Chayei Sarah (Hebrew)

B'reisheet 23:1-25:18
B’reisheet 23:1 ויהיו חיי שׂרה מאה שׁנה ועשׂרים שׁנה ושׁבע שׁנים שׁני חיי שׂרה׃
B’reisheet 23:2 ותמת שׂרה בקרית ארבע הוא חברון בארץ כנען ויבא אברהם לספד לשׂרה ולבכתה׃
B’reisheet 23:3 ויקם אברהם מעל פני מתו וידבר אל־בני־חת לאמר׃
B’reisheet 23:4 גר־ותושׁב אנכי עמכם תנו לי אחזת־קבר עמכם ואקברה מתי מלפני׃
B’reisheet 23:5 ויענו בני־חת את־אברהם לאמר לו׃
B’reisheet 23:6 שׁמענו אדני נשׂיא אלהים אתה בתוכנו במבחר קברינו קבר את־מתך אישׁ ממנו את־קברו לא־יכלה ממך מקבר מתך׃
B’reisheet 23:7 ויקם אברהם וישׁתחו לעם־הארץ לבני־חת׃
B’reisheet 23:8 וידבר אתם לאמר אם־ישׁ את־נפשׁכם לקבר את־מתי מלפני שׁמעוני ופגעו־לי בעפרון בן־צחר׃
B’reisheet 23:9 ויתן־לי את־מערת המכפלה אשׁר־לו אשׁר בקצה שׂדהו בכסף מלא יתננה לי בתוככם לאחזת־קבר׃
B’reisheet 23:10 ועפרון ישׁב בתוך בני־חת ויען עפרון החתי את־אברהם באזני בני־חת לכל באי שׁער־עירו לאמר׃
B’reisheet 23:11 לא־אדני שׁמעני השׂדה נתתי לך והמערה אשׁר־בו לך נתתיה לעיני בני־עמי נתתיה לך קבר מתך׃
B’reisheet 23:12 וישׁתחו אברהם לפני עם הארץ׃
B’reisheet 23:13 וידבר אל־עפרון באזני עם־הארץ לאמר אך אם־אתה לו שׁמעני נתתי כסף השׂדה קח ממני ואקברה את־מתי שׁמה׃
B’reisheet 23:14 ויען עפרון את־אברהם לאמר לו׃
B’reisheet 23:15 אדני שׁמעני ארץ ארבע מאת שׁקל־כסף ביני ובינך מה־הוא ואת־מתך קבר׃
B’reisheet 23:16 וישׁמע אברהם אל־עפרון וישׁקל אברהם לעפרן את־הכסף אשׁר דבר באזני בני־חת ארבע מאות שׁקל כסף עבר לסחר׃
B’reisheet 23:17 ויקם שׂדה עפרון אשׁר במכפלה אשׁר לפני ממרא השׂדה והמערה אשׁר־בו וכל־העץ אשׁר בשׂדה אשׁר בכל־גבלו סביב׃
B’reisheet 23:18 לאברהם למקנה לעיני בני־חת בכל באי שׁער־עירו׃
B’reisheet 23:19 ואחרי־כן קבר אברהם את־שׂרה אשׁתו אל־מערת שׂדה המכפלה על־פני ממרא הוא חברון בארץ כנען׃
B’reisheet 23:20 ויקם השׂדה והמערה אשׁר־בו לאברהם לאחזת־קבר מאת בני־חת׃
B’reisheet 24:1 ואברהם זקן בא בימים ויהוה ברך את־אברהם בכל׃
B’reisheet 24:2 ויאמר אברהם אל־עבדו זקן ביתו המשׁל בכל־אשׁר־לו שׂים־נא ידך תחת ירכי׃
B’reisheet 24:3 ואשׁביעך ביהוה אלהי השׁמים ואלהי הארץ אשׁר לא־תקח אשׁה לבני מבנות הכנעני אשׁר אנכי יושׁב בקרבו׃
B’reisheet 24:4 כי אל־ארצי ואל־מולדתי תלך ולקחת אשׁה לבני ליצחק׃
B’reisheet 24:5 ויאמר אליו העבד אולי לא־תאבה האשׁה ללכת אחרי אל־הארץ הזאת ההשׁב אשׁיב את־בנך אל־הארץ אשׁר־יצאת משׁם׃
B’reisheet 24:6 ויאמר אליו אברהם השׁמר לך פן־תשׁיב את־בני שׁמה׃
