Vayeshev (Hebrew)

B'reisheet 37:1 - 40:23
B’reisheet 37:1 וישׁב יעקב בארץ מגורי אביו בארץ כנען׃
B’reisheet 37:2 אלה תלדות יעקב יוסף בן־שׁבע־עשׂרה שׁנה היה רעה את־אחיו בצאן והוא נער את־בני בלהה ואת־בני זלפה נשׁי אביו ויבא יוסף את־דבתם רעה אל־אביהם׃
B’reisheet 37:3 וישׂראל אהב את־יוסף מכל־בניו כי־בן־זקנים הוא לו ועשׂה לו כתנת פסים׃
B’reisheet 37:4 ויראו אחיו כי־אתו אהב אביהם מכל־אחיו וישׂנאו אתו ולא יכלו דברו לשׁלם׃
B’reisheet 37:5 ויחלם יוסף חלום ויגד לאחיו ויוספו עוד שׂנא אתו׃
B’reisheet 37:6 ויאמר אליהם שׁמעו־נא החלום הזה אשׁר חלמתי׃
B’reisheet 37:7 והנה אנחנו מאלמים אלמים בתוך השׂדה והנה קמה אלמתי וגם־נצבה והנה תסבינה אלמתיכם ותשׁתחוין לאלמתי׃
B’reisheet 37:8 ויאמרו לו אחיו המלך תמלך עלינו אם־משׁול תמשׁל בנו ויוספו עוד שׂנא אתו על־חלמתיו ועל־דבריו׃
B’reisheet 37:9 ויחלם עוד חלום אחר ויספר אתו לאחיו ויאמר הנה חלמתי חלום עוד והנה השׁמשׁ והירח ואחד עשׂר כוכבים משׁתחוים לי׃
B’reisheet 37:10 ויספר אל־אביו ואל־אחיו ויגער־בו אביו ויאמר לו מה החלום הזה אשׁר חלמת הבוא נבוא אני ואמך ואחיך להשׁתחות לך ארצה׃
B’reisheet 37:11 ויקנאו־בו אחיו ואביו שׁמר את־הדבר׃
B’reisheet 37:12 וילכו אחיו לרעות את־צאן אביהם בשׁכם׃
B’reisheet 37:13 ויאמר ישׂראל אל־יוסף הלוא אחיך רעים בשׁכם לכה ואשׁלחך אליהם ויאמר לו הנני׃
B’reisheet 37:14 ויאמר לו לך־נא ראה את־שׁלום אחיך ואת־שׁלום הצאן והשׁבני דבר וישׁלחהו מעמק חברון ויבא שׁכמה׃
B’reisheet 37:15 וימצאהו אישׁ והנה תעה בשׂדה וישׁאלהו האישׁ לאמר מה־תבקשׁ׃
B’reisheet 37:16 ויאמר את־אחי אנכי מבקשׁ הגידה־נא לי איפה הם רעים׃
B’reisheet 37:17 ויאמר האישׁ נסעו מזה כי שׁמעתי אמרים נלכה דתינה וילך יוסף אחר אחיו וימצאם בדתן׃
B’reisheet 37:18 ויראו אתו מרחק ובטרם יקרב אליהם ויתנכלו אתו להמיתו׃
B’reisheet 37:19 ויאמרו אישׁ אל־אחיו הנה בעל החלמות הלזה בא׃
B’reisheet 37:20 ועתה לכו ונהרגהו ונשׁלכהו באחד הברות ואמרנו חיה רעה אכלתהו ונראה מה־יהיו חלמתיו׃
B’reisheet 37:21 וישׁמע ראובן ויצלהו מידם ויאמר לא נכנו נפשׁ׃
B’reisheet 37:22 ויאמר אלהם ראובן אל־תשׁפכו־דם השׁליכו אתו אל־הבור הזה אשׁר במדבר ויד אל־תשׁלחו־בו למען הציל אתו מידם להשׁיבו אל־אביו׃
