Pinchas Gospel (Hebrew)

Yochanan 15-17
Yochanan 15:1 אנכי הגפן האמתית ואבי הוא הכרם׃
Yochanan 15:2 כל־שריג בי אשר איננו עשה־פרי יסירנו ואשר יעשה פרי יטהרנו להרבות את־פריו׃
Yochanan 15:3 אתם כבר מטהרים בעבור דברי אשר דברתי אליכם׃
Yochanan 15:4 עמדו־בי ואני בכם כאשר השריג בל־יעשה פרי מאליו אם־לא יעמד בגפן כן גם־אתם אם־לא תעמדו בי׃
Yochanan 15:5 אנכי הוא הגפן ואתם השריגים העמד בי ואני בו הוא יעשה־פרי לרב כי בלעדי לא תוכלון עשות דבר׃
Yochanan 15:6 איש אשר לא יעמד בי השלך החוצה כשריג וייבש וילקטום וישליכום אל־תוך האש והיה לבער׃
Yochanan 15:7 אם־תעמדו בי ודברי יהיו בכם ככל־מה־שחפצתם אז תשאלו ויעשה לכם׃
Yochanan 15:8 בזאת נכבד אבי בעשותכם פרי לרב והייתם לי לתלמידים׃
Yochanan 15:9 כאשר אהבני אבי אהבתי אתכם גם־אני ואתם עמדו באהבתי׃
Yochanan 15:10 אם־תשמרו את־מצותי תעמדו באהבתי כאשר שמרתי גם־אני את־מצות אבי ועמדתי באהבתו׃
Yochanan 15:11 את־אלה דברתי אליכם בעבור תשכן שמחתי בכם ותהיה שמחתכם שלמה׃
Yochanan 15:12 הנה־זאת מצותי אשר תההבון איש את־אחיו כאשר אהבתיכם׃
Yochanan 15:13 אין אהבה רבה מאהבת הנותן נפשו בעד ידידיו׃
Yochanan 15:14 ואתם אם־תעשו את אשר־אני מצוה אתכם ידידי אתם׃
Yochanan 15:15 לא־אקרא לכם עוד עבדים כי העבד איננו ידע את־אשר יעשה אדניו ואמרתי ידידי אתם כי כל־אשר שמעתי מאת אבי הודעתי אתכם׃
Yochanan 15:16 לא אתם בחרתם בי כי אם־אנכי בחרתי בכם והפקדתי אתכם ללכת ולעשות פרי ופריכם יקום והיה כל אשר תשאלו מאבי בשמי יתן לכם׃
Yochanan 15:17 את־אלה אנכי מצוה אתכם למען תאהבון איש את־אחיו׃
Yochanan 15:18 אם־העולם שנא אתכם דעו כי אתי שנא ראשונה׃
Yochanan 15:19 אלו מן־העולם הייתם היה העולם אהב את אשר־לו ויען כי־אינכם מן־העולם כי אם־בחרתי אתכם מן־העולם לכן העולם ישנא אתכם׃
Yochanan 15:20 זככו את־דברי אשר דברתי אליכם לאמר לא גדול העבד מאדניו אם־רדפו אתי גם־אתכם ירדפו אם־שמרו את־דברי גם את־דברכם ישמרו׃
Yochanan 15:21 אבל כל־זאת יעשו לכם בעבור שמי כי לא־ידעו את־שלחי׃
Yochanan 15:22 לולא באתי ודברתי אליכם לא־היה בהם חטא ועתה לא יוכלון להתנצל על־חטאתם׃
Yochanan 15:23 השנא אתי ישנא גם־את־אבי׃
Yochanan 15:24 לולא עשיתי בתוכם את־המעשים אשר לא עשה איש אחר לא־היה בהם חטא ועתה ראו וישנאו גם־אתי גם־את־אבי׃
Yochanan 15:25 אך למלאת דבר־הכתוב בתורתם שנאת חנם שנאוני׃
Yochanan 15:26 ובבוא הפרקליט אשר אשלח לכם מאת אבי רוח האמת היוצא מאת אבי הוא יעיד עלי׃
Yochanan 15:27 וגם־אתם תעידו כי מראש הייתם עמדי׃
Yochanan 16:1 את אלה דברתי אליכם למען לא תכשלו׃
Yochanan 16:2 הנה ינדו אתכם ואף באה שעה אשר כל־הרג אתכם ידמה לעשות עבודה לאלהים׃
