Toldot (Hebrew)

B'reisheet 25:19 - 28:9
B’reisheet 25:19 ואלה תולדת יצחק בן־אברהם אברהם הוליד את־יצחק׃
B’reisheet 25:20 ויהי יצחק בן־ארבעים שׁנה בקחתו את־רבקה בת־בתואל הארמי מפדן ארם אחות לבן הארמי לו לאשׁה׃
B’reisheet 25:21 ויעתר יצחק ליהוה לנכח אשׁתו כי עקרה הוא ויעתר לו יהוה ותהר רבקה אשׁתו׃
B’reisheet 25:22 ויתרצצו הבנים בקרבה ותאמר אם־כן למה זה אנכי ותלך לדרשׁ את־יהוה׃
B’reisheet 25:23 ויאמר יהוה לה שׁני גיים בבטנך ושׁני לאמים ממעיך יפרדו ולאם מלאם יאמץ ורב יעבד צעיר׃
B’reisheet 25:24 וימלאו ימיה ללדת והנה תומם בבטנה׃
B’reisheet 25:25 ויצא הראשׁון אדמוני כלו כאדרת שׂער ויקראו שׁמו עשׂו׃
B’reisheet 25:26 ואחרי־כן יצא אחיו וידו אחזת בעקב עשׂו ויקרא שׁמו יעקב ויצחק בן־שׁשׁים שׁנה בלדת אתם׃
B’reisheet 25:27 ויגדלו הנערים ויהי עשׂו אישׁ ידע ציד אישׁ שׂדה ויעקב אישׁ תם ישׁב אהלים׃
B’reisheet 25:28 ויאהב יצחק את־עשׂו כי־ציד בפיו ורבקה אהבת את־יעקב׃
B’reisheet 25:29 ויזד יעקב נזיד ויבא עשׂו מן־השׂדה והוא עיף׃
B’reisheet 25:30 ויאמר עשׂו אל־יעקב הלעיטני נא מן־האדם האדם הזה כי עיף אנכי על־כן קרא־שׁמו אדום׃
B’reisheet 25:31 ויאמר יעקב מכרה כיום את־בכרתך לי׃
B’reisheet 25:32 ויאמר עשׂו הנה אנכי הולך למות ולמה־זה לי בכרה׃
B’reisheet 25:33 ויאמר יעקב השׁבעה לי כיום וישׁבע לו וימכר את־בכרתו ליעקב׃
B’reisheet 25:34 ויעקב נתן לעשׂו לחם ונזיד עדשׁים ויאכל וישׁת ויקם וילך ויבז עשׂו את־הבכרה׃
B’reisheet 26:1 ויהי רעב בארץ מלבד הרעב הראשׁון אשׁר היה בימי אברהם וילך יצחק אל־אבימלך מלך־פלשׁתים גררה׃
B’reisheet 26:2 וירא אליו יהוה ויאמר אל־תרד מצרימה שׁכן בארץ אשׁר אמר אליך׃
B’reisheet 26:3 גור בארץ הזאת ואהיה עמך ואברכך כי־לך ולזרעך אתן את־כל־הארצת האל והקמתי את־השׁבעה אשׁר נשׁבעתי לאברהם אביך׃
B’reisheet 26:4 והרביתי את־זרעך ככוכבי השׁמים ונתתי לזרעך את כל־הארצת האל והתברכו בזרעך כל גויי הארץ׃
B’reisheet 26:5 עקב אשׁר־שׁמע אברהם בקלי וישׁמר משׁמרתי מצותי חקותי ותורתי׃
B’reisheet 26:6 וישׁב יצחק בגרר׃
B’reisheet 26:7 וישׁאלו אנשׁי המקום לאשׁתו ויאמר אחתי הוא כי ירא לאמר אשׁתי פן־יהרגני אנשׁי המקום על־רבקה כי־טובת מראה הוא׃
B’reisheet 26:8 ויהי כי ארכו־לו שׁם הימים וישׁקף אבימלך מלך פלשׁתים בעד החלון וירא והנה יצחק מצחק את רבקה אשׁתו׃
B’reisheet 26:9 ויקרא אבימלך ליצחק ויאמר אך הנה אשׁתך הוא ואיך אמרת אחתי הוא ויאמר אליו יצחק כי אמרתי פן־אמות עליה׃
B’reisheet 26:10 ויאמר אבימלך מה־זאת עשׂית לנו כמעט שׁכב אחד העם את־אשׁתך והבאת עלינו אשׁם׃
