Vayetze (Hebrew)

B'reisheet 28:10 - 32:3(2)*
B’reisheet 28:10 ויצא יעקב מבאר שׁבע וילך חרנה׃
B’reisheet 28:11 ויפגע במקום וילן שׁם כי־בא השׁמשׁ ויקח מאבני המקום וישׂם מראשׁתיו וישׁכב במקום ההוא׃
B’reisheet 28:12 ויחלם והנה סלם מצב ארצה וראשׁו מגיע השׁמימה והנה מלאכי אלהים עלים וירדים בו׃
B’reisheet 28:13 והנה יהוה נצב עליו ויאמר אני יהוה אלהי אברהם אביך ואלהי יצחק הארץ אשׁר אתה שׁכב עליה לך אתננה ולזרעך׃
B’reisheet 28:14 והיה זרעך כעפר הארץ ופרצת ימה וקדמה וצפנה ונגבה ונברכו בך כל־משׁפחת האדמה ובזרעך׃
B’reisheet 28:15 והנה אנכי עמך ושׁמרתיך בכל אשׁר־תלך והשׁבתיך אל־האדמה הזאת כי לא אעזבך עד אשׁר אם־עשׂיתי את אשׁר־דברתי לך׃
B’reisheet 28:16 וייקץ יעקב משׁנתו ויאמר אכן ישׁ יהוה במקום הזה ואנכי לא ידעתי׃
B’reisheet 28:17 ויירא ויאמר מה־נורא המקום הזה אין זה כי אם־בית אלהים וזה שׁער השׁמים׃
B’reisheet 28:18 וישׁכם יעקב בבקר ויקח את־האבן אשׁר־שׂם מראשׁתיו וישׂם אתה מצבה ויצק שׁמן על־ראשׁה׃
B’reisheet 28:19 ויקרא את־שׁם־המקום ההוא בית־אל ואולם לוז שׁם־העיר לראשׁנה׃
B’reisheet 28:20 וידר יעקב נדר לאמר אם־יהיה אלהים עמדי ושׁמרני בדרך הזה אשׁר אנכי הולך ונתן־לי לחם לאכל ובגד ללבשׁ׃
B’reisheet 28:21 ושׁבתי בשׁלום אל־בית אבי והיה יהוה לי לאלהים׃
B’reisheet 28:22 והאבן הזאת אשׁר־שׂמתי מצבה יהיה בית אלהים וכל אשׁר תתן־לי עשׂר אעשׂרנו לך׃
B’reisheet 29:1 וישׂא יעקב רגליו וילך ארצה בני־קדם׃
B’reisheet 29:2 וירא והנה באר בשׂדה והנה־שׁם שׁלשׁה עדרי־צאן רבצים עליה כי מן־הבאר ההוא ישׁקו העדרים והאבן גדלה על־פי הבאר׃
B’reisheet 29:3 ונאספו־שׁמה כל־העדרים וגללו את־האבן מעל פי הבאר והשׁקו את־הצאן והשׁיבו את־האבן על־פי הבאר למקמה׃
B’reisheet 29:4 ויאמר להם יעקב אחי מאין אתם ויאמרו מחרן אנחנו׃
B’reisheet 29:5 ויאמר להם הידעתם את־לבן בן־נחור ויאמרו ידענו׃
B’reisheet 29:6 ויאמר להם השׁלום לו ויאמרו שׁלום והנה רחל בתו באה עם־הצאן׃
B’reisheet 29:7 ויאמר הן עוד היום גדול לא־עת האסף המקנה השׁקו הצאן ולכו רעו׃
B’reisheet 29:8 ויאמרו לא נוכל עד אשׁר יאספו כל־העדרים וגללו את־האבן מעל פי הבאר והשׁקינו הצאן׃
B’reisheet 29:9 עודנו מדבר עמם ורחל באה עם־הצאן אשׁר לאביה כי רעה הוא׃
B’reisheet 29:10 ויהי כאשׁר ראה יעקב את־רחל בת־לבן אחי אמו ואת־צאן לבן אחי אמו ויגשׁ יעקב ויגל את־האבן מעל פי הבאר וישׁק את־צאן לבן אחי אמו׃