Yochanan 16:3 ואת־אלה יעשו לכם יען גם־את־אבי וגם־אתי לא ידעו׃
Yochanan 16:4 אבל הגדתי לכם את־אלה למען אשר־תזכרו בבא השעה כי אנכי דברתי אליכם ומראש לא־דברתי אליכם כאלה כי הייתי עמכם׃
Yochanan 16:5 ועתה הלך אנכי אל־שלחי ולא ישאלני איש מכם אנה תלך׃
Yochanan 16:6 ועצבת מלאה לבבכם על־דברי את־אלה אליכם׃
Yochanan 16:7 אולם אמת אגיד לכם כי לכתי אך־טוב לכם כי אם־לא אלך לא־יבא אליכם הפרקליט ואם־הלכתי אשלחהו אליכם׃
Yochanan 16:8 והיה כי־יבא והוכיח את־העולם על־דבר החטא והצדק והמשפט׃
Yochanan 16:9 על־החטא כי לא־האמינו בי׃
Yochanan 16:10 ועל־הצדק כי אלך אל־אבי ולא תוסיפו לראות אתי׃
Yochanan 16:11 ועל־המשפט כי נדון שר העולם הזה׃
Yochanan 16:12 עוד רבות לי להגיד לכם אך לא־תוכלון שאת עתה׃
Yochanan 16:13 ורוח האמת בבאו הוא ידריך אתכם אל־האמת כלה כי לא ידבר מעצמו כי אם־אשר ישמע ידבר והאתיות יגיד לכם׃
Yochanan 16:14 הוא יפארני כי משלי יקח ויגיד לכם׃
Yochanan 16:15 כל אשר לאבי לי הוא על־כן אמרתי כי משלי יקח ויגיד לכם׃
Yochanan 16:16 הן־מעט ולא תראוני ועוד־מעט ותחזוני (כי־אני הלך אל־אבי)׃
Yochanan 16:17 ומקצת תלמידיו נדברו איש אל־אחיו לאמר מה אמרו אלינו הן־מעט ולא תראוני ועוד־מעט ותחזוני ואמרו אני הלך אל־אבי׃
Yochanan 16:18 ויאמרו מה אמרו מעט לא ידענו מה־דבר׃
Yochanan 16:19 וידע ישוע כי עם־לבבם לשאל אתו ויאמר אליהם העל הדבר הזה תדרשו זה את־זה כי אמרתי הן־מעט ולא תראוני ועוד־מעט ותחזוני׃
Yochanan 16:20 אמן אמן אני אמר לכם כי אתם תבכו ותילילו והעולם ישמח הן־אתם תעצבו אכן עצבכם יהפך לששון׃
Yochanan 16:21 האשה כי תקריב ללדת עצב לה כי מלאו ימיה ואחרי לדתה את־הילד לא־תזכר עוד את־עצבונה והיא שמחה כי־אדם נולד לעולם׃
Yochanan 16:22 וגם־אתם כעת תתעצבו ואני אשוב אראה אתכם ושש לבכם ואין־מסיר שמחתכם מכם׃
Yochanan 16:23 וביום ההוא לא תשאלוני דבר אמן אמן אני אמר לכם כי כל־אשר תשאלו מאת אבי בשמי יתן לכם׃
Yochanan 16:24 עד־עתה לא־שאלתם דבר בשמי שאלו ותקחו למען תמלא שמחתכם׃
Yochanan 16:25 את־אלה דברתי אליכם במשלים והנה שעה באה ולא אדבר עוד אליכם במשלים כי אם־ברור אדבר לכם על־דבר אבי׃
Yochanan 16:26 ביום ההוא תשאלו בשמי ואינני אמר לכם אשר אני אעתיר לאבי בעדכם׃
Yochanan 16:27 כי־אבי גם־הוא אהב אתכם עקב אשר אהבתוני והאמנתם כי־מאת אלהים יצאתי׃
Yochanan 16:28 מאת האב יצאתי ואבא לעולם אשובה אסור מן־העולם ואלך אל־אבי׃
Yochanan 16:29 ויאמרו אליו תלמידיו הנה כעת ברור תמלל ולא תמשל משל׃
Yochanan 16:30 עתה ידענו כי־כל ידעת ולא תצטרך אשר ישאלך איש בזאת נאמין כי מאת אלהים יצאת׃
Yochanan 16:31 ויען ישוע ויאמר אליהם עתה תאמינו׃
Yochanan 16:32 הנה שעה באה ועתה זה הגיעה ונפצותם איש לביתו ואתי תעזבו לבדי ואינני לבדי כי אבי עמדי׃
