Re'eh (Hebrew)

Devarim 11:26-16:17
Dev 11:26 ראה אנכי נתן לפניכם היום ברכה וקללה׃
Dev 11:27 את־הברכה אשׁר תשׁמעו אל־מצות יהוה אלהיכם אשׁר אנכי מצוה אתכם היום׃
Dev 11:28 והקללה אם־לא תשׁמעו אל־מצות יהוה אלהיכם וסרתם מן־הדרך אשׁר אנכי מצוה אתכם היום ללכת אחרי אלהים אחרים אשׁר לא־ידעתם׃
Dev 11:29 והיה כי יביאך יהוה אלהיך אל־הארץ אשׁר־אתה בא־שׁמה לרשׁתה ונתתה את־הברכה על־הר גרזים ואת־הקללה על־הר עיבל׃
Dev 11:30 הלא־המה בעבר הירדן אחרי דרך מבוא השׁמשׁ בארץ הכנעני הישׁב בערבה מול הגלגל אצל אלוני מרה׃
Dev 11:31 כי אתם עברים את־הירדן לבא לרשׁת את־הארץ אשׁר־יהוה אלהיכם נתן לכם וירשׁתם אתה וישׁבתם־בה׃
Dev 11:32 ושׁמרתם לעשׂות את כל־החקים ואת־המשׁפטים אשׁר אנכי נתן לפניכם היום׃
Dev 12:1 אלה החקים והמשׁפטים אשׁר תשׁמרון לעשׂות בארץ אשׁר נתן יהוה אלהי אבתיך לך לרשׁתה כל־הימים אשׁר־אתם חיים על־האדמה׃
Dev 12:2 אבד תאבדון את־כל־המקמות אשׁר עבדו־שׁם הגוים אשׁר אתם ירשׁים אתם את־אלהיהם על־ההרים הרמים ועל־הגבעות ותחת כל־עץ רענן׃
Dev 12:3 ונתצתם את־מזבחתם ושׁברתם את־מצבתם ואשׁריהם תשׂרפון באשׁ ופסילי אלהיהם תגדעון ואבדתם את־שׁמם מן־המקום ההוא׃
Dev 12:4 לא־תעשׂון כן ליהוה אלהיכם׃
Dev 12:5 כי אם־אל־המקום אשׁר־יבחר יהוה אלהיכם מכל־שׁבטיכם לשׂום את־שׁמו שׁם לשׁכנו תדרשׁו ובאת שׁמה׃
Dev 12:6 והבאתם שׁמה עלתיכם וזבחיכם ואת מעשׂרתיכם ואת תרומת ידכם ונדריכם ונדבתיכם ובכרת בקרכם וצאנכם׃
Dev 12:7 ואכלתם־שׁם לפני יהוה אלהיכם ושׂמחתם בכל משׁלח ידכם אתם ובתיכם אשׁר ברכך יהוה אלהיך׃
Dev 12:8 לא תעשׂון ככל אשׁר אנחנו עשׂים פה היום אישׁ כל־הישׁר בעיניו׃
Dev 12:9 כי לא־באתם עד־עתה אל־המנוחה ואל־הנחלה אשׁר־יהוה אלהיך נתן לך׃
Dev 12:10 ועברתם את־הירדן וישׁבתם בארץ אשׁר־יהוה אלהיכם מנחיל אתכם והניח לכם מכל־איביכם מסביב וישׁבתם־בטח׃
Dev 12:11 והיה המקום אשׁר־יבחר יהוה אלהיכם בו לשׁכן שׁמו שׁם שׁמה תביאו את כל־אשׁר אנכי מצוה אתכם עולתיכם וזבחיכם מעשׂרתיכם ותרמת ידכם וכל מבחר נדריכם אשׁר תדרו ליהוה׃
Dev 12:12 ושׂמחתם לפני יהוה אלהיכם אתם ובניכם ובנתיכם ועבדיכם ואמהתיכם והלוי אשׁר בשׁעריכם כי אין לו חלק ונחלה אתכם׃