B’reisheet 26:11 ויצו אבימלך את־כל־העם לאמר הנגע באישׁ הזה ובאשׁתו מות יומת׃
B’reisheet 26:12 ויזרע יצחק בארץ ההוא וימצא בשׁנה ההוא מאה שׁערים ויברכהו יהוה׃
B’reisheet 26:13 ויגדל האישׁ וילך הלוך וגדל עד כי־גדל מאד׃
B’reisheet 26:14 ויהי־לו מקנה־צאן ומקנה בקר ועבדה רבה ויקנאו אתו פלשׁתים׃
B’reisheet 26:15 וכל־הבארת אשׁר חפרו עבדי אביו בימי אברהם אביו סתמום פלשׁתים וימלאום עפר׃
B’reisheet 26:16 ויאמר אבימלך אל־יצחק לך מעמנו כי־עצמת־ממנו מאד׃
B’reisheet 26:17 וילך משׁם יצחק ויחן בנחל־גרר וישׁב שׁם׃
B’reisheet 26:18 וישׁב יצחק ויחפר את־בארת המים אשׁר חפרו בימי אברהם אביו ויסתמום פלשׁתים אחרי מות אברהם ויקרא להן שׁמות כשׁמת אשׁר־קרא להן אביו׃
B’reisheet 26:19 ויחפרו עבדי־יצחק בנחל וימצאו־שׁם באר מים חיים׃
B’reisheet 26:20 ויריבו רעי גרר עם־רעי יצחק לאמר לנו המים ויקרא שׁם־הבאר עשׂק כי התעשׂקו עמו׃
B’reisheet 26:21 ויחפרו באר אחרת ויריבו גם־עליה ויקרא שׁמה שׂטנה׃
B’reisheet 26:22 ויעתק משׁם ויחפר באר אחרת ולא רבו עליה ויקרא שׁמה רחבות ויאמר כי־עתה הרחיב יהוה לנו ופרינו בארץ׃
B’reisheet 26:23 ויעל משׁם באר שׁבע׃
B’reisheet 26:24 וירא אליו יהוה בלילה ההוא ויאמר אנכי אלהי אברהם אביך אל־תירא כי־אתך אנכי וברכתיך והרביתי את־זרעך בעבור אברהם עבדי׃
B’reisheet 26:25 ויבן שׁם מזבח ויקרא בשׁם יהוה ויט־שׁם אהלו ויכרו־שׁם עבדי־יצחק באר׃
B’reisheet 26:26 ואבימלך הלך אליו מגרר ואחזת מרעהו ופיכל שׂר־צבאו׃
B’reisheet 26:27 ויאמר אלהם יצחק מדוע באתם אלי ואתם שׂנאתם אתי ותשׁלחוני מאתכם׃
B’reisheet 26:28 ויאמרו ראו ראינו כי־היה יהוה עמך ונאמר תהי נא אלה בינותינו בינינו ובינך ונכרתה ברית עמך׃
B’reisheet 26:29 אם־תעשׂה עמנו רעה כאשׁר לא נגענוך וכאשׁר עשׂינו עמך רק־טוב ונשׁלחך בשׁלום אתה עתה ברוך יהוה׃
B’reisheet 26:30 ויעשׂ להם משׁתה ויאכלו וישׁתו׃
B’reisheet 26:31 וישׁכימו בבקר וישׁבעו אישׁ לאחיו וישׁלחם יצחק וילכו מאתו בשׁלום׃
B’reisheet 26:32 ויהי ביום ההוא ויבאו עבדי יצחק ויגדו לו על־אדות הבאר אשׁר חפרו ויאמרו לו מצאנו מים׃
B’reisheet 26:33 ויקרא אתה שׁבעה על־כן שׁם־העיר באר שׁבע עד היום הזה׃
B’reisheet 26:34 ויהי עשׂו בן־ארבעים שׁנה ויקח אשׁה את־יהודית בת־בארי החתי ואת־בשׂמת בת־אילן החתי׃
B’reisheet 26:35 ותהיין מרת רוח ליצחק ולרבקה׃
B’reisheet 27:1 ויהי כי־זקן יצחק ותכהין עיניו מראת ויקרא את־עשׂו בנו הגדל ויאמר אליו בני ויאמר אליו הנני׃
B’reisheet 27:2 ויאמר הנה־נא זקנתי לא ידעתי יום מותי׃
B’reisheet 27:3 ועתה שׂא־נא כליך תליך וקשׁתך וצא השׂדה וצודה לי צידה׃