Yochanan 16:33 את־אלה דברתי אליכם למען יהיה־לכם שלום בי צרה לכם בעולם אך־יאמץ לבבכם אני נצחתי את־העולם׃
Yochanan 17:1 את־אלה דבר ישוע וישא עיניו השמימה ויאמר אבי הנה־באה השעה פאר את־בנך למען יפארך גם־בנך׃
Yochanan 17:2 כאשר נתת לו השלטן על־כל־בשר למען יתן חיי עולם לכל אשר־נתת לו׃
Yochanan 17:3 ואלה הם חיי העולם לדעת אתך כי אתה האלהים לבדך ואת־ישוע המשיח אשר שלחת׃
Yochanan 17:4 אני פארתיך בארץ כליתי מלאכתך אשר צויתני לעשות׃
Yochanan 17:5 ועתה פארני אתה אבי עמך בכבוד אשר היה־לי עמך טרם היות העולם׃
Yochanan 17:6 את שמך הודעתי לבני האדם אשר נתת לי מתוך העולם לך היו ולי נתת אתם ואת־דברך נצרו׃
Yochanan 17:7 ועתה ידעו כי־כל אשר נתת לי מעמך הוא׃
Yochanan 17:8 כי הדברים אשר נתת לי נתתי להם והם קבלום ויכירו באמת כי מעמך יצאתי ויאמינו כי אתה שלחתני׃
Yochanan 17:9 אני בעדם אעתיר לך לא בעד העולם אעתיר כי אם־בעד אלה אשר נתת לי כי־לך המה׃
Yochanan 17:10 וכל־אשר לי לך הוא ושלך שלי ונתפארתי בהם׃
Yochanan 17:11 ואני אינני עוד בעולם והם בעולם המה ואני בא אליך אבי הקדוש נצר אתם בשמך את־אשר נתת לי למען יהיו אחד כמנו׃
Yochanan 17:12 בהיותי עמהם בעולם אני נצרתי אתם בשמך את־אשר נתתם לי שמרתי ולא־אבד מהם איש זולתי בן־האבדון למלאת דבר הכתוב׃
Yochanan 17:13 ועתה הנני בא אליך ואת־אלה אני מדבר בעולם למען תמלא להם שמחתי בקרבם׃
Yochanan 17:14 אני נתתי להם את־דברך והעולם שנא אתם יען כי לא מן־העולם הם כאשר גם־אנכי לא מן־העולם אני׃
Yochanan 17:15 ולא אעתיר לך אשר תקחם מן־העולם רק שתצרם מן־הרע׃
Yochanan 17:16 לא מן־העולם הם כאשר גם־אנכי אינני מן־העולם׃
Yochanan 17:17 קדש אתם באמתך דברך אמת׃
Yochanan 17:18 כאשר אתה שלחת אתי אל־העולם כן גם־אני שלחתי אתם אל־העולם׃
Yochanan 17:19 ואני מקדיש את־נפשי בעדם למען יהיו גם־הם מקדשים באמת׃
Yochanan 17:20 אולם לא לבד בעד־אלה אנכי מעתיר לך כי אם־גם־בעד המאמינים בי על־פי דברם׃
Yochanan 17:21 למען יהיו כלם אחד כאשר אתה אבי בי אתה ואני בך והיו גם־המה בנו כאחד למען יאמין העולם כי אתה שלחתני׃
Yochanan 17:22 ואני נתתי להם את־הכבוד אשר נתת לי למען יהיו אחד כאשר אנחנו אחד׃
Yochanan 17:23 אני בהם ואתה בי למען יהיו משלמים לאחד ולמען ידע העולם כי אתה שלחתני ואהבת אתם כאשר אהבתני׃
Yochanan 17:24 אבי אשר נתתם לי רצוני שיהיו עמדי באשר אהיה אני למען יחזו בכבודי אשר נתת לי כי אהבתני לפני מוסדות עולם׃
Yochanan 17:25 אבי הצדיק הן העולם לא ידעך ואני ידעתיך ואלה הכירו אשר אתה שלחתני׃
Yochanan 17:26 ואני הודעתים את־שמך ואוסיף להודיעם למען תהיה־בם האהבה אשר אהבתני וגם אני אהיה בהם׃