B’reisheet 29:11 וישׁק יעקב לרחל וישׂא את־קלו ויבך׃
B’reisheet 29:12 ויגד יעקב לרחל כי אחי אביה הוא וכי בן־רבקה הוא ותרץ ותגד לאביה׃
B’reisheet 29:13 ויהי כשׁמע לבן את־שׁמע יעקב בן־אחתו וירץ לקראתו ויחבק־לו וינשׁק־לו ויביאהו אל־ביתו ויספר ללבן את כל־הדברים האלה׃
B’reisheet 29:14 ויאמר לו לבן אך עצמי ובשׂרי אתה וישׁב עמו חדשׁ ימים׃
B’reisheet 29:15 ויאמר לבן ליעקב הכי־אחי אתה ועבדתני חנם הגידה לי מה־משׂכרתך׃
B’reisheet 29:16 וללבן שׁתי בנות שׁם הגדלה לאה ושׁם הקטנה רחל׃
B’reisheet 29:17 ועיני לאה רכות ורחל היתה יפת־תאר ויפת מראה׃
B’reisheet 29:18 ויאהב יעקב את־רחל ויאמר אעבדך שׁבע שׁנים ברחל בתך הקטנה׃
B’reisheet 29:19 ויאמר לבן טוב תתי אתה לך מתתי אתה לאישׁ אחר שׁבה עמדי׃
B’reisheet 29:20 ויעבד יעקב ברחל שׁבע שׁנים ויהיו בעיניו כימים אחדים באהבתו אתה׃
B’reisheet 29:21 ויאמר יעקב אל־לבן הבה את־אשׁתי כי מלאו ימי ואבואה אליה׃
B’reisheet 29:22 ויאסף לבן את־כל־אנשׁי המקום ויעשׂ משׁתה׃
B’reisheet 29:23 ויהי בערב ויקח את־לאה בתו ויבא אתה אליו ויבא אליה׃
B’reisheet 29:24 ויתן לבן לה את־זלפה שׁפחתו ללאה בתו שׁפחה׃
B’reisheet 29:25 ויהי בבקר והנה־הוא לאה ויאמר אל־לבן מה־זאת עשׂית לי הלא ברחל עבדתי עמך ולמה רמיתני׃
B’reisheet 29:26 ויאמר לבן לא־יעשׂה כן במקומנו לתת הצעירה לפני הבכירה׃
B’reisheet 29:27 מלא שׁבע זאת ונתנה לך גם־את־זאת בעבדה אשׁר תעבד עמדי עוד שׁבע־שׁנים אחרות׃
B’reisheet 29:28 ויעשׂ יעקב כן וימלא שׁבע זאת ויתן־לו את־רחל בתו לו לאשׁה׃
B’reisheet 29:29 ויתן לבן לרחל בתו את־בלהה שׁפחתו לה לשׁפחה׃
B’reisheet 29:30 ויבא גם אל־רחל ויאהב גם־את־רחל מלאה ויעבד עמו עוד שׁבע־שׁנים אחרות׃
B’reisheet 29:31 וירא יהוה כי־שׂנואה לאה ויפתח את־רחמה ורחל עקרה׃
B’reisheet 29:32 ותהר לאה ותלד בן ותקרא שׁמו ראובן כי אמרה כי־ראה יהוה בעניי כי עתה יאהבני אישׁי׃
B’reisheet 29:33 ותהר עוד ותלד בן ותאמר כי־שׁמע יהוה כי־שׂנואה אנכי ויתן־לי גם־את־זה ותקרא שׁמו שׁמעון׃
B’reisheet 29:34 ותהר עוד ותלד בן ותאמר עתה הפעם ילוה אישׁי אלי כי־ילדתי לו שׁלשׁה בנים על־כן קרא־שׁמו לוי׃
B’reisheet 29:35 ותהר עוד ותלד בן ותאמר הפעם אודה את־יהוה על־כן קראה שׁמו יהודה ותעמד מלדת׃
B’reisheet 30:1 ותרא רחל כי לא ילדה ליעקב ותקנא רחל באחתה ותאמר אל־יעקב הבה־לי בנים ואם־אין מתה אנכי׃