B’reisheet 27:4 ועשׂה־לי מטעמים כאשׁר אהבתי והביאה לי ואכלה בעבור תברכך נפשׁי בטרם אמות׃
B’reisheet 27:5 ורבקה שׁמעת בדבר יצחק אל־עשׂו בנו וילך עשׂו השׂדה לצוד ציד להביא׃
B’reisheet 27:6 ורבקה אמרה אל־יעקב בנה לאמר הנה שׁמעתי את־אביך מדבר אל־עשׂו אחיך לאמר׃
B’reisheet 27:7 הביאה לי ציד ועשׂה־לי מטעמים ואכלה ואברככה לפני יהוה לפני מותי׃
B’reisheet 27:8 ועתה בני שׁמע בקלי לאשׁר אני מצוה אתך׃
B’reisheet 27:9 לך־נא אל־הצאן וקח־לי משׁם שׁני גדיי עזים טבים ואעשׂה אתם מטעמים לאביך כאשׁר אהב׃
B’reisheet 27:10 והבאת לאביך ואכל בעבר אשׁר יברכך לפני מותו׃
B’reisheet 27:11 ויאמר יעקב אל־רבקה אמו הן עשׂו אחי אישׁ שׂער ואנכי אישׁ חלק׃
B’reisheet 27:12 אולי ימשׁני אבי והייתי בעיניו כמתעתע והבאתי עלי קללה ולא ברכה׃
B’reisheet 27:13 ותאמר לו אמו עלי קללתך בני אך שׁמע בקלי ולך קח־לי׃
B’reisheet 27:14 וילך ויקח ויבא לאמו ותעשׂ אמו מטעמים כאשׁר אהב אביו׃
B’reisheet 27:15 ותקח רבקה את־בגדי עשׂו בנה הגדל החמדת אשׁר אתה בבית ותלבשׁ את־יעקב בנה הקטן׃
B’reisheet 27:16 ואת ערת גדיי העזים הלבישׁה על־ידיו ועל חלקת צואריו׃
B’reisheet 27:17 ותתן את־המטעמים ואת־הלחם אשׁר עשׂתה ביד יעקב בנה׃
B’reisheet 27:18 ויבא אל־אביו ויאמר אבי ויאמר הנני מי אתה בני׃
B’reisheet 27:19 ויאמר יעקב אל־אביו אנכי עשׂו בכרך עשׂיתי כאשׁר דברת אלי קום־נא שׁבה ואכלה מצידי בעבור תברכני נפשׁך׃
B’reisheet 27:20 ויאמר יצחק אל־בנו מה־זה מהרת למצא בני ויאמר כי הקרה יהוה אלהיך לפני׃
B’reisheet 27:21 ויאמר יצחק אל־יעקב גשׁה־נא ואמשׁך בני האתה זה בני עשׂו אם־לא׃
B’reisheet 27:22 ויגשׁ יעקב אל־יצחק אביו וימשׁהו ויאמר הקל קול יעקב והידים ידי עשׂו׃
B’reisheet 27:23 ולא הכירו כי־היו ידיו כידי עשׂו אחיו שׂערת ויברכהו׃
B’reisheet 27:24 ויאמר אתה זה בני עשׂו ויאמר אני׃
B’reisheet 27:25 ויאמר הגשׁה לי ואכלה מציד בני למען תברכך נפשׁי ויגשׁ־לו ויאכל ויבא לו יין וישׁת׃
B’reisheet 27:26 ויאמר אליו יצחק אביו גשׁה־נא ושׁקה־לי בני׃
B’reisheet 27:27 ויגשׁ וישׁק־לו וירח את־ריח בגדיו ויברכהו ויאמר ראה ריח בני כריח שׂדה אשׁר ברכו יהוה׃
B’reisheet 27:28 ויתן־לך האלהים מטל השׁמים ומשׁמני הארץ ורב דגן ותירשׁ׃
B’reisheet 27:29 יעבדוך עמים וישׁתחו לך לאמים הוה גביר לאחיך וישׁתחוו לך בני אמך ארריך ארור ומברכיך ברוך׃
B’reisheet 27:30 ויהי כאשׁר כלה יצחק לברך את־יעקב ויהי אך יצא יצא יעקב מאת פני יצחק אביו ועשׂו אחיו בא מצידו׃
B’reisheet 27:31 ויעשׂ גם־הוא מטעמים ויבא לאביו ויאמר לאביו יקם אבי ויאכל מציד בנו בעבר תברכני נפשׁך׃