Dev 12:13 השׁמר לך פן־תעלה עלתיך בכל־מקום אשׁר תראה׃
Dev 12:14 כי אם־במקום אשׁר־יבחר יהוה באחד שׁבטיך שׁם תעלה עלתיך ושׁם תעשׂה כל אשׁר אנכי מצוך׃
Dev 12:15 רק בכל־אות נפשׁך תזבח ואכלת בשׂר כברכת יהוה אלהיך אשׁר נתן־לך בכל־שׁעריך הטמא והטהור יאכלנו כצבי וכאיל׃
Dev 12:16 רק הדם לא תאכלו על־הארץ תשׁפכנו כמים׃
Dev 12:17 לא־תוכל לאכל בשׁעריך מעשׂר דגנך ותירשׁך ויצהרך ובכרת בקרך וצאנך וכל־נדריך אשׁר תדר ונדבתיך ותרומת ידך׃
Dev 12:18 כי אם־לפני יהוה אלהיך תאכלנו במקום אשׁר יבחר יהוה אלהיך בו אתה ובנך ובתך ועבדך ואמתך והלוי אשׁר בשׁעריך ושׂמחת לפני יהוה אלהיך בכל משׁלח ידך׃
Dev 12:19 השׁמר לך פן־תעזב את־הלוי כל־ימיך על־אדמתך׃
Dev 12:20 כי־ירחיב יהוה אלהיך את־גבלך כאשׁר דבר־לך ואמרת אכלה בשׂר כי־תאוה נפשׁך לאכל בשׂר בכל־אות נפשׁך תאכל בשׂר׃
Dev 12:21 כי־ירחק ממך המקום אשׁר יבחר יהוה אלהיך לשׂום שׁמו שׁם וזבחת מבקרך ומצאנך אשׁר נתן יהוה לך כאשׁר צויתך ואכלת בשׁעריך בכל אות נפשׁך׃
Dev 12:22 אך כאשׁר יאכל את־הצבי ואת־האיל כן תאכלנו הטמא והטהור יחדו יאכלנו׃
Dev 12:23 רק חזק לבלתי אכל הדם כי הדם הוא הנפשׁ ולא־תאכל הנפשׁ עם־הבשׂר׃
Dev 12:24 לא תאכלנו על־הארץ תשׁפכנו כמים׃
Dev 12:25 לא תאכלנו למען ייטב לך ולבניך אחריך כי־תעשׂה הישׁר בעיני יהוה׃
Dev 12:26 רק קדשׁיך אשׁר־יהיו לך ונדריך תשׂא ובאת אל־המקום אשׁר־יבחר יהוה׃
Dev 12:27 ועשׂית עלתיך הבשׂר והדם על־מזבח יהוה אלהיך ודם־זבחיך ישׁפך על־מזבח יהוה אלהיך והבשׂר תאכל׃
Dev 12:28 שׁמר ושׁמעת את כל־הדברים האלה אשׁר אנכי מצוך למען ייטב לך ולבניך אחריך עד־עולם כי תעשׂה הטוב והישׁר בעיני יהוה אלהיך׃
Dev 12:29 כי־יכרית יהוה אלהיך את־הגוים אשׁר אתה בא־שׁמה לרשׁת אותם מפניך וירשׁת אתם וישׁבת בארצם׃
Dev 12:30 השׁמר לך פן־תנקשׁ אחריהם אחרי השׁמדם מפניך ופן־תדרשׁ לאלהיהם לאמר איכה יעבדו הגוים האלה את־אלהיהם ואעשׂה־כן גם־אני׃
Dev 12:31 לא־תעשׂה כן ליהוה אלהיך כי כל־תועבת יהוה אשׁר שׂנא עשׂו לאלהיהם כי גם את־בניהם ואת־בנתיהם ישׂרפו באשׁ לאלהיהם׃
Dev 12:32 (13:1) את כל־הדבר אשׁר אנכי מצוה אתכם אתו תשׁמרו לעשׂות לא־תסף עליו ולא תגרע ממנו׃