B’reisheet 30:2 ויחר־אף יעקב ברחל ויאמר התחת אלהים אנכי אשׁר־מנע ממך פרי־בטן׃
B’reisheet 30:3 ותאמר הנה אמתי בלהה בא אליה ותלד על־ברכי ואבנה גם־אנכי ממנה׃
B’reisheet 30:4 ותתן־לו את־בלהה שׁפחתה לאשׁה ויבא אליה יעקב׃
B’reisheet 30:5 ותהר בלהה ותלד ליעקב בן׃
B’reisheet 30:6 ותאמר רחל דנני אלהים וגם שׁמע בקלי ויתן־לי בן על־כן קראה שׁמו דן׃
B’reisheet 30:7 ותהר עוד ותלד בלהה שׁפחת רחל בן שׁני ליעקב׃
B’reisheet 30:8 ותאמר רחל נפתולי אלהים נפתלתי עם־אחתי גם־יכלתי ותקרא שׁמו נפתלי׃
B’reisheet 30:9 ותרא לאה כי עמדה מלדת ותקח את־זלפה שׁפחתה ותתן אתה ליעקב לאשׁה׃
B’reisheet 30:10 ותלד זלפה שׁפחת לאה ליעקב בן׃
B’reisheet 30:11 ותאמר לאה בגד ותקרא את־שׁמו גד׃
B’reisheet 30:12 ותלד זלפה שׁפחת לאה בן שׁני ליעקב׃
B’reisheet 30:13 ותאמר לאה באשׁרי כי אשׁרוני בנות ותקרא את־שׁמו אשׁר׃
B’reisheet 30:14 וילך ראובן בימי קציר־חטים וימצא דודאים בשׂדה ויבא אתם אל־לאה אמו ותאמר רחל אל־לאה תני־נא לי מדודאי בנך׃
B’reisheet 30:15 ותאמר לה המעט קחתך את־אישׁי ולקחת גם את־דודאי בני ותאמר רחל לכן ישׁכב עמך הלילה תחת דודאי בנך׃
B’reisheet 30:16 ויבא יעקב מן־השׂדה בערב ותצא לאה לקראתו ותאמר אלי תבוא כי שׂכר שׂכרתיך בדודאי בני וישׁכב עמה בלילה הוא׃
B’reisheet 30:17 וישׁמע אלהים אל־לאה ותהר ותלד ליעקב בן חמישׁי׃
B’reisheet 30:18 ותאמר לאה נתן אלהים שׂכרי אשׁר־נתתי שׁפחתי לאישׁי ותקרא שׁמו ישׂשכר׃
B’reisheet 30:19 ותהר עוד לאה ותלד בן־שׁשׁי ליעקב׃
B’reisheet 30:20 ותאמר לאה זבדני אלהים אתי זבד טוב הפעם יזבלני אישׁי כי־ילדתי לו שׁשׁה בנים ותקרא את־שׁמו זבלון׃
B’reisheet 30:21 ואחר ילדה בת ותקרא את־שׁמה דינה׃
B’reisheet 30:22 ויזכר אלהים את־רחל וישׁמע אליה אלהים ויפתח את־רחמה׃
B’reisheet 30:23 ותהר ותלד בן ותאמר אסף אלהים את־חרפתי׃
B’reisheet 30:24 ותקרא את־שׁמו יוסף לאמר יסף יהוה לי בן אחר׃
B’reisheet 30:25 ויהי כאשׁר ילדה רחל את־יוסף ויאמר יעקב אל־לבן שׁלחני ואלכה אל־מקומי ולארצי׃
B’reisheet 30:26 תנה את־נשׁי ואת־ילדי אשׁר עבדתי אתך בהן ואלכה כי אתה ידעת את־עבדתי אשׁר עבדתיך׃
B’reisheet 30:27 ויאמר אליו לבן אם־נא מצאתי חן בעיניך נחשׁתי ויברכני יהוה בגללך׃
B’reisheet 30:28 ויאמר נקבה שׂכרך עלי ואתנה׃
B’reisheet 30:29 ויאמר אליו אתה ידעת את אשׁר עבדתיך ואת אשׁר־היה מקנך אתי׃