B’reisheet 27:32 ויאמר לו יצחק אביו מי־אתה ויאמר אני בנך בכרך עשׂו׃
B’reisheet 27:33 ויחרד יצחק חרדה גדלה עד־מאד ויאמר מי־אפוא הוא הצד־ציד ויבא לי ואכל מכל בטרם תבוא ואברכהו גם־ברוך יהיה׃
B’reisheet 27:34 כשׁמע עשׂו את־דברי אביו ויצעק צעקה גדלה ומרה עד־מאד ויאמר לאביו ברכני גם־אני אבי׃
B’reisheet 27:35 ויאמר בא אחיך במרמה ויקח ברכתך׃
B’reisheet 27:36 ויאמר הכי קרא שׁמו יעקב ויעקבני זה פעמים את־בכרתי לקח והנה עתה לקח ברכתי ויאמר הלא־אצלת לי ברכה׃
B’reisheet 27:37 ויען יצחק ויאמר לעשׂו הן גביר שׂמתיו לך ואת־כל־אחיו נתתי לו לעבדים ודגן ותירשׁ סמכתיו ולכה אפוא מה אעשׂה בני׃
B’reisheet 27:38 ויאמר עשׂו אל־אביו הברכה אחת הוא־לך אבי ברכני גם־אני אבי וישׂא עשׂו קלו ויבך׃
B’reisheet 27:39 ויען יצחק אביו ויאמר אליו הנה משׁמני הארץ יהיה מושׁבך ומטל השׁמים מעל׃
B’reisheet 27:40 ועל־חרבך תחיה ואת־אחיך תעבד והיה כאשׁר תריד ופרקת עלו מעל צוארך׃
B’reisheet 27:41 וישׂטם עשׂו את־יעקב על־הברכה אשׁר ברכו אביו ויאמר עשׂו בלבו יקרבו ימי אבל אבי ואהרגה את־יעקב אחי׃
B’reisheet 27:42 ויגד לרבקה את־דברי עשׂו בנה הגדל ותשׁלח ותקרא ליעקב בנה הקטן ותאמר אליו הנה עשׂו אחיך מתנחם לך להרגך׃
B’reisheet 27:43 ועתה בני שׁמע בקלי וקום ברח־לך אל־לבן אחי חרנה׃
B’reisheet 27:44 וישׁבת עמו ימים אחדים עד אשׁר־תשׁוב חמת אחיך׃
B’reisheet 27:45 עד־שׁוב אף־אחיך ממך ושׁכח את אשׁר־עשׂית לו ושׁלחתי ולקחתיך משׁם למה אשׁכל גם־שׁניכם יום אחד׃
B’reisheet 27:46 ותאמר רבקה אל־יצחק קצתי בחיי מפני בנות חת אם־לקח יעקב אשׁה מבנות־חת כאלה מבנות הארץ למה לי חיים׃
B’reisheet 28:1 ויקרא יצחק אל־יעקב ויברך אתו ויצוהו ויאמר לו לא־תקח אשׁה מבנות כנען׃
B’reisheet 28:2 קום לך פדנה ארם ביתה בתואל אבי אמך וקח־לך משׁם אשׁה מבנות לבן אחי אמך׃
B’reisheet 28:3 ואל שׁדי יברך אתך ויפרך וירבך והיית לקהל עמים׃
B’reisheet 28:4 ויתן־לך את־ברכת אברהם לך ולזרעך אתך לרשׁתך את־ארץ מגריך אשׁר־נתן אלהים לאברהם׃
B’reisheet 28:5 וישׁלח יצחק את־יעקב וילך פדנה ארם אל־לבן בן־בתואל הארמי אחי רבקה אם יעקב ועשׂו׃
B’reisheet 28:6 וירא עשׂו כי־ברך יצחק את־יעקב ושׁלח אתו פדנה ארם לקחת־לו משׁם אשׁה בברכו אתו ויצו עליו לאמר לא־תקח אשׁה מבנות כנען׃
B’reisheet 28:7 וישׁמע יעקב אל־אביו ואל־אמו וילך פדנה ארם׃
B’reisheet 28:8 וירא עשׂו כי רעות בנות כנען בעיני יצחק אביו׃
B’reisheet 28:9 וילך עשׂו אל־ישׁמעאל ויקח את־מחלת בת־ישׁמעאל בן־אברהם אחות נביות על־נשׁיו לו לאשׁה׃