Pinchas (Hebrew)

Num 25:10 וידבר יהוה אל־משׁה לאמר׃
Num 25:11 פינחס בן־אלעזר בן־אהרן הכהן השׁיב את־חמתי מעל בני־ישׂראל בקנאו את־קנאתי בתוכם ולא־כליתי את־בני־ישׂראל בקנאתי׃
Num 25:12 לכן אמר הנני נתן לו את־בריתי שׁלום׃
Num 25:13 והיתה לו ולזרעו אחריו ברית כהנת עולם תחת אשׁר קנא לאלהיו ויכפר על־בני ישׂראל׃
Num 25:14 ושׁם אישׁ ישׂראל המכה אשׁר הכה את־המדינית זמרי בן־סלוא נשׂיא בית־אב לשׁמעני׃
Num 25:15 ושׁם האשׁה המכה המדינית כזבי בת־צור ראשׁ אמות בית־אב במדין הוא׃
Num 25:16 וידבר יהוה אל־משׁה לאמר׃
Num 25:17 צרור את־המדינים והכיתם אותם׃
Num 25:18 כי צררים הם לכם בנכליהם אשׁר־נכלו לכם על־דבר־פעור ועל־דבר כזבי בת־נשׂיא מדין אחתם המכה ביום־המגפה על־דבר־פעור׃ (25:19) ויהי אחרי המגפה׃
Num 26:1 ויאמר יהוה אל־משׁה ואל אלעזר בן־אהרן הכהן לאמר׃
Num 26:2 שׂאו את־ראשׁ כל־עדת בני־ישׂראל מבן עשׂרים שׁנה ומעלה לבית אבתם כל־יצא צבא בישׂראל׃
Num 26:3 וידבר משׁה ואלעזר הכהן אתם בערבת מואב על־ירדן ירחו לאמר׃
Num 26:4 מבן עשׂרים שׁנה ומעלה כאשׁר צוה יהוה את־משׁה ובני ישׂראל היצאים מארץ מצרים׃
Num 26:5 ראובן בכור ישׂראל בני ראובן חנוך משׁפחת החנכי לפלוא משׁפחת הפלאי׃
Num 26:6 לחצרן משׁפחת החצרוני לכרמי משׁפחת הכרמי׃
Num 26:7 אלה משׁפחת הראובני ויהיו פקדיהם שׁלשׁה וארבעים אלף ושׁבע מאות ושׁלשׁים׃
Num 26:8 ובני פלוא אליאב׃
Num 26:9 ובני אליאב נמואל ודתן ואבירם הוא־דתן ואבירם קרואי העדה אשׁר הצו על־משׁה ועל־אהרן בעדת־קרח בהצתם על־יהוה׃
Num 26:10 ותפתח הארץ את־פיה ותבלע אתם ואת־קרח במות העדה באכל האשׁ את חמשׁים ומאתים אישׁ ויהיו לנס׃
Num 26:11 ובני־קרח לא־מתו׃
Num 26:12 בני שׁמעון למשׁפחתם לנמואל משׁפחת הנמואלי לימין משׁפחת הימיני ליכין משׁפחת היכיני׃
Num 26:13 לזרח משׁפחת הזרחי לשׁאול משׁפחת השׁאולי׃
Num 26:14 אלה משׁפחת השׁמעני שׁנים ועשׂרים אלף ומאתים׃
Num 26:15 בני גד למשׁפחתם לצפון משׁפחת הצפוני לחגי משׁפחת החגי לשׁוני משׁפחת השׁוני׃
Num 26:16 לאזני משׁפחת האזני לערי משׁפחת הערי׃
Num 26:17 לארוד משׁפחת הארודי לאראלי משׁפחת האראלי׃
Num 26:18 אלה משׁפחת בני־גד לפקדיהם ארבעים אלף וחמשׁ מאות׃
Num 26:19 בני יהודה ער ואונן וימת ער ואונן בארץ כנען׃
Num 26:20 ויהיו בני־יהודה למשׁפחתם לשׁלה משׁפחת השׁלני לפרץ משׁפחת הפרצי לזרח משׁפחת הזרחי׃