B’reisheet 30:30 כי מעט אשׁר־היה לך לפני ויפרץ לרב ויברך יהוה אתך לרגלי ועתה מתי אעשׂה גם־אנכי לביתי׃
B’reisheet 30:31 ויאמר מה אתן־לך ויאמר יעקב לא־תתן־לי מאומה אם־תעשׂה־לי הדבר הזה אשׁובה ארעה צאנך אשׁמר׃
B’reisheet 30:32 אעבר בכל־צאנך היום הסר משׁם כל־שׂה נקד וטלוא וכל־שׂה־חום בכשׂבים וטלוא ונקד בעזים והיה שׂכרי׃
B’reisheet 30:33 וענתה־בי צדקתי ביום מחר כי־תבוא על־שׂכרי לפניך כל אשׁר־איננו נקד וטלוא בעזים וחום בכשׂבים גנוב הוא אתי׃
B’reisheet 30:34 ויאמר לבן הן לו יהי כדברך׃
B’reisheet 30:35 ויסר ביום ההוא את־התישׁים העקדים והטלאים ואת כל־העזים הנקדות והטלאת כל אשׁר־לבן בו וכל־חום בכשׂבים ויתן ביד־בניו׃
B’reisheet 30:36 וישׂם דרך שׁלשׁת ימים בינו ובין יעקב ויעקב רעה את־צאן לבן הנותרת׃
B’reisheet 30:37 ויקח־לו יעקב מקל לבנה לח ולוז וערמון ויפצל בהן פצלות לבנות מחשׂף הלבן אשׁר על־המקלות׃
B’reisheet 30:38 ויצג את־המקלות אשׁר פצל ברהטים בשׁקתות המים אשׁר תבאן הצאן לשׁתות לנכח הצאן ויחמנה בבאן לשׁתות׃
B’reisheet 30:39 ויחמו הצאן אל־המקלות ותלדן הצאן עקדים נקדים וטלאים׃
B’reisheet 30:40 והכשׂבים הפריד יעקב ויתן פני הצאן אל־עקד וכל־חום בצאן לבן וישׁת־לו עדרים לבדו ולא שׁתם על־צאן לבן׃
B’reisheet 30:41 והיה בכל־יחם הצאן המקשׁרות ושׂם יעקב את־המקלות לעיני הצאן ברהטים ליחמנה במקלות׃
B’reisheet 30:42 ובהעטיף הצאן לא ישׂים והיה העטפים ללבן והקשׁרים ליעקב׃
B’reisheet 30:43 ויפרץ האישׁ מאד מאד ויהי־לו צאן רבות ושׁפחות ועבדים וגמלים וחמרים׃
B’reisheet 31:1 וישׁמע את־דברי בני־לבן לאמר לקח יעקב את כל־אשׁר לאבינו ומאשׁר לאבינו עשׂה את כל־הכבד הזה׃
B’reisheet 31:2 וירא יעקב את־פני לבן והנה איננו עמו כתמול שׁלשׁום׃
B’reisheet 31:3 ויאמר יהוה אל־יעקב שׁוב אל־ארץ אבותיך ולמולדתך ואהיה עמך׃
B’reisheet 31:4 וישׁלח יעקב ויקרא לרחל וללאה השׂדה אל־צאנו׃
B’reisheet 31:5 ויאמר להן ראה אנכי את־פני אביכן כי־איננו אלי כתמל שׁלשׁם ואלהי אבי היה עמדי׃
B’reisheet 31:6 ואתנה ידעתן כי בכל־כחי עבדתי את־אביכן׃
B’reisheet 31:7 ואביכן התל בי והחלף את־משׂכרתי עשׂרת מנים ולא־נתנו אלהים להרע עמדי׃
B’reisheet 31:8 אם־כה יאמר נקדים יהיה שׂכרך וילדו כל־הצאן נקדים ואם־כה יאמר עקדים יהיה שׂכרך וילדו כל־הצאן עקדים׃
B’reisheet 31:9 ויצל אלהים את־מקנה אביכם ויתן־לי׃
