanan 20:1 ויהי באחד בשבת לפנות הבקר בעוד חשך ותבא מרים המגדלית אל־הקבר ותרא והנה־האבן מוסרה מעל הקבר׃
Yochanan 20:2 ותרץ ותבא אל־שמעון פטרוס ואל־התלמיד האחר אשר ישוע אהבו ותאמר אליהם הנה נשאו את־האדון מקברו ולא ידענו איפה הניחהו׃
Yochanan 20:3 ויצא פטרוס והתלמיד האחר וילכו אל־הקבר׃
Yochanan 20:4 וירוצו שניהם יחדו וימהר התלמיד האחר לרוץ ויעבר את־פטרוס ויבא ראשונה אל־הקבר׃
Yochanan 20:5 וישקף אל־תוכו וירא את־התכריכין מנחים ולא נכנס׃
Yochanan 20:6 ויבא שמעון פטרוס אחריו והוא נכנס אל־הקבר וירא את־התכריכין מנחים׃
Yochanan 20:7 והסודר אשר היתה על־ראשו איננה מנחת אצל התכריכין כי אם־מקפלת לבדה במקום אחד׃
Yochanan 20:8 והתלמיד האחר אשר בא ראשונה אל־הקבר גם־הוא נכנס וירא ויאמן׃
Yochanan 20:9 כי עדן לא־הבינו את־הכתוב אשר קום יקום מעם המתים׃
Yochanan 20:10 וישובו התלמידים וילכו אל־ביתם׃
Yochanan 20:11 ומרים עמדה מחוץ לקבר והיא בוכיה ויהי בבכותה ותשקף אל־תוך הקבר׃
Yochanan 20:12 ותרא שני מלאכים לבושי לבנים ישבים במקום אשר שמו שם את־גופת ישוע אחד מראשותיו ואחד מרגלותיו׃
Yochanan 20:13 ויאמרו אליה אשה למה תבכי ותאמר אליהם כי נשאו מזה את־אדני ולא ידעתי איפה הניחהו׃
Yochanan 20:14 ויהי ככלותה לדבר זאת ותפן אחריה ותרא והנה ישוע עמד ולא ידעה כי ישוע הוא׃
Yochanan 20:15 ויאמר אליה ישוע אשה למה תבכי את־מי תבקשי והיא חשבתהו לשמר הגן ותאמר אליו אדני אם־אתה נשאת אתו מזה הגידה־נא לי איפה הנחתו ולקחתיו משם׃
Yochanan 20:16 ויאמר אליה ישוע מרים ותפן ותאמר אליו רבוני הוא מורה׃
Yochanan 20:17 ויאמר אליה ישוע אל־תגעי בי כי עוד לא עליתי אל־אבי ולכי־נא אל־אחי והגידי להם אני עלה אל־אבי ואביכם ואל־אלהי ואלהיכם׃
Yochanan 20:18 ותבא מרים המגדלית ותספר אל־התלמידים את אשר־ראתה את־האדון וכזאת דבר אליה׃
Yochanan 20:19 ויהי ביום ההוא והוא אחד בשבת לעת־ערב כאשר נסגרו דלתות הבית אשר־נקבצו שם התלמידים מיראת היהודים ויבא ישוע ויעמד ביניהם ויאמר אליהם שלום לכם׃
Yochanan 20:20 ואחרי דברו זאת הראם את־ידיו ואת־צדו וישמחו התלמידים בראותם את־האדון׃
Yochanan 20:21 ויסף ישוע ויאמר אליהם שלום לכם כאשר שלח אתי האב כן אנכי שלח אתכם׃
Yochanan 20:22 ואחרי דברו זאת ויפח בהם ויאמר אליהם קחו לכם את־רוח הקדש׃
Yochanan 20:23 והיה כל־אשר תסלחו לחטאתם ונסלח להם ואשר תאשימו יאשמו׃
Yochanan 20:24 ותומא אחד משנים העשר הנקרא דידומוס לא־היה בתוכם כבוא ישוע׃
Yochanan 20:25 ויגידו לו התלמידים הנשארים לאמר ראה ראינו את־האדון ויאמר אליהם אם־לא אראה בידיו את־רשם המסמרות ואשים את־אצבעי במקום המסמרות ואשים את־ידי בצדו לא אאמין׃
Yochanan 20:26 ויהי מקצה שמונת ימים ותלמידיו שנית בבית ותומא עמהם ויבא ישוע והדלתות מסגרות ויעמד ביניהם ויאמר שלום לכם׃
Yochanan 20:27 ואחר אמר אל־תומא שלח אצבעך הנה וראה את־ידי ושלח את־ידך הנה ושים בצדי ואל־תהי מחסר אמונה כי אם־מאמין׃
Yochanan 20:28 ויען תומא ויאמר אליו אדני ואלהי׃
Yochanan 20:29 ויאמר אליו ישוע יען ראית אתי האמנת אשרי המאמינים ואינם ראים׃
Yochanan 20:30 והנה גם־אתות אחרים רבים עשה ישוע לעיני תלמידיו אשר לא־נכתבו בספר הזה׃
