Re'eh Gospel (Hebrew)

Acts of the Jewish Apostles 8-9
Act 8:1 ושאול גם־הוא היה רצה בהרגתו ותהי ביום ההוא רדיפה גדולה על־הקהילה אשר בירושלים ויפצו כלם בערי יהודה ושמרון לבד מן־השליחים׃
Act 8:2 ואנשים יראי אלהים נשאו את־אסטפנוס ויקברהו ויספדו עליו מספד גדול׃
Act 8:3 ושאול החריב את־הקהילה וישוטט בבתים ויסחב משם אנשים ונשים ויסגירם לכלא׃
Act 8:4 והנפוצים עברו בארץ ויבשרו את־הדבר׃
Act 8:5 ופילפוס ירד אל־עיר שמרון ויכרז להם את־המשיח׃
Act 8:6 ויקשב המון העם לב אחד אל־אמרי פילפוס בשמעם ובראותם את־האתות אשר עשה׃
Act 8:7 כי רבים היו אחוזי רוחות הטמאה והרוחות יצאו מהם צעקות צעקה גדולה ורבים נכי אברים ופסחים ונרפאו׃
Act 8:8 ותהי שמחה גדולה בעיר ההיא׃
Act 8:9 ואיש אחד ושמו שמעון היה מלפנים בעיר מכשף ומבהיל את־עם שמרון באמרו על־נפשו כי גדול הוא׃
Act 8:10 וכלם הקשיבו אליו מקטנם ועד־גדולם לאמר זה הוא גבורת האלהים הגדולה׃
Act 8:11 ויקשיבו אליו על־היותו מבהיל אותם בכשפיו ימים רבים׃
Act 8:12 ויהי כאשר האמינו לפילפוס בבשרו את־מלכות האלהים ואת־שם ישוע המשיח ויטבלו אנשים ונשים׃
Act 8:13 ויאמן שמעון גם־הוא ויטבל וידבק בפילפוס וירא את־האתות והמפתים הגדלים אשר נעשו ויתמה׃
Act 8:14 וישמעו השליחים אשר בירושלים כי־קבלה שמרון את־דבר האלהים וישלחו אליהם את־פטרוס ואת־יוחנן׃
Act 8:15 וירדו שמה ויתפללו בעדם אשר יקבלו את־רוח הקדש׃
Act 8:16 כי הרוח לא־צלחה עד־עתה על־אחד מהם והם רק־נטבלים לשם האדון ישוע׃
Act 8:17 ויסמכו את־ידיהם עליהם ויקבלו את־רוח הקדש׃
Act 8:18 ויהי בראות שמעון כי נתן רוח הקדש בסמיכת ידי השליחים ויבא לפניהם כסף׃
Act 8:19 ויאמר תנו־נא גם־לי שלטן כשלטן הזה אשר יקבל את־רוח הקדש כל אשר־אשים עליו את־ידי׃
Act 8:20 ויאמר אליו פטרוס כספך יהי אתך לאבדון יען אשר אמרת לקנות במחיר את־מתת האלהים׃
Act 8:21 אין־לך חלק וגורל בדבר הזה כי לבבך איננו ישר לפני האלהים׃
Act 8:22 ועתה שוב מרעתך זאת והתחנן אל־האלהים אולי תסלח לך מזמת לבבך׃
Act 8:23 כי־ראה אנכי כי־באת בידי מרורת רוש וחרצבות רשע׃
Act 8:24 ויען שמעון ויאמר העתירו אתם בעדי אל־יהוה לבלתי־בוא עלי דבר מכל אשר אמרתם׃
Act 8:25 והמה העידו ודברו את־דבר יהוה וישובו ירושלים ויבשרו את־הבשורה בכפרים רבים אשר לשמרונים׃
Act 8:26 וידבר מלאך־יהוה אל־פילפוס לאמר קום לך הנגבה על־הדרך הירדת מירושלים עזתה והיא חרבה׃
Act 8:27 ויקם וילך והנה איש כושי סריס ושליט לקנדק מלכת־כוש וממנה על־כל־גנזיה אשר עלה אל־ירושלים להשתחות׃
Act 8:28 ויהי בשובו והוא ישב על־מרכבתו וקרא בספר ישעיה הנביא׃