Num 26:21 ויהיו בני־פרץ לחצרן משׁפחת החצרני לחמול משׁפחת החמולי׃
Num 26:22 אלה משׁפחת יהודה לפקדיהם שׁשׁה ושׁבעים אלף וחמשׁ מאות׃
Num 26:23 בני ישׂשכר למשׁפחתם תולע משׁפחת התולעי לפוה משׁפחת הפוני׃
Num 26:24 לישׁוב משׁפחת הישׁבי לשׁמרן משׁפחת השׁמרני׃
Num 26:25 אלה משׁפחת ישׂשכר לפקדיהם ארבעה ושׁשׁים אלף ושׁלשׁ מאות׃
Num 26:26 בני זבולן למשׁפחתם לסרד משׁפחת הסרדי לאלון משׁפחת האלני ליחלאל משׁפחת היחלאלי׃
Num 26:27 אלה משׁפחת הזבולני לפקדיהם שׁשׁים אלף וחמשׁ מאות׃
Num 26:28 בני יוסף למשׁפחתם מנשׁה ואפרים׃
Num 26:29 בני מנשׁה למכיר משׁפחת המכירי ומכיר הוליד את־גלעד לגלעד משׁפחת הגלעדי׃
Num 26:30 אלה בני גלעד איעזר משׁפחת האיעזרי לחלק משׁפחת החלקי׃
Num 26:31 ואשׂריאל משׁפחת האשׂראלי ושׁכם משׁפחת השׁכמי׃
Num 26:32 ושׁמידע משׁפחת השׁמידעי וחפר משׁפחת החפרי׃
Num 26:33 וצלפחד בן־חפר לא־היו לו בנים כי אם־בנות ושׁם בנות צלפחד מחלה ונעה חגלה מלכה ותרצה׃
Num 26:34 אלה משׁפחת מנשׁה ופקדיהם שׁנים וחמשׁים אלף ושׁבע מאות׃
Num 26:35 אלה בני־אפרים למשׁפחתם לשׁותלח משׁפחת השׁתלחי לבכר משׁפחת הבכרי לתחן משׁפחת התחני׃
Num 26:36 ואלה בני שׁותלח לערן משׁפחת הערני׃
Num 26:37 אלה משׁפחת בני־אפרים לפקדיהם שׁנים ושׁלשׁים אלף וחמשׁ מאות אלה בני־יוסף למשׁפחתם׃
Num 26:38 בני בנימן למשׁפחתם לבלע משׁפחת הבלעי לאשׁבל משׁפחת האשׁבלי לאחירם משׁפחת האחירמי׃
Num 26:39 לשׁפופם משׁפחת השׁופמי לחופם משׁפחת החופמי׃
Num 26:40 ויהיו בני־בלע ארד ונעמן משׁפחת הארדי לנעמן משׁפחת הנעמי׃
Num 26:41 אלה בני־בנימן למשׁפחתם ופקדיהם חמשׁה וארבעים אלף ושׁשׁ מאות׃
Num 26:42 אלה בני־דן למשׁפחתם לשׁוחם משׁפחת השׁוחמי אלה משׁפחת דן למשׁפחתם׃
Num 26:43 כל־משׁפחת השׁוחמי לפקדיהם ארבעה ושׁשׁים אלף וארבע מאות׃
Num 26:44 בני אשׁר למשׁפחתם לימנה משׁפחת הימנה לישׁוי משׁפחת הישׁוי לבריעה משׁפחת הבריעי׃
Num 26:45 לבני בריעה לחבר משׁפחת החברי למלכיאל משׁפחת המלכיאלי׃
Num 26:46 ושׁם בת־אשׁר שׂרח׃
Num 26:47 אלה משׁפחת בני־אשׁר לפקדיהם שׁלשׁה וחמשׁים אלף וארבע מאות׃
Num 26:48 בני נפתלי למשׁפחתם ליחצאל משׁפחת היחצאלי לגוני משׁפחת הגוני׃
Num 26:49 ליצר משׁפחת היצרי לשׁלם משׁפחת השׁלמי׃
Num 26:50 אלה משׁפחת נפתלי למשׁפחתם ופקדיהם חמשׁה וארבעים אלף וארבע מאות׃
