Mattot-Massei Haftarah (Hebrew)

YirmeYahu 2:4-28, 3:4
YirmeYahu 2:4 שׁמעו דבר־יהוה בית יעקב וכל־משׁפחות בית ישׂראל׃
YirmeYahu 2:5 כה אמר יהוה מה־מצאו אבותיכם בי עול כי רחקו מעלי וילכו אחרי ההבל ויהבלו׃
YirmeYahu 2:6 ולא אמרו איה יהוה המעלה אתנו מארץ מצרים המוליך אתנו במדבר בארץ ערבה ושׁוחה בארץ ציה וצלמות בארץ לא־עבר בה אישׁ ולא־ישׁב אדם שׁם׃
YirmeYahu 2:7 ואביא אתכם אל־ארץ הכרמל לאכל פריה וטובה ותבאו ותטמאו את־ארצי ונחלתי שׂמתם לתועבה׃
YirmeYahu 2:8 הכהנים לא אמרו איה יהוה ותפשׂי התורה לא ידעוני והרעים פשׁעו בי והנביאים נבאו בבעל ואחרי לא־יועלו הלכו׃
YirmeYahu 2:9 לכן עד אריב אתכם נאם־יהוה ואת־בני בניכם אריב׃
YirmeYahu 2:10 כי עברו איי כתיים וראו וקדר שׁלחו והתבוננו מאד וראו הן היתה כזאת׃
YirmeYahu 2:11 ההימיר גוי אלהים והמה לא אלהים ועמי המיר כבודו בלוא יועיל׃
YirmeYahu 2:12 שׁמו שׁמים על־זאת ושׂערו חרבו מאד נאם־יהוה׃
YirmeYahu 2:13 כי־שׁתים רעות עשׂה עמי אתי עזבו מקור מים חיים לחצב להם בארות בארת נשׁברים אשׁר לא־יכלו המים׃
YirmeYahu 2:14 העבד ישׂראל אם־יליד בית הוא מדוע היה לבז׃
YirmeYahu 2:15 עליו ישׁאגו כפרים נתנו קולם וישׁיתו ארצו לשׁמה עריו נצתה מבלי ישׁב׃
YirmeYahu 2:16 גם־בני־נף ותחפנס ירעוך קדקד׃
YirmeYahu 2:17 הלוא־זאת תעשׂה־לך עזבך את־יהוה אלהיך בעת מוליכך בדרך׃
YirmeYahu 2:18 ועתה מה־לך לדרך מצרים לשׁתות מי שׁחור ומה־לך לדרך אשׁור לשׁתות מי נהר׃
YirmeYahu 2:19 תיסרך רעתך ומשׁבותיך תוכחך ודעי וראי כי־רע ומר עזבך את־יהוה אלהיך ולא פחדתי אליך נאם־אדני יהוה צבאות׃
YirmeYahu 2:20 כי מעולם שׁברתי עלך נתקתי מוסרתיך ותאמרי לא אעבד כי על־כל־גבעה גבהה ותחת כל־עץ רענן את צעה זנה׃
YirmeYahu 2:21 ואנכי נטעתיך שׂרק כלה זרע אמת ואיך נהפכת לי סורי הגפן נכריה׃
YirmeYahu 2:22 כי אם־תכבסי בנתר ותרבי־לך ברית נכתם עונך לפני נאם אדני יהוה׃
YirmeYahu 2:23 איך תאמרי לא נטמאתי אחרי הבעלים לא הלכתי ראי דרכך בגיא דעי מה עשׂית בכרה קלה משׂרכת דרכיה׃
YirmeYahu 2:24 פרה למד מדבר באות נפשׁו שׁאפה רוח תאנתה מי ישׁיבנה כל־מבקשׁיה לא ייעפו בחדשׁה ימצאונה׃
YirmeYahu 2:25 מנעי רגלך מיחף וגורנך מצמאה ותאמרי נואשׁ לוא כי־אהבתי זרים ואחריהם אלך׃
YirmeYahu 2:26 כבשׁת גנב כי ימצא כן הבישׁו בית ישׂראל המה מלכיהם שׂריהם וכהניהם ונביאיהם׃
YirmeYahu 2:27 אמרים לעץ אבי אתה ולאבן את ילדתני כי־פנו אלי ערף ולא פנים ובעת רעתם יאמרו קומה והושׁיענו׃
YirmeYahu 2:28 ואיה אלהיך אשׁר עשׂית לך יקומו אם־יושׁיעוך בעת רעתך כי מספר עריך היו אלהיך יהודה׃
YirmeYahu 3:4 הלוא מעתה קראתי לי אבי אלוף נערי אתה׃