Vayetze Gospel (Hebrew)

MattithYahu 15-16
Mat 15:1 אז באו אל־ישוע הסופרים והפרושים אשר מירושלים׃
Mat 15:2 ויאמרו מדוע תלמידיך עברים את קבלת הזקנים כי אינם נטלים ידיהם לסעודה׃
Mat 15:3 ויען ויאמר אליהם מדוע גם־אתם עברים את־מצות אלהים למען קבלתכם׃
Mat 15:4 כי האלהים צוה לאמר כבד את־אביך ואת־אמך ומקלל אביו ואמו מות יומת׃
Mat 15:5 ואתם אמרים האמר לאביו ולאמו קרבן מה־שאתה נהנה לי אינו חיב בכבוד אביו ואמו׃
Mat 15:6 ותפרו את־דבר האלהים למען קבלתכם׃
Mat 15:7 חנפים היטב נבא עליכם ישעיהו לאמר׃
Mat 15:8 נגש העם הזה בפיו ובשפתיו כבדוני ולבם רחק ממני׃
Mat 15:9 ותהי יראתם אתי מצות אנשים מלמדה׃
Mat 15:10 ויקרא אל־העם ויאמר להם שמעו והבינו׃
Mat 15:11 לא הנכנס אל־הפה יטמא את־האדם כי אם־היוצא מן־הפה הוא מטמא את־האדם׃
Mat 15:12 ויגשו אליו תלמידיו ויאמרו הידעת כי הפרושים שמעו את־הדבר הזה ויכשלו־בו׃
Mat 15:13 ויען ויאמר כל־מטע אשר לא נטע אבי שבשמים עקור יעקר׃
Mat 15:14 הניחו אותם מדריכים עורים המה לעורים וכי־ידריך עור את־העור ונפלו שניהם אל־השחת׃
Mat 15:15 ויען פטרוס ויאמר אליו באר לנו את־המשל הזה׃
Mat 15:16 ויאמר ישוע עדנה גם־אתם לא תשכילו׃
Mat 15:17 העוד לא תדעו כי כל־הבא אל־הפה יורד אל־הכרש וישפך משם למוצאות׃
Mat 15:18 אבל היוצא מן־הפה יוצא מן־הלב והוא מטמא את־האדם׃
Mat 15:19 כי מן־הלב יוצאות מחשבות רע רציחות נאופים זנונים גנבות עדות שקר וגדופים׃
Mat 15:20 אלה הם המטמאים את־האדם אבל אכילה בלא נטילת ידים לא תטמא את־האדם׃
Mat 15:21 ויצא ישוע משם ויסר אל־גלילות צור וצידון׃
Mat 15:22 והנה אשה כנענית יצאת מן־הגבולות ההם ותצעק אליו לאמר חנני אדני בן־דוד כי בתי מענה מאד על־ידי שד׃
Mat 15:23 ולא־ענה אתה דבר ויגשו תלמידיו ויבקשו ממנו לאמר שלחה כי־צעקת היא אחרינו׃
Mat 15:24 ויען ויאמר לא שלחתי בלתי אל־הצאן האבדות אשר לבית ישראל׃
Mat 15:25 והיא באה ותשתחו לו ותאמר אדני עזרני׃
Mat 15:26 ויען ויאמר לא־טוב לקחת את־לחם הבנים ולהשליכו לפני צעירי הכלבים׃
Mat 15:27 ותאמר כן אדני אפס כי־גם־צעירי הכלבים יאכלו מן־הפרורים הנפלים מעל־שלחן אדניהם׃
Mat 15:28 ויען ישוע ויאמר אליה אשה רבה אמונתך יהי־לך כרצונך ותרפא בתה מן־השעה ההיא׃
Mat 15:29 ויעבר ישוע משם ויבא אל־ים הגליל ויעל ההרה וישב שם׃
Mat 15:30 ויבאו אליו המון עם רב ועמהם פסחים עורים אלמים קטעים ורבים כהמה ויפילום לרגלי ישוע וירפאם׃
Mat 15:31 ויתמהו העם בראותם את־האלמים מדברים והקטעים בריאים והפסחים מהלכים והעורים ראים וישבחו את־אלהי ישראל׃
Mat 15:32 ויקרא ישוע אל־תלמידיו ויאמר נכמרו רחמי על־העם כי־זה עמדם עמדי שלשת ימים ואין להם מה־לאכל ואינני חפץ לשלחם רעבים פן־יתעלפו בדרך׃
Mat 15:33 ויאמרו אליו התלמידים מאין לנו במדבר די־לחם להשביע את־המון רב כזה׃
Mat 15:34 ויאמר ישוע אליהם כמה ככרות לחם לכם ויאמרו שבע ומעט דגים קטנים׃
Mat 15:35 ויצו את־המון העם וישבו לארץ׃