Dev 13:1 (13:2) כי־יקום בקרבך נביא או חלם חלום ונתן אליך אות או מופת׃
Dev 13:2 (13:3) ובא האות והמופת אשׁר־דבר אליך לאמר נלכה אחרי אלהים אחרים אשׁר לא־ידעתם ונעבדם׃
Dev 13:3 (13:4) לא תשׁמע אל־דברי הנביא ההוא או אל־חולם החלום ההוא כי מנסה יהוה אלהיכם אתכם לדעת הישׁכם אהבים את־יהוה אלהיכם בכל־לבבכם ובכל־נפשׁכם׃
Dev 13:4 (13:5) אחרי יהוה אלהיכם תלכו ואתו תיראו ואת־מצותיו תשׁמרו ובקלו תשׁמעו ואתו תעבדו ובו תדבקון׃
Dev 13:5 (13:6) והנביא ההוא או חלם החלום ההוא יומת כי דבר־סרה על־יהוה אלהיכם המוציא אתכם מארץ מצרים והפדך מבית עבדים להדיחך מן־הדרך אשׁר צוך יהוה אלהיך ללכת בה ובערת הרע מקרבך׃
Dev 13:6 (13:7) כי יסיתך אחיך בן־אמך או־בנך או־בתך או אשׁת חיקך או רעך אשׁר כנפשׁך בסתר לאמר נלכה ונעבדה אלהים אחרים אשׁר לא ידעת אתה ואבתיך׃
Dev 13:7 (13:8) מאלהי העמים אשׁר סביבתיכם הקרבים אליך או הרחקים ממך מקצה הארץ ועד־קצה הארץ׃
Dev 13:8 (13:9) לא־תאבה לו ולא תשׁמע אליו ולא־תחוס עינך עליו ולא־תחמל ולא־תכסה עליו׃
Dev 13:9 (13:10) כי הרג תהרגנו ידך תהיה־בו בראשׁונה להמיתו ויד כל־העם באחרנה׃
Dev 13:10 (13:11) וסקלתו באבנים ומת כי בקשׁ להדיחך מעל יהוה אלהיך המוציאך מארץ מצרים מבית עבדים׃
Dev 13:11 (13:12) וכל־ישׂראל ישׁמעו ויראון ולא־יוספו לעשׂות כדבר הרע הזה בקרבך׃
Dev 13:12 (13:13) כי־תשׁמע באחת עריך אשׁר יהוה אלהיך נתן לך לשׁבת שׁם לאמר׃
Dev 13:13 (13:14) יצאו אנשׁים בני־בליעל מקרבך וידיחו את־ישׁבי עירם לאמר נלכה ונעבדה אלהים אחרים אשׁר לא־ידעתם׃
Dev 13:14 (13:15) ודרשׁת וחקרת ושׁאלת היטב והנה אמת נכון הדבר נעשׂתה התועבה הזאת בקרבך׃
Dev 13:15 (13:16) הכה תכה את־ישׁבי העיר ההוא לפי־חרב החרם אתה ואת־כל־אשׁר־בה ואת־בהמתה לפי־חרב׃
Dev 13:16 (13:17) ואת־כל־שׁללה תקבץ אל־תוך רחבה ושׂרפת באשׁ את־העיר ואת־כל־שׁללה כליל ליהוה אלהיך והיתה תל עולם לא תבנה עוד׃
Dev 13:17 (13:18) ולא־ידבק בידך מאומה מן־החרם למען ישׁוב יהוה מחרון אפו ונתן־לך רחמים ורחמך והרבך כאשׁר נשׁבע לאבתיך׃
Dev 13:18 (13:19) כי תשׁמע בקול יהוה אלהיך לשׁמר את־כל־מצותיו אשׁר אנכי מצוך היום לעשׂות הישׁר בעיני יהוה אלהיך׃
