Vayishlach (Hebrew)

B'reisheet 32:4(3)* - 36:43
B’reisheet 32:3 (32:4) וישׁלח יעקב מלאכים לפניו אל־עשׂו אחיו ארצה שׂעיר שׂדה אדום׃
B’reisheet 32:4 (32:5) ויצו אתם לאמר כה תאמרון לאדני לעשׂו כה אמר עבדך יעקב עם־לבן גרתי ואחר עד־עתה׃
B’reisheet 32:5 (32:6) ויהי־לי שׁור וחמור צאן ועבד ושׁפחה ואשׁלחה להגיד לאדני למצא־חן בעיניך׃
B’reisheet 32:6 (32:7) וישׁבו המלאכים אל־יעקב לאמר באנו אל־אחיך אל־עשׂו וגם הלך לקראתך וארבע־מאות אישׁ עמו׃
B’reisheet 32:7 (32:8) ויירא יעקב מאד ויצר לו ויחץ את־העם אשׁר־אתו ואת־הצאן ואת־הבקר והגמלים לשׁני מחנות׃
B’reisheet 32:8 (32:9) ויאמר אם־יבוא עשׂו אל־המחנה האחת והכהו והיה המחנה הנשׁאר לפליטה׃
B’reisheet 32:9 (32:10) ויאמר יעקב אלהי אבי אברהם ואלהי אבי יצחק יהוה האמר אלי שׁוב לארצך ולמולדתך ואיטיבה עמך׃
B’reisheet 32:10 (32:11) קטנתי מכל החסדים ומכל־האמת אשׁר עשׂית את־עבדך כי במקלי עברתי את־הירדן הזה ועתה הייתי לשׁני מחנות׃
B’reisheet 32:11 (32:12) הצילני נא מיד אחי מיד עשׂו כי־ירא אנכי אתו פן־יבוא והכני אם על־בנים׃
B’reisheet 32:12 (32:13) ואתה אמרת היטב איטיב עמך ושׂמתי את־זרעך כחול הים אשׁר לא־יספר מרב׃
B’reisheet 32:13 (32:14) וילן שׁם בלילה ההוא ויקח מן־הבא בידו מנחה לעשׂו אחיו׃
B’reisheet 32:14 (32:15) עזים מאתים ותישׁים עשׂרים רחלים מאתים ואילים עשׂרים׃
B’reisheet 32:15 (32:16) גמלים מיניקות ובניהם שׁלשׁים פרות ארבעים ופרים עשׂרה אתנת עשׂרים ועירם עשׂרה׃
B’reisheet 32:16 (32:17) ויתן ביד־עבדיו עדר עדר לבדו ויאמר אל־עבדיו עברו לפני ורוח תשׂימו בין עדר ובין עדר׃
B’reisheet 32:17 (32:18) ויצו את־הראשׁון לאמר כי יפגשׁך עשׂו אחי ושׁאלך לאמר למי־אתה ואנה תלך ולמי אלה לפניך׃
B’reisheet 32:18 (32:19) ואמרת לעבדך ליעקב מנחה הוא שׁלוחה לאדני לעשׂו והנה גם־הוא אחרינו׃
B’reisheet 32:19 (32:20) ויצו גם את־השׁני גם את־השׁלישׁי גם את־כל־ההלכים אחרי העדרים לאמר כדבר הזה תדברון אל־עשׂו במצאכם אתו׃
B’reisheet 32:20 (32:21) ואמרתם גם הנה עבדך יעקב אחרינו כי־אמר אכפרה פניו במנחה ההלכת לפני ואחרי־כן אראה פניו אולי ישׂא פני׃
B’reisheet 32:21 (32:22) ותעבר המנחה על־פניו והוא לן בלילה־ההוא במחנה׃
B’reisheet 32:22 (32:23) ויקם בלילה הוא ויקח את־שׁתי נשׁיו ואת־שׁתי שׁפחתיו ואת־אחד עשׂר ילדיו ויעבר את מעבר יבק׃
B’reisheet 32:23 (32:24) ויקחם ויעברם את־הנחל ויעבר את־אשׁר־לו׃
B’reisheet 32:24 (32:25) ויותר יעקב לבדו ויאבק אישׁ עמו עד עלות השׁחר׃
B’reisheet 32:25 (32:26) וירא כי לא יכל לו ויגע בכף־ירכו ותקע כף־ירך יעקב בהאבקו עמו׃
B’reisheet 32:26 (32:27) ויאמר שׁלחני כי עלה השׁחר ויאמר לא אשׁלחך כי אם־ברכתני׃