Num 26:51 אלה פקודי בני ישׂראל שׁשׁ־מאות אלף ואלף שׁבע מאות ושׁלשׁים׃
Num 26:52 וידבר יהוה אל־משׁה לאמר׃
Num 26:53 לאלה תחלק הארץ בנחלה במספר שׁמות׃
Num 26:54 לרב תרבה נחלתו ולמעט תמעיט נחלתו אישׁ לפי פקדיו יתן נחלתו׃
Num 26:55 אך־בגורל יחלק את־הארץ לשׁמות מטות־אבתם ינחלו׃
Num 26:56 על־פי הגורל תחלק נחלתו בין רב למעט׃
Num 26:57 ואלה פקודי הלוי למשׁפחתם לגרשׁון משׁפחת הגרשׁני לקהת משׁפחת הקהתי למררי משׁפחת המררי׃
Num 26:58 אלה משׁפחת לוי משׁפחת הלבני משׁפחת החברני משׁפחת המחלי משׁפחת המושׁי משׁפחת הקרחי וקהת הולד את־עמרם׃
Num 26:59 ושׁם אשׁת עמרם יוכבד בת־לוי אשׁר ילדה אתה ללוי במצרים ותלד לעמרם את־אהרן ואת־משׁה ואת מרים אחתם׃
Num 26:60 ויולד לאהרן את־נדב ואת־אביהוא את־אלעזר ואת־איתמר׃
Num 26:61 וימת נדב ואביהוא בהקריבם אשׁ־זרה לפני יהוה׃
Num 26:62 ויהיו פקדיהם שׁלשׁה ועשׂרים אלף כל־זכר מבן־חדשׁ ומעלה כי לא התפקדו בתוך בני ישׂראל כי לא־נתן להם נחלה בתוך בני ישׂראל׃
Num 26:63 אלה פקודי משׁה ואלעזר הכהן אשׁר פקדו את־בני ישׂראל בערבת מואב על ירדן ירחו׃
Num 26:64 ובאלה לא־היה אישׁ מפקודי משׁה ואהרן הכהן אשׁר פקדו את־בני ישׂראל במדבר סיני׃
Num 26:65 כי־אמר יהוה להם מות ימתו במדבר ולא־נותר מהם אישׁ כי אם־כלב בן־יפנה ויהושׁע בן־נון׃
Num 27:1 ותקרבנה בנות צלפחד בן־חפר בן־גלעד בן־מכיר בן־מנשׁה למשׁפחת מנשׁה בן־יוסף ואלה שׁמות בנתיו מחלה נעה וחגלה ומלכה ותרצה׃
Num 27:2 ותעמדנה לפני משׁה ולפני אלעזר הכהן ולפני הנשׂיאם וכל־העדה פתח אהל־מועד לאמר׃
Num 27:3 אבינו מת במדבר והוא לא־היה בתוך העדה הנועדים על־יהוה בעדת־קרח כי־בחטאו מת ובנים לא־היו לו׃
Num 27:4 למה יגרע שׁם־אבינו מתוך משׁפחתו כי אין לו בן תנה־לנו אחזה בתוך אחי אבינו׃
Num 27:5 ויקרב משׁה את־משׁפטן לפני יהוה׃
Num 27:6 ויאמר יהוה אל־משׁה לאמר׃
Num 27:7 כן בנות צלפחד דברת נתן תתן להם אחזת נחלה בתוך אחי אביהם והעברת את־נחלת אביהן להן׃
Num 27:8 ואל־בני ישׂראל תדבר לאמר אישׁ כי־ימות ובן אין לו והעברתם את־נחלתו לבתו׃
Num 27:9 ואם־אין לו בת ונתתם את־נחלתו לאחיו׃
Num 27:10 ואם־אין לו אחים ונתתם את־נחלתו לאחי אביו׃
Num 27:11 ואם־אין אחים לאביו ונתתם את־נחלתו לשׁארו הקרב אליו ממשׁפחתו וירשׁ אתה והיתה לבני ישׂראל לחקת משׁפט כאשׁר צוה יהוה את־משׁה׃