B’reisheet 31:10 ויהי בעת יחם הצאן ואשׂא עיני וארא בחלום והנה העתדים העלים על־הצאן עקדים נקדים וברדים׃
B’reisheet 31:11 ויאמר אלי מלאך האלהים בחלום יעקב ואמר הנני׃
B’reisheet 31:12 ויאמר שׂא־נא עיניך וראה כל־העתדים העלים על־הצאן עקדים נקדים וברדים כי ראיתי את כל־אשׁר לבן עשׂה לך׃
B’reisheet 31:13 אנכי האל בית־אל אשׁר משׁחת שׁם מצבה אשׁר נדרת לי שׁם נדר עתה קום צא מן־הארץ הזאת ושׁוב אל־ארץ מולדתך׃
B’reisheet 31:14 ותען רחל ולאה ותאמרנה לו העוד לנו חלק ונחלה בבית אבינו׃
B’reisheet 31:15 הלוא נכריות נחשׁבנו לו כי מכרנו ויאכל גם־אכול את־כספנו׃
B’reisheet 31:16 כי כל־העשׁר אשׁר הציל אלהים מאבינו לנו הוא ולבנינו ועתה כל אשׁר אמר אלהים אליך עשׂה׃
B’reisheet 31:17 ויקם יעקב וישׂא את־בניו ואת־נשׁיו על־הגמלים׃
B’reisheet 31:18 וינהג את־כל־מקנהו ואת־כל־רכשׁו אשׁר רכשׁ מקנה קנינו אשׁר רכשׁ בפדן ארם לבוא אל־יצחק אביו ארצה כנען׃
B’reisheet 31:19 ולבן הלך לגזז את־צאנו ותגנב רחל את־התרפים אשׁר לאביה׃
B’reisheet 31:20 ויגנב יעקב את־לב לבן הארמי על־בלי הגיד לו כי ברח הוא׃
B’reisheet 31:21 ויברח הוא וכל־אשׁר־לו ויקם ויעבר את־הנהר וישׂם את־פניו הר הגלעד׃
B’reisheet 31:22 ויגד ללבן ביום השׁלישׁי כי ברח יעקב׃
B’reisheet 31:23 ויקח את־אחיו עמו וירדף אחריו דרך שׁבעת ימים וידבק אתו בהר הגלעד׃
B’reisheet 31:24 ויבא אלהים אל־לבן הארמי בחלם הלילה ויאמר לו השׁמר לך פן־תדבר עם־יעקב מטוב עד־רע׃
B’reisheet 31:25 וישׂג לבן את־יעקב ויעקב תקע את־אהלו בהר ולבן תקע את־אחיו בהר הגלעד׃
B’reisheet 31:26 ויאמר לבן ליעקב מה עשׂית ותגנב את־לבבי ותנהג את־בנתי כשׁביות חרב׃
B’reisheet 31:27 למה נחבאת לברח ותגנב אתי ולא־הגדת לי ואשׁלחך בשׂמחה ובשׁרים בתף ובכנור׃
B’reisheet 31:28 ולא נטשׁתני לנשׁק לבני ולבנתי עתה הסכלת עשׂו׃
B’reisheet 31:29 ישׁ־לאל ידי לעשׂות עמכם רע ואלהי אביכם אמשׁ אמר אלי לאמר השׁמר לך מדבר עם־יעקב מטוב עד־רע׃
B’reisheet 31:30 ועתה הלך הלכת כי־נכסף נכספתה לבית אביך למה גנבת את־אלהי׃
B’reisheet 31:31 ויען יעקב ויאמר ללבן כי יראתי כי אמרתי פן־תגזל את־בנותיך מעמי׃
B’reisheet 31:32 עם אשׁר תמצא את־אלהיך לא יחיה נגד אחינו הכר־לך מה עמדי וקח־לך ולא־ידע יעקב כי רחל גנבתם׃
B’reisheet 31:33 ויבא לבן באהל יעקב ובאהל לאה ובאהל שׁתי האמהת ולא מצא ויצא מאהל לאה ויבא באהל רחל׃
B’reisheet 31:34 ורחל לקחה את־התרפים ותשׂמם בכר הגמל ותשׁב עליהם וימשׁשׁ לבן את־כל־האהל ולא מצא׃
