Vezot HaBrachah (Hebrew)

Devarim 33:1 - 34:12
Dev 33:1 וזאת הברכה אשׁר ברך משׁה אישׁ האלהים את־בני ישׂראל לפני מותו׃
Dev 33:2 ויאמר יהוה מסיני בא וזרח משׂעיר למו הופיע מהר פארן ואתה מרבבת קדשׁ מימינו אשׁדת למו׃
Dev 33:3 אף חבב עמים כל־קדשׁיו בידך והם תכו לרגלך ישׂא מדברתיך׃
Dev 33:4 תורה צוה־לנו משׁה מורשׁה קהלת יעקב׃
Dev 33:5 ויהי בישׁרון מלך בהתאסף ראשׁי עם יחד שׁבטי ישׂראל׃
Dev 33:6 יחי ראובן ואל־ימת ויהי מתיו מספר׃
Dev 33:7 וזאת ליהודה ויאמר שׁמע יהוה קול יהודה ואל־עמו תביאנו ידיו רב לו ועזר מצריו תהיה׃
Dev 33:8 וללוי אמר תמיך ואוריך לאישׁ חסידך אשׁר נסיתו במסה תריבהו על־מי מריבה׃
Dev 33:9 האמר לאביו ולאמו לא ראיתיו ואת־אחיו לא הכיר ואת־בנו לא ידע כי שׁמרו אמרתך ובריתך ינצרו׃
Dev 33:10 יורו משׁפטיך ליעקב ותורתך לישׂראל ישׂימו קטורה באפך וכליל על־מזבחך׃
Dev 33:11 ברך יהוה חילו ופעל ידיו תרצה מחץ מתנים קמיו ומשׂנאיו מן־יקומון׃
Dev 33:12 לבנימן אמר ידיד יהוה ישׁכן לבטח עליו חפף עליו כל־היום ובין כתפיו שׁכן׃
Dev 33:13 וליוסף אמר מברכת יהוה ארצו ממגד שׁמים מטל ומתהום רבצת תחת׃
Dev 33:14 וממגד תבואת שׁמשׁ וממגד גרשׁ ירחים׃
Dev 33:15 ומראשׁ הררי־קדם וממגד גבעות עולם׃
Dev 33:16 וממגד ארץ ומלאה ורצון שׁכני סנה תבואתה לראשׁ יוסף ולקדקד נזיר אחיו׃
Dev 33:17 בכור שׁורו הדר לו וקרני ראם קרניו בהם עמים ינגח יחדו אפסי־ארץ והם רבבות אפרים והם אלפי מנשׁה׃
Dev 33:18 ולזבולן אמר שׂמח זבולן בצאתך וישׂשכר באהליך׃
Dev 33:19 עמים הר־יקראו שׁם יזבחו זבחי־צדק כי שׁפע ימים יינקו ושׂפני טמוני חול׃
Dev 33:20 ולגד אמר ברוך מרחיב גד כלביא שׁכן וטרף זרוע אף־קדקד׃
Dev 33:21 וירא ראשׁית לו כי־שׁם חלקת מחקק ספון ויתא ראשׁי עם צדקת יהוה עשׂה ומשׁפטיו עם־ישׂראל׃
Dev 33:22 ולדן אמר דן גור אריה יזנק מן־הבשׁן׃
Dev 33:23 ולנפתלי אמר נפתלי שׂבע רצון ומלא ברכת יהוה ים ודרום ירשׁה׃
Dev 33:24 ולאשׁר אמר ברוך מבנים אשׁר יהי רצוי אחיו וטבל בשׁמן רגלו׃
Dev 33:25 ברזל ונחשׁת מנעלך וכימיך דבאך׃
Dev 33:26 אין כאל ישׁרון רכב שׁמים בעזרך ובגאותו שׁחקים׃
Dev 33:27 מענה אלהי קדם ומתחת זרעת עולם ויגרשׁ מפניך אויב ויאמר השׁמד׃
Dev 33:28 וישׁכן ישׂראל בטח בדד עין יעקב אל־ארץ דגן ותירושׁ אף־שׁמיו יערפו טל׃
Dev 33:29 אשׁריך ישׂראל מי כמוך עם נושׁע ביהוה מגן עזרך ואשׁר־חרב גאותך ויכחשׁו איביך לך ואתה על־במותימו תדרך׃
Dev 34:1 ויעל משׁה מערבת מואב אל־הר נבו ראשׁ הפסגה אשׁר על־פני ירחו ויראהו יהוה את־כל־הארץ את־הגלעד עד־דן׃
Dev 34:2 ואת כל־נפתלי ואת־ארץ אפרים ומנשׁה ואת כל־ארץ יהודה עד הים האחרון׃
Dev 34:3 ואת־הנגב ואת־הככר בקעת ירחו עיר התמרים עד־צער׃
Dev 34:4 ויאמר יהוה אליו זאת הארץ אשׁר נשׁבעתי לאברהם ליצחק וליעקב לאמר לזרעך אתננה הראיתיך בעיניך ושׁמה לא תעבר׃
Dev 34:5 וימת שׁם משׁה עבד־יהוה בארץ מואב על־פי יהוה׃
Dev 34:6 ויקבר אתו בגי בארץ מואב מול בית פעור ולא־ידע אישׁ את־קברתו עד היום הזה׃
Dev 34:7 ומשׁה בן־מאה ועשׂרים שׁנה במתו לא־כהתה עינו ולא־נס לחה׃
Dev 34:8 ויבכו בני ישׂראל את־משׁה בערבת מואב שׁלשׁים יום ויתמו ימי בכי אבל משׁה׃
Dev 34:9 ויהושׁע בן־נון מלא רוח חכמה כי־סמך משׁה את־ידיו עליו וישׁמעו אליו בני־ישׂראל ויעשׂו כאשׁר צוה יהוה את־משׁה׃
Dev 34:10 ולא־קם נביא עוד בישׂראל כמשׁה אשׁר ידעו יהוה פנים אל־פנים׃
Dev 34:11 לכל־האתת והמופתים אשׁר שׁלחו יהוה לעשׂות בארץ מצרים לפרעה ולכל־עבדיו ולכל־ארצו׃
Dev 34:12 ולכל היד החזקה ולכל המורא הגדול אשׁר עשׂה משׁה לעיני כל־ישׂראל׃