B’reisheet 37:23 ויהי כאשׁר־בא יוסף אל־אחיו ויפשׁיטו את־יוסף את־כתנתו את־כתנת הפסים אשׁר עליו׃
B’reisheet 37:24 ויקחהו וישׁלכו אתו הברה והבור רק אין בו מים׃
B’reisheet 37:25 וישׁבו לאכל־לחם וישׂאו עיניהם ויראו והנה ארחת ישׁמעאלים באה מגלעד וגמליהם נשׂאים נכאת וצרי ולט הולכים להוריד מצרימה׃
B’reisheet 37:26 ויאמר יהודה אל־אחיו מה־בצע כי נהרג את־אחינו וכסינו את־דמו׃
B’reisheet 37:27 לכו ונמכרנו לישׁמעאלים וידנו אל־תהי־בו כי־אחינו בשׂרנו הוא וישׁמעו אחיו׃
B’reisheet 37:28 ויעברו אנשׁים מדינים סחרים וימשׁכו ויעלו את־יוסף מן־הבור וימכרו את־יוסף לישׁמעאלים בעשׂרים כסף ויביאו את־יוסף מצרימה׃
B’reisheet 37:29 וישׁב ראובן אל־הבור והנה אין־יוסף בבור ויקרע את־בגדיו׃
B’reisheet 37:30 וישׁב אל־אחיו ויאמר הילד איננו ואני אנה אני־בא׃
B’reisheet 37:31 ויקחו את־כתנת יוסף וישׁחטו שׂעיר עזים ויטבלו את־הכתנת בדם׃
B’reisheet 37:32 וישׁלחו את־כתנת הפסים ויביאו אל־אביהם ויאמרו זאת מצאנו הכר־נא הכתנת בנך הוא אם־לא׃
B’reisheet 37:33 ויכירה ויאמר כתנת בני חיה רעה אכלתהו טרף טרף יוסף׃
B’reisheet 37:34 ויקרע יעקב שׂמלתיו וישׂם שׂק במתניו ויתאבל על־בנו ימים רבים׃
B’reisheet 37:35 ויקמו כל־בניו וכל־בנתיו לנחמו וימאן להתנחם ויאמר כי־ארד אל־בני אבל שׁאלה ויבך אתו אביו׃
B’reisheet 37:36 והמדנים מכרו אתו אל־מצרים לפוטיפר סריס פרעה שׂר הטבחים׃
B’reisheet 38:1 ויהי בעת ההוא וירד יהודה מאת אחיו ויט עד־אישׁ עדלמי ושׁמו חירה׃
B’reisheet 38:2 וירא־שׁם יהודה בת־אישׁ כנעני ושׁמו שׁוע ויקחה ויבא אליה׃
B’reisheet 38:3 ותהר ותלד בן ויקרא את־שׁמו ער׃
B’reisheet 38:4 ותהר עוד ותלד בן ותקרא את־שׁמו אונן׃
B’reisheet 38:5 ותסף עוד ותלד בן ותקרא את־שׁמו שׁלה והיה בכזיב בלדתה אתו׃
B’reisheet 38:6 ויקח יהודה אשׁה לער בכורו ושׁמה תמר׃
B’reisheet 38:7 ויהי ער בכור יהודה רע בעיני יהוה וימתהו יהוה׃
B’reisheet 38:8 ויאמר יהודה לאונן בא אל־אשׁת אחיך ויבם אתה והקם זרע לאחיך׃
B’reisheet 38:9 וידע אונן כי לא לו יהיה הזרע והיה אם־בא אל־אשׁת אחיו ושׁחת ארצה לבלתי נתן־זרע לאחיו׃
B’reisheet 38:10 וירע בעיני יהוה אשׁר עשׂה וימת גם־אתו׃