B’reisheet 24:7 יהוה אלהי השׁמים אשׁר לקחני מבית אבי ומארץ מולדתי ואשׁר דבר־לי ואשׁר נשׁבע־לי לאמר לזרעך אתן את־הארץ הזאת הוא ישׁלח מלאכו לפניך ולקחת אשׁה לבני משׁם׃
B’reisheet 24:8 ואם־לא תאבה האשׁה ללכת אחריך ונקית משׁבעתי זאת רק את־בני לא תשׁב שׁמה׃
B’reisheet 24:9 וישׂם העבד את־ידו תחת ירך אברהם אדניו וישׁבע לו על־הדבר הזה׃
B’reisheet 24:10 ויקח העבד עשׂרה גמלים מגמלי אדניו וילך וכל־טוב אדניו בידו ויקם וילך אל־ארם נהרים אל־עיר נחור׃
B’reisheet 24:11 ויברך הגמלים מחוץ לעיר אל־באר המים לעת ערב לעת צאת השׁאבת׃
B’reisheet 24:12 ויאמר יהוה אלהי אדני אברהם הקרה־נא לפני היום ועשׂה־חסד עם אדני אברהם׃
B’reisheet 24:13 הנה אנכי נצב על־עין המים ובנות אנשׁי העיר יצאת לשׁאב מים׃
B’reisheet 24:14 והיה הנער אשׁר אמר אליה הטי־נא כדך ואשׁתה ואמרה שׁתה וגם־גמליך אשׁקה אתה הכחת לעבדך ליצחק ובה אדע כי־עשׂית חסד עם־אדני׃
B’reisheet 24:15 ויהי־הוא טרם כלה לדבר והנה רבקה יצאת אשׁר ילדה לבתואל בן־מלכה אשׁת נחור אחי אברהם וכדה על־שׁכמה׃
B’reisheet 24:16 והנער טבת מראה מאד בתולה ואישׁ לא ידעה ותרד העינה ותמלא כדה ותעל׃
B’reisheet 24:17 וירץ העבד לקראתה ויאמר הגמיאיני נא מעט־מים מכדך׃
B’reisheet 24:18 ותאמר שׁתה אדני ותמהר ותרד כדה על־ידה ותשׁקהו׃
B’reisheet 24:19 ותכל להשׁקתו ותאמר גם לגמליך אשׁאב עד אם־כלו לשׁתת׃
B’reisheet 24:20 ותמהר ותער כדה אל־השׁקת ותרץ עוד אל־הבאר לשׁאב ותשׁאב לכל־גמליו׃
B’reisheet 24:21 והאישׁ משׁתאה לה מחרישׁ לדעת ההצליח יהוה דרכו אם־לא׃
B’reisheet 24:22 ויהי כאשׁר כלו הגמלים לשׁתות ויקח האישׁ נזם זהב בקע משׁקלו ושׁני צמידים על־ידיה עשׂרה זהב משׁקלם׃
B’reisheet 24:23 ויאמר בת־מי את הגידי נא לי הישׁ בית־אביך מקום לנו ללין׃
B’reisheet 24:24 ותאמר אליו בת־בתואל אנכי בן־מלכה אשׁר ילדה לנחור׃
B’reisheet 24:25 ותאמר אליו גם־תבן גם־מספוא רב עמנו גם־מקום ללון׃
B’reisheet 24:26 ויקד האישׁ וישׁתחו ליהוה׃
B’reisheet 24:27 ויאמר ברוך יהוה אלהי אדני אברהם אשׁר לא־עזב חסדו ואמתו מעם אדני אנכי בדרך נחני יהוה בית אחי אדני׃
B’reisheet 24:28 ותרץ הנער ותגד לבית אמה כדברים האלה׃
B’reisheet 24:29 ולרבקה אח ושׁמו לבן וירץ לבן אל־האישׁ החוצה אל־העין׃
B’reisheet 24:30 ויהי כראת את־הנזם ואת־הצמדים על־ידי אחתו וכשׁמעו את־דברי רבקה אחתו לאמר כה־דבר אלי האישׁ ויבא אל־האישׁ והנה עמד על־הגמלים על־העין׃
B’reisheet 24:31 ויאמר בוא ברוך יהוה למה תעמד בחוץ ואנכי פניתי הבית ומקום לגמלים׃
