Mattot-Massei (Hebrew)

B'midbar 30:2(1)* - 36:13
Num 30:1 (30:2) וידבר משׁה אל־ראשׁי המטות לבני ישׂראל לאמר זה הדבר אשׁר צוה יהוה׃
Num 30:2 (30:3) אישׁ כי־ידר נדר ליהוה או־השׁבע שׁבעה לאסר אסר על־נפשׁו לא יחל דברו ככל־היצא מפיו יעשׂה׃
Num 30:3 (30:4) ואשׁה כי־תדר נדר ליהוה ואסרה אסר בבית אביה בנעריה׃
Num 30:4 (30:5) ושׁמע אביה את־נדרה ואסרה אשׁר אסרה על־נפשׁה והחרישׁ לה אביה וקמו כל־נדריה וכל־אסר אשׁר־אסרה על־נפשׁה יקום׃
Num 30:5 (30:6) ואם־הניא אביה אתה ביום שׁמעו כל־נדריה ואסריה אשׁר־אסרה על־נפשׁה לא יקום ויהוה יסלח־לה כי־הניא אביה אתה׃
Num 30:6 (30:7) ואם־היו תהיה לאישׁ ונדריה עליה או מבטא שׂפתיה אשׁר אסרה על־נפשׁה׃
Num 30:7 (30:8) ושׁמע אישׁה ביום שׁמעו והחרישׁ לה וקמו נדריה ואסרה אשׁר־אסרה על־נפשׁה יקמו׃
Num 30:8 (30:9) ואם ביום שׁמע אישׁה יניא אותה והפר את־נדרה אשׁר עליה ואת מבטא שׂפתיה אשׁר אסרה על־נפשׁה ויהוה יסלח־לה׃
Num 30:9 (30:10) ונדר אלמנה וגרושׁה כל אשׁר־אסרה על־נפשׁה יקום עליה׃
Num 30:10 (30:11) ואם־בית אישׁה נדרה או־אסרה אסר על־נפשׁה בשׁבעה׃
Num 30:11 (30:12) ושׁמע אישׁה והחרשׁ לה לא הניא אתה וקמו כל־נדריה וכל־אסר אשׁר־אסרה על־נפשׁה יקום׃
Num 30:12 (30:13) ואם־הפר יפר אתם אישׁה ביום שׁמעו כל־מוצא שׂפתיה לנדריה ולאסר נפשׁה לא יקום אישׁה הפרם ויהוה יסלח־לה׃
Num 30:13 (30:14) כל־נדר וכל־שׁבעת אסר לענת נפשׁ אישׁה יקימנו ואישׁה יפרנו׃
Num 30:14 (30:15) ואם־החרשׁ יחרישׁ לה אישׁה מיום אל־יום והקים את־כל־נדריה או את־כל־אסריה אשׁר עליה הקים אתם כי־החרשׁ לה ביום שׁמעו׃
Num 30:15 (30:16) ואם־הפר יפר אתם אחרי שׁמעו ונשׂא את־עונה׃
Num 30:16 (30:17) אלה החקים אשׁר צוה יהוה את־משׁה בין אישׁ לאשׁתו בין־אב לבתו בנעריה בית אביה׃
Num 31:1 וידבר יהוה אל־משׁה לאמר׃
Num 31:2 נקם נקמת בני ישׂראל מאת המדינים אחר תאסף אל־עמיך׃
Num 31:3 וידבר משׁה אל־העם לאמר החלצו מאתכם אנשׁים לצבא ויהיו על־מדין לתת נקמת־יהוה במדין׃
Num 31:4 אלף למטה אלף למטה לכל מטות ישׂראל תשׁלחו לצבא׃
Num 31:5 וימסרו מאלפי ישׂראל אלף למטה שׁנים־עשׂר אלף חלוצי צבא׃
Num 31:6 וישׁלח אתם משׁה אלף למטה לצבא אתם ואת־פינחס בן־אלעזר הכהן לצבא וכלי הקדשׁ וחצצרות התרועה בידו׃
Num 31:7 ויצבאו על־מדין כאשׁר צוה יהוה את־משׁה ויהרגו כל־זכר׃
Num 31:8 ואת־מלכי מדין הרגו על־חלליהם את־אוי ואת־רקם ואת־צור ואת־חור ואת־רבע חמשׁת מלכי מדין ואת בלעם בן־בעור הרגו בחרב׃
Num 31:9 וישׁבו בני־ישׂראל את־נשׁי מדין ואת־טפם ואת כל־בהמתם ואת־כל־מקנהם ואת־כל־חילם בזזו׃
