Vayera (Hebrew)

B'reisheet 18:1-22:24
B’reisheet 18:1 וירא אליו יהוה באלני ממרא והוא ישׁב פתח־האהל כחם היום׃
B’reisheet 18:2 וישׂא עיניו וירא והנה שׁלשׁה אנשׁים נצבים עליו וירא וירץ לקראתם מפתח האהל וישׁתחו ארצה׃
B’reisheet 18:3 ויאמר אדני אם־נא מצאתי חן בעיניך אל־נא תעבר מעל עבדך׃
B’reisheet 18:4 יקח־נא מעט־מים ורחצו רגליכם והשׁענו תחת העץ׃
B’reisheet 18:5 ואקחה פת־לחם וסעדו לבכם אחר תעברו כי־על־כן עברתם על־עבדכם ויאמרו כן תעשׂה כאשׁר דברת׃
B’reisheet 18:6 וימהר אברהם האהלה אל־שׂרה ויאמר מהרי שׁלשׁ סאים קמח סלת לושׁי ועשׂי עגות׃
B’reisheet 18:7 ואל־הבקר רץ אברהם ויקח בן־בקר רך וטוב ויתן אל־הנער וימהר לעשׂות אתו׃
B’reisheet 18:8 ויקח חמאה וחלב ובן־הבקר אשׁר עשׂה ויתן לפניהם והוא־עמד עליהם תחת העץ ויאכלו׃
B’reisheet 18:9 ויאמרו אליו איה שׂרה אשׁתך ויאמר הנה באהל׃
B’reisheet 18:10 ויאמר שׁוב אשׁוב אליך כעת חיה והנה־בן לשׂרה אשׁתך ושׂרה שׁמעת פתח האהל והוא אחריו׃
B’reisheet 18:11 ואברהם ושׂרה זקנים באים בימים חדל להיות לשׂרה ארח כנשׁים׃
B’reisheet 18:12 ותצחק שׂרה בקרבה לאמר אחרי בלתי היתה־לי עדנה ואדני זקן׃
B’reisheet 18:13 ויאמר יהוה אל־אברהם למה זה צחקה שׂרה לאמר האף אמנם אלד ואני זקנתי׃
B’reisheet 18:14 היפלא מיהוה דבר למועד אשׁוב אליך כעת חיה ולשׂרה בן׃
B’reisheet 18:15 ותכחשׁ שׂרה לאמר לא צחקתי כי יראה ויאמר לא כי צחקת׃
B’reisheet 18:16 ויקמו משׁם האנשׁים וישׁקפו על־פני סדם ואברהם הלך עמם לשׁלחם׃
B’reisheet 18:17 ויהוה אמר המכסה אני מאברהם אשׁר אני עשׂה׃
B’reisheet 18:18 ואברהם היו יהיה לגוי גדול ועצום ונברכו בו כל גויי הארץ׃
B’reisheet 18:19 כי ידעתיו למען אשׁר יצוה את־בניו ואת־ביתו אחריו ושׁמרו דרך יהוה לעשׂות צדקה ומשׁפט למען הביא יהוה על־אברהם את אשׁר־דבר עליו׃
B’reisheet 18:20 ויאמר יהוה זעקת סדם ועמרה כי־רבה וחטאתם כי כבדה מאד׃
B’reisheet 18:21 ארדה־נא ואראה הכצעקתה הבאה אלי עשׂו כלה ואם־לא אדעה׃
B’reisheet 18:22 ויפנו משׁם האנשׁים וילכו סדמה ואברהם עודנו עמד לפני יהוה׃
B’reisheet 18:23 ויגשׁ אברהם ויאמר האף תספה צדיק עם־רשׁע׃
B’reisheet 18:24 אולי ישׁ חמשׁים צדיקם בתוך העיר האף תספה ולא־תשׂא למקום למען חמשׁים הצדיקם אשׁר בקרבה׃
B’reisheet 18:25 חללה לך מעשׂת כדבר הזה להמית צדיק עם־רשׁע והיה כצדיק כרשׁע חללה לך השׁפט כל־הארץ לא יעשׂה משׁפט׃
B’reisheet 18:26 ויאמר יהוה אם־אמצא בסדם חמשׁים צדיקם בתוך העיר ונשׂאתי לכל־המקום בעבורם׃
