Vezot HaBrachah Gospel (Hebrew)

Act 27:1 וכאשר נגמר דיננו לעבר באניה אל־איטליא מסרו את־פולוס ומקצת אסירים אחרים אל־שר המאה לגדוד אגוסטוס ושמו יוליוס׃
Act 27:2 ונרד באניה אדרמטית נכונה ללכת על־פני חוף אסיא ונעבר הימה ויהי אתנו ארסטרכוס מקדון מן־תסלוניקי׃
Act 27:3 וממחרת הגענו לצידון ויוליוס עשה חסד עם־פולוס וינח לו ללכת אל־מידעיו למען ישיבו נפשו׃
Act 27:4 ונלך משם ונעבר בסביבות קיפרוס כי הרוחות היו לנגדנו׃
Act 27:5 ונעבר את־הים אשר לפני קיליקיא ופמפוליא ונבא אל־מורא אשר בלוקיא׃
Act 27:6 וימצא־שם שר המאה אניה אלכסנדרית באה לאיטליא ויעבירנו אל־תוכה׃
Act 27:7 והאניה הלכה בכבדות ימים רבים ואחרי אשר יגענו ובאנו אל־מול קנידוס לא הניחנו הרוח לחתר אל־היבשה ונעבר מצד קריטי על־פני הר סלמוני׃
Act 27:8 ואחרי אשר עברנו בתלאות באנו למקום אחד קלי לימנס שמו וקרובה לו עיר ושמה לסיא׃
Act 27:9 ויהי מקץ ימים רבים הגיעה עת הסכנה לירדי הים כי גם־הצום כבר עבר ויזהר אתם פולוס׃
Act 27:10 ויאמר אליהם אנשים ראה אני כי הליכתנו תהיה אך־זדון ונזק גדול לא למשא ולאניה לבד כי אם־גם לנפשותינו׃
Act 27:11 ושר המאה שמע אל־רב החבל ואל־בעל האניה ואל־דברי פולוס לא שמע׃
Act 27:12 ובאשר החוף לא טוב לעמד־בו בימי הסתו יעצו הרבים לעבר משם כי אמרו אולי נוכל הגיע לפיניכס וישבנו שם בימי הסתו והוא חוף בקריטי פונה לפאת דרום מערבה ולפאת צפון מערבה׃
Act 27:13 ורוח נשבת לאט מן־הדרום והם חשבים שתצלח עצתם ויעלו העוגין ויעברו לעמת שפת אי קריטי׃
Act 27:14 וכמעט אחר כן ותפגע באי רוח נחשל אשר אוריקלידון יקרא לה׃
Act 27:15 ותטרף האניה ולא־יכלה לעמד נגד הרוח ונרף ידינו ממנה וננדף׃
Act 27:16 ותרץ האניה אל־עבר אי־קטן קלודה שמו וכמעט לא יכלנו לאחז העברה׃
Act 27:17 ואחרי משכם אותה אליהם הביאו לעזרתם כל־אשר השיגה ידם ויחבשו את־דפני האניה ומיראתם פן־יפלו אל־בין רכסי החול הורידו את הקלעים ונעבר הלאה׃
Act 27:18 ויהי הסער הולך וסער עלינו וממחרת הטילו את־המשא אל־הים׃
Act 27:19 וביום השלישי הטילו בידיהם את־כלי האניה אל־הים׃
Act 27:20 ויהי ימים רבים גם־השמש גם־הכוכבים לא נראו והסערה חזקה עלינו עד־מאד ותכרת ממנו כל־תקוה׃
Act 27:21 ופולוס עמד בתוכם אחרי האריכם בצום ויאמר אנשים לו שמעתם אלי ולא יצאתם מקריטי כי אז לא קרנו הנזק הזה במריכם׃
Act 27:22 ועתה אני אמר אליכם חזקו ואמצו כי לא־תאבד נפש מכם בלתי האניה לבדה׃
Act 27:23 כי־בלילה הזה נצב עלי מלאך האלהים אשר־לו אנכי ואשר אני עבד אתו׃
Act 27:24 ויאמר אל־תירא פולוס עוד עמוד תעמד לפני קיסר ועתה הנה נתן־לך האלהים את־כל־ההלכים אתך באניה׃
