Chayei Sarah Haftarah (Hebrew)

Melachim Aleph 1:1-31
Melachim Aleph 1:1 והמלך דוד זקן בא בימים ויכסהו בבגדים ולא יחם לו׃
Melachim Aleph 1:2 ויאמרו לו עבדיו יבקשׁו לאדני המלך נערה בתולה ועמדה לפני המלך ותהי־לו סכנת ושׁכבה בחיקך וחם לאדני המלך׃
Melachim Aleph 1:3 ויבקשׁו נערה יפה בכל גבול ישׂראל וימצאו את־אבישׁג השׁונמית ויבאו אתה למלך׃
Melachim Aleph 1:4 והנערה יפה עד־מאד ותהי למלך סכנת ותשׁרתהו והמלך לא ידעה׃
Melachim Aleph 1:5 ואדניה בן־חגית מתנשׂא לאמר אני אמלך ויעשׂ לו רכב ופרשׁים וחמשׁים אישׁ רצים לפניו׃
Melachim Aleph 1:6 ולא־עצבו אביו מימיו לאמר מדוע ככה עשׂית וגם־הוא טוב־תאר מאד ואתו ילדה אחרי אבשׁלום׃
Melachim Aleph 1:7 ויהיו דבריו עם יואב בן־צרויה ועם אביתר הכהן ויעזרו אחרי אדניה׃
Melachim Aleph 1:8 וצדוק הכהן ובניהו בן־יהוידע ונתן הנביא ושׁמעי ורעי והגבורים אשׁר לדוד לא היו עם־אדניהו׃
Melachim Aleph 1:9 ויזבח אדניהו צאן ובקר ומריא עם אבן הזחלת אשׁר־אצל עין רגל ויקרא את־כל־אחיו בני המלך ולכל־אנשׁי יהודה עבדי המלך׃
Melachim Aleph 1:10 ואת־נתן הנביא ובניהו ואת־הגבורים ואת־שׁלמה אחיו לא קרא׃
Melachim Aleph 1:11 ויאמר נתן אל־בת־שׁבע אם־שׁלמה לאמר הלוא שׁמעת כי מלך אדניהו בן־חגית ואדנינו דוד לא ידע׃
Melachim Aleph 1:12 ועתה לכי איעצך נא עצה ומלטי את־נפשׁך ואת־נפשׁ בנך שׁלמה׃
Melachim Aleph 1:13 לכי ובאי אל־המלך דוד ואמרת אליו הלא־אתה אדני המלך נשׁבעת לאמתך לאמר כי־שׁלמה בנך ימלך אחרי והוא ישׁב על־כסאי ומדוע מלך אדניהו׃
Melachim Aleph 1:14 הנה עודך מדברת שׁם עם־המלך ואני אבוא אחריך ומלאתי את־דבריך׃
Melachim Aleph 1:15 ותבא בת־שׁבע אל־המלך החדרה והמלך זקן מאד ואבישׁג השׁונמית משׁרת את־המלך׃
Melachim Aleph 1:16 ותקד בת־שׁבע ותשׁתחו למלך ויאמר המלך מה־לך׃
Melachim Aleph 1:17 ותאמר לו אדני אתה נשׁבעת ביהוה אלהיך לאמתך כי־שׁלמה בנך ימלך אחרי והוא ישׁב על־כסאי׃
Melachim Aleph 1:18 ועתה הנה אדניה מלך ועתה אדני המלך לא ידעת׃
Melachim Aleph 1:19 ויזבח שׁור ומריא־וצאן לרב ויקרא לכל־בני המלך ולאביתר הכהן וליאב שׂר הצבא ולשׁלמה עבדך לא קרא׃
Melachim Aleph 1:20 ואתה אדני המלך עיני כל־ישׂראל עליך להגיד להם מי ישׁב על־כסא אדני־המלך אחריו׃
Melachim Aleph 1:21 והיה כשׁכב אדני־המלך עם־אבתיו והייתי אני ובני שׁלמה חטאים׃
Melachim Aleph 1:22 והנה עודנה מדברת עם־המלך ונתן הנביא בא׃
Melachim Aleph 1:23 ויגידו למלך לאמר הנה נתן הנביא ויבא לפני המלך וישׁתחו למלך על־אפיו ארצה׃
Melachim Aleph 1:24 ויאמר נתן אדני המלך אתה אמרת אדניהו ימלך אחרי והוא ישׁב על־כסאי׃
Melachim Aleph 1:25 כי ירד היום ויזבח שׁור ומריא־וצאן לרב ויקרא לכל־בני המלך ולשׂרי הצבא ולאביתר הכהן והנם אכלים ושׁתים לפניו ויאמרו יחי המלך אדניהו׃
Melachim Aleph 1:26 ולי אני־עבדך ולצדק הכהן ולבניהו בן־יהוידע ולשׁלמה עבדך לא קרא׃
Melachim Aleph 1:27 אם מאת אדני המלך נהיה הדבר הזה ולא הודעת את־עבדיך מי ישׁב על־כסא אדני־המלך אחריו׃
Melachim Aleph 1:28 ויען המלך דוד ויאמר קראו־לי לבת־שׁבע ותבא לפני המלך ותעמד לפני המלך׃
Melachim Aleph 1:29 וישׁבע המלך ויאמר חי־יהוה אשׁר־פדה את־נפשׁי מכל־צרה׃
Melachim Aleph 1:30 כי כאשׁר נשׁבעתי לך ביהוה אלהי ישׂראל לאמר כי־שׁלמה בנך ימלך אחרי והוא ישׁב על־כסאי תחתי כי כן אעשׂה היום הזה׃
Melachim Aleph 1:31 ותקד בת־שׁבע אפים ארץ ותשׁתחו למלך ותאמר יחי אדני המלך דוד לעלם׃