B’reisheet 18:27 ויען אברהם ויאמר הנה־נא הואלתי לדבר אל־אדני ואנכי עפר ואפר׃
B’reisheet 18:28 אולי יחסרון חמשׁים הצדיקם חמשׁה התשׁחית בחמשׁה את־כל־העיר ויאמר לא אשׁחית אם־אמצא שׁם ארבעים וחמשׁה׃
B’reisheet 18:29 ויסף עוד לדבר אליו ויאמר אולי ימצאון שׁם ארבעים ויאמר לא אעשׂה בעבור הארבעים׃
B’reisheet 18:30 ויאמר אל־נא יחר לאדני ואדברה אולי ימצאון שׁם שׁלשׁים ויאמר לא אעשׂה אם־אמצא שׁם שׁלשׁים׃
B’reisheet 18:31 ויאמר הנה־נא הואלתי לדבר אל־אדני אולי ימצאון שׁם עשׂרים ויאמר לא אשׁחית בעבור העשׂרים׃
B’reisheet 18:32 ויאמר אל־נא יחר לאדני ואדברה אך־הפעם אולי ימצאון שׁם עשׂרה ויאמר לא אשׁחית בעבור העשׂרה׃
B’reisheet 18:33 וילך יהוה כאשׁר כלה לדבר אל־אברהם ואברהם שׁב למקמו׃
B’reisheet 19:1 ויבאו שׁני המלאכים סדמה בערב ולוט ישׁב בשׁער־סדם וירא־לוט ויקם לקראתם וישׁתחו אפים ארצה׃
B’reisheet 19:2 ויאמר הנה נא־אדני סורו נא אל־בית עבדכם ולינו ורחצו רגליכם והשׁכמתם והלכתם לדרככם ויאמרו לא כי ברחוב נלין׃
B’reisheet 19:3 ויפצר־בם מאד ויסרו אליו ויבאו אל־ביתו ויעשׂ להם משׁתה ומצות אפה ויאכלו׃
B’reisheet 19:4 טרם ישׁכבו ואנשׁי העיר אנשׁי סדם נסבו על־הבית מנער ועד־זקן כל־העם מקצה׃
B’reisheet 19:5 ויקראו אל־לוט ויאמרו לו איה האנשׁים אשׁר־באו אליך הלילה הוציאם אלינו ונדעה אתם׃
B’reisheet 19:6 ויצא אלהם לוט הפתחה והדלת סגר אחריו׃
B’reisheet 19:7 ויאמר אל־נא אחי תרעו׃
B’reisheet 19:8 הנה־נא לי שׁתי בנות אשׁר לא־ידעו אישׁ אוציאה־נא אתהן אליכם ועשׂו להן כטוב בעיניכם רק לאנשׁים האל אל־תעשׂו דבר כי־על־כן באו בצל קרתי׃
B’reisheet 19:9 ויאמרו גשׁ־הלאה ויאמרו האחד בא־לגור וישׁפט שׁפוט עתה נרע לך מהם ויפצרו באישׁ בלוט מאד ויגשׁו לשׁבר הדלת׃
B’reisheet 19:10 וישׁלחו האנשׁים את־ידם ויביאו את־לוט אליהם הביתה ואת־הדלת סגרו׃
B’reisheet 19:11 ואת־האנשׁים אשׁר־פתח הבית הכו בסנורים מקטן ועד־גדול וילאו למצא הפתח׃
B’reisheet 19:12 ויאמרו האנשׁים אל־לוט עד מי־לך פה חתן ובניך ובנתיך וכל אשׁר־לך בעיר הוצא מן־המקום׃
B’reisheet 19:13 כי־משׁחתים אנחנו את־המקום הזה כי־גדלה צעקתם את־פני יהוה וישׁלחנו יהוה לשׁחתה׃
B’reisheet 19:14 ויצא לוט וידבר אל־חתניו לקחי בנתיו ויאמר קומו צאו מן־המקום הזה כי־משׁחית יהוה את־העיר ויהי כמצחק בעיני חתניו׃
B’reisheet 19:15 וכמו השׁחר עלה ויאיצו המלאכים בלוט לאמר קום קח את־אשׁתך ואת־שׁתי בנתיך הנמצאת פן־תספה בעון העיר׃
