Va'etchanan (Hebrew)

Devarim 3:23 - 7:11
Dev 3:23 ואתחנן אל־יהוה בעת ההוא לאמר׃
Dev 3:24 אדני יהוה אתה החלות להראות את־עבדך את־גדלך ואת־ידך החזקה אשׁר מי־אל בשׁמים ובארץ אשׁר־יעשׂה כמעשׂיך וכגבורתך׃
Dev 3:25 אעברה־נא ואראה את־הארץ הטובה אשׁר בעבר הירדן ההר הטוב הזה והלבנן׃
Dev 3:26 ויתעבר יהוה בי למענכם ולא שׁמע אלי ויאמר יהוה אלי רב־לך אל־תוסף דבר אלי עוד בדבר הזה׃
Dev 3:27 עלה ראשׁ הפסגה ושׂא עיניך ימה וצפנה ותימנה ומזרחה וראה בעיניך כי־לא תעבר את־הירדן הזה׃
Dev 3:28 וצו את־יהושׁע וחזקהו ואמצהו כי־הוא יעבר לפני העם הזה והוא ינחיל אותם את־הארץ אשׁר תראה׃
Dev 3:29 ונשׁב בגיא מול בית פעור׃
Dev 4:1 ועתה ישׂראל שׁמע אל־החקים ואל־המשׁפטים אשׁר אנכי מלמד אתכם לעשׂות למען תחיו ובאתם וירשׁתם את־הארץ אשׁר יהוה אלהי אבתיכם נתן לכם׃
Dev 4:2 לא תספו על־הדבר אשׁר אנכי מצוה אתכם ולא תגרעו ממנו לשׁמר את־מצות יהוה אלהיכם אשׁר אנכי מצוה אתכם׃
Dev 4:3 עיניכם הראות את אשׁר־עשׂה יהוה בבעל פעור כי כל־האישׁ אשׁר הלך אחרי בעל־פעור השׁמידו יהוה אלהיך מקרבך׃
Dev 4:4 ואתם הדבקים ביהוה אלהיכם חיים כלכם היום׃
Dev 4:5 ראה למדתי אתכם חקים ומשׁפטים כאשׁר צוני יהוה אלהי לעשׂות כן בקרב הארץ אשׁר אתם באים שׁמה לרשׁתה׃
Dev 4:6 ושׁמרתם ועשׂיתם כי הוא חכמתכם ובינתכם לעיני העמים אשׁר ישׁמעון את כל־החקים האלה ואמרו רק עם־חכם ונבון הגוי הגדול הזה׃
Dev 4:7 כי מי־גוי גדול אשׁר־לו אלהים קרבים אליו כיהוה אלהינו בכל־קראנו אליו׃
Dev 4:8 ומי גוי גדול אשׁר־לו חקים ומשׁפטים צדיקם ככל התורה הזאת אשׁר אנכי נתן לפניכם היום׃
Dev 4:9 רק השׁמר לך ושׁמר נפשׁך מאד פן־תשׁכח את־הדברים אשׁר־ראו עיניך ופן־יסורו מלבבך כל ימי חייך והודעתם לבניך ולבני בניך׃
Dev 4:10 יום אשׁר עמדת לפני יהוה אלהיך בחרב באמר יהוה אלי הקהל־לי את־העם ואשׁמעם את־דברי אשׁר ילמדון ליראה אתי כל־הימים אשׁר הם חיים על־האדמה ואת־בניהם ילמדון׃
Dev 4:11 ותקרבון ותעמדון תחת ההר וההר בער באשׁ עד־לב השׁמים חשׁך ענן וערפל׃
Dev 4:12 וידבר יהוה אליכם מתוך האשׁ קול דברים אתם שׁמעים ותמונה אינכם ראים זולתי קול׃
Dev 4:13 ויגד לכם את־בריתו אשׁר צוה אתכם לעשׂות עשׂרת הדברים ויכתבם על־שׁני לחות אבנים׃
Dev 4:14 ואתי צוה יהוה בעת ההוא ללמד אתכם חקים ומשׁפטים לעשׂתכם אתם בארץ אשׁר אתם עברים שׁמה לרשׁתה׃
Dev 4:15 ונשׁמרתם מאד לנפשׁתיכם כי לא ראיתם כל־תמונה ביום דבר יהוה אליכם בחרב מתוך האשׁ׃
Dev 4:16 פן־תשׁחתון ועשׂיתם לכם פסל תמונת כל־סמל תבנית זכר או נקבה׃