Dev 14:1 בנים אתם ליהוה אלהיכם לא תתגדדו ולא־תשׂימו קרחה בין עיניכם למת׃
Dev 14:2 כי עם קדושׁ אתה ליהוה אלהיך ובך בחר יהוה להיות לו לעם סגלה מכל העמים אשׁר על־פני האדמה׃
Dev 14:3 לא תאכל כל־תועבה׃
Dev 14:4 זאת הבהמה אשׁר תאכלו שׁור שׂה כשׂבים ושׂה עזים׃
Dev 14:5 איל וצבי ויחמור ואקו ודישׁן ותאו וזמר׃
Dev 14:6 וכל־בהמה מפרסת פרסה ושׁסעת שׁסע שׁתי פרסות מעלת גרה בבהמה אתה תאכלו׃
Dev 14:7 אך את־זה לא תאכלו ממעלי הגרה וממפריסי הפרסה השׁסועה את־הגמל ואת־הארנבת ואת־השׁפן כי־מעלה גרה המה ופרסה לא הפריסו טמאים הם לכם׃
Dev 14:8 ואת־החזיר כי־מפריס פרסה הוא ולא גרה טמא הוא לכם מבשׂרם לא תאכלו ובנבלתם לא תגעו׃
Dev 14:9 את־זה תאכלו מכל אשׁר במים כל אשׁר־לו סנפיר וקשׂקשׂת תאכלו׃
Dev 14:10 וכל אשׁר אין־לו סנפיר וקשׂקשׂת לא תאכלו טמא הוא לכם׃
Dev 14:11 כל־צפור טהרה תאכלו׃
Dev 14:12 וזה אשׁר לא־תאכלו מהם הנשׁר והפרס והעזניה׃
Dev 14:13 והראה ואת־האיה והדיה למינה׃
Dev 14:14 ואת כל־ערב למינו׃
Dev 14:15 ואת בת היענה ואת־התחמס ואת־השׁחף ואת־הנץ למינהו׃
Dev 14:16 את־הכוס ואת־הינשׁוף והתנשׁמת׃
Dev 14:17 והקאת ואת־הרחמה ואת־השׁלך׃
Dev 14:18 והחסידה והאנפה למינה והדוכיפת והעטלף׃
Dev 14:19 וכל שׁרץ העוף טמא הוא לכם לא יאכלו׃
Dev 14:20 כל־עוף טהור תאכלו׃
Dev 14:21 לא תאכלו כל־נבלה לגר אשׁר־בשׁעריך תתננה ואכלה או מכר לנכרי כי עם קדושׁ אתה ליהוה אלהיך לא־תבשׁל גדי בחלב אמו׃
Dev 14:22 עשׂר תעשׂר את כל־תבואת זרעך היצא השׂדה שׁנה שׁנה׃
Dev 14:23 ואכלת לפני יהוה אלהיך במקום אשׁר־יבחר לשׁכן שׁמו שׁם מעשׂר דגנך תירשׁך ויצהרך ובכרת בקרך וצאנך למען תלמד ליראה את־יהוה אלהיך כל־הימים׃
Dev 14:24 וכי־ירבה ממך הדרך כי לא תוכל שׂאתו כי־ירחק ממך המקום אשׁר יבחר יהוה אלהיך לשׂום שׁמו שׁם כי יברכך יהוה אלהיך׃
Dev 14:25 ונתתה בכסף וצרת הכסף בידך והלכת אל־המקום אשׁר יבחר יהוה אלהיך בו׃
Dev 14:26 ונתתה הכסף בכל אשׁר־תאוה נפשׁך בבקר ובצאן וביין ובשׁכר ובכל אשׁר תשׁאלך נפשׁך ואכלת שׁם לפני יהוה אלהיך ושׂמחת אתה וביתך׃
Dev 14:27 והלוי אשׁר־בשׁעריך לא תעזבנו כי אין לו חלק ונחלה עמך׃