B’reisheet 19:16 ויתמהמה ויחזיקו האנשׁים בידו וביד־אשׁתו וביד שׁתי בנתיו בחמלת יהוה עליו ויצאהו וינחהו מחוץ לעיר׃
B’reisheet 19:17 ויהי כהוציאם אתם החוצה ויאמר המלט על־נפשׁך אל־תביט אחריך ואל־תעמד בכל־הככר ההרה המלט פן־תספה׃
B’reisheet 19:18 ויאמר לוט אלהם אל־נא אדני׃
B’reisheet 19:19 הנה־נא מצא עבדך חן בעיניך ותגדל חסדך אשׁר עשׂית עמדי להחיות את־נפשׁי ואנכי לא אוכל להמלט ההרה פן־תדבקני הרעה ומתי׃
B’reisheet 19:20 הנה־נא העיר הזאת קרבה לנוס שׁמה והוא מצער אמלטה נא שׁמה הלא מצער הוא ותחי נפשׁי׃
B’reisheet 19:21 ויאמר אליו הנה נשׂאתי פניך גם לדבר הזה לבלתי הפכי את־העיר אשׁר דברת׃
B’reisheet 19:22 מהר המלט שׁמה כי לא אוכל לעשׂות דבר עד־באך שׁמה על־כן קרא שׁם־העיר צוער׃
B’reisheet 19:23 השׁמשׁ יצא על־הארץ ולוט בא צערה׃
B’reisheet 19:24 ויהוה המטיר על־סדם ועל־עמרה גפרית ואשׁ מאת יהוה מן־השׁמים׃
B’reisheet 19:25 ויהפך את־הערים האל ואת כל־הככר ואת כל־ישׁבי הערים וצמח האדמה׃
B’reisheet 19:26 ותבט אשׁתו מאחריו ותהי נציב מלח׃
B’reisheet 19:27 וישׁכם אברהם בבקר אל־המקום אשׁר־עמד שׁם את־פני יהוה׃
B’reisheet 19:28 וישׁקף על־פני סדם ועמרה ועל־כל־פני ארץ הככר וירא והנה עלה קיטר הארץ כקיטר הכבשׁן׃
B’reisheet 19:29 ויהי בשׁחת אלהים את־ערי הככר ויזכר אלהים את־אברהם וישׁלח את־לוט מתוך ההפכה בהפך את־הערים אשׁר־ישׁב בהן לוט׃
B’reisheet 19:30 ויעל לוט מצוער וישׁב בהר ושׁתי בנתיו עמו כי ירא לשׁבת בצוער וישׁב במערה הוא ושׁתי בנתיו׃
B’reisheet 19:31 ותאמר הבכירה אל־הצעירה אבינו זקן ואישׁ אין בארץ לבוא עלינו כדרך כל־הארץ׃
B’reisheet 19:32 לכה נשׁקה את־אבינו יין ונשׁכבה עמו ונחיה מאבינו זרע׃
B’reisheet 19:33 ותשׁקין את־אביהן יין בלילה הוא ותבא הבכירה ותשׁכב את־אביה ולא־ידע בשׁכבה ובקומה׃
B’reisheet 19:34 ויהי ממחרת ותאמר הבכירה אל־הצעירה הן־שׁכבתי אמשׁ את־אבי נשׁקנו יין גם־הלילה ובאי שׁכבי עמו ונחיה מאבינו זרע׃
B’reisheet 19:35 ותשׁקין גם בלילה ההוא את־אביהן יין ותקם הצעירה ותשׁכב עמו ולא־ידע בשׁכבה ובקמה׃
B’reisheet 19:36 ותהרין שׁתי בנות־לוט מאביהן׃
B’reisheet 19:37 ותלד הבכירה בן ותקרא שׁמו מואב הוא אבי־מואב עד־היום׃
B’reisheet 19:38 והצעירה גם־הוא ילדה בן ותקרא שׁמו בן־עמי הוא אבי בני־עמון עד־היום׃
B’reisheet 20:1 ויסע משׁם אברהם ארצה הנגב וישׁב בין־קדשׁ ובין שׁור ויגר בגרר׃
B’reisheet 20:2 ויאמר אברהם אל־שׂרה אשׁתו אחתי הוא וישׁלח אבימלך מלך גרר ויקח את־שׂרה׃