Num 27:12 ויאמר יהוה אל־משׁה עלה אל־הר העברים הזה וראה את־הארץ אשׁר נתתי לבני ישׂראל׃
Num 27:13 וראיתה אתה ונאספת אל־עמיך גם־אתה כאשׁר נאסף אהרן אחיך׃
Num 27:14 כאשׁר מריתם פי במדבר־צן במריבת העדה להקדישׁני במים לעיניהם הם מי־מריבת קדשׁ מדבר־צן׃
Num 27:15 וידבר משׁה אל־יהוה לאמר׃
Num 27:16 יפקד יהוה אלהי הרוחת לכל־בשׂר אישׁ על־העדה׃
Num 27:17 אשׁר־יצא לפניהם ואשׁר יבא לפניהם ואשׁר יוציאם ואשׁר יביאם ולא תהיה עדת יהוה כצאן אשׁר אין־להם רעה׃
Num 27:18 ויאמר יהוה אל־משׁה קח־לך את־יהושׁע בן־נון אישׁ אשׁר־רוח בו וסמכת את־ידך עליו׃
Num 27:19 והעמדת אתו לפני אלעזר הכהן ולפני כל־העדה וצויתה אתו לעיניהם׃
Num 27:20 ונתתה מהודך עליו למען ישׁמעו כל־עדת בני ישׂראל׃
Num 27:21 ולפני אלעזר הכהן יעמד ושׁאל לו במשׁפט האורים לפני יהוה על־פיו יצאו ועל־פיו יבאו הוא וכל־בני־ישׂראל אתו וכל־העדה׃
Num 27:22 ויעשׂ משׁה כאשׁר צוה יהוה אתו ויקח את־יהושׁע ויעמדהו לפני אלעזר הכהן ולפני כל־העדה׃
Num 27:23 ויסמך את־ידיו עליו ויצוהו כאשׁר דבר יהוה ביד־משׁה׃
Num 28:1 וידבר יהוה אל־משׁה לאמר׃
Num 28:2 צו את־בני ישׂראל ואמרת אלהם את־קרבני לחמי לאשׁי ריח ניחחי תשׁמרו להקריב לי במועדו׃
Num 28:3 ואמרת להם זה האשׁה אשׁר תקריבו ליהוה כבשׂים בני־שׁנה תמימם שׁנים ליום עלה תמיד׃
Num 28:4 את־הכבשׂ אחד תעשׂה בבקר ואת הכבשׂ השׁני תעשׂה בין הערבים׃
Num 28:5 ועשׂירית האיפה סלת למנחה בלולה בשׁמן כתית רביעת ההין׃
Num 28:6 עלת תמיד העשׂיה בהר סיני לריח ניחח אשׁה ליהוה׃
Num 28:7 ונסכו רביעת ההין לכבשׂ האחד בקדשׁ הסך נסך שׁכר ליהוה׃
Num 28:8 ואת הכבשׂ השׁני תעשׂה בין הערבים כמנחת הבקר וכנסכו תעשׂה אשׁה ריח ניחח ליהוה׃
Num 28:9 וביום השׁבת שׁני־כבשׂים בני־שׁנה תמימם ושׁני עשׂרנים סלת מנחה בלולה בשׁמן ונסכו׃
Num 28:10 עלת שׁבת בשׁבתו על־עלת התמיד ונסכה׃
Num 28:11 ובראשׁי חדשׁיכם תקריבו עלה ליהוה פרים בני־בקר שׁנים ואיל אחד כבשׂים בני־שׁנה שׁבעה תמימם׃
Num 28:12 ושׁלשׁה עשׂרנים סלת מנחה בלולה בשׁמן לפר האחד ושׁני עשׂרנים סלת מנחה בלולה בשׁמן לאיל האחד׃
Num 28:13 ועשׂרן עשׂרון סלת מנחה בלולה בשׁמן לכבשׂ האחד עלה ריח ניחח אשׁה ליהוה׃
Num 28:14 ונסכיהם חצי ההין יהיה לפר ושׁלישׁת ההין לאיל ורביעת ההין לכבשׂ יין זאת עלת חדשׁ בחדשׁו לחדשׁי השׁנה׃