Num 31:10 ואת כל־עריהם במושׁבתם ואת כל־טירתם שׂרפו באשׁ׃
Num 31:11 ויקחו את־כל־השׁלל ואת כל־המלקוח באדם ובבהמה׃
Num 31:12 ויבאו אל־משׁה ואל־אלעזר הכהן ואל־עדת בני־ישׂראל את־השׁבי ואת־המלקוח ואת־השׁלל אל־המחנה אל־ערבת מואב אשׁר על־ירדן ירחו׃
Num 31:13 ויצאו משׁה ואלעזר הכהן וכל־נשׂיאי העדה לקראתם אל־מחוץ למחנה׃
Num 31:14 ויקצף משׁה על פקודי החיל שׂרי האלפים ושׂרי המאות הבאים מצבא המלחמה׃
Num 31:15 ויאמר אליהם משׁה החייתם כל־נקבה׃
Num 31:16 הן הנה היו לבני ישׂראל בדבר בלעם למסר־מעל ביהוה על־דבר־פעור ותהי המגפה בעדת יהוה׃
Num 31:17 ועתה הרגו כל־זכר בטף וכל־אשׁה ידעת אישׁ למשׁכב זכר הרגו׃
Num 31:18 וכל הטף בנשׁים אשׁר לא־ידעו משׁכב זכר החיו לכם׃
Num 31:19 ואתם חנו מחוץ למחנה שׁבעת ימים כל הרג נפשׁ וכל נגע בחלל תתחטאו ביום השׁלישׁי וביום השׁביעי אתם ושׁביכם׃
Num 31:20 וכל־בגד וכל־כלי־עור וכל־מעשׂה עזים וכל־כלי־עץ תתחטאו׃
Num 31:21 ויאמר אלעזר הכהן אל־אנשׁי הצבא הבאים למלחמה זאת חקת התורה אשׁר־צוה יהוה את־משׁה׃
Num 31:22 אך את־הזהב ואת־הכסף את־הנחשׁת את־הברזל את־הבדיל ואת־העפרת׃
Num 31:23 כל־דבר אשׁר־יבא באשׁ תעבירו באשׁ וטהר אך במי נדה יתחטא וכל אשׁר לא־יבא באשׁ תעבירו במים׃
Num 31:24 וכבסתם בגדיכם ביום השׁביעי וטהרתם ואחר תבאו אל־המחנה׃
Num 31:25 ויאמר יהוה אל־משׁה לאמר׃
Num 31:26 שׂא את ראשׁ מלקוח השׁבי באדם ובבהמה אתה ואלעזר הכהן וראשׁי אבות העדה׃
Num 31:27 וחצית את־המלקוח בין תפשׂי המלחמה היצאים לצבא ובין כל־העדה׃
Num 31:28 והרמת מכס ליהוה מאת אנשׁי המלחמה היצאים לצבא אחד נפשׁ מחמשׁ המאות מן־האדם ומן־הבקר ומן־החמרים ומן־הצאן׃
Num 31:29 ממחציתם תקחו ונתתה לאלעזר הכהן תרומת יהוה׃
Num 31:30 וממחצת בני־ישׂראל תקח אחד אחז מן־החמשׁים מן־האדם מן־הבקר מן־החמרים ומן־הצאן מכל־הבהמה ונתתה אתם ללוים שׁמרי משׁמרת משׁכן יהוה׃
Num 31:31 ויעשׂ משׁה ואלעזר הכהן כאשׁר צוה יהוה את־משׁה׃
Num 31:32 ויהי המלקוח יתר הבז אשׁר בזזו עם הצבא צאן שׁשׁ־מאות אלף ושׁבעים אלף וחמשׁת־אלפים׃
Num 31:33 ובקר שׁנים ושׁבעים אלף׃
Num 31:34 וחמרים אחד ושׁשׁים אלף׃
Num 31:35 ונפשׁ אדם מן־הנשׁים אשׁר לא־ידעו משׁכב זכר כל־נפשׁ שׁנים ושׁלשׁים אלף׃
Num 31:36 ותהי המחצה חלק היצאים בצבא מספר הצאן שׁלשׁ־מאות אלף ושׁלשׁים אלף ושׁבעת אלפים וחמשׁ מאות׃
Num 31:37 ויהי המכס ליהוה מן־הצאן שׁשׁ מאות חמשׁ ושׁבעים׃
Num 31:38 והבקר שׁשׁה ושׁלשׁים אלף ומכסם ליהוה שׁנים ושׁבעים׃
Num 31:39 וחמרים שׁלשׁים אלף וחמשׁ מאות ומכסם ליהוה אחד ושׁשׁים׃