Act 8:29 ויאמר הרוח אל־פילפוס גשה והלוה על־המרכבה הזאת׃
Act 8:30 וירץ פילפוס אליה וישמע אתו קרא בספר ישעיה הנביא ויאמר הגם תבין את־אשר אתה קורא׃
Act 8:31 ויאמר ואיככה אוכל ואין איש אשר יורני ויבקש מאת פילפוס לעלות ולשבת אצלו׃
Act 8:32 וזה ענין הכתוב אשר קרא כשה לטבח יובל וכרחל לפני גוזזיה נאלמה ולא־יפתח פיו׃
Act 8:33 בעצר משפטו לקח ואת־דורו מי ישוחח כי נגזרו מארץ חייו׃
Act 8:34 ויען הסריס ויאמר אל־פילפוס אשאלה ממך על־מי הנביא מדבר את־זאת על־נפשו או על־איש אחר׃
Act 8:35 ויפתח פילפוס את־פיו ויחל מן־הכתוב הזה ויבשר אותו את־ישוע׃
Act 8:36 ויהי בעברם בדרך ויבאו אל־מקום מים ויאמר הסריס הנה־מים מה־ימנעני מהטבל׃
Act 8:37 (ויאמר פילפוס אם־מאמין אתה בכל־לבבך מתר־לך ויען ויאמר אני מאמין כי ישוע המשיח בן־האלהים הוא)׃
Act 8:38 ויצו להעמיד את־המרכבה וירדו שניהם אל־תוך המים פילפוס והסריס ויטבל אותו׃
Act 8:39 ויהי כי עלו מן־המים וישא רוח יהוה את־פילפוס והסריס לא ראהו עוד וילך לדרכו שמח׃
Act 8:40 ופילפוס נמצא באשדוד ויעבר ויבשר בכל־הערים עד־באו לקיסריה׃
Act 9:1 ושאול עודנו יפח זעם ורצח על־תלמידי האדון ויבא אל־הכהן הגדול׃
Act 9:2 וישאל מאתו מכתבים לדמשק אל־בתי כנסיות למען אשר יאסר את־אשר ימצא אחזים בדרך ההיא אנשים או נשים ויביאם ירושלים׃
Act 9:3 ויהי הוא הלך וקרב לדמשק והנה פתאם נגה עליו מסביב אור מן־השמים׃
Act 9:4 ויפל ארצה וישמע קול מדבר אליו שאול שאול למה תרדפני׃
Act 9:5 ויאמר מי אתה אדני ויאמר האדון אנכי ישוע אשר אתה רודף (קשה לך לבעט בדרבנות׃
Act 9:6 והוא חרד ונבעת ויאמר אדני מה־תחפץ ואעשה ויען האדון) קום לך העירה ויאמר לך את־אשר עליך לעשות׃
Act 9:7 והאנשים אשר הלכו אתו עמדו נאלמים כי שמעו את־הקול ואיש לא הביטו׃
Act 9:8 ויקם שאול מן־הארץ ובפתחו את־עיניו לא ראה איש ויחזיקו בידו ויוליכהו לדמשק׃
Act 9:9 ותחשכנה עיניו מראות שלשת ימים ולא אכל ולא שתה׃
Act 9:10 ותלמיד אחד היה בדמשק חנניה שמו ויאמר אליו האדון במחזה חנניה ויאמר הנני אדני׃
Act 9:11 ויאמר אליו האדון קום לך אל־הרחוב הנקרא הישר ושאל בבית יהודה לאיש טרסי ושמו שאול כי הנה־הוא מתפלל׃
Act 9:12 וירא במחזה והנה־איש ושמו חנניה בא החדרה וישם עליו את־ידו למען ישוב ויראה׃
Act 9:13 ויען חנניה ויאמר אדני שמעתי רבים מספרים על־האיש הזה כמה רעות עשה לקדושיך בירושלים׃
Act 9:14 וגם־פה רשות יש־לו מאת ראשי הכהנים לאסר את־כל־הקראים בשמך׃
Act 9:15 ויאמר אליו האדון לך כי־כלי חפץ הוא לי לשאת את־שמי לפני גוים ומלכים ולפני בני ישראל׃
Act 9:16 כי אני אראהו כמה יש־לו לסבל למען שמי׃
