Vezot HaBrachah Haftarah (Hebrew)

Yehoshua 1:1-18
Yeh 1:1 ויהי אחרי מות משׁה עבד יהוה ויאמר יהוה אל־יהושׁע בן־נון משׁרת משׁה לאמר׃
Yeh 1:2 משׁה עבדי מת ועתה קום עבר את־הירדן הזה אתה וכל־העם הזה אל־הארץ אשׁר אנכי נתן להם לבני ישׂראל׃
Yeh 1:3 כל־מקום אשׁר תדרך כף־רגלכם בו לכם נתתיו כאשׁר דברתי אל־משׁה׃
Yeh 1:4 מהמדבר והלבנון הזה ועד־הנהר הגדול נהר־פרת כל ארץ החתים ועד־הים הגדול מבוא השׁמשׁ יהיה גבולכם׃
Yeh 1:5 לא־יתיצב אישׁ לפניך כל ימי חייך כאשׁר הייתי עם־משׁה אהיה עמך לא ארפך ולא אעזבך׃
Yeh 1:6 חזק ואמץ כי אתה תנחיל את־העם הזה את־הארץ אשׁר־נשׁבעתי לאבותם לתת להם׃
Yeh 1:7 רק חזק ואמץ מאד לשׁמר לעשׂות ככל־התורה אשׁר צוך משׁה עבדי אל־תסור ממנו ימין ושׂמאול למען תשׂכיל בכל אשׁר תלך׃
Yeh 1:8 לא־ימושׁ ספר התורה הזה מפיך והגית בו יומם ולילה למען תשׁמר לעשׂות ככל־הכתוב בו כי־אז תצליח את־דרכך ואז תשׂכיל׃
Yeh 1:9 הלוא צויתיך חזק ואמץ אל־תערץ ואל־תחת כי עמך יהוה אלהיך בכל אשׁר תלך׃
Yeh 1:10 ויצו יהושׁע את־שׁטרי העם לאמר׃
Yeh 1:11 עברו בקרב המחנה וצוו את־העם לאמר הכינו לכם צידה כי בעוד שׁלשׁת ימים אתם עברים את־הירדן הזה לבוא לרשׁת את־הארץ אשׁר יהוה אלהיכם נתן לכם לרשׁתה׃
Yeh 1:12 ולראובני ולגדי ולחצי שׁבט המנשׁה אמר יהושׁע לאמר׃
Yeh 1:13 זכור את־הדבר אשׁר צוה אתכם משׁה עבד־יהוה לאמר יהוה אלהיכם מניח לכם ונתן לכם את־הארץ הזאת׃
Yeh 1:14 נשׁיכם טפכם ומקניכם ישׁבו בארץ אשׁר נתן לכם משׁה בעבר הירדן ואתם תעברו חמשׁים לפני אחיכם כל גבורי החיל ועזרתם אותם׃
Yeh 1:15 עד אשׁר־יניח יהוה לאחיכם ככם וירשׁו גם־המה את־הארץ אשׁר־יהוה אלהיכם נתן להם ושׁבתם לארץ ירשׁתכם וירשׁתם אותה אשׁר נתן לכם משׁה עבד יהוה בעבר הירדן מזרח השׁמשׁ׃
Yeh 1:16 ויענו את־יהושׁע לאמר כל אשׁר־צויתנו נעשׂה ואל־כל־אשׁר תשׁלחנו נלך׃
Yeh 1:17 ככל אשׁר־שׁמענו אל־משׁה כן נשׁמע אליך רק יהיה יהוה אלהיך עמך כאשׁר היה עם־משׁה׃
Yeh 1:18 כל־אישׁ אשׁר־ימרה את־פיך ולא־ישׁמע את־דבריך לכל אשׁר־תצונו יומת רק חזק ואמץ׃