Num 31:40 ונפשׁ אדם שׁשׁה עשׂר אלף ומכסם ליהוה שׁנים ושׁלשׁים נפשׁ׃
Num 31:41 ויתן משׁה את־מכס תרומת יהוה לאלעזר הכהן כאשׁר צוה יהוה את־משׁה׃
Num 31:42 וממחצית בני ישׂראל אשׁר חצה משׁה מן־האנשׁים הצבאים׃
Num 31:43 ותהי מחצת העדה מן־הצאן שׁלשׁ־מאות אלף ושׁלשׁים אלף שׁבעת אלפים וחמשׁ מאות׃
Num 31:44 ובקר שׁשׁה ושׁלשׁים אלף׃
Num 31:45 וחמרים שׁלשׁים אלף וחמשׁ מאות׃
Num 31:46 ונפשׁ אדם שׁשׁה עשׂר אלף׃
Num 31:47 ויקח משׁה ממחצת בני־ישׂראל את־האחז אחד מן־החמשׁים מן־האדם ומן־הבהמה ויתן אתם ללוים שׁמרי משׁמרת משׁכן יהוה כאשׁר צוה יהוה את־משׁה׃
Num 31:48 ויקרבו אל־משׁה הפקדים אשׁר לאלפי הצבא שׂרי האלפים ושׂרי המאות׃
Num 31:49 ויאמרו אל־משׁה עבדיך נשׂאו את־ראשׁ אנשׁי המלחמה אשׁר בידנו ולא־נפקד ממנו אישׁ׃
Num 31:50 ונקרב את־קרבן יהוה אישׁ אשׁר מצא כלי־זהב אצעדה וצמיד טבעת עגיל וכומז לכפר על־נפשׁתינו לפני יהוה׃
Num 31:51 ויקח משׁה ואלעזר הכהן את־הזהב מאתם כל כלי מעשׂה׃
Num 31:52 ויהי כל־זהב התרומה אשׁר הרימו ליהוה שׁשׁה עשׂר אלף שׁבע־מאות וחמשׁים שׁקל מאת שׂרי האלפים ומאת שׂרי המאות׃
Num 31:53 אנשׁי הצבא בזזו אישׁ לו׃
Num 31:54 ויקח משׁה ואלעזר הכהן את־הזהב מאת שׂרי האלפים והמאות ויבאו אתו אל־אהל מועד זכרון לבני־ישׂראל לפני יהוה׃
Num 32:1 ומקנה רב היה לבני ראובן ולבני־גד עצום מאד ויראו את־ארץ יעזר ואת־ארץ גלעד והנה המקום מקום מקנה׃
Num 32:2 ויבאו בני־גד ובני ראובן ויאמרו אל־משׁה ואל־אלעזר הכהן ואל־נשׂיאי העדה לאמר׃
Num 32:3 עטרות ודיבן ויעזר ונמרה וחשׁבון ואלעלה ושׂבם ונבו ובען׃
Num 32:4 הארץ אשׁר הכה יהוה לפני עדת ישׂראל ארץ מקנה הוא ולעבדיך מקנה׃
Num 32:5 ויאמרו אם־מצאנו חן בעיניך יתן את־הארץ הזאת לעבדיך לאחזה אל־תעברנו את־הירדן׃
Num 32:6 ויאמר משׁה לבני־גד ולבני ראובן האחיכם יבאו למלחמה ואתם תשׁבו פה׃
Num 32:7 ולמה תנואון את־לב בני ישׂראל מעבר אל־הארץ אשׁר־נתן להם יהוה׃
Num 32:8 כה עשׂו אבתיכם בשׁלחי אתם מקדשׁ ברנע לראות את־הארץ׃
Num 32:9 ויעלו עד־נחל אשׁכול ויראו את־הארץ ויניאו את־לב בני ישׂראל לבלתי־בא אל־הארץ אשׁר־נתן להם יהוה׃
Num 32:10 ויחר־אף יהוה ביום ההוא וישׁבע לאמר׃
Num 32:11 אם־יראו האנשׁים העלים ממצרים מבן עשׂרים שׁנה ומעלה את האדמה אשׁר נשׁבעתי לאברהם ליצחק וליעקב כי לא־מלאו אחרי׃
Num 32:12 בלתי כלב בן־יפנה הקנזי ויהושׁע בן־נון כי מלאו אחרי יהוה׃
Num 32:13 ויחר־אף יהוה בישׂראל וינעם במדבר ארבעים שׁנה עד־תם כל־הדור העשׂה הרע בעיני יהוה׃