B’reisheet 20:3 ויבא אלהים אל־אבימלך בחלום הלילה ויאמר לו הנך מת על־האשׁה אשׁר־לקחת והוא בעלת בעל׃
B’reisheet 20:4 ואבימלך לא קרב אליה ויאמר אדני הגוי גם־צדיק תהרג׃
B’reisheet 20:5 הלא הוא אמר־לי אחתי הוא והיא־גם־הוא אמרה אחי הוא בתם־לבבי ובנקין כפי עשׂיתי זאת׃
B’reisheet 20:6 ויאמר אליו האלהים בחלם גם אנכי ידעתי כי בתם־לבבך עשׂית זאת ואחשׂך גם־אנכי אותך מחטו־לי על־כן לא־נתתיך לנגע אליה׃
B’reisheet 20:7 ועתה השׁב אשׁת־האישׁ כי־נביא הוא ויתפלל בעדך וחיה ואם־אינך משׁיב דע כי־מות תמות אתה וכל־אשׁר־לך׃
B’reisheet 20:8 וישׁכם אבימלך בבקר ויקרא לכל־עבדיו וידבר את־כל־הדברים האלה באזניהם וייראו האנשׁים מאד׃
B’reisheet 20:9 ויקרא אבימלך לאברהם ויאמר לו מה־עשׂית לנו ומה־חטאתי לך כי־הבאת עלי ועל־ממלכתי חטאה גדלה מעשׂים אשׁר לא־יעשׂו עשׂית עמדי׃
B’reisheet 20:10 ויאמר אבימלך אל־אברהם מה ראית כי עשׂית את־הדבר הזה׃
B’reisheet 20:11 ויאמר אברהם כי אמרתי רק אין־יראת אלהים במקום הזה והרגוני על־דבר אשׁתי׃
B’reisheet 20:12 וגם־אמנה אחתי בת־אבי הוא אך לא בת־אמי ותהי־לי לאשׁה׃
B’reisheet 20:13 ויהי כאשׁר התעו אתי אלהים מבית אבי ואמר לה זה חסדך אשׁר תעשׂי עמדי אל כל־המקום אשׁר נבוא שׁמה אמרי־לי אחי הוא׃
B’reisheet 20:14 ויקח אבימלך צאן ובקר ועבדים ושׁפחת ויתן לאברהם וישׁב לו את שׂרה אשׁתו׃
B’reisheet 20:15 ויאמר אבימלך הנה ארצי לפניך בטוב בעיניך שׁב׃
B’reisheet 20:16 ולשׂרה אמר הנה נתתי אלף כסף לאחיך הנה הוא־לך כסות עינים לכל אשׁר אתך ואת כל ונכחת׃
B’reisheet 20:17 ויתפלל אברהם אל־האלהים וירפא אלהים את־אבימלך ואת־אשׁתו ואמהתיו וילדו׃
B’reisheet 20:18 כי־עצר עצר יהוה בעד כל־רחם לבית אבימלך על־דבר שׂרה אשׁת אברהם׃
B’reisheet 21:1 ויהוה פקד את־שׂרה כאשׁר אמר ויעשׂ יהוה לשׂרה כאשׁר דבר׃
B’reisheet 21:2 ותהר ותלד שׂרה לאברהם בן לזקניו למועד אשׁר־דבר אתו אלהים׃
B’reisheet 21:3 ויקרא אברהם את־שׁם־בנו הנולד־לו אשׁר־ילדה־לו שׂרה יצחק׃
B’reisheet 21:4 וימל אברהם את־יצחק בנו בן־שׁמנת ימים כאשׁר צוה אתו אלהים׃
B’reisheet 21:5 ואברהם בן־מאת שׁנה בהולד לו את יצחק בנו׃
B’reisheet 21:6 ותאמר שׂרה צחק עשׂה לי אלהים כל־השׁמע יצחק־לי׃
B’reisheet 21:7 ותאמר מי מלל לאברהם היניקה בנים שׂרה כי־ילדתי בן לזקניו׃
B’reisheet 21:8 ויגדל הילד ויגמל ויעשׂ אברהם משׁתה גדול ביום הגמל את־יצחק׃
B’reisheet 21:9 ותרא שׂרה את־בן־הגר המצרית אשׁר־ילדה לאברהם מצחק׃