Num 28:15 ושׂעיר עזים אחד לחטאת ליהוה על־עלת התמיד יעשׂה ונסכו׃
Num 28:16 ובחדשׁ הראשׁון בארבעה עשׂר יום לחדשׁ פסח ליהוה׃
Num 28:17 ובחמשׁה עשׂר יום לחדשׁ הזה חג שׁבעת ימים מצות יאכל׃
Num 28:18 ביום הראשׁון מקרא־קדשׁ כל־מלאכת עבדה לא תעשׂו׃
Num 28:19 והקרבתם אשׁה עלה ליהוה פרים בני־בקר שׁנים ואיל אחד ושׁבעה כבשׂים בני שׁנה תמימם יהיו לכם׃
Num 28:20 ומנחתם סלת בלולה בשׁמן שׁלשׁה עשׂרנים לפר ושׁני עשׂרנים לאיל תעשׂו׃
Num 28:21 עשׂרון עשׂרון תעשׂה לכבשׂ האחד לשׁבעת הכבשׂים׃
Num 28:22 ושׂעיר חטאת אחד לכפר עליכם׃
Num 28:23 מלבד עלת הבקר אשׁר לעלת התמיד תעשׂו את־אלה׃
Num 28:24 כאלה תעשׂו ליום שׁבעת ימים לחם אשׁה ריח־ניחח ליהוה על־עולת התמיד יעשׂה ונסכו׃
Num 28:25 וביום השׁביעי מקרא־קדשׁ יהיה לכם כל־מלאכת עבדה לא תעשׂו׃
Num 28:26 וביום הבכורים בהקריבכם מנחה חדשׁה ליהוה בשׁבעתיכם מקרא־קדשׁ יהיה לכם כל־מלאכת עבדה לא תעשׂו׃
Num 28:27 והקרבתם עולה לריח ניחח ליהוה פרים בני־בקר שׁנים איל אחד שׁבעה כבשׂים בני שׁנה׃
Num 28:28 ומנחתם סלת בלולה בשׁמן שׁלשׁה עשׂרנים לפר האחד שׁני עשׂרנים לאיל האחד׃
Num 28:29 עשׂרון עשׂרון לכבשׂ האחד לשׁבעת הכבשׂים׃
Num 28:30 שׂעיר עזים אחד לכפר עליכם׃
Num 28:31 מלבד עלת התמיד ומנחתו תעשׂו תמימם יהיו־לכם ונסכיהם׃
Num 29:1 ובחדשׁ השׁביעי באחד לחדשׁ מקרא־קדשׁ יהיה לכם כל־מלאכת עבדה לא תעשׂו יום תרועה יהיה לכם׃
Num 29:2 ועשׂיתם עלה לריח ניחח ליהוה פר בן־בקר אחד איל אחד כבשׂים בני־שׁנה שׁבעה תמימם׃
Num 29:3 ומנחתם סלת בלולה בשׁמן שׁלשׁה עשׂרנים לפר שׁני עשׂרנים לאיל׃
Num 29:4 ועשׂרון אחד לכבשׂ האחד לשׁבעת הכבשׂים׃
Num 29:5 ושׂעיר־עזים אחד חטאת לכפר עליכם׃
Num 29:6 מלבד עלת החדשׁ ומנחתה ועלת התמיד ומנחתה ונסכיהם כמשׁפטם לריח ניחח אשׁה ליהוה׃
Num 29:7 ובעשׂור לחדשׁ השׁביעי הזה מקרא־קדשׁ יהיה לכם ועניתם את־נפשׁתיכם כל־מלאכה לא תעשׂו׃
Num 29:8 והקרבתם עלה ליהוה ריח ניחח פר בן־בקר אחד איל אחד כבשׂים בני־שׁנה שׁבעה תמימם יהיו לכם׃
Num 29:9 ומנחתם סלת בלולה בשׁמן שׁלשׁה עשׂרנים לפר שׁני עשׂרנים לאיל האחד׃
Num 29:10 עשׂרון עשׂרון לכבשׂ האחד לשׁבעת הכבשׂים׃
Num 29:11 שׂעיר־עזים אחד חטאת מלבד חטאת הכפרים ועלת התמיד ומנחתה ונסכיהם׃