Num 32:14 והנה קמתם תחת אבתיכם תרבות אנשׁים חטאים לספות עוד על חרון אף־יהוה אל־ישׂראל׃
Num 32:15 כי תשׁובן מאחריו ויסף עוד להניחו במדבר ושׁחתם לכל־העם הזה׃
Num 32:16 ויגשׁו אליו ויאמרו גדרת צאן נבנה למקננו פה וערים לטפנו׃
Num 32:17 ואנחנו נחלץ חשׁים לפני בני ישׂראל עד אשׁר אם־הביאנם אל־מקומם וישׁב טפנו בערי המבצר מפני ישׁבי הארץ׃
Num 32:18 לא נשׁוב אל־בתינו עד התנחל בני ישׂראל אישׁ נחלתו׃
Num 32:19 כי לא ננחל אתם מעבר לירדן והלאה כי באה נחלתנו אלינו מעבר הירדן מזרחה׃
Num 32:20 ויאמר אליהם משׁה אם־תעשׂון את־הדבר הזה אם־תחלצו לפני יהוה למלחמה׃
Num 32:21 ועבר לכם כל־חלוץ את־הירדן לפני יהוה עד הורישׁו את־איביו מפניו׃
Num 32:22 ונכבשׁה הארץ לפני יהוה ואחר תשׁבו והייתם נקים מיהוה ומישׂראל והיתה הארץ הזאת לכם לאחזה לפני יהוה׃
Num 32:23 ואם־לא תעשׂון כן הנה חטאתם ליהוה ודעו חטאתכם אשׁר תמצא אתכם׃
Num 32:24 בנו־לכם ערים לטפכם וגדרת לצנאכם והיצא מפיכם תעשׂו׃
Num 32:25 ויאמר בני־גד ובני ראובן אל־משׁה לאמר עבדיך יעשׂו כאשׁר אדני מצוה׃
Num 32:26 טפנו נשׁינו מקננו וכל־בהמתנו יהיו־שׁם בערי הגלעד׃
Num 32:27 ועבדיך יעברו כל־חלוץ צבא לפני יהוה למלחמה כאשׁר אדני דבר׃
Num 32:28 ויצו להם משׁה את אלעזר הכהן ואת יהושׁע בן־נון ואת־ראשׁי אבות המטות לבני ישׂראל׃
Num 32:29 ויאמר משׁה אלהם אם־יעברו בני־גד ובני־ראובן אתכם את־הירדן כל־חלוץ למלחמה לפני יהוה ונכבשׁה הארץ לפניכם ונתתם להם את־ארץ הגלעד לאחזה׃
Num 32:30 ואם־לא יעברו חלוצים אתכם ונאחזו בתככם בארץ כנען׃
Num 32:31 ויענו בני־גד ובני ראובן לאמר את אשׁר דבר יהוה אל־עבדיך כן נעשׂה׃
Num 32:32 נחנו נעבר חלוצים לפני יהוה ארץ כנען ואתנו אחזת נחלתנו מעבר לירדן׃
Num 32:33 ויתן להם משׁה לבני־גד ולבני ראובן ולחצי שׁבט מנשׁה בן־יוסף את־ממלכת סיחן מלך האמרי ואת־ממלכת עוג מלך הבשׁן הארץ לעריה בגבלת ערי הארץ סביב׃
Num 32:34 ויבנו בני־גד את־דיבן ואת־עטרת ואת ערער׃
Num 32:35 ואת־עטרת שׁופן ואת־יעזר ויגבהה׃
Num 32:36 ואת־בית נמרה ואת־בית הרן ערי מבצר וגדרת צאן׃
Num 32:37 ובני ראובן בנו את־חשׁבון ואת־אלעלא ואת קריתים׃
Num 32:38 ואת־נבו ואת־בעל מעון מוסבת שׁם ואת־שׂבמה ויקראו בשׁמת את־שׁמות הערים אשׁר בנו׃
Num 32:39 וילכו בני מכיר בן־מנשׁה גלעדה וילכדה ויורשׁ את־האמרי אשׁר־בה׃
Num 32:40 ויתן משׁה את־הגלעד למכיר בן־מנשׁה וישׁב בה׃
Num 32:41 ויאיר בן־מנשׁה הלך וילכד את־חותיהם ויקרא אתהן חות יאיר׃
Num 32:42 ונבח הלך וילכד את־קנת ואת־בנתיה ויקרא לה נבח בשׁמו׃