Dev 4:17 תבנית כל־בהמה אשׁר בארץ תבנית כל־צפור כנף אשׁר תעוף בשׁמים׃
Dev 4:18 תבנית כל־רמשׂ באדמה תבנית כל־דגה אשׁר־במים מתחת לארץ׃
Dev 4:19 ופן־תשׂא עיניך השׁמימה וראית את־השׁמשׁ ואת־הירח ואת־הכוכבים כל צבא השׁמים ונדחת והשׁתחוית להם ועבדתם אשׁר חלק יהוה אלהיך אתם לכל העמים תחת כל־השׁמים׃
Dev 4:20 ואתכם לקח יהוה ויוצא אתכם מכור הברזל ממצרים להיות לו לעם נחלה כיום הזה׃
Dev 4:21 ויהוה התאנף־בי על־דבריכם וישׁבע לבלתי עברי את־הירדן ולבלתי־בא אל־הארץ הטובה אשׁר יהוה אלהיך נתן לך נחלה׃
Dev 4:22 כי אנכי מת בארץ הזאת אינני עבר את־הירדן ואתם עברים וירשׁתם את־הארץ הטובה הזאת׃
Dev 4:23 השׁמרו לכם פן־תשׁכחו את־ברית יהוה אלהיכם אשׁר כרת עמכם ועשׂיתם לכם פסל תמונת כל אשׁר צוך יהוה אלהיך׃
Dev 4:24 כי יהוה אלהיך אשׁ אכלה הוא אל קנא׃
Dev 4:25 כי־תוליד בנים ובני בנים ונושׁנתם בארץ והשׁחתם ועשׂיתם פסל תמונת כל ועשׂיתם הרע בעיני יהוה־אלהיך להכעיסו׃
Dev 4:26 העידתי בכם היום את־השׁמים ואת־הארץ כי־אבד תאבדון מהר מעל הארץ אשׁר אתם עברים את־הירדן שׁמה לרשׁתה לא־תאריכן ימים עליה כי השׁמד תשׁמדון׃
Dev 4:27 והפיץ יהוה אתכם בעמים ונשׁארתם מתי מספר בגוים אשׁר ינהג יהוה אתכם שׁמה׃
Dev 4:28 ועבדתם־שׁם אלהים מעשׂה ידי אדם עץ ואבן אשׁר לא־יראון ולא ישׁמעון ולא יאכלון ולא יריחן׃
Dev 4:29 ובקשׁתם משׁם את־יהוה אלהיך ומצאת כי תדרשׁנו בכל־לבבך ובכל־נפשׁך׃
Dev 4:30 בצר לך ומצאוך כל הדברים האלה באחרית הימים ושׁבת עד־יהוה אלהיך ושׁמעת בקלו׃
Dev 4:31 כי אל רחום יהוה אלהיך לא ירפך ולא ישׁחיתך ולא ישׁכח את־ברית אבתיך אשׁר נשׁבע להם׃
Dev 4:32 כי שׁאל־נא לימים ראשׁנים אשׁר־היו לפניך למן־היום אשׁר ברא אלהים אדם על־הארץ ולמקצה השׁמים ועד־קצה השׁמים הנהיה כדבר הגדול הזה או הנשׁמע כמהו׃
Dev 4:33 השׁמע עם קול אלהים מדבר מתוך־האשׁ כאשׁר־שׁמעת אתה ויחי׃
Dev 4:34 או הנסה אלהים לבוא לקחת לו גוי מקרב גוי במסת באתת ובמופתים ובמלחמה וביד חזקה ובזרוע נטויה ובמוראים גדלים ככל אשׁר־עשׂה לכם יהוה אלהיכם במצרים לעיניך׃
Dev 4:35 אתה הראת לדעת כי יהוה הוא האלהים אין עוד מלבדו׃
Dev 4:36 מן־השׁמים השׁמיעך את־קלו ליסרך ועל־הארץ הראך את־אשׁו הגדולה ודבריו שׁמעת מתוך האשׁ׃
Dev 4:37 ותחת כי אהב את־אבתיך ויבחר בזרעו אחריו ויוצאך בפניו בכחו הגדל ממצרים׃
Dev 4:38 להורישׁ גוים גדלים ועצמים ממך מפניך להביאך לתת־לך את־ארצם נחלה כיום הזה׃
Dev 4:39 וידעת היום והשׁבת אל־לבבך כי יהוה הוא האלהים בשׁמים ממעל ועל־הארץ מתחת אין עוד׃