B’reisheet 38:11 ויאמר יהודה לתמר כלתו שׁבי אלמנה בית־אביך עד־יגדל שׁלה בני כי אמר פן־ימות גם־הוא כאחיו ותלך תמר ותשׁב בית אביה׃
B’reisheet 38:12 וירבו הימים ותמת בת־שׁוע אשׁת־יהודה וינחם יהודה ויעל על־גזזי צאנו הוא וחירה רעהו העדלמי תמנתה׃
B’reisheet 38:13 ויגד לתמר לאמר הנה חמיך עלה תמנתה לגז צאנו׃
B’reisheet 38:14 ותסר בגדי אלמנותה מעליה ותכס בצעיף ותתעלף ותשׁב בפתח עינים אשׁר על־דרך תמנתה כי ראתה כי־גדל שׁלה והוא לא־נתנה לו לאשׁה׃
B’reisheet 38:15 ויראה יהודה ויחשׁבה לזונה כי כסתה פניה׃
B’reisheet 38:16 ויט אליה אל־הדרך ויאמר הבה־נא אבוא אליך כי לא ידע כי כלתו הוא ותאמר מה־תתן־לי כי תבוא אלי׃
B’reisheet 38:17 ויאמר אנכי אשׁלח גדי־עזים מן־הצאן ותאמר אם־תתן ערבון עד שׁלחך׃
B’reisheet 38:18 ויאמר מה הערבון אשׁר אתן־לך ותאמר חתמך ופתילך ומטך אשׁר בידך ויתן־לה ויבא אליה ותהר לו׃
B’reisheet 38:19 ותקם ותלך ותסר צעיפה מעליה ותלבשׁ בגדי אלמנותה׃
B’reisheet 38:20 וישׁלח יהודה את־גדי העזים ביד רעהו העדלמי לקחת הערבון מיד האשׁה ולא מצאה׃
B’reisheet 38:21 וישׁאל את־אנשׁי מקמה לאמר איה הקדשׁה הוא בעינים על־הדרך ויאמרו לא־היתה בזה קדשׁה׃
B’reisheet 38:22 וישׁב אל־יהודה ויאמר לא מצאתיה וגם אנשׁי המקום אמרו לא־היתה בזה קדשׁה׃
B’reisheet 38:23 ויאמר יהודה תקח־לה פן נהיה לבוז הנה שׁלחתי הגדי הזה ואתה לא מצאתה׃
B’reisheet 38:24 ויהי כמשׁלשׁ חדשׁים ויגד ליהודה לאמר זנתה תמר כלתך וגם הנה הרה לזנונים ויאמר יהודה הוציאוה ותשׂרף׃
B’reisheet 38:25 הוא מוצאת והיא שׁלחה אל־חמיה לאמר לאישׁ אשׁר־אלה לו אנכי הרה ותאמר הכר־נא למי החתמת והפתילים והמטה האלה׃
B’reisheet 38:26 ויכר יהודה ויאמר צדקה ממני כי־על־כן לא־נתתיה לשׁלה בני ולא־יסף עוד לדעתה׃
B’reisheet 38:27 ויהי בעת לדתה והנה תאומים בבטנה׃
B’reisheet 38:28 ויהי בלדתה ויתן־יד ותקח המילדת ותקשׁר על־ידו שׁני לאמר זה יצא ראשׁנה׃
B’reisheet 38:29 ויהי כמשׁיב ידו והנה יצא אחיו ותאמר מה־פרצת עליך פרץ ויקרא שׁמו פרץ׃
B’reisheet 38:30 ואחר יצא אחיו אשׁר על־ידו השׁני ויקרא שׁמו זרח׃
B’reisheet 39:1 ויוסף הורד מצרימה ויקנהו פוטיפר סריס פרעה שׂר הטבחים אישׁ מצרי מיד הישׁמעאלים אשׁר הורדהו שׁמה׃
B’reisheet 39:2 ויהי יהוה את־יוסף ויהי אישׁ מצליח ויהי בבית אדניו המצרי׃