Dev 14:28 מקצה שׁלשׁ שׁנים תוציא את־כל־מעשׂר תבואתך בשׁנה ההוא והנחת בשׁעריך׃
Dev 14:29 ובא הלוי כי אין־לו חלק ונחלה עמך והגר והיתום והאלמנה אשׁר בשׁעריך ואכלו ושׂבעו למען יברכך יהוה אלהיך בכל־מעשׂה ידך אשׁר תעשׂה׃
Dev 15:1 מקץ שׁבע־שׁנים תעשׂה שׁמטה׃
Dev 15:2 וזה דבר השׁמטה שׁמוט כל־בעל משׁה ידו אשׁר ישׁה ברעהו לא־יגשׂ את־רעהו ואת־אחיו כי־קרא שׁמטה ליהוה׃
Dev 15:3 את־הנכרי תגשׂ ואשׁר יהיה לך את־אחיך תשׁמט ידך׃
Dev 15:4 אפס כי לא יהיה־בך אביון כי־ברך יברכך יהוה בארץ אשׁר יהוה אלהיך נתן־לך נחלה לרשׁתה׃
Dev 15:5 רק אם־שׁמוע תשׁמע בקול יהוה אלהיך לשׁמר לעשׂות את־כל־המצוה הזאת אשׁר אנכי מצוך היום׃
Dev 15:6 כי־יהוה אלהיך ברכך כאשׁר דבר־לך והעבטת גוים רבים ואתה לא תעבט ומשׁלת בגוים רבים ובך לא ימשׁלו׃
Dev 15:7 כי־יהיה בך אביון מאחד אחיך באחד שׁעריך בארצך אשׁר־יהוה אלהיך נתן לך לא תאמץ את־לבבך ולא תקפץ את־ידך מאחיך האביון׃
Dev 15:8 כי־פתח תפתח את־ידך לו והעבט תעביטנו די מחסרו אשׁר יחסר לו׃
Dev 15:9 השׁמר לך פן־יהיה דבר עם־לבבך בליעל לאמר קרבה שׁנת־השׁבע שׁנת השׁמטה ורעה עינך באחיך האביון ולא תתן לו וקרא עליך אל־יהוה והיה בך חטא׃
Dev 15:10 נתון תתן לו ולא־ירע לבבך בתתך לו כי בגלל הדבר הזה יברכך יהוה אלהיך בכל־מעשׂך ובכל משׁלח ידך׃
Dev 15:11 כי לא־יחדל אביון מקרב הארץ על־כן אנכי מצוך לאמר פתח תפתח את־ידך לאחיך לעניך ולאבינך בארצך׃
Dev 15:12 כי־ימכר לך אחיך העברי או העבריה ועבדך שׁשׁ שׁנים ובשׁנה השׁביעת תשׁלחנו חפשׁי מעמך׃
Dev 15:13 וכי־תשׁלחנו חפשׁי מעמך לא תשׁלחנו ריקם׃
Dev 15:14 העניק תעניק לו מצאנך ומגרנך ומיקבך אשׁר ברכך יהוה אלהיך תתן־לו׃
Dev 15:15 וזכרת כי עבד היית בארץ מצרים ויפדך יהוה אלהיך על־כן אנכי מצוך את־הדבר הזה היום׃
Dev 15:16 והיה כי־יאמר אליך לא אצא מעמך כי אהבך ואת־ביתך כי־טוב לו עמך׃
Dev 15:17 ולקחת את־המרצע ונתתה באזנו ובדלת והיה לך עבד עולם ואף לאמתך תעשׂה־כן׃
Dev 15:18 לא־יקשׁה בעינך בשׁלחך אתו חפשׁי מעמך כי משׁנה שׂכר שׂכיר עבדך שׁשׁ שׁנים וברכך יהוה אלהיך בכל אשׁר תעשׂה׃