Dev 4:40 ושׁמרת את־חקיו ואת־מצותיו אשׁר אנכי מצוך היום אשׁר ייטב לך ולבניך אחריך ולמען תאריך ימים על־האדמה אשׁר יהוה אלהיך נתן לך כל־הימים׃
Dev 4:41 אז יבדיל משׁה שׁלשׁ ערים בעבר הירדן מזרחה שׁמשׁ׃
Dev 4:42 לנס שׁמה רוצח אשׁר ירצח את־רעהו בבלי־דעת והוא לא־שׂנא לו מתמל שׁלשׁם ונס אל־אחת מן־הערים האל וחי׃
Dev 4:43 את־בצר במדבר בארץ המישׁר לראובני ואת־ראמת בגלעד לגדי ואת־גולן בבשׁן למנשׁי׃
Dev 4:44 וזאת התורה אשׁר־שׂם משׁה לפני בני ישׂראל׃
Dev 4:45 אלה העדת והחקים והמשׁפטים אשׁר דבר משׁה אל־בני ישׂראל בצאתם ממצרים׃
Dev 4:46 בעבר הירדן בגיא מול בית פעור בארץ סיחן מלך האמרי אשׁר יושׁב בחשׁבון אשׁר הכה משׁה ובני ישׂראל בצאתם ממצרים׃
Dev 4:47 ויירשׁו את־ארצו ואת־ארץ עוג מלך־הבשׁן שׁני מלכי האמרי אשׁר בעבר הירדן מזרח שׁמשׁ׃
Dev 4:48 מערער אשׁר על־שׂפת־נחל ארנן ועד־הר שׂיאן הוא חרמון׃
Dev 4:49 וכל־הערבה עבר הירדן מזרחה ועד ים הערבה תחת אשׁדת הפסגה׃
Dev 5:1 ויקרא משׁה אל־כל־ישׂראל ויאמר אלהם שׁמע ישׂראל את־החקים ואת־המשׁפטים אשׁר אנכי דבר באזניכם היום ולמדתם אתם ושׁמרתם לעשׂתם׃
Dev 5:2 יהוה אלהינו כרת עמנו ברית בחרב׃
Dev 5:3 לא את־אבתינו כרת יהוה את־הברית הזאת כי אתנו אנחנו אלה פה היום כלנו חיים׃
Dev 5:4 פנים בפנים דבר יהוה עמכם בהר מתוך האשׁ׃
Dev 5:5 אנכי עמד בין־יהוה וביניכם בעת ההוא להגיד לכם את־דבר יהוה כי יראתם מפני האשׁ ולא־עליתם בהר לאמר׃
Dev 5:6 אנכי יהוה אלהיך אשׁר הוצאתיך מארץ מצרים מבית עבדים׃
Dev 5:7 לא יהיה־לך אלהים אחרים על־פני׃
Dev 5:8 לא־תעשׂה־לך פסל כל־תמונה אשׁר בשׁמים ממעל ואשׁר בארץ מתחת ואשׁר במים מתחת לארץ׃
Dev 5:9 לא־תשׁתחוה להם ולא תעבדם כי אנכי יהוה אלהיך אל קנא פקד עון אבות על־בנים ועל־שׁלשׁים ועל־רבעים לשׂנאי׃
Dev 5:10 ועשׂה חסד לאלפים לאהבי ולשׁמרי מצותו׃
Dev 5:11 לא תשׂא את־שׁם־יהוה אלהיך לשׁוא כי לא ינקה יהוה את אשׁר־ישׂא את־שׁמו לשׁוא׃
Dev 5:12 שׁמור את־יום השׁבת לקדשׁו כאשׁר צוך יהוה אלהיך׃
Dev 5:13 שׁשׁת ימים תעבד ועשׂית כל־מלאכתך׃
Dev 5:14 ויום השׁביעי שׁבת ליהוה אלהיך לא תעשׂה כל־מלאכה אתה ובנך־ובתך ועבדך־ואמתך ושׁורך וחמרך וכל־בהמתך וגרך אשׁר בשׁעריך למען ינוח עבדך ואמתך כמוך׃
Dev 5:15 וזכרת כי־עבד היית בארץ מצרים ויצאך יהוה אלהיך משׁם ביד חזקה ובזרע נטויה על־כן צוך יהוה אלהיך לעשׂות את־יום השׁבת׃
Dev 5:16 כבד את־אביך ואת־אמך כאשׁר צוך יהוה אלהיך למען יאריכן ימיך ולמען ייטב לך על האדמה אשׁר־יהוה אלהיך נתן לך׃