B’reisheet 39:3 וירא אדניו כי יהוה אתו וכל אשׁר־הוא עשׂה יהוה מצליח בידו׃
B’reisheet 39:4 וימצא יוסף חן בעיניו וישׁרת אתו ויפקדהו על־ביתו וכל־ישׁ־לו נתן בידו׃
B’reisheet 39:5 ויהי מאז הפקיד אתו בביתו ועל כל־אשׁר ישׁ־לו ויברך יהוה את־בית המצרי בגלל יוסף ויהי ברכת יהוה בכל־אשׁר ישׁ־לו בבית ובשׂדה׃
B’reisheet 39:6 ויעזב כל־אשׁר־לו ביד־יוסף ולא־ידע אתו מאומה כי אם־הלחם אשׁר־הוא אוכל ויהי יוסף יפה־תאר ויפה מראה׃
B’reisheet 39:7 ויהי אחר הדברים האלה ותשׂא אשׁת־אדניו את־עיניה אל־יוסף ותאמר שׁכבה עמי׃
B’reisheet 39:8 וימאן ויאמר אל־אשׁת אדניו הן אדני לא־ידע אתי מה־בבית וכל אשׁר־ישׁ־לו נתן בידי׃
B’reisheet 39:9 איננו גדול בבית הזה ממני ולא־חשׂך ממני מאומה כי אם־אותך באשׁר את־אשׁתו ואיך אעשׂה הרעה הגדלה הזאת וחטאתי לאלהים׃
B’reisheet 39:10 ויהי כדברה אל־יוסף יום יום ולא־שׁמע אליה לשׁכב אצלה להיות עמה׃
B’reisheet 39:11 ויהי כהיום הזה ויבא הביתה לעשׂות מלאכתו ואין אישׁ מאנשׁי הבית שׁם בבית׃
B’reisheet 39:12 ותתפשׂהו בבגדו לאמר שׁכבה עמי ויעזב בגדו בידה וינס ויצא החוצה׃
B’reisheet 39:13 ויהי כראותה כי־עזב בגדו בידה וינס החוצה׃
B’reisheet 39:14 ותקרא לאנשׁי ביתה ותאמר להם לאמר ראו הביא לנו אישׁ עברי לצחק בנו בא אלי לשׁכב עמי ואקרא בקול גדול׃
B’reisheet 39:15 ויהי כשׁמעו כי־הרימתי קולי ואקרא ויעזב בגדו אצלי וינס ויצא החוצה׃
B’reisheet 39:16 ותנח בגדו אצלה עד־בוא אדניו אל־ביתו׃
B’reisheet 39:17 ותדבר אליו כדברים האלה לאמר בא־אלי העבד העברי אשׁר־הבאת לנו לצחק בי׃
B’reisheet 39:18 ויהי כהרימי קולי ואקרא ויעזב בגדו אצלי וינס החוצה׃
B’reisheet 39:19 ויהי כשׁמע אדניו את־דברי אשׁתו אשׁר דברה אליו לאמר כדברים האלה עשׂה לי עבדך ויחר אפו׃
B’reisheet 39:20 ויקח אדני יוסף אתו ויתנהו אל־בית הסהר מקום אשׁר־אסורי המלך אסורים ויהי־שׁם בבית הסהר׃
B’reisheet 39:21 ויהי יהוה את־יוסף ויט אליו חסד ויתן חנו בעיני שׂר בית־הסהר׃
B’reisheet 39:22 ויתן שׂר בית־הסהר ביד־יוסף את כל־האסירם אשׁר בבית הסהר ואת כל־אשׁר עשׂים שׁם הוא היה עשׂה׃
B’reisheet 39:23 אין שׂר בית־הסהר ראה את־כל־מאומה בידו באשׁר יהוה אתו ואשׁר־הוא עשׂה יהוה מצליח׃
