Pinchas Haftarah (Hebrew)

Melachim Alef 18:46-19:21
1Ki 18:46 ויד־יהוה היתה אל־אליהו וישׁנס מתניו וירץ לפני אחאב עד־באכה יזרעאלה׃
1Ki 19:1 ויגד אחאב לאיזבל את כל־אשׁר עשׂה אליהו ואת כל־אשׁר הרג את־כל־הנביאים בחרב׃
1Ki 19:2 ותשׁלח איזבל מלאך אל־אליהו לאמר כה־יעשׂון אלהים וכה יוספון כי־כעת מחר אשׂים את־נפשׁך כנפשׁ אחד מהם׃
1Ki 19:3 וירא ויקם וילך אל־נפשׁו ויבא באר שׁבע אשׁר ליהודה וינח את־נערו שׁם׃
1Ki 19:4 והוא־הלך במדבר דרך יום ויבא וישׁב תחת רתם אחת וישׁאל את־נפשׁו למות ויאמר רב עתה יהוה קח נפשׁי כי־לא־טוב אנכי מאבתי׃
1Ki 19:5 וישׁכב ויישׁן תחת רתם אחד והנה־זה מלאך נגע בו ויאמר לו קום אכול׃
1Ki 19:6 ויבט והנה מראשׁתיו עגת רצפים וצפחת מים ויאכל וישׁת וישׁב וישׁכב׃
1Ki 19:7 וישׁב מלאך יהוה שׁנית ויגע־בו ויאמר קום אכל כי רב ממך הדרך׃
1Ki 19:8 ויקם ויאכל וישׁתה וילך בכח האכילה ההיא ארבעים יום וארבעים לילה עד הר האלהים חרב׃
1Ki 19:9 ויבא־שׁם אל־המערה וילן שׁם והנה דבר־יהוה אליו ויאמר לו מה־לך פה אליהו׃
1Ki 19:10 ויאמר קנא קנאתי ליהוה אלהי צבאות כי־עזבו בריתך בני ישׂראל את־מזבחתיך הרסו ואת־נביאיך הרגו בחרב ואותר אני לבדי ויבקשׁו את־נפשׁי לקחתה׃
1Ki 19:11 ויאמר צא ועמדת בהר לפני יהוה והנה יהוה עבר ורוח גדולה וחזק מפרק הרים ומשׁבר סלעים לפני יהוה לא ברוח יהוה ואחר הרוח רעשׁ לא ברעשׁ יהוה׃
1Ki 19:12 ואחר הרעשׁ אשׁ לא באשׁ יהוה ואחר האשׁ קול דממה דקה׃
1Ki 19:13 ויהי כשׁמע אליהו וילט פניו באדרתו ויצא ויעמד פתח המערה והנה אליו קול ויאמר מה־לך פה אליהו׃
1Ki 19:14 ויאמר קנא קנאתי ליהוה אלהי צבאות כי־עזבו בריתך בני ישׂראל את־מזבחתיך הרסו ואת־נביאיך הרגו בחרב ואותר אני לבדי ויבקשׁו את־נפשׁי לקחתה׃
1Ki 19:15 ויאמר יהוה אליו לך שׁוב לדרכך מדברה דמשׂק ובאת ומשׁחת את־חזאל למלך על־ארם׃
1Ki 19:16 ואת יהוא בן־נמשׁי תמשׁח למלך על־ישׂראל ואת־אלישׁע בן־שׁפט מאבל מחולה תמשׁח לנביא תחתיך׃
1Ki 19:17 והיה הנמלט מחרב חזאל ימית יהוא והנמלט מחרב יהוא ימית אלישׁע׃
1Ki 19:18 והשׁארתי בישׂראל שׁבעת אלפים כל־הברכים אשׁר לא־כרעו לבעל וכל־הפה אשׁר לא־נשׁק לו׃
1Ki 19:19 וילך משׁם וימצא את־אלישׁע בן־שׁפט והוא חרשׁ שׁנים־עשׂר צמדים לפניו והוא בשׁנים העשׂר ויעבר אליהו אליו וישׁלך אדרתו אליו׃
1Ki 19:20 ויעזב את־הבקר וירץ אחרי אליהו ויאמר אשׁקה־נא לאבי ולאמי ואלכה אחריך ויאמר לו לך שׁוב כי מה־עשׂיתי לך׃
1Ki 19:21 וישׁב מאחריו ויקח את־צמד הבקר ויזבחהו ובכלי הבקר בשׁלם הבשׂר ויתן לעם ויאכלו ויקם וילך אחרי אליהו וישׁרתהו׃