Num 33:1 אלה מסעי בני־ישׂראל אשׁר יצאו מארץ מצרים לצבאתם ביד־משׁה ואהרן׃
Num 33:2 ויכתב משׁה את־מוצאיהם למסעיהם על־פי יהוה ואלה מסעיהם למוצאיהם׃
Num 33:3 ויסעו מרעמסס בחדשׁ הראשׁון בחמשׁה עשׂר יום לחדשׁ הראשׁון ממחרת הפסח יצאו בני־ישׂראל ביד רמה לעיני כל־מצרים׃
Num 33:4 ומצרים מקברים את אשׁר הכה יהוה בהם כל־בכור ובאלהיהם עשׂה יהוה שׁפטים׃
Num 33:5 ויסעו בני־ישׂראל מרעמסס ויחנו בסכת׃
Num 33:6 ויסעו מסכת ויחנו באתם אשׁר בקצה המדבר׃
Num 33:7 ויסעו מאתם וישׁב על־פי החירת אשׁר על־פני בעל צפון ויחנו לפני מגדל׃
Num 33:8 ויסעו מפני החירת ויעברו בתוך־הים המדברה וילכו דרך שׁלשׁת ימים במדבר אתם ויחנו במרה׃
Num 33:9 ויסעו ממרה ויבאו אילמה ובאילם שׁתים עשׂרה עינת מים ושׁבעים תמרים ויחנו־שׁם׃
Num 33:10 ויסעו מאילם ויחנו על־ים־סוף׃
Num 33:11 ויסעו מים־סוף ויחנו במדבר־סין׃
Num 33:12 ויסעו ממדבר־סין ויחנו בדפקה׃
Num 33:13 ויסעו מדפקה ויחנו באלושׁ׃
Num 33:14 ויסעו מאלושׁ ויחנו ברפידם ולא־היה שׁם מים לעם לשׁתות׃
Num 33:15 ויסעו מרפידם ויחנו במדבר סיני׃
Num 33:16 ויסעו ממדבר סיני ויחנו בקברת התאוה׃
Num 33:17 ויסעו מקברת התאוה ויחנו בחצרת׃
Num 33:18 ויסעו מחצרת ויחנו ברתמה׃
Num 33:19 ויסעו מרתמה ויחנו ברמן פרץ׃
Num 33:20 ויסעו מרמן פרץ ויחנו בלבנה׃
Num 33:21 ויסעו מלבנה ויחנו ברסה׃
Num 33:22 ויסעו מרסה ויחנו בקהלתה׃
Num 33:23 ויסעו מקהלתה ויחנו בהר־שׁפר׃
Num 33:24 ויסעו מהר־שׁפר ויחנו בחרדה׃
Num 33:25 ויסעו מחרדה ויחנו במקהלת׃
Num 33:26 ויסעו ממקהלת ויחנו בתחת׃
Num 33:27 ויסעו מתחת ויחנו בתרח׃
Num 33:28 ויסעו מתרח ויחנו במתקה׃
Num 33:29 ויסעו ממתקה ויחנו בחשׁמנה׃
Num 33:30 ויסעו מחשׁמנה ויחנו במסרות׃
Num 33:31 ויסעו ממסרות ויחנו בבני יעקן׃
Num 33:32 ויסעו מבני יעקן ויחנו בחר הגדגד׃
Num 33:33 ויסעו מחר הגדגד ויחנו ביטבתה׃
Num 33:34 ויסעו מיטבתה ויחנו בעברנה׃
Num 33:35 ויסעו מעברנה ויחנו בעצין גבר׃
Num 33:36 ויסעו מעצין גבר ויחנו במדבר־צן הוא קדשׁ׃
Num 33:37 ויסעו מקדשׁ ויחנו בהר ההר בקצה ארץ אדום׃
Num 33:38 ויעל אהרן הכהן אל־הר ההר על־פי יהוה וימת שׁם בשׁנת הארבעים לצאת בני־ישׂראל מארץ מצרים בחדשׁ החמישׁי באחד לחדשׁ׃
Num 33:39 ואהרן בן־שׁלשׁ ועשׂרים ומאת שׁנה במתו בהר ההר׃
Num 33:40 וישׁמע הכנעני מלך ערד והוא־ישׁב בנגב בארץ כנען בבא בני ישׂראל׃
Num 33:41 ויסעו מהר ההר ויחנו בצלמנה׃
Num 33:42 ויסעו מצלמנה ויחנו בפונן׃
Num 33:43 ויסעו מפונן ויחנו באבת׃
Num 33:44 ויסעו מאבת ויחנו בעיי העברים בגבול מואב׃
Num 33:45 ויסעו מעיים ויחנו בדיבן גד׃
