Toldot Haftarah (Hebrew)

Mal'aki 1:1 - 2:7
Mal 1:1 משׂא דבר־יהוה אל־ישׂראל ביד מלאכי׃
Mal 1:2 אהבתי אתכם אמר יהוה ואמרתם במה אהבתנו הלוא־אח עשׂו ליעקב נאם־יהוה ואהב את־יעקב׃
Mal 1:3 ואת־עשׂו שׂנאתי ואשׂים את־הריו שׁממה ואת־נחלתו לתנות מדבר׃
Mal 1:4 כי־תאמר אדום רשׁשׁנו ונשׁוב ונבנה חרבות כה אמר יהוה צבאות המה יבנו ואני אהרוס וקראו להם גבול רשׁעה והעם אשׁר־זעם יהוה עד־עולם׃
Mal 1:5 ועיניכם תראינה ואתם תאמרו יגדל יהוה מעל לגבול ישׂראל׃
Mal 1:6 בן יכבד אב ועבד אדניו ואם־אב אני איה כבודי ואם־אדונים אני איה מוראי אמר יהוה צבאות לכם הכהנים בוזי שׁמי ואמרתם במה בזינו את־שׁמך׃
Mal 1:7 מגישׁים על־מזבחי לחם מגאל ואמרתם במה גאלנוך באמרכם שׁלחן יהוה נבזה הוא׃
Mal 1:8 וכי־תגשׁון עור לזבח אין רע וכי תגישׁו פסח וחלה אין רע הקריבהו נא לפחתך הירצך או הישׂא פניך אמר יהוה צבאות׃
Mal 1:9 ועתה חלו־נא פני־אל ויחננו מידכם היתה זאת הישׂא מכם פנים אמר יהוה צבאות׃
Mal 1:10 מי גם־בכם ויסגר דלתים ולא־תאירו מזבחי חנם אין־לי חפץ בכם אמר יהוה צבאות ומנחה לא־ארצה מידכם׃
Mal 1:11 כי ממזרח־שׁמשׁ ועד־מבואו גדול שׁמי בגוים ובכל־מקום מקטר מגשׁ לשׁמי ומנחה טהורה כי־גדול שׁמי בגוים אמר יהוה צבאות׃
Mal 1:12 ואתם מחללים אותו באמרכם שׁלחן אדני מגאל הוא וניבו נבזה אכלו׃
Mal 1:13 ואמרתם הנה מתלאה והפחתם אותו אמר יהוה צבאות והבאתם גזול ואת־הפסח ואת־החולה והבאתם את־המנחה הארצה אותה מידכם אמר יהוה׃
Mal 1:14 וארור נוכל וישׁ בעדרו זכר ונדר וזבח משׁחת לאדני כי מלך גדול אני אמר יהוה צבאות ושׁמי נורא בגוים׃
Mal 2:1 ועתה אליכם המצוה הזאת הכהנים׃
Mal 2:2 אם־לא תשׁמעו ואם־לא תשׂימו על־לב לתת כבוד לשׁמי אמר יהוה צבאות ושׁלחתי בכם את־המארה וארותי את־ברכותיכם וגם ארותיה כי אינכם שׂמים על־לב׃
Mal 2:3 הנני גער לכם את־הזרע וזריתי פרשׁ על־פניכם פרשׁ חגיכם ונשׂא אתכם אליו׃
Mal 2:4 וידעתם כי שׁלחתי אליכם את המצוה הזאת להיות בריתי את־לוי אמר יהוה צבאות׃
Mal 2:5 בריתי היתה אתו החיים והשׁלום ואתנם־לו מורא וייראני ומפני שׁמי נחת הוא׃
Mal 2:6 תורת אמת היתה בפיהו ועולה לא־נמצא בשׂפתיו בשׁלום ובמישׁור הלך אתי ורבים השׁיב מעון׃
Mal 2:7 כי־שׂפתי כהן ישׁמרו־דעת ותורה יבקשׁו מפיהו כי מלאך יהוה־צבאות הוא׃