B’reisheet 31:35 ותאמר אל־אביה אל־יחר בעיני אדני כי לוא אוכל לקום מפניך כי־דרך נשׁים לי ויחפשׂ ולא מצא את־התרפים׃
B’reisheet 31:36 ויחר ליעקב וירב בלבן ויען יעקב ויאמר ללבן מה־פשׁעי מה חטאתי כי דלקת אחרי׃
B’reisheet 31:37 כי־משׁשׁת את־כל־כלי מה־מצאת מכל כלי־ביתך שׂים כה נגד אחי ואחיך ויוכיחו בין שׁנינו׃
B’reisheet 31:38 זה עשׂרים שׁנה אנכי עמך רחליך ועזיך לא שׁכלו ואילי צאנך לא אכלתי׃
B’reisheet 31:39 טרפה לא־הבאתי אליך אנכי אחטנה מידי תבקשׁנה גנבתי יום וגנבתי לילה׃
B’reisheet 31:40 הייתי ביום אכלני חרב וקרח בלילה ותדד שׁנתי מעיני׃
B’reisheet 31:41 זה־לי עשׂרים שׁנה בביתך עבדתיך ארבע־עשׂרה שׁנה בשׁתי בנתיך ושׁשׁ שׁנים בצאנך ותחלף את־משׂכרתי עשׂרת מנים׃
B’reisheet 31:42 לולי אלהי אבי אלהי אברהם ופחד יצחק היה לי כי עתה ריקם שׁלחתני את־עניי ואת־יגיע כפי ראה אלהים ויוכח אמשׁ׃
B’reisheet 31:43 ויען לבן ויאמר אל־יעקב הבנות בנתי והבנים בני והצאן צאני וכל אשׁר־אתה ראה לי־הוא ולבנתי מה־אעשׂה לאלה היום או לבניהן אשׁר ילדו׃
B’reisheet 31:44 ועתה לכה נכרתה ברית אני ואתה והיה לעד ביני ובינך׃
B’reisheet 31:45 ויקח יעקב אבן וירימה מצבה׃
B’reisheet 31:46 ויאמר יעקב לאחיו לקטו אבנים ויקחו אבנים ויעשׂו־גל ויאכלו שׁם על־הגל׃
B’reisheet 31:47 ויקרא־לו לבן יגר שׂהדותא ויעקב קרא לו גלעד׃
B’reisheet 31:48 ויאמר לבן הגל הזה עד ביני ובינך היום על־כן קרא־שׁמו גלעד׃
B’reisheet 31:49 והמצפה אשׁר אמר יצף יהוה ביני ובינך כי נסתר אישׁ מרעהו׃
B’reisheet 31:50 אם־תענה את־בנתי ואם־תקח נשׁים על־בנתי אין אישׁ עמנו ראה אלהים עד ביני ובינך׃
B’reisheet 31:51 ויאמר לבן ליעקב הנה הגל הזה והנה המצבה אשׁר יריתי ביני ובינך׃
B’reisheet 31:52 עד הגל הזה ועדה המצבה אם־אני לא־אעבר אליך את־הגל הזה ואם־אתה לא־תעבר אלי את־הגל הזה ואת־המצבה הזאת לרעה׃
B’reisheet 31:53 אלהי אברהם ואלהי נחור ישׁפטו בינינו אלהי אביהם וישׁבע יעקב בפחד אביו יצחק׃
B’reisheet 31:54 ויזבח יעקב זבח בהר ויקרא לאחיו לאכל־לחם ויאכלו לחם וילינו בהר׃
B’reisheet 31:55 (32:1) וישׁכם לבן בבקר וינשׁק לבניו ולבנותיו ויברך אתהם וילך וישׁב לבן למקמו׃
B’reisheet 32:1 (32:2) ויעקב הלך לדרכו ויפגעו־בו מלאכי אלהים׃
B’reisheet 32:2 (32:3) ויאמר יעקב כאשׁר ראם מחנה אלהים זה ויקרא שׁם־המקום ההוא מחנים׃