Num 33:46 ויסעו מדיבן גד ויחנו בעלמן דבלתימה׃
Num 33:47 ויסעו מעלמן דבלתימה ויחנו בהרי העברים לפני נבו׃
Num 33:48 ויסעו מהרי העברים ויחנו בערבת מואב על ירדן ירחו׃
Num 33:49 ויחנו על־הירדן מבית הישׁמת עד אבל השׁטים בערבת מואב׃
Num 33:50 וידבר יהוה אל־משׁה בערבת מואב על־ירדן ירחו לאמר׃
Num 33:51 דבר אל־בני ישׂראל ואמרת אלהם כי אתם עברים את־הירדן אל־ארץ כנען׃
Num 33:52 והורשׁתם את־כל־ישׁבי הארץ מפניכם ואבדתם את כל־משׂכיתם ואת כל־צלמי מסכתם תאבדו ואת כל־במותם תשׁמידו׃
Num 33:53 והורשׁתם את־הארץ וישׁבתם־בה כי לכם נתתי את־הארץ לרשׁת אתה׃
Num 33:54 והתנחלתם את־הארץ בגורל למשׁפחתיכם לרב תרבו את־נחלתו ולמעט תמעיט את־נחלתו אל אשׁר־יצא לו שׁמה הגורל לו יהיה למטות אבתיכם תתנחלו׃
Num 33:55 ואם־לא תורישׁו את־ישׁבי הארץ מפניכם והיה אשׁר תותירו מהם לשׂכים בעיניכם ולצנינם בצדיכם וצררו אתכם על־הארץ אשׁר אתם ישׁבים בה׃
Num 33:56 והיה כאשׁר דמיתי לעשׂות להם אעשׂה לכם׃
Num 34:1 וידבר יהוה אל־משׁה לאמר׃
Num 34:2 צו את־בני ישׂראל ואמרת אלהם כי־אתם באים אל־הארץ כנען זאת הארץ אשׁר תפל לכם בנחלה ארץ כנען לגבלתיה׃
Num 34:3 והיה לכם פאת־נגב ממדבר־צן על־ידי אדום והיה לכם גבול נגב מקצה ים־המלח קדמה׃
Num 34:4 ונסב לכם הגבול מנגב למעלה עקרבים ועבר צנה והיה תוצאתיו מנגב לקדשׁ ברנע ויצא חצר־אדר ועבר עצמנה׃
Num 34:5 ונסב הגבול מעצמון נחלה מצרים והיו תוצאתיו הימה׃
Num 34:6 וגבול ים והיה לכם הים הגדול וגבול זה־יהיה לכם גבול ים׃
Num 34:7 וזה־יהיה לכם גבול צפון מן־הים הגדל תתאו לכם הר ההר׃
Num 34:8 מהר ההר תתאו לבא חמת והיו תוצאת הגבל צדדה׃
Num 34:9 ויצא הגבל זפרנה והיו תוצאתיו חצר עינן זה־יהיה לכם גבול צפון׃
Num 34:10 והתאויתם לכם לגבול קדמה מחצר עינן שׁפמה׃
Num 34:11 וירד הגבל משׁפם הרבלה מקדם לעין וירד הגבל ומחה על־כתף ים־כנרת קדמה׃
Num 34:12 וירד הגבול הירדנה והיו תוצאתיו ים המלח זאת תהיה לכם הארץ לגבלתיה סביב׃
Num 34:13 ויצו משׁה את־בני ישׂראל לאמר זאת הארץ אשׁר תתנחלו אתה בגורל אשׁר צוה יהוה לתת לתשׁעת המטות וחצי המטה׃
Num 34:14 כי לקחו מטה בני הראובני לבית אבתם ומטה בני־הגדי לבית אבתם וחצי מטה מנשׁה לקחו נחלתם׃
Num 34:15 שׁני המטות וחצי המטה לקחו נחלתם מעבר לירדן ירחו קדמה מזרחה׃
Num 34:16 וידבר יהוה אל־משׁה לאמר׃
Num 34:17 אלה שׁמות האנשׁים אשׁר־ינחלו לכם את־הארץ אלעזר הכהן ויהושׁע בן־נון׃
Num 34:18 ונשׂיא אחד נשׂיא אחד ממטה תקחו לנחל את־הארץ׃
Num 34:19 ואלה שׁמות האנשׁים למטה יהודה כלב בן־יפנה׃