Yochanan 20:31 ואלה נכתבו למען תאמינו כי ישוע הוא המשיח בן־אלהים ולמען יהיו לכם חיים בשמו באמונתכם׃
Yochanan 21:1 ויהי אחרי־כן ויסף ישוע להראות אל־תלמידיו על־ים טיבריה וזה־דבר הראותו אליהם׃
Yochanan 21:2 שמעון פטרוס ותומא הנקרא דידומוס ונתנאל מקנה אשר בארץ הגליל ובני זבדי ועוד שנים אחרים מתלמידיו ישבו יחדו׃
Yochanan 21:3 ויאמר אליהם שמעון פטרוס הנני הלך לדוג ויאמרו אליו גם־אנחנו נלך עמך ויצאו וירדו באניה ולא לכדו מאומה בלילה ההוא׃
Yochanan 21:4 הבקר אור וישוע עמד על־שפת הים והתלמידים לא ידעו כי ישוע הוא׃
Yochanan 21:5 ויאמר אליהם ישוע בני היש־לכם דבר לאכל ויאמרו לא׃
Yochanan 21:6 ויאמר להם השליכו המכמרת מימין לאניה ותמצאו וישליכו ולא־יכלו עוד למשך אתה מרב הדגים׃
Yochanan 21:7 ויאמר התלמיד ההוא אשר ישוע אהבו אל־פטרוס הנה־האדון ויהי כשמע שמעון פטרוס כי הוא האדון ויחגר את־מעילו כי עירום היה ויתנפל אל־הים׃
Yochanan 21:8 והתלמידים הנשארים באו בספינה כי לא הרחיקו מן־היבשה כי אם־כמאתים אמה וימשכו את־המכמרת עם־הדגים׃
Yochanan 21:9 ויהי בעלותם אל־היבשה ויראו והנה גחלי־אש ערוכים ודגים עליהם ולחם לאכל׃
Yochanan 21:10 ויאמר אליהם ישוע הביאו מן־הדגים אשר לכדתם עתה׃
Yochanan 21:11 ויעל שמעון פטרוס וימשך את־המכמרת אל־היבשה והיא מלאה דגים גדולים מאה וחמשים ושלשה ולא נקרעה המכמרת אף־כי רבים היו׃
Yochanan 21:12 ויאמר אליהם ישוע באו ברו־לחם ואין איש מן־התלמידים אשר מלאו לבו לשאל מי אתה כי ידעו אשר הוא האדון׃
Yochanan 21:13 ויבא ישוע ויקח את־הלחם ויתן להם ואת־הדגים׃
Yochanan 21:14 וזאת הפעם השלישית אשר־נראה ישוע אל־תלמידיו אחרי קומו מעם המתים׃
Yochanan 21:15 ויהי אחרי אכלם ויאמר ישוע אל־שמעון פטרוס שמעון בן־יונה התאהב אתי יותר מאלה ויאמר אליו כן אדני אתה ידעת כי אהבתיך ויאמר אליו רעה את־טלאי׃
Yochanan 21:16 ויאמר אליו עוד הפעם שמעון בן־יונה התאהב אתי ויאמר אליו כן אדני אתה ידעת כי אהבתיך ויאמר אליו נהג את־צאני׃
Yochanan 21:17 ויאמר אליו פעם שלישית שמעון בן־יונה התאהב אתי ויתעצב פטרוס כי־אמר אליו בשלישית התאהב אתי ויאמר אליו אדני את־כל אתה יודע וידעת כי אהבתיך ויאמר אליו ישוע רעה את־צאני׃
Yochanan 21:18 אמן אמן אני אמר לך בהיתך צעיר לימים אתה חגרת עצמך ותלך אל־אשר חפצת וכאשר תזקן ופרשת כפיך ואחר יחגרך ונשאך אל־אשר לא תחפץ׃
Yochanan 21:19 וכל־זאת דבר לרמז על־מיתתו אשר יכבד־בה את־האלהים ויהי ככלותו לדבר ויאמר אליו לך אחרי׃
Yochanan 21:20 ויפן פטרוס וירא את־התלמיד אשר ישוע אהבו הלך אחריהם והוא אשר נפל על־לבו בסעודה וגם־אמר אדני מי הוא־זה אשר ימסר׃
Yochanan 21:21 ויהי בראות אתו פטרוס ויאמר אל־ישוע אדני וזה מה־לו׃
Yochanan 21:22 ויאמר אליו ישוע אם־רצוני שישאר עד־באי מה־לך ולזאת אתה לך אחרי׃
Yochanan 21:23 על־כן יצא הדבר הזה בין האחים שהתלמיד ההוא לא ימות וישוע לא אמר־לו כי לא־ימות אבל אמר אם־חפצי כי־ישאר עד־באי מה־זה לך׃
Yochanan 21:24 זה הוא התלמיד המעיד על־אלה ואשר כתב כל־זאת וידענו כי עדותו אמת׃
Yochanan 21:25 ויש עוד מעשים רבים אחרים אשר עשה ישוע ואם־יכתבו כלם לאחד אחד אדמה שגם־העולם כלו לא יכיל את־הספרים אשר יכתבו (אמן)׃