Act 27:25 על־כן אנשים חזקו ואמצו כי מאמין אני לאלהים כי־כן יהיה כאשר נאמר אלי׃
Act 27:26 אך השלך נשלך אל־אחד האיים׃
Act 27:27 ויהי כבוא ליל ארבעה עשר לטלטולנו בים אדריה כחצות הלילה ויחשבו המלחים כי־קרבה להם יבשת׃
Act 27:28 ויורידו את־האנך וימצאו עמק הים עשרים קומה ויעברו מעט ויורידו את־האנך שנית וימצאו קומות חמש עשרה׃
Act 27:29 וייראו פן־יפגעו בשני הסלעים וישליכו מעל־אחורי האניה ארבעה עוגינים אל־הים ויכספו לאור היום׃
Act 27:30 והמלחים בקשו לברח מן־האניה ויורידו את־העברה אל־הים באמרם כי יש את־נפשם לשלח עוגינים גם־מראש האניה׃
Act 27:31 ויאמר פולוס אל־שר המאה ואל־אנשי הצבא לאמר אם־הם לא־יעמדו עתנו באניה לא תוכלו אתם להנצל׃
Act 27:32 ויקצצו אנשי הצבא את־חבלי העברה ויתנוה לנפול׃
Act 27:33 והבקר טרם יאור ויבקש פולוס מכלם לטעם־לחם לאמר היום יום ארבעה עשר אשר חכיתם בצום ולא טעמתם לחם׃
Act 27:34 על־כן קרא אני אתכם לטעם לחם כי הוא לתשועתכם כי איש מכם לא־יפל משערת ראשו ארצה׃
Act 27:35 הוא דבר את־הדברים האלה והוא לקח את־הלחם ויודה לאלהים לפני כלם ויבצע ויחל לאכל׃
Act 27:36 ויאמץ לב כלם ויטעמו־אכל גם־המה׃
Act 27:37 ואנחנו כל־נפש אשר באניה מאתים ושבעים ושש׃
Act 27:38 ויאכלו לשבעה ויקלו מעל־האניה ויטילו את־הצדה אל־הים׃
Act 27:39 הבקר אור והם לא הכירו את־הארץ אבל ראו כמפרץ הים וחוף לו ויועצו לנהג אליו את־האניה אם־יוכלו׃
Act 27:40 ויגדעו את־העוגינים ויעזבום לים ויתירו גם־את־מיתרי המנהיג ויפרשו מפרש התרן אל־פני הרוח ויבקשו לבא אל־החוף׃
Act 27:41 ויפגעו במקום אשר הים משני עבריו ותדבק־בו האניה ותעמד ראשה לא ינוע ואחוריה נשברו משאון הגלים׃
Act 27:42 ותהי עצת אנשי הצבא להמית את־האסירים פן־ישחה איש מהם ונמלט׃
Act 27:43 ושר המאה חפץ להציל את־פולוס וינא את־עצתם ויאמר הידע לשחות ירד ויעבר ליבשה בראשנה והנשארים אלה על־קרשים ואלה על־שברי האניה׃
Act 27:44 ויהי־כן וימלטו כלם אל־היבשה׃
Act 28:1 וכאשר נמלטנו נודע לנו כי־שם האי מליטי׃
Act 28:2 והלעזים לא המעיטו חסדם עמנו כי־בערו אש ויאספו את־כלנו אליהם מפני הגשם היורד ומפני הקר׃
Act 28:3 ופולוס אסף לו ערמת קצים וישם על־המוקד ויצא אפעה מפני החם ויאחז בידו׃
Act 28:4 ויראו הלעזים את־השרץ תלוי על־ידו ויאמרו איש אל־רעהו אכן רצח האיש הזה הנמלט מן־הים ורוח נקם לא־הניח לו לחיות׃
Act 28:5 וינער השרץ מעל ידו אל־תוך האש ולא־הרע לו׃
Act 28:6 והם הוחילו לו אשר יצבה גופו או־יפל מת פתאם ויחילו עד־בוש והנה לא־קרהו כל־אסון ויהפך לבם ויאמרו אלהים הוא׃