B’reisheet 21:10 ותאמר לאברהם גרשׁ האמה הזאת ואת־בנה כי לא יירשׁ בן־האמה הזאת עם־בני עם־יצחק׃
B’reisheet 21:11 וירע הדבר מאד בעיני אברהם על אודת בנו׃
B’reisheet 21:12 ויאמר אלהים אל־אברהם אל־ירע בעיניך על־הנער ועל־אמתך כל אשׁר תאמר אליך שׂרה שׁמע בקלה כי ביצחק יקרא לך זרע׃
B’reisheet 21:13 וגם את־בן־האמה לגוי אשׂימנו כי זרעך הוא׃
B’reisheet 21:14 וישׁכם אברהם בבקר ויקח־לחם וחמת מים ויתן אל־הגר שׂם על־שׁכמה ואת־הילד וישׁלחה ותלך ותתע במדבר באר שׁבע׃
B’reisheet 21:15 ויכלו המים מן־החמת ותשׁלך את־הילד תחת אחד השׂיחם׃
B’reisheet 21:16 ותלך ותשׁב לה מנגד הרחק כמטחוי קשׁת כי אמרה אל־אראה במות הילד ותשׁב מנגד ותשׂא את־קלה ותבך׃
B’reisheet 21:17 וישׁמע אלהים את־קול הנער ויקרא מלאך אלהים אל־הגר מן־השׁמים ויאמר לה מה־לך הגר אל־תיראי כי־שׁמע אלהים אל־קול הנער באשׁר הוא־שׁם׃
B’reisheet 21:18 קומי שׂאי את־הנער והחזיקי את־ידך בו כי־לגוי גדול אשׂימנו׃
B’reisheet 21:19 ויפקח אלהים את־עיניה ותרא באר מים ותלך ותמלא את־החמת מים ותשׁק את־הנער׃
B’reisheet 21:20 ויהי אלהים את־הנער ויגדל וישׁב במדבר ויהי רבה קשׁת׃
B’reisheet 21:21 וישׁב במדבר פארן ותקח־לו אמו אשׁה מארץ מצרים׃
B’reisheet 21:22 ויהי בעת ההוא ויאמר אבימלך ופיכל שׂר־צבאו אל־אברהם לאמר אלהים עמך בכל אשׁר־אתה עשׂה׃
B’reisheet 21:23 ועתה השׁבעה לי באלהים הנה אם־תשׁקר לי ולניני ולנכדי כחסד אשׁר־עשׂיתי עמך תעשׂה עמדי ועם־הארץ אשׁר־גרתה בה׃
B’reisheet 21:24 ויאמר אברהם אנכי אשׁבע׃
B’reisheet 21:25 והוכח אברהם את־אבימלך על־אדות באר המים אשׁר גזלו עבדי אבימלך׃
B’reisheet 21:26 ויאמר אבימלך לא ידעתי מי עשׂה את־הדבר הזה וגם־אתה לא־הגדת לי וגם אנכי לא שׁמעתי בלתי היום׃
B’reisheet 21:27 ויקח אברהם צאן ובקר ויתן לאבימלך ויכרתו שׁניהם ברית׃
B’reisheet 21:28 ויצב אברהם את־שׁבע כבשׂת הצאן לבדהן׃
B’reisheet 21:29 ויאמר אבימלך אל־אברהם מה הנה שׁבע כבשׂת האלה אשׁר הצבת לבדנה׃
B’reisheet 21:30 ויאמר כי את־שׁבע כבשׂת תקח מידי בעבור תהיה־לי לעדה כי חפרתי את־הבאר הזאת׃
B’reisheet 21:31 על־כן קרא למקום ההוא באר שׁבע כי שׁם נשׁבעו שׁניהם׃
B’reisheet 21:32 ויכרתו ברית בבאר שׁבע ויקם אבימלך ופיכל שׂר־צבאו וישׁבו אל־ארץ פלשׁתים׃
B’reisheet 21:33 ויטע אשׁל בבאר שׁבע ויקרא־שׁם בשׁם יהוה אל עולם׃
B’reisheet 21:34 ויגר אברהם בארץ פלשׁתים ימים רבים׃
B’reisheet 22:1 ויהי אחר הדברים האלה והאלהים נסה את־אברהם ויאמר אליו אברהם ויאמר הנני׃