B’reisheet 32:27 (32:28) ויאמר אליו מה־שׁמך ויאמר יעקב׃
B’reisheet 32:28 (32:29) ויאמר לא יעקב יאמר עוד שׁמך כי אם־ישׂראל כי־שׂרית עם־אלהים ועם־אנשׁים ותוכל׃
B’reisheet 32:29 (32:30) וישׁאל יעקב ויאמר הגידה־נא שׁמך ויאמר למה זה תשׁאל לשׁמי ויברך אתו שׁם׃
B’reisheet 32:30 (32:31) ויקרא יעקב שׁם המקום פניאל כי־ראיתי אלהים פנים אל־פנים ותנצל נפשׁי׃
B’reisheet 32:31 (32:32) ויזרח־לו השׁמשׁ כאשׁר עבר את־פנואל והוא צלע על־ירכו׃
B’reisheet 32:32 (32:33) על־כן לא־יאכלו בני־ישׂראל את־גיד הנשׁה אשׁר על־כף הירך עד היום הזה כי נגע בכף־ירך יעקב בגיד הנשׁה׃
B’reisheet 33:1 וישׂא יעקב עיניו וירא והנה עשׂו בא ועמו ארבע מאות אישׁ ויחץ את־הילדים על־לאה ועל־רחל ועל שׁתי השׁפחות׃
B’reisheet 33:2 וישׂם את־השׁפחות ואת־ילדיהן ראשׁנה ואת־לאה וילדיה אחרנים ואת־רחל ואת־יוסף אחרנים׃
B’reisheet 33:3 והוא עבר לפניהם וישׁתחו ארצה שׁבע פעמים עד־גשׁתו עד־אחיו׃
B’reisheet 33:4 וירץ עשׂו לקראתו ויחבקהו ויפל על־צוארו וישׁקהו ויבכו׃
B’reisheet 33:5 וישׂא את־עיניו וירא את־הנשׁים ואת־הילדים ויאמר מי־אלה לך ויאמר הילדים אשׁר־חנן אלהים את־עבדך׃
B’reisheet 33:6 ותגשׁן השׁפחות הנה וילדיהן ותשׁתחוין׃
B’reisheet 33:7 ותגשׁ גם־לאה וילדיה וישׁתחוו ואחר נגשׁ יוסף ורחל וישׁתחוו׃
B’reisheet 33:8 ויאמר מי לך כל־המחנה הזה אשׁר פגשׁתי ויאמר למצא־חן בעיני אדני׃
B’reisheet 33:9 ויאמר עשׂו ישׁ־לי רב אחי יהי לך אשׁר־לך׃
B’reisheet 33:10 ויאמר יעקב אל־נא אם־נא מצאתי חן בעיניך ולקחת מנחתי מידי כי על־כן ראיתי פניך כראת פני אלהים ותרצני׃
B’reisheet 33:11 קח־נא את־ברכתי אשׁר הבאת לך כי־חנני אלהים וכי ישׁ־לי־כל ויפצר־בו ויקח׃
B’reisheet 33:12 ויאמר נסעה ונלכה ואלכה לנגדך׃
B’reisheet 33:13 ויאמר אליו אדני ידע כי־הילדים רכים והצאן והבקר עלות עלי ודפקום יום אחד ומתו כל־הצאן׃
B’reisheet 33:14 יעבר־נא אדני לפני עבדו ואני אתנהלה לאטי לרגל המלאכה אשׁר־לפני ולרגל הילדים עד אשׁר־אבא אל־אדני שׂעירה׃
B’reisheet 33:15 ויאמר עשׂו אציגה־נא עמך מן־העם אשׁר אתי ויאמר למה זה אמצא־חן בעיני אדני׃
B’reisheet 33:16 וישׁב ביום ההוא עשׂו לדרכו שׂעירה׃
B’reisheet 33:17 ויעקב נסע סכתה ויבן לו בית ולמקנהו עשׂה סכת על־כן קרא שׁם־המקום סכות׃
B’reisheet 33:18 ויבא יעקב שׁלם עיר שׁכם אשׁר בארץ כנען בבאו מפדן ארם ויחן את־פני העיר׃
B’reisheet 33:19 ויקן את־חלקת השׂדה אשׁר נטה־שׁם אהלו מיד בני־חמור אבי שׁכם במאה קשׂיטה׃
B’reisheet 33:20 ויצב־שׁם מזבח ויקרא־לו אל אלהי ישׂראל׃
B’reisheet 34:1 ותצא דינה בת־לאה אשׁר ילדה ליעקב לראות בבנות הארץ׃
B’reisheet 34:2 וירא אתה שׁכם בן־חמור החוי נשׂיא הארץ ויקח אתה וישׁכב אתה ויענה׃