Mat 15:36 ויקח את־שבע ככרות הלחם ואת הדגים ויברך ויפרס ויתן אל־התלמידים והתלמידים נתנו לעם׃
Mat 15:37 ויאכלו כלם וישבעו וישאו מן־הפתותים הנותרים שבעה דודים מלאים׃
Mat 15:38 והאכלים ארבעת אלפים איש מלבד הנשים והטף׃
Mat 15:39 וישלח את־העם וירד באניה ויבא אל־גבול מגדן׃
Mat 16:1 ויגשו הפרושים והצדוקים לנסותו וישאלו מאתו להראותם אות מן־השמים׃
Mat 16:2 ויען ויאמר להם בערב תאמרו יום־צח יהיה כי אדמו השמים׃
Mat 16:3 ובבקר תאמרו היום סער כי־אדמו והתקדרו השמים חנפים אתם מכירים את־פני השמים ואתות העתים לא תכירו׃
Mat 16:4 דור רע ומנאף מבקש־לו אות ואות לא ינתן־לו בלתי אם־אות יונה הנביא ויעזבם וילך לו׃
Mat 16:5 ויבאו התלמידים אל־עבר הים והם שכחו לקחת אתם לחם׃
Mat 16:6 ויאמר ישוע אליהם ראו והשמרו לכם משאר הפרושים והצדוקים׃
Mat 16:7 ויחשבו כה וכה בקרבם ויאמרו על־דבר שלא־לקחנו אתנו לחם׃
Mat 16:8 וידע ישוע ויאמר אליהם קטני אמונה מה־תחשבו בלבבכם אשר לא־לקחתם אתכם לחם׃
Mat 16:9 העוד לא תשכילו ולא תזכרו את־חמשת ככרות־הלחם לחמשת אלפים איש וכמה סלים נשאתם׃
Mat 16:10 ואת־שבע ככרות הלחם לארבעת אלפים איש וכמה דודים נשאתם׃
Mat 16:11 איך לא תבינו כי לא על־הלחם אמרתי אליהם השמרו לכם משאר הפרושים והצדוקים׃
Mat 16:12 אז הבינו כי לא אמר להם להשמר משאר הלחם כי אם־מלמוד הפרושים והצדוקים׃
Mat 16:13 ויהי כבוא ישוע אל־גלילות קיסריה של־פילפוס וישאל את־תלמידיו לאמר מה־אמרים לי בני אדם מי הוא בן־האדם׃
Mat 16:14 ויאמרו יש אמרים יוחנן המטביל הוא ויש אמרים אליהו ואחרים אמרים ירמיהו או אחד מן־הנביאים׃
Mat 16:15 ויאמר אליהם ואתם מה־תאמרו לי מי אני׃
Mat 16:16 ויען שמעון פטרוס ויאמר אתה הוא המשיח בן־אלהים חיים׃
Mat 16:17 ויען ויאמר אליו אשריך שמעון בר־יונה כי־בשר ודם לא גלה־לך את־זאת כי אם־אבי שבשמים׃
Mat 16:18 וגם־אני אמר לך כי אתה פטרוס ועל־הצור הזה אבנה את־קהלתי ושערי שאול לא יגברו עליה׃
Mat 16:19 ואתן לך את־מפתחות מלכות השמים וכל־אשר תאסר על־הארץ אסור יהיה בשמים וכל־אשר תתיר על־הארץ מתר יהיה בשמים׃
Mat 16:20 אז צוה על־תלמידיו אשר לא יספרו לאיש כי הוא המשיח׃
Mat 16:21 מן־העת ההיא החל ישוע להגיד לתלמידיו כי צריך הוא ללכת ירושלים ויענה הרבה מידי הזקנים וראשי הכהנים והסופרים ויהרג וביום השלישי קום יקום׃
Mat 16:22 ויקחהו פטרוס ויחל לגער־בו לאמר חס לך אדני אל־יהי־לך כזאת׃
Mat 16:23 ויפן ויאמר לפטרוס סור מעלי השטן מכשול אתה לי כי לבך לדברי בני־אדם ולא לדברי אלהים׃
Mat 16:24 ויאמר ישוע אל־תלמידיו איש כי־יחפץ ללכת אחרי יכחש בעצמו ונשא את־צלובו והלך אחרי׃
Mat 16:25 כי החפץ להציל את־נפשו תאבד נפשו ממנו והמאבד נפשו למעני הוא ימצאנה׃
Mat 16:26 כי מה־יועיל האדם שיקנה את־כל־העולם והשחית את־נפשו או מה־יתן האדם פדיון נפשו׃
Mat 16:27 כי בן־האדם עתיד לבוא בכבוד אביו עם־מלאכיו ואז ישלם לכל־איש כמעשהו׃
Mat 16:28 אמן אמר אני לכם כי יש בעמדים פה אשר לא־יטעמו טעם מיתה עד כי־יראו את־בן־האדם בא במלכותו׃