B’reisheet 24:32 ויבא האישׁ הביתה ויפתח הגמלים ויתן תבן ומספוא לגמלים ומים לרחץ רגליו ורגלי האנשׁים אשׁר אתו׃
B’reisheet 24:33 ויישׂם לפניו לאכל ויאמר לא אכל עד אם־דברתי דברי ויאמר דבר׃
B’reisheet 24:34 ויאמר עבד אברהם אנכי׃
B’reisheet 24:35 ויהוה ברך את־אדני מאד ויגדל ויתן־לו צאן ובקר וכסף וזהב ועבדם ושׁפחת וגמלים וחמרים׃
B’reisheet 24:36 ותלד שׂרה אשׁת אדני בן לאדני אחרי זקנתה ויתן־לו את־כל־אשׁר־לו׃
B’reisheet 24:37 וישׁבעני אדני לאמר לא־תקח אשׁה לבני מבנות הכנעני אשׁר אנכי ישׁב בארצו׃
B’reisheet 24:38 אם־לא אל־בית־אבי תלך ואל־משׁפחתי ולקחת אשׁה לבני׃
B’reisheet 24:39 ואמר אל־אדני אלי לא־תלך האשׁה אחרי׃
B’reisheet 24:40 ויאמר אלי יהוה אשׁר־התהלכתי לפניו ישׁלח מלאכו אתך והצליח דרכך ולקחת אשׁה לבני ממשׁפחתי ומבית אבי׃
B’reisheet 24:41 אז תנקה מאלתי כי תבוא אל־משׁפחתי ואם־לא יתנו לך והיית נקי מאלתי׃
B’reisheet 24:42 ואבא היום אל־העין ואמר יהוה אלהי אדני אברהם אם־ישׁך־נא מצליח דרכי אשׁר אנכי הלך עליה׃
B’reisheet 24:43 הנה אנכי נצב על־עין המים והיה העלמה היצאת לשׁאב ואמרתי אליה השׁקיני־נא מעט־מים מכדך׃
B’reisheet 24:44 ואמרה אלי גם־אתה שׁתה וגם לגמליך אשׁאב הוא האשׁה אשׁר־הכיח יהוה לבן־אדני׃
B’reisheet 24:45 אני טרם אכלה לדבר אל־לבי והנה רבקה יצאת וכדה על־שׁכמה ותרד העינה ותשׁאב ואמר אליה השׁקיני נא׃
B’reisheet 24:46 ותמהר ותורד כדה מעליה ותאמר שׁתה וגם־גמליך אשׁקה ואשׁת וגם הגמלים השׁקתה׃
B’reisheet 24:47 ואשׁאל אתה ואמר בת־מי את ותאמר בת־בתואל בן־נחור אשׁר ילדה־לו מלכה ואשׂם הנזם על־אפה והצמידים על־ידיה׃
B’reisheet 24:48 ואקד ואשׁתחוה ליהוה ואברך את־יהוה אלהי אדני אברהם אשׁר הנחני בדרך אמת לקחת את־בת־אחי אדני לבנו׃
B’reisheet 24:49 ועתה אם־ישׁכם עשׂים חסד ואמת את־אדני הגידו לי ואם־לא הגידו לי ואפנה על־ימין או על־שׂמאל׃
B’reisheet 24:50 ויען לבן ובתואל ויאמרו מיהוה יצא הדבר לא נוכל דבר אליך רע או־טוב׃
B’reisheet 24:51 הנה־רבקה לפניך קח ולך ותהי אשׁה לבן־אדניך כאשׁר דבר יהוה׃
B’reisheet 24:52 ויהי כאשׁר שׁמע עבד אברהם את־דבריהם וישׁתחו ארצה ליהוה׃
B’reisheet 24:53 ויוצא העבד כלי־כסף וכלי זהב ובגדים ויתן לרבקה ומגדנת נתן לאחיה ולאמה׃
B’reisheet 24:54 ויאכלו וישׁתו הוא והאנשׁים אשׁר־עמו וילינו ויקומו בבקר ויאמר שׁלחני לאדני׃
B’reisheet 24:55 ויאמר אחיה ואמה תשׁב הנער אתנו ימים או עשׂור אחר תלך׃
B’reisheet 24:56 ויאמר אלהם אל־תאחרו אתי ויהוה הצליח דרכי שׁלחוני ואלכה לאדני׃
B’reisheet 24:57 ויאמרו נקרא לנער ונשׁאלה את־פיה׃