B’reisheet 34:3 ותדבק נפשׁו בדינה בת־יעקב ויאהב את־הנער וידבר על־לב הנער׃
B’reisheet 34:4 ויאמר שׁכם אל־חמור אביו לאמר קח־לי את־הילדה הזאת לאשׁה׃
B’reisheet 34:5 ויעקב שׁמע כי טמא את־דינה בתו ובניו היו את־מקנהו בשׂדה והחרשׁ יעקב עד־באם׃
B’reisheet 34:6 ויצא חמור אבי־שׁכם אל־יעקב לדבר אתו׃
B’reisheet 34:7 ובני יעקב באו מן־השׂדה כשׁמעם ויתעצבו האנשׁים ויחר להם מאד כי־נבלה עשׂה בישׂראל לשׁכב את־בת־יעקב וכן לא יעשׂה׃
B’reisheet 34:8 וידבר חמור אתם לאמר שׁכם בני חשׁקה נפשׁו בבתכם תנו נא אתה לו לאשׁה׃
B’reisheet 34:9 והתחתנו אתנו בנתיכם תתנו־לנו ואת־בנתינו תקחו לכם׃
B’reisheet 34:10 ואתנו תשׁבו והארץ תהיה לפניכם שׁבו וסחרוה והאחזו בה׃
B’reisheet 34:11 ויאמר שׁכם אל־אביה ואל־אחיה אמצא־חן בעיניכם ואשׁר תאמרו אלי אתן׃
B’reisheet 34:12 הרבו עלי מאד מהר ומתן ואתנה כאשׁר תאמרו אלי ותנו־לי את־הנער לאשׁה׃
B’reisheet 34:13 ויענו בני־יעקב את־שׁכם ואת־חמור אביו במרמה וידברו אשׁר טמא את דינה אחתם׃
B’reisheet 34:14 ויאמרו אליהם לא נוכל לעשׂות הדבר הזה לתת את־אחתנו לאישׁ אשׁר־לו ערלה כי־חרפה הוא לנו׃
B’reisheet 34:15 אך־בזאת נאות לכם אם תהיו כמנו להמל לכם כל־זכר׃
B’reisheet 34:16 ונתנו את־בנתינו לכם ואת־בנתיכם נקח־לנו וישׁבנו אתכם והיינו לעם אחד׃
B’reisheet 34:17 ואם־לא תשׁמעו אלינו להמול ולקחנו את־בתנו והלכנו׃
B’reisheet 34:18 וייטבו דבריהם בעיני חמור ובעיני שׁכם בן־חמור׃
B’reisheet 34:19 ולא־אחר הנער לעשׂות הדבר כי חפץ בבת־יעקב והוא נכבד מכל בית אביו׃
B’reisheet 34:20 ויבא חמור ושׁכם בנו אל־שׁער עירם וידברו אל־אנשׁי עירם לאמר׃
B’reisheet 34:21 האנשׁים האלה שׁלמים הם אתנו וישׁבו בארץ ויסחרו אתה והארץ הנה רחבת־ידים לפניהם את־בנתם נקח־לנו לנשׁים ואת־בנתינו נתן להם׃
B’reisheet 34:22 אך־בזאת יאתו לנו האנשׁים לשׁבת אתנו להיות לעם אחד בהמול לנו כל־זכר כאשׁר הם נמלים׃
B’reisheet 34:23 מקנהם וקנינם וכל־בהמתם הלוא לנו הם אך נאותה להם וישׁבו אתנו׃
B’reisheet 34:24 וישׁמעו אל־חמור ואל־שׁכם בנו כל־יצאי שׁער עירו וימלו כל־זכר כל־יצאי שׁער עירו׃
B’reisheet 34:25 ויהי ביום השׁלישׁי בהיותם כאבים ויקחו שׁני־בני־יעקב שׁמעון ולוי אחי דינה אישׁ חרבו ויבאו על־העיר בטח ויהרגו כל־זכר׃
B’reisheet 34:26 ואת־חמור ואת־שׁכם בנו הרגו לפי־חרב ויקחו את־דינה מבית שׁכם ויצאו׃
B’reisheet 34:27 בני יעקב באו על־החללים ויבזו העיר אשׁר טמאו אחותם׃
B’reisheet 34:28 את־צאנם ואת־בקרם ואת־חמריהם ואת אשׁר־בעיר ואת־אשׁר בשׂדה לקחו׃
B’reisheet 34:29 ואת־כל־חילם ואת־כל־טפם ואת־נשׁיהם שׁבו ויבזו ואת כל־אשׁר בבית׃