Act 28:7 ובסביבי המקום ההוא שדות אשר לראש אנשי האי ושמו פובליוס הוא הביא אתנו לביתו ויכלכל אתנו בטובו שלשת ימים׃
Act 28:8 ואבי פובליוס נופל למשכב בקדחת ובמחלה המעים ויבא אליו פולוס ויתפלל וישם עליו את־ידיו וירפאהו׃
Act 28:9 ואחרי־כן באו גם־החלים האחרים אשר באי וירפאו׃
Act 28:10 ויכבדנו כבוד גדול ובלכתנו משם ספקו לנו די צרכנו׃
Act 28:11 ואחרי שלשת חדשים עברנו משם באניה אלכסנדרית אשר עמדה באי בימי הסתו ואות דגלה התאומים׃
Act 28:12 ונבא אל־סרקוסא ונשב־שם שלשת ימים׃
Act 28:13 משם סבנו ונבא אל־רגיון ובנשב רוח דרומית ביום המחרת באנו ביום השני אל־פוטיולי׃
Act 28:14 ושם מצאנו אחים ויבקשו ממנו לשבת אתם שבעת ימים ובכן הלכנו אל־רומי׃
Act 28:15 וישמעו האחים כי־באים אנחנו ויצאו משם לקראתנו עד לשוק אפיוס ועד לשלשת החניות וירא אתם פולוס ויודה לאלהים ויתחזק׃
Act 28:16 ואחר באנו אל־רומי (העביר שר המאה את־האסירים אל־שר הצבא ו) לפולוס הניחו לשבת לבדו עם־איש הצבא השמר אותו׃
Act 28:17 ויהי מקץ שלשת ימים ויקרא פולוס אליו את־ראשי היהודים ויקהלו אליו ויאמר אליהם אנשים אחים לא מעלתי מעל בעמנו ובחקות אבותינו ויאסרוני בירושלים וימסרוני לידי הרומיים׃
Act 28:18 והם אחרי חקרם אתי אמרו להתירני כי לא־מצאו לי משפט־מות׃
Act 28:19 והיהודים קמו־בי ואהי מכרח לקרא את־קיסר לדיני ואין בלבבי לשטון את־עמי׃
Act 28:20 ובעבור זאת קראתי לכם לראותכם ולדבר עמכם כי בגלל תקות ישראל אסור אני בכבל הזה׃
Act 28:21 ויאמרו אליו לא נתנו לנו אגרות מארץ יהודה על־אדותיך ולא־בא הנה אחד מן־האחים אשר הגיד או־דבר עליך דבר רע׃
Act 28:22 אמנם חפצים אנחנו לשמע את־אשר בלבבך כי נודע לנו אשר בכל מקום יריבו אל־הכת הזאת׃
Act 28:23 וישימו לו מועד ויבאו אליו רבים אל־מלונו ויעד בהם ויבאר את־מלכות אלהים ויוכח להם עניני ישוע מתורת משה ומן־הנביאים מבקר עד־ערב׃
Act 28:24 ויש אשר שמעו אל־דבריו ויש אשר לא האמינו׃
Act 28:25 ויהי כי חלקו בדעתם ויפנו וילכו לדרכם ופולוס מדבר רק הדבר הזה היטב דבר רוח הקדש לאבותינו בפי ישעיהו הנביא לאמר׃
Act 28:26 לך ואמרת לעם הזה שמעו שמוע ואל־תבינו וראו ראו ואל־תדעו׃
Act 28:27 כי שמן לב העם הזה ואזניו כבדו ואת־עניו השע פן־יראה בעיניו ובאזניו ישמע ולבבו יבין ושב ורפאתיו׃
Act 28:28 לכן דעו כי אל־הגוים נשלחה תשועת אלהים והמה ישמעו׃
Act 28:29 (ויהי בדברו זאת ויעברו מעליו היהודים ויתוכחו הרבה איש עם־רעהו)׃
Act 28:30 ופולוס ישב שנתים ימים בביתו אשר שכר־לו ויקבל את כל־הבאים אליו׃
Act 28:31 ויקרא את־מלכות האלהים וילמד את־דרכי ישוע המשיח אדנינו בלי כל־פחד ואין מנע׃