Num 29:12 ובחמשׁה עשׂר יום לחדשׁ השׁביעי מקרא־קדשׁ יהיה לכם כל־מלאכת עבדה לא תעשׂו וחגתם חג ליהוה שׁבעת ימים׃
Num 29:13 והקרבתם עלה אשׁה ריח ניחח ליהוה פרים בני־בקר שׁלשׁה עשׂר אילם שׁנים כבשׂים בני־שׁנה ארבעה עשׂר תמימם יהיו׃
Num 29:14 ומנחתם סלת בלולה בשׁמן שׁלשׁה עשׂרנים לפר האחד לשׁלשׁה עשׂר פרים שׁני עשׂרנים לאיל האחד לשׁני האילם׃
Num 29:15 ועשׂרון עשׂרון לכבשׂ האחד לארבעה עשׂר כבשׂים׃
Num 29:16 ושׂעיר־עזים אחד חטאת מלבד עלת התמיד מנחתה ונסכה׃
Num 29:17 וביום השׁני פרים בני־בקר שׁנים עשׂר אילם שׁנים כבשׂים בני־שׁנה ארבעה עשׂר תמימם׃
Num 29:18 ומנחתם ונסכיהם לפרים לאילם ולכבשׂים במספרם כמשׁפט׃
Num 29:19 ושׂעיר־עזים אחד חטאת מלבד עלת התמיד ומנחתה ונסכיהם׃
Num 29:20 וביום השׁלישׁי פרים עשׁתי־עשׂר אילם שׁנים כבשׂים בני־שׁנה ארבעה עשׂר תמימם׃
Num 29:21 ומנחתם ונסכיהם לפרים לאילם ולכבשׂים במספרם כמשׁפט׃
Num 29:22 ושׂעיר חטאת אחד מלבד עלת התמיד ומנחתה ונסכה׃
Num 29:23 וביום הרביעי פרים עשׂרה אילם שׁנים כבשׂים בני־שׁנה ארבעה עשׂר תמימם׃
Num 29:24 מנחתם ונסכיהם לפרים לאילם ולכבשׂים במספרם כמשׁפט׃
Num 29:25 ושׂעיר־עזים אחד חטאת מלבד עלת התמיד מנחתה ונסכה׃
Num 29:26 וביום החמישׁי פרים תשׁעה אילם שׁנים כבשׂים בני־שׁנה ארבעה עשׂר תמימם׃
Num 29:27 ומנחתם ונסכיהם לפרים לאילם ולכבשׂים במספרם כמשׁפט׃
Num 29:28 ושׂעיר חטאת אחד מלבד עלת התמיד ומנחתה ונסכה׃
Num 29:29 וביום השׁשׁי פרים שׁמנה אילם שׁנים כבשׂים בני־שׁנה ארבעה עשׂר תמימם׃
Num 29:30 ומנחתם ונסכיהם לפרים לאילם ולכבשׂים במספרם כמשׁפט׃
Num 29:31 ושׂעיר חטאת אחד מלבד עלת התמיד מנחתה ונסכיה׃
Num 29:32 וביום השׁביעי פרים שׁבעה אילם שׁנים כבשׂים בני־שׁנה ארבעה עשׂר תמימם׃
Num 29:33 ומנחתם ונסכהם לפרים לאילם ולכבשׂים במספרם כמשׁפטם׃
Num 29:34 ושׂעיר חטאת אחד מלבד עלת התמיד מנחתה ונסכה׃
Num 29:35 ביום השׁמיני עצרת תהיה לכם כל־מלאכת עבדה לא תעשׂו׃
Num 29:36 והקרבתם עלה אשׁה ריח ניחח ליהוה פר אחד איל אחד כבשׂים בני־שׁנה שׁבעה תמימם׃
Num 29:37 מנחתם ונסכיהם לפר לאיל ולכבשׂים במספרם כמשׁפט׃
Num 29:38 ושׂעיר חטאת אחד מלבד עלת התמיד ומנחתה ונסכה׃
Num 29:39 אלה תעשׂו ליהוה במועדיכם לבד מנדריכם ונדבתיכם לעלתיכם ולמנחתיכם ולנסכיכם ולשׁלמיכם׃
Num 29:40 (30:1) ויאמר משׁה אל־בני ישׂראל ככל אשׁר־צוה יהוה את־משׁה׃