Dev 5:17 לא תרצח׃
Dev 5:18 ולא תנאף׃
Dev 5:19 ולא תגנב׃
Dev 5:20 ולא־תענה ברעך עד שׁוא׃
Dev 5:21 ולא תחמד אשׁת רעך ולא תתאוה בית רעך שׂדהו ועבדו ואמתו שׁורו וחמרו וכל אשׁר לרעך׃
Dev 5:22 את־הדברים האלה דבר יהוה אל־כל־קהלכם בהר מתוך האשׁ הענן והערפל קול גדול ולא יסף ויכתבם על־שׁני לחת אבנים ויתנם אלי׃
Dev 5:23 ויהי כשׁמעכם את־הקול מתוך החשׁך וההר בער באשׁ ותקרבון אלי כל־ראשׁי שׁבטיכם וזקניכם׃
Dev 5:24 ותאמרו הן הראנו יהוה אלהינו את־כבדו ואת־גדלו ואת־קלו שׁמענו מתוך האשׁ היום הזה ראינו כי־ידבר אלהים את־האדם וחי׃
Dev 5:25 ועתה למה נמות כי תאכלנו האשׁ הגדלה הזאת אם־יספים אנחנו לשׁמע את־קול יהוה אלהינו עוד ומתנו׃
Dev 5:26 כי מי כל־בשׂר אשׁר שׁמע קול אלהים חיים מדבר מתוך־האשׁ כמנו ויחי׃
Dev 5:27 קרב אתה ושׁמע את כל־אשׁר יאמר יהוה אלהינו ואת תדבר אלינו את כל־אשׁר ידבר יהוה אלהינו אליך ושׁמענו ועשׂינו׃
Dev 5:28 וישׁמע יהוה את־קול דבריכם בדברכם אלי ויאמר יהוה אלי שׁמעתי את־קול דברי העם הזה אשׁר דברו אליך היטיבו כל־אשׁר דברו׃
Dev 5:29 מי־יתן והיה לבבם זה להם ליראה אתי ולשׁמר את־כל־מצותי כל־הימים למען ייטב להם ולבניהם לעלם׃
Dev 5:30 לך אמר להם שׁובו לכם לאהליכם׃
Dev 5:31 ואתה פה עמד עמדי ואדברה אליך את כל־המצוה והחקים והמשׁפטים אשׁר תלמדם ועשׂו בארץ אשׁר אנכי נתן להם לרשׁתה׃
Dev 5:32 ושׁמרתם לעשׂות כאשׁר צוה יהוה אלהיכם אתכם לא תסרו ימין ושׂמאל׃
Dev 5:33 בכל־הדרך אשׁר צוה יהוה אלהיכם אתכם תלכו למען תחיון וטוב לכם והארכתם ימים בארץ אשׁר תירשׁון׃
Dev 6:1 וזאת המצוה החקים והמשׁפטים אשׁר צוה יהוה אלהיכם ללמד אתכם לעשׂות בארץ אשׁר אתם עברים שׁמה לרשׁתה׃
Dev 6:2 למען תירא את־יהוה אלהיך לשׁמר את־כל־חקתיו ומצותיו אשׁר אנכי מצוך אתה ובנך ובן־בנך כל ימי חייך ולמען יארכן ימיך׃
Dev 6:3 ושׁמעת ישׂראל ושׁמרת לעשׂות אשׁר ייטב לך ואשׁר תרבון מאד כאשׁר דבר יהוה אלהי אבתיך לך ארץ זבת חלב ודבשׁ׃
Dev 6:4 שׁמע ישׂראל יהוה אלהינו יהוה אחד׃
Dev 6:5 ואהבת את יהוה אלהיך בכל־לבבך ובכל־נפשׁך ובכל־מאדך׃
Dev 6:6 והיו הדברים האלה אשׁר אנכי מצוך היום על־לבבך׃
Dev 6:7 ושׁננתם לבניך ודברת בם בשׁבתך בביתך ובלכתך בדרך ובשׁכבך ובקומך׃
Dev 6:8 וקשׁרתם לאות על־ידך והיו לטטפת בין עיניך׃
Dev 6:9 וכתבתם על־מזזות ביתך ובשׁעריך׃
Dev 6:10 והיה כי יביאך יהוה אלהיך אל־הארץ אשׁר נשׁבע לאבתיך לאברהם ליצחק וליעקב לתת לך ערים גדלת וטבת אשׁר לא־בנית׃