B’reisheet 24:58 ויקראו לרבקה ויאמרו אליה התלכי עם־האישׁ הזה ותאמר אלך׃
B’reisheet 24:59 וישׁלחו את־רבקה אחתם ואת־מנקתה ואת־עבד אברהם ואת־אנשׁיו׃
B’reisheet 24:60 ויברכו את־רבקה ויאמרו לה אחתנו את היי לאלפי רבבה ויירשׁ זרעך את שׁער שׂנאיו׃
B’reisheet 24:61 ותקם רבקה ונערתיה ותרכבנה על־הגמלים ותלכנה אחרי האישׁ ויקח העבד את־רבקה וילך׃
B’reisheet 24:62 ויצחק בא מבוא באר לחי ראי והוא יושׁב בארץ הנגב׃
B’reisheet 24:63 ויצא יצחק לשׂוח בשׂדה לפנות ערב וישׂא עיניו וירא והנה גמלים באים׃
B’reisheet 24:64 ותשׂא רבקה את־עיניה ותרא את־יצחק ותפל מעל הגמל׃
B’reisheet 24:65 ותאמר אל־העבד מי־האישׁ הלזה ההלך בשׂדה לקראתנו ויאמר העבד הוא אדני ותקח הצעיף ותתכס׃
B’reisheet 24:66 ויספר העבד ליצחק את כל־הדברים אשׁר עשׂה׃
B’reisheet 24:67 ויבאה יצחק האהלה שׂרה אמו ויקח את־רבקה ותהי־לו לאשׁה ויאהבה וינחם יצחק אחרי אמו׃
B’reisheet 25:1 ויסף אברהם ויקח אשׁה ושׁמה קטורה׃
B’reisheet 25:2 ותלד לו את־זמרן ואת־יקשׁן ואת־מדן ואת־מדין ואת־ישׁבק ואת־שׁוח׃
B’reisheet 25:3 ויקשׁן ילד את־שׁבא ואת־דדן ובני דדן היו אשׁורם ולטושׁם ולאמים׃
B’reisheet 25:4 ובני מדין עיפה ועפר וחנך ואבידע ואלדעה כל־אלה בני קטורה׃
B’reisheet 25:5 ויתן אברהם את־כל־אשׁר־לו ליצחק׃
B’reisheet 25:6 ולבני הפילגשׁים אשׁר לאברהם נתן אברהם מתנת וישׁלחם מעל יצחק בנו בעודנו חי קדמה אל־ארץ קדם׃
B’reisheet 25:7 ואלה ימי שׁני־חיי אברהם אשׁר־חי מאת שׁנה ושׁבעים שׁנה וחמשׁ שׁנים׃
B’reisheet 25:8 ויגוע וימת אברהם בשׂיבה טובה זקן ושׂבע ויאסף אל־עמיו׃
B’reisheet 25:9 ויקברו אתו יצחק וישׁמעאל בניו אל־מערת המכפלה אל־שׂדה עפרן בן־צחר החתי אשׁר על־פני ממרא׃
B’reisheet 25:10 השׂדה אשׁר־קנה אברהם מאת בני־חת שׁמה קבר אברהם ושׂרה אשׁתו׃
B’reisheet 25:11 ויהי אחרי מות אברהם ויברך אלהים את־יצחק בנו וישׁב יצחק עם־באר לחי ראי׃
B’reisheet 25:12 ואלה תלדת ישׁמעאל בן־אברהם אשׁר ילדה הגר המצרית שׁפחת שׂרה לאברהם׃
B’reisheet 25:13 ואלה שׁמות בני ישׁמעאל בשׁמתם לתולדתם בכר ישׁמעאל נבית וקדר ואדבאל ומבשׂם׃
B’reisheet 25:14 ומשׁמע ודומה ומשׂא׃
B’reisheet 25:15 חדד ותימא יטור נפישׁ וקדמה׃
B’reisheet 25:16 אלה הם בני ישׁמעאל ואלה שׁמתם בחצריהם ובטירתם שׁנים־עשׂר נשׂיאם לאמתם׃
B’reisheet 25:17 ואלה שׁני חיי ישׁמעאל מאת שׁנה ושׁלשׁים שׁנה ושׁבע שׁנים ויגוע וימת ויאסף אל־עמיו׃
B’reisheet 25:18 וישׁכנו מחוילה עד־שׁור אשׁר על־פני מצרים באכה אשׁורה על־פני כל־אחיו נפל׃