B’reisheet 40:1 ויהי אחר הדברים האלה חטאו משׁקה מלך־מצרים והאפה לאדניהם למלך מצרים׃
B’reisheet 40:2 ויקצף פרעה על שׁני סריסיו על שׂר המשׁקים ועל שׂר האופים׃
B’reisheet 40:3 ויתן אתם במשׁמר בית שׂר הטבחים אל־בית הסהר מקום אשׁר יוסף אסור שׁם׃
B’reisheet 40:4 ויפקד שׂר הטבחים את־יוסף אתם וישׁרת אתם ויהיו ימים במשׁמר׃
B’reisheet 40:5 ויחלמו חלום שׁניהם אישׁ חלמו בלילה אחד אישׁ כפתרון חלמו המשׁקה והאפה אשׁר למלך מצרים אשׁר אסורים בבית הסהר׃
B’reisheet 40:6 ויבא אליהם יוסף בבקר וירא אתם והנם זעפים׃
B’reisheet 40:7 וישׁאל את־סריסי פרעה אשׁר אתו במשׁמר בית אדניו לאמר מדוע פניכם רעים היום׃
B’reisheet 40:8 ויאמרו אליו חלום חלמנו ופתר אין אתו ויאמר אלהם יוסף הלוא לאלהים פתרנים ספרו־נא לי׃
B’reisheet 40:9 ויספר שׂר־המשׁקים את־חלמו ליוסף ויאמר לו בחלומי והנה־גפן לפני׃
B’reisheet 40:10 ובגפן שׁלשׁה שׂריגם והוא כפרחת עלתה נצה הבשׁילו אשׁכלתיה ענבים׃
B’reisheet 40:11 וכוס פרעה בידי ואקח את־הענבים ואשׂחט אתם אל־כוס פרעה ואתן את־הכוס על־כף פרעה׃
B’reisheet 40:12 ויאמר לו יוסף זה פתרנו שׁלשׁת השׂרגים שׁלשׁת ימים הם׃
B’reisheet 40:13 בעוד שׁלשׁת ימים ישׂא פרעה את־ראשׁך והשׁיבך על־כנך ונתת כוס־פרעה בידו כמשׁפט הראשׁון אשׁר היית משׁקהו׃
B’reisheet 40:14 כי אם־זכרתני אתך כאשׁר ייטב לך ועשׂית־נא עמדי חסד והזכרתני אל־פרעה והוצאתני מן־הבית הזה׃
B’reisheet 40:15 כי־גנב גנבתי מארץ העברים וגם־פה לא־עשׂיתי מאומה כי־שׂמו אתי בבור׃
B’reisheet 40:16 וירא שׂר־האפים כי טוב פתר ויאמר אל־יוסף אף־אני בחלומי והנה שׁלשׁה סלי חרי על־ראשׁי׃
B’reisheet 40:17 ובסל העליון מכל מאכל פרעה מעשׂה אפה והעוף אכל אתם מן־הסל מעל ראשׁי׃
B’reisheet 40:18 ויען יוסף ויאמר זה פתרנו שׁלשׁת הסלים שׁלשׁת ימים הם׃
B’reisheet 40:19 בעוד שׁלשׁת ימים ישׂא פרעה את־ראשׁך מעליך ותלה אותך על־עץ ואכל העוף את־בשׂרך מעליך׃
B’reisheet 40:20 ויהי ביום השׁלישׁי יום הלדת את־פרעה ויעשׂ משׁתה לכל־עבדיו וישׂא את־ראשׁ שׂר המשׁקים ואת־ראשׁ שׂר האפים בתוך עבדיו׃
B’reisheet 40:21 וישׁב את־שׂר המשׁקים על־משׁקהו ויתן הכוס על־כף פרעה׃
B’reisheet 40:22 ואת שׂר האפים תלה כאשׁר פתר להם יוסף׃
B’reisheet 40:23 ולא־זכר שׂר־המשׁקים את־יוסף וישׁכחהו׃