Num 34:20 ולמטה בני שׁמעון שׁמואל בן־עמיהוד׃
Num 34:21 למטה בנימן אלידד בן־כסלון׃
Num 34:22 ולמטה בני־דן נשׂיא בקי בן־יגלי׃
Num 34:23 לבני יוסף למטה בני־מנשׁה נשׂיא חניאל בן־אפד׃
Num 34:24 ולמטה בני־אפרים נשׂיא קמואל בן־שׁפטן׃
Num 34:25 ולמטה בני־זבולן נשׂיא אליצפן בן־פרנך׃
Num 34:26 ולמטה בני־ישׂשכר נשׂיא פלטיאל בן־עזן׃
Num 34:27 ולמטה בני־אשׁר נשׂיא אחיהוד בן־שׁלמי׃
Num 34:28 ולמטה בני־נפתלי נשׂיא פדהאל בן־עמיהוד׃
Num 34:29 אלה אשׁר צוה יהוה לנחל את־בני־ישׂראל בארץ כנען׃
Num 35:1 וידבר יהוה אל־משׁה בערבת מואב על־ירדן ירחו לאמר׃
Num 35:2 צו את־בני ישׂראל ונתנו ללוים מנחלת אחזתם ערים לשׁבת ומגרשׁ לערים סביבתיהם תתנו ללוים׃
Num 35:3 והיו הערים להם לשׁבת ומגרשׁיהם יהיו לבהמתם ולרכשׁם ולכל חיתם׃
Num 35:4 ומגרשׁי הערים אשׁר תתנו ללוים מקיר העיר וחוצה אלף אמה סביב׃
Num 35:5 ומדתם מחוץ לעיר את־פאת־קדמה אלפים באמה ואת־פאת־נגב אלפים באמה ואת־פאת־ים אלפים באמה ואת פאת צפון אלפים באמה והעיר בתוך זה יהיה להם מגרשׁי הערים׃
Num 35:6 ואת הערים אשׁר תתנו ללוים את שׁשׁ־ערי המקלט אשׁר תתנו לנס שׁמה הרצח ועליהם תתנו ארבעים ושׁתים עיר׃
Num 35:7 כל־הערים אשׁר תתנו ללוים ארבעים ושׁמנה עיר אתהן ואת־מגרשׁיהן׃
Num 35:8 והערים אשׁר תתנו מאחזת בני־ישׂראל מאת הרב תרבו ומאת המעט תמעיטו אישׁ כפי נחלתו אשׁר ינחלו יתן מעריו ללוים׃
Num 35:9 וידבר יהוה אל־משׁה לאמר׃
Num 35:10 דבר אל־בני ישׂראל ואמרת אלהם כי אתם עברים את־הירדן ארצה כנען׃
Num 35:11 והקריתם לכם ערים ערי מקלט תהיינה לכם ונס שׁמה רצח מכה־נפשׁ בשׁגגה׃
Num 35:12 והיו לכם הערים למקלט מגאל ולא ימות הרצח עד־עמדו לפני העדה למשׁפט׃
Num 35:13 והערים אשׁר תתנו שׁשׁ־ערי מקלט תהיינה לכם׃
Num 35:14 את שׁלשׁ הערים תתנו מעבר לירדן ואת שׁלשׁ הערים תתנו בארץ כנען ערי מקלט תהיינה׃
Num 35:15 לבני ישׂראל ולגר ולתושׁב בתוכם תהיינה שׁשׁ־הערים האלה למקלט לנוס שׁמה כל־מכה־נפשׁ בשׁגגה׃
Num 35:16 ואם־בכלי ברזל הכהו וימת רצח הוא מות יומת הרצח׃
Num 35:17 ואם באבן יד אשׁר־ימות בה הכהו וימת רצח הוא מות יומת הרצח׃
Num 35:18 או בכלי עץ־יד אשׁר־ימות בו הכהו וימת רצח הוא מות יומת הרצח׃
Num 35:19 גאל הדם הוא ימית את־הרצח בפגעו־בו הוא ימתנו׃
Num 35:20 ואם־בשׂנאה יהדפנו או־השׁליך עליו בצדיה וימת׃
Num 35:21 או באיבה הכהו בידו וימת מות־יומת המכה רצח הוא גאל הדם ימית את־הרצח בפגעו־בו׃
Num 35:22 ואם־בפתע בלא־איבה הדפו או־השׁליך עליו כל־כלי בלא צדיה׃