Dev 6:11 ובתים מלאים כל־טוב אשׁר לא־מלאת וברת חצובים אשׁר לא־חצבת כרמים וזיתים אשׁר לא־נטעת ואכלת ושׂבעת׃
Dev 6:12 השׁמר לך פן־תשׁכח את־יהוה אשׁר הוציאך מארץ מצרים מבית עבדים׃
Dev 6:13 את־יהוה אלהיך תירא ואתו תעבד ובשׁמו תשׁבע׃
Dev 6:14 לא תלכון אחרי אלהים אחרים מאלהי העמים אשׁר סביבותיכם׃
Dev 6:15 כי אל קנא יהוה אלהיך בקרבך פן־יחרה אף־יהוה אלהיך בך והשׁמידך מעל פני האדמה׃
Dev 6:16 לא תנסו את־יהוה אלהיכם כאשׁר נסיתם במסה׃
Dev 6:17 שׁמור תשׁמרון את־מצות יהוה אלהיכם ועדתיו וחקיו אשׁר צוך׃
Dev 6:18 ועשׂית הישׁר והטוב בעיני יהוה למען ייטב לך ובאת וירשׁת את־הארץ הטבה אשׁר־נשׁבע יהוה לאבתיך׃
Dev 6:19 להדף את־כל־איביך מפניך כאשׁר דבר יהוה׃
Dev 6:20 כי־ישׁאלך בנך מחר לאמר מה העדת והחקים והמשׁפטים אשׁר צוה יהוה אלהינו אתכם׃
Dev 6:21 ואמרת לבנך עבדים היינו לפרעה במצרים ויציאנו יהוה ממצרים ביד חזקה׃
Dev 6:22 ויתן יהוה אותת ומפתים גדלים ורעים במצרים בפרעה ובכל־ביתו לעינינו׃
Dev 6:23 ואותנו הוציא משׁם למען הביא אתנו לתת לנו את־הארץ אשׁר נשׁבע לאבתינו׃
Dev 6:24 ויצונו יהוה לעשׂות את־כל־החקים האלה ליראה את־יהוה אלהינו לטוב לנו כל־הימים לחיתנו כהיום הזה׃
Dev 6:25 וצדקה תהיה־לנו כי־נשׁמר לעשׂות את־כל־המצוה הזאת לפני יהוה אלהינו כאשׁר צונו׃
Dev 7:1 כי יביאך יהוה אלהיך אל־הארץ אשׁר־אתה בא־שׁמה לרשׁתה ונשׁל גוים־רבים מפניך החתי והגרגשׁי והאמרי והכנעני והפרזי והחוי והיבוסי שׁבעה גוים רבים ועצומים ממך׃
Dev 7:2 ונתנם יהוה אלהיך לפניך והכיתם החרם תחרים אתם לא־תכרת להם ברית ולא תחנם׃
Dev 7:3 ולא תתחתן בם בתך לא־תתן לבנו ובתו לא־תקח לבנך׃
Dev 7:4 כי־יסיר את־בנך מאחרי ועבדו אלהים אחרים וחרה אף־יהוה בכם והשׁמידך מהר׃
Dev 7:5 כי־אם־כה תעשׂו להם מזבחתיהם תתצו ומצבתם תשׁברו ואשׁירהם תגדעון ופסיליהם תשׂרפון באשׁ׃
Dev 7:6 כי עם קדושׁ אתה ליהוה אלהיך בך בחר יהוה אלהיך להיות לו לעם סגלה מכל העמים אשׁר על־פני האדמה׃
Dev 7:7 לא מרבכם מכל־העמים חשׁק יהוה בכם ויבחר בכם כי־אתם המעט מכל־העמים׃
Dev 7:8 כי מאהבת יהוה אתכם ומשׁמרו את־השׁבעה אשׁר נשׁבע לאבתיכם הוציא יהוה אתכם ביד חזקה ויפדך מבית עבדים מיד פרעה מלך־מצרים׃
Dev 7:9 וידעת כי־יהוה אלהיך הוא האלהים האל הנאמן שׁמר הברית והחסד לאהביו ולשׁמרי מצותו לאלף דור׃
Dev 7:10 ומשׁלם לשׂנאיו אל־פניו להאבידו לא יאחר לשׂנאו אל־פניו ישׁלם־לו׃
Dev 7:11 ושׁמרת את־המצוה ואת־החקים ואת־המשׁפטים אשׁר אנכי מצוך היום לעשׂותם׃