Va'etchanan Haftara (Hebrew)

Yesha'Yahu 40:1-26
Yes 40:1 נחמו נחמו עמי יאמר אלהיכם׃
Yes 40:2 דברו על־לב ירושׁלם וקראו אליה כי מלאה צבאה כי נרצה עונה כי לקחה מיד יהוה כפלים בכל־חטאתיה׃
Yes 40:3 קול קורא במדבר פנו דרך יהוה ישׁרו בערבה מסלה לאלהינו׃
Yes 40:4 כל־גיא ינשׂא וכל־הר וגבעה ישׁפלו והיה העקב למישׁור והרכסים לבקעה׃
Yes 40:5 ונגלה כבוד יהוה וראו כל־בשׂר יחדו כי פי יהוה דבר׃
Yes 40:6 קול אמר קרא ואמר מה אקרא כל־הבשׂר חציר וכל־חסדו כציץ השׂדה׃
Yes 40:7 יבשׁ חציר נבל ציץ כי רוח יהוה נשׁבה בו אכן חציר העם׃
Yes 40:8 יבשׁ חציר נבל ציץ ודבר־אלהינו יקום לעולם׃
Yes 40:9 על הר־גבה עלי־לך מבשׂרת ציון הרימי בכח קולך מבשׂרת ירושׁלם הרימי אל־תיראי אמרי לערי יהודה הנה אלהיכם׃
Yes 40:10 הנה אדני יהוה בחזק יבוא וזרעו משׁלה לו הנה שׂכרו אתו ופעלתו לפניו׃
Yes 40:11 כרעה עדרו ירעה בזרעו יקבץ טלאים ובחיקו ישׂא עלות ינהל׃
Yes 40:12 מי־מדד בשׁעלו מים ושׁמים בזרת תכן וכל בשׁלשׁ עפר הארץ ושׁקל בפלס הרים וגבעות במאזנים׃
Yes 40:13 מי־תכן את־רוח יהוה ואישׁ עצתו יודיענו׃
Yes 40:14 את־מי נועץ ויבינהו וילמדהו בארח משׁפט וילמדהו דעת ודרך תבונות יודיענו׃
Yes 40:15 הן גוים כמר מדלי וכשׁחק מאזנים נחשׁבו הן איים כדק יטול׃
Yes 40:16 ולבנון אין די בער וחיתו אין די עולה׃
Yes 40:17 כל־הגוים כאין נגדו מאפס ותהו נחשׁבו־לו׃
Yes 40:18 ואל־מי תדמיון אל ומה־דמות תערכו לו׃
Yes 40:19 הפסל נסך חרשׁ וצרף בזהב ירקענו ורתקות כסף צורף׃
Yes 40:20 המסכן תרומה עץ לא־ירקב יבחר חרשׁ חכם יבקשׁ־לו להכין פסל לא ימוט׃
Yes 40:21 הלוא תדעו הלוא תשׁמעו הלוא הגד מראשׁ לכם הלוא הבינתם מוסדות הארץ׃
Yes 40:22 הישׁב על־חוג הארץ וישׁביה כחגבים הנוטה כדק שׁמים וימתחם כאהל לשׁבת׃
Yes 40:23 הנותן רוזנים לאין שׁפטי ארץ כתהו עשׂה׃
Yes 40:24 אף בל־נטעו אף בל־זרעו אף בל־שׁרשׁ בארץ גזעם וגם־נשׁף בהם ויבשׁו וסערה כקשׁ תשׂאם׃
Yes 40:25 ואל־מי תדמיוני ואשׁוה יאמר קדושׁ׃
Yes 40:26 שׂאו־מרום עיניכם וראו מי־ברא אלה המוציא במספר צבאם לכלם בשׁם יקרא מרב אונים ואמיץ כח אישׁ לא נעדר׃