Act 9:17 וילך חנניה ויבא הביתה וישם את־ידיו עליו ויאמר שאול אחי האדון ישוע הנראה אליך בדרך אשר־באת בה שלחני למען תפקחנה עיניך ותמלא רוח הקדש׃
Act 9:18 וכרגע נפלו מעל עיניו כמו קשקשים ותפקחנה פתאם ויקם ויטבל׃
Act 9:19 ויאכל לחם ויחזק וישב שאול ימים אחדים עם־התלמידים אשר בדמשק׃
Act 9:20 וימהר ויקרא בבתי כנסיות את־ישוע לאמר כי־הוא בן־האלהים הוא׃
Act 9:21 ויתמהו כל־השמעים ויאמרו הלא זה הוא אשר האביד בירושלים את־קראי השם הזה ולמען זאת בא הנה להביאם אסורים לפני ראשי הכהנים׃
Act 9:22 ושאול היה הולך וחזק ויהם את־היהודים ישבי דמשק בהוכיחו כי־זה הוא המשיח׃
Act 9:23 ויהי כי־ארכו־לו שם הימים ויועצו היהודים יחדו להמיתו׃
Act 9:24 ויודע לשאול ארבם והמה שמרו את־השערים יומם ולילה להמיתו׃
Act 9:25 ויקחו אתו התלמידים לילה ויורידהו בסל בעד החומה׃
Act 9:26 ויהי כבוא שאול ירושלימה ויבקש להלות אל־התלמידים וייראו כלם מפניו ולא האמינו כי־תלמיד הוא׃
Act 9:27 ויקח אתו בר־נבא ויביאהו אל־השליחים ויספר להם את אשר־ראה בדרך את־האדון וכי הוא דבר אליו ואשר השמיע באמץ לבו בדמשק את־שם ישוע׃
Act 9:28 ויהי אתם יוצא ובא בירושלים ויקרא באמץ לבו בשם האדון ישוע׃
Act 9:29 וידבר ויתוכח גם עם־היהודים היונים והם זממו להמיתו׃
Act 9:30 וישמעו האחים ויורידו אתו לקיסריה וישלחהו אל־טרסוס׃
Act 9:31 ויהי שלום לקהלות בכל־מקמות יהודה והגליל ושמרון ותבנינה ותתהלכנה ביראת האדון ותרבינה בנחמת רוח הקדש׃
Act 9:32 ויהי בסבב פטרוס בכל־המקמות וירד גם אל־הקדושים אשר ישבו בלד׃
Act 9:33 וימצא־שם איש שמו אניס והוא שכב על־משכבו זה שמנה שנים והוא נכה אברים׃
Act 9:34 ויאמר אליו פטרוס אניס רפאך ישוע המשיח קום הצע את מטתך אתה ויקם כרגע׃
Act 9:35 ויראו אותו כל־ישבי לד והשרון ויפנו אל־האדון׃
Act 9:36 ותלמידה ביפו ושמה טביתא תרגומו צביה והיא מלאה מעשים טובים וצדקות אשר עשתה׃
Act 9:37 ויהי בימים ההם ותחלה ותמת וירחצו אתה וישימוה בעליה׃
Act 9:38 ולד קרובה היא ליפו וישמעו התלמידים כי פטרוס שם וישלחו אליו שני אנשים ויפצרו־בו לבלתי העצל לעבר אליהם׃
Act 9:39 ויקם פטרוס וילך אתם ובבאו העלהו אל־העליה ותגשנה אליו כל־האלמנות בוכיות ומראות לו את הכתנת ואת הבגדים אשר עשתה צביה בעודה עמהן׃
Act 9:40 ויוצא פטרוס את־כלם החוצה ויכרע על־ברכיו ויתפלל ויפן אל־גויתה ויאמר טביתא קומי ותפתח את־עיניה ותרא את־פטרוס ותתעודד׃
Act 9:41 וישלח ידו ויקם אתה ויקרא את־הקדושים ואת־האלמנות ויעמד אתה חיה לפניהם׃
Act 9:42 ויודע הדבר בכל־יפו ויאמינו רבים באדון׃
Act 9:43 ויואל לשבת ביפו ימים רבים עם־בורסי אחד ושמו שמעון׃