Num 35:23 או בכל־אבן אשׁר־ימות בה בלא ראות ויפל עליו וימת והוא לא־אויב לו ולא מבקשׁ רעתו׃
Num 35:24 ושׁפטו העדה בין המכה ובין גאל הדם על המשׁפטים האלה׃
Num 35:25 והצילו העדה את־הרצח מיד גאל הדם והשׁיבו אתו העדה אל־עיר מקלטו אשׁר־נס שׁמה וישׁב בה עד־מות הכהן הגדל אשׁר־משׁח אתו בשׁמן הקדשׁ׃
Num 35:26 ואם־יצא יצא הרצח את־גבול עיר מקלטו אשׁר ינוס שׁמה׃
Num 35:27 ומצא אתו גאל הדם מחוץ לגבול עיר מקלטו ורצח גאל הדם את־הרצח אין לו דם׃
Num 35:28 כי בעיר מקלטו ישׁב עד־מות הכהן הגדל ואחרי מות הכהן הגדל ישׁוב הרצח אל־ארץ אחזתו׃
Num 35:29 והיו אלה לכם לחקת משׁפט לדרתיכם בכל מושׁבתיכם׃
Num 35:30 כל־מכה־נפשׁ לפי עדים ירצח את־הרצח ועד אחד לא־יענה בנפשׁ למות׃
Num 35:31 ולא־תקחו כפר לנפשׁ רצח אשׁר־הוא רשׁע למות כי־מות יומת׃
Num 35:32 ולא־תקחו כפר לנוס אל־עיר מקלטו לשׁוב לשׁבת בארץ עד־מות הכהן׃
Num 35:33 ולא־תחניפו את־הארץ אשׁר אתם בה כי הדם הוא יחניף את־הארץ ולארץ לא־יכפר לדם אשׁר שׁפך־בה כי־אם בדם שׁפכו׃
Num 35:34 ולא תטמא את־הארץ אשׁר אתם ישׁבים בה אשׁר אני שׁכן בתוכה כי אני יהוה שׁכן בתוך בני ישׂראל׃
Num 36:1 ויקרבו ראשׁי האבות למשׁפחת בני־גלעד בן־מכיר בן־מנשׁה ממשׁפחת בני יוסף וידברו לפני משׁה ולפני הנשׂאים ראשׁי אבות לבני ישׂראל׃
Num 36:2 ויאמרו את־אדני צוה יהוה לתת את־הארץ בנחלה בגורל לבני ישׂראל ואדני צוה ביהוה לתת את־נחלת צלפחד אחינו לבנתיו׃
Num 36:3 והיו לאחד מבני שׁבטי בני־ישׂראל לנשׁים ונגרעה נחלתן מנחלת אבתינו ונוסף על נחלת המטה אשׁר תהיינה להם ומגרל נחלתנו יגרע׃
Num 36:4 ואם־יהיה היבל לבני ישׂראל ונוספה נחלתן על נחלת המטה אשׁר תהיינה להם ומנחלת מטה אבתינו יגרע נחלתן׃
Num 36:5 ויצו משׁה את־בני ישׂראל על־פי יהוה לאמר כן מטה בני־יוסף דברים׃
Num 36:6 זה הדבר אשׁר־צוה יהוה לבנות צלפחד לאמר לטוב בעיניהם תהיינה לנשׁים אך למשׁפחת מטה אביהם תהיינה לנשׁים׃
Num 36:7 ולא־תסב נחלה לבני ישׂראל ממטה אל־מטה כי אישׁ בנחלת מטה אבתיו ידבקו בני ישׂראל׃
Num 36:8 וכל־בת ירשׁת נחלה ממטות בני ישׂראל לאחד ממשׁפחת מטה אביה תהיה לאשׁה למען יירשׁו בני ישׂראל אישׁ נחלת אבתיו׃
Num 36:9 ולא־תסב נחלה ממטה למטה אחר כי־אישׁ בנחלתו ידבקו מטות בני ישׂראל׃
Num 36:10 כאשׁר צוה יהוה את־משׁה כן עשׂו בנות צלפחד׃
Num 36:11 ותהיינה מחלה תרצה וחגלה ומלכה ונעה בנות צלפחד לבני דדיהן לנשׁים׃
Num 36:12 ממשׁפחת בני־מנשׁה בן־יוסף היו לנשׁים ותהי נחלתן על־מטה משׁפחת אביהן׃
Num 36:13 אלה המצות והמשׁפטים אשׁר צוה יהוה ביד־משׁה אל־בני ישׂראל בערבת מואב על ירדן ירחו׃