Dev 15:19 כל־הבכור אשׁר יולד בבקרך ובצאנך הזכר תקדישׁ ליהוה אלהיך לא תעבד בבכר שׁורך ולא תגז בכור צאנך׃
Dev 15:20 לפני יהוה אלהיך תאכלנו שׁנה בשׁנה במקום אשׁר־יבחר יהוה אתה וביתך׃
Dev 15:21 וכי־יהיה בו מום פסח או עור כל מום רע לא תזבחנו ליהוה אלהיך׃
Dev 15:22 בשׁעריך תאכלנו הטמא והטהור יחדו כצבי וכאיל׃
Dev 15:23 רק את־דמו לא תאכל על־הארץ תשׁפכנו כמים׃
Dev 16:1 שׁמור את־חדשׁ האביב ועשׂית פסח ליהוה אלהיך כי בחדשׁ האביב הוציאך יהוה אלהיך ממצרים לילה׃
Dev 16:2 וזבחת פסח ליהוה אלהיך צאן ובקר במקום אשׁר־יבחר יהוה לשׁכן שׁמו שׁם׃
Dev 16:3 לא־תאכל עליו חמץ שׁבעת ימים תאכל־עליו מצות לחם עני כי בחפזון יצאת מארץ מצרים למען תזכר את־יום צאתך מארץ מצרים כל ימי חייך׃
Dev 16:4 ולא־יראה לך שׂאר בכל־גבלך שׁבעת ימים ולא־ילין מן־הבשׂר אשׁר תזבח בערב ביום הראשׁון לבקר׃
Dev 16:5 לא תוכל לזבח את־הפסח באחד שׁעריך אשׁר־יהוה אלהיך נתן לך׃
Dev 16:6 כי אם־אל־המקום אשׁר־יבחר יהוה אלהיך לשׁכן שׁמו שׁם תזבח את־הפסח בערב כבוא השׁמשׁ מועד צאתך ממצרים׃
Dev 16:7 ובשׁלת ואכלת במקום אשׁר יבחר יהוה אלהיך בו ופנית בבקר והלכת לאהליך׃
Dev 16:8 שׁשׁת ימים תאכל מצות וביום השׁביעי עצרת ליהוה אלהיך לא תעשׂה מלאכה׃
Dev 16:9 שׁבעה שׁבעת תספר־לך מהחל חרמשׁ בקמה תחל לספר שׁבעה שׁבעות׃
Dev 16:10 ועשׂית חג שׁבעות ליהוה אלהיך מסת נדבת ידך אשׁר תתן כאשׁר יברכך יהוה אלהיך׃
Dev 16:11 ושׂמחת לפני יהוה אלהיך אתה ובנך ובתך ועבדך ואמתך והלוי אשׁר בשׁעריך והגר והיתום והאלמנה אשׁר בקרבך במקום אשׁר יבחר יהוה אלהיך לשׁכן שׁמו שׁם׃
Dev 16:12 וזכרת כי־עבד היית במצרים ושׁמרת ועשׂית את־החקים האלה׃
Dev 16:13 חג הסכת תעשׂה לך שׁבעת ימים באספך מגרנך ומיקבך׃
Dev 16:14 ושׂמחת בחגך אתה ובנך ובתך ועבדך ואמתך והלוי והגר והיתום והאלמנה אשׁר בשׁעריך׃
Dev 16:15 שׁבעת ימים תחג ליהוה אלהיך במקום אשׁר־יבחר יהוה כי יברכך יהוה אלהיך בכל תבואתך ובכל מעשׂה ידיך והיית אך שׂמח׃
Dev 16:16 שׁלושׁ פעמים בשׁנה יראה כל־זכורך את־פני יהוה אלהיך במקום אשׁר יבחר בחג המצות ובחג השׁבעות ובחג הסכות ולא יראה את־פני יהוה ריקם׃
Dev 16:17 אישׁ כמתנת ידו כברכת יהוה אלהיך אשׁר נתן־לך׃