Vayera Haftarah (Hebrew)

Melachim Bet 4:1 ואשׁה אחת מנשׁי בני־הנביאים צעקה אל־אלישׁע לאמר עבדך אישׁי מת ואתה ידעת כי עבדך היה ירא את־יהוה והנשׁה בא לקחת את־שׁני ילדי לו לעבדים׃
Melachim Bet 4:2 ויאמר אליה אלישׁע מה אעשׂה־לך הגידי לי מה־ישׁ־לכי בבית ותאמר אין לשׁפחתך כל בבית כי אם־אסוך שׁמן׃
Melachim Bet 4:3 ויאמר לכי שׁאלי־לך כלים מן־החוץ מאת כל־שׁכנכי כלים רקים אל־תמעיטי׃
Melachim Bet 4:4 ובאת וסגרת הדלת בעדך ובעד־בניך ויצקת על כל־הכלים האלה והמלא תסיעי׃
Melachim Bet 4:5 ותלך מאתו ותסגר הדלת בעדה ובעד בניה הם מגשׁים אליה והיא מיצקת׃
Melachim Bet 4:6 ויהי כמלאת הכלים ותאמר אל־בנה הגישׁה אלי עוד כלי ויאמר אליה אין עוד כלי ויעמד השׁמן׃
Melachim Bet 4:7 ותבא ותגד לאישׁ האלהים ויאמר לכי מכרי את־השׁמן ושׁלמי את־נשׁיכי ואת בניכי תחיי בנותר׃
Melachim Bet 4:8 ויהי היום ויעבר אלישׁע אל־שׁונם ושׁם אשׁה גדולה ותחזק־בו לאכל־לחם ויהי מדי עברו יסר שׁמה לאכל־לחם׃
Melachim Bet 4:9 ותאמר אל־אישׁה הנה־נא ידעתי כי אישׁ אלהים קדושׁ הוא עבר עלינו תמיד׃
Melachim Bet 4:10 נעשׂה־נא עלית־קיר קטנה ונשׂים לו שׁם מטה ושׁלחן וכסא ומנורה והיה בבאו אלינו יסור שׁמה׃
Melachim Bet 4:11 ויהי היום ויבא שׁמה ויסר אל־העליה וישׁכב־שׁמה׃
Melachim Bet 4:12 ויאמר אל־גחזי נערו קרא לשׁונמית הזאת ויקרא־לה ותעמד לפניו׃
Melachim Bet 4:13 ויאמר לו אמר־נא אליה הנה חרדת אלינו את־כל־החרדה הזאת מה לעשׂות לך הישׁ לדבר־לך אל־המלך או אל־שׂר הצבא ותאמר בתוך עמי אנכי ישׁבת׃
Melachim Bet 4:14 ויאמר ומה לעשׂות לה ויאמר גיחזי אבל בן אין־לה ואישׁה זקן׃
Melachim Bet 4:15 ויאמר קרא־לה ויקרא־לה ותעמד בפתח׃
Melachim Bet 4:16 ויאמר למועד הזה כעת חיה אתי חבקת בן ותאמר אל־אדני אישׁ האלהים אל־תכזב בשׁפחתך׃
Melachim Bet 4:17 ותהר האשׁה ותלד בן למועד הזה כעת חיה אשׁר־דבר אליה אלישׁע׃
Melachim Bet 4:18 ויגדל הילד ויהי היום ויצא אל־אביו אל־הקצרים׃
Melachim Bet 4:19 ויאמר אל־אביו ראשׁי ראשׁי ויאמר אל־הנער שׂאהו אל־אמו׃
Melachim Bet 4:20 וישׂאהו ויביאהו אל־אמו וישׁב על־ברכיה עד־הצהרים וימת׃
Melachim Bet 4:21 ותעל ותשׁכבהו על־מטת אישׁ האלהים ותסגר בעדו ותצא׃
Melachim Bet 4:22 ותקרא אל־אישׁה ותאמר שׁלחה נא לי אחד מן־הנערים ואחת האתנות וארוצה עד־אישׁ האלהים ואשׁובה׃
Melachim Bet 4:23 ויאמר מדוע אתי הלכתי אליו היום לא־חדשׁ ולא שׁבת ותאמר שׁלום׃
Melachim Bet 4:24 ותחבשׁ האתון ותאמר אל־נערה נהג ולך אל־תעצר־לי לרכב כי אם־אמרתי לך׃
Melachim Bet 4:25 ותלך ותבוא אל־אישׁ האלהים אל־הר הכרמל ויהי כראות אישׁ־האלהים אתה מנגד ויאמר אל־גיחזי נערו הנה השׁונמית הלז׃
Melachim Bet 4:26 עתה רוץ־נא לקראתה ואמר־לה השׁלום לך השׁלום לאישׁך השׁלום לילד ותאמר שׁלום׃
Melachim Bet 4:27 ותבא אל־אישׁ האלהים אל־ההר ותחזק ברגליו ויגשׁ גיחזי להדפה ויאמר אישׁ האלהים הרפה־לה כי־נפשׁה מרה־לה ויהוה העלים ממני ולא הגיד לי׃
Melachim Bet 4:28 ותאמר השׁאלתי בן מאת אדני הלא אמרתי לא תשׁלה אתי׃
Melachim Bet 4:29 ויאמר לגיחזי חגר מתניך וקח משׁענתי בידך ולך כי־תמצא אישׁ לא תברכנו וכי־יברכך אישׁ לא תעננו ושׂמת משׁענתי על־פני הנער׃
Melachim Bet 4:30 ותאמר אם הנער חי־יהוה וחי־נפשׁך אם־אעזבך ויקם וילך אחריה׃
Melachim Bet 4:31 וגחזי עבר לפניהם וישׂם את־המשׁענת על־פני הנער ואין קול ואין קשׁב וישׁב לקראתו ויגד־לו לאמר לא הקיץ הנער׃
Melachim Bet 4:32 ויבא אלישׁע הביתה והנה הנער מת משׁכב על־מטתו׃
Melachim Bet 4:33 ויבא ויסגר הדלת בעד שׁניהם ויתפלל אל־יהוה׃
Melachim Bet 4:34 ויעל וישׁכב על־הילד וישׂם פיו על־פיו ועיניו על־עיניו וכפיו על־כפו ויגהר עליו ויחם בשׂר הילד׃
Melachim Bet 4:35 וישׁב וילך בבית אחת הנה ואחת הנה ויעל ויגהר עליו ויזורר הנער עד־שׁבע פעמים ויפקח הנער את־עיניו׃
Melachim Bet 4:36 ויקרא אל־גיחזי ויאמר קרא אל־השׁנמית הזאת ויקראה ותבוא אליו ויאמר שׂאי בנך׃
Melachim Bet 4:37 ותבא ותפל על־רגליו ותשׁתחו ארצה ותשׂא את־בנה ותצא׃