B’reisheet 22:2 ויאמר קח־נא את־בנך את־יחידך אשׁר־אהבת את־יצחק ולך־לך אל־ארץ המריה והעלהו שׁם לעלה על אחד ההרים אשׁר אמר אליך׃
B’reisheet 22:3 וישׁכם אברהם בבקר ויחבשׁ את־חמרו ויקח את־שׁני נעריו אתו ואת יצחק בנו ויבקע עצי עלה ויקם וילך אל־המקום אשׁר־אמר־לו האלהים׃
B’reisheet 22:4 ביום השׁלישׁי וישׂא אברהם את־עיניו וירא את־המקום מרחק׃
B’reisheet 22:5 ויאמר אברהם אל־נעריו שׁבו־לכם פה עם־החמור ואני והנער נלכה עד־כה ונשׁתחוה ונשׁובה אליכם׃
B’reisheet 22:6 ויקח אברהם את־עצי העלה וישׂם על־יצחק בנו ויקח בידו את־האשׁ ואת־המאכלת וילכו שׁניהם יחדו׃
B’reisheet 22:7 ויאמר יצחק אל־אברהם אביו ויאמר אבי ויאמר הנני בני ויאמר הנה האשׁ והעצים ואיה השׂה לעלה׃
B’reisheet 22:8 ויאמר אברהם אלהים יראה־לו השׂה לעלה בני וילכו שׁניהם יחדו׃
B’reisheet 22:9 ויבאו אל־המקום אשׁר אמר־לו האלהים ויבן שׁם אברהם את־המזבח ויערך את־העצים ויעקד את־יצחק בנו וישׂם אתו על־המזבח ממעל לעצים׃
B’reisheet 22:10 וישׁלח אברהם את־ידו ויקח את־המאכלת לשׁחט את־בנו׃
B’reisheet 22:11 ויקרא אליו מלאך יהוה מן־השׁמים ויאמר אברהם אברהם ויאמר הנני׃
B’reisheet 22:12 ויאמר אל־תשׁלח ידך אל־הנער ואל־תעשׂ לו מאומה כי עתה ידעתי כי־ירא אלהים אתה ולא חשׂכת את־בנך את־יחידך ממני׃
B’reisheet 22:13 וישׂא אברהם את־עיניו וירא והנה־איל אחר נאחז בסבך בקרניו וילך אברהם ויקח את־האיל ויעלהו לעלה תחת בנו׃
B’reisheet 22:14 ויקרא אברהם שׁם־המקום ההוא יהוה יראה אשׁר יאמר היום בהר יהוה יראה׃
B’reisheet 22:15 ויקרא מלאך יהוה אל־אברהם שׁנית מן־השׁמים׃
B’reisheet 22:16 ויאמר בי נשׁבעתי נאם־יהוה כי יען אשׁר עשׂית את־הדבר הזה ולא חשׂכת את־בנך את־יחידך׃
B’reisheet 22:17 כי־ברך אברכך והרבה ארבה את־זרעך ככוכבי השׁמים וכחול אשׁר על־שׂפת הים וירשׁ זרעך את שׁער איביו׃
B’reisheet 22:18 והתברכו בזרעך כל גויי הארץ עקב אשׁר שׁמעת בקלי׃
B’reisheet 22:19 וישׁב אברהם אל־נעריו ויקמו וילכו יחדו אל־באר שׁבע וישׁב אברהם בבאר שׁבע׃
B’reisheet 22:20 ויהי אחרי הדברים האלה ויגד לאברהם לאמר הנה ילדה מלכה גם־הוא בנים לנחור אחיך׃
B’reisheet 22:21 את־עוץ בכרו ואת־בוז אחיו ואת־קמואל אבי ארם׃
B’reisheet 22:22 ואת־כשׂד ואת־חזו ואת־פלדשׁ ואת־ידלף ואת בתואל׃
B’reisheet 22:23 ובתואל ילד את־רבקה שׁמנה אלה ילדה מלכה לנחור אחי אברהם׃
B’reisheet 22:24 ופילגשׁו ושׁמה ראומה ותלד גם־הוא את־טבח ואת־גחם ואת־תחשׁ ואת־מעכה׃