B’reisheet 34:30 ויאמר יעקב אל־שׁמעון ואל־לוי עכרתם אתי להבאישׁני בישׁב הארץ בכנעני ובפרזי ואני מתי מספר ונאספו עלי והכוני ונשׁמדתי אני וביתי׃
B’reisheet 34:31 ויאמרו הכזונה יעשׂה את־אחותנו׃
B’reisheet 35:1 ויאמר אלהים אל־יעקב קום עלה בית־אל ושׁב־שׁם ועשׂה־שׁם מזבח לאל הנראה אליך בברחך מפני עשׂו אחיך׃
B’reisheet 35:2 ויאמר יעקב אל־ביתו ואל כל־אשׁר עמו הסרו את־אלהי הנכר אשׁר בתככם והטהרו והחליפו שׂמלתיכם׃
B’reisheet 35:3 ונקומה ונעלה בית־אל ואעשׂה־שׁם מזבח לאל הענה אתי ביום צרתי ויהי עמדי בדרך אשׁר הלכתי׃
B’reisheet 35:4 ויתנו אל־יעקב את כל־אלהי הנכר אשׁר בידם ואת־הנזמים אשׁר באזניהם ויטמן אתם יעקב תחת האלה אשׁר עם־שׁכם׃
B’reisheet 35:5 ויסעו ויהי חתת אלהים על־הערים אשׁר סביבותיהם ולא רדפו אחרי בני יעקב׃
B’reisheet 35:6 ויבא יעקב לוזה אשׁר בארץ כנען הוא בית־אל הוא וכל־העם אשׁר־עמו׃
B’reisheet 35:7 ויבן שׁם מזבח ויקרא למקום אל בית־אל כי שׁם נגלו אליו האלהים בברחו מפני אחיו׃
B’reisheet 35:8 ותמת דברה מינקת רבקה ותקבר מתחת לבית־אל תחת האלון ויקרא שׁמו אלון בכות׃
B’reisheet 35:9 וירא אלהים אל־יעקב עוד בבאו מפדן ארם ויברך אתו׃
B’reisheet 35:10 ויאמר־לו אלהים שׁמך יעקב לא־יקרא שׁמך עוד יעקב כי אם־ישׂראל יהיה שׁמך ויקרא את־שׁמו ישׂראל׃
B’reisheet 35:11 ויאמר לו אלהים אני אל שׁדי פרה ורבה גוי וקהל גוים יהיה ממך ומלכים מחלציך יצאו׃
B’reisheet 35:12 ואת־הארץ אשׁר נתתי לאברהם וליצחק לך אתננה ולזרעך אחריך אתן את־הארץ׃
B’reisheet 35:13 ויעל מעליו אלהים במקום אשׁר־דבר אתו׃
B’reisheet 35:14 ויצב יעקב מצבה במקום אשׁר־דבר אתו מצבת אבן ויסך עליה נסך ויצק עליה שׁמן׃
B’reisheet 35:15 ויקרא יעקב את־שׁם המקום אשׁר דבר אתו שׁם אלהים בית־אל׃
B’reisheet 35:16 ויסעו מבית אל ויהי־עוד כברת־הארץ לבוא אפרתה ותלד רחל ותקשׁ בלדתה׃
B’reisheet 35:17 ויהי בהקשׁתה בלדתה ותאמר לה המילדת אל־תיראי כי־גם־זה לך בן׃
B’reisheet 35:18 ויהי בצאת נפשׁה כי מתה ותקרא שׁמו בן־אוני ואביו קרא־לו בנימין׃
B’reisheet 35:19 ותמת רחל ותקבר בדרך אפרתה הוא בית לחם׃
B’reisheet 35:20 ויצב יעקב מצבה על־קברתה הוא מצבת קברת־רחל עד־היום׃
B’reisheet 35:21 ויסע ישׂראל ויט אהלה מהלאה למגדל־עדר׃
B’reisheet 35:22 ויהי בשׁכן ישׂראל בארץ ההוא וילך ראובן וישׁכב את־בלהה פילגשׁ אביו וישׁמע ישׂראל ויהיו בני־יעקב שׁנים עשׂר׃
B’reisheet 35:23 בני לאה בכור יעקב ראובן ושׁמעון ולוי ויהודה וישׂשכר וזבלון׃
B’reisheet 35:24 בני רחל יוסף ובנימן׃
B’reisheet 35:25 ובני בלהה שׁפחת רחל דן ונפתלי׃
B’reisheet 35:26 ובני זלפה שׁפחת לאה גד ואשׁר אלה בני יעקב אשׁר ילד־לו בפדן ארם׃
B’reisheet 35:27 ויבא יעקב אל־יצחק אביו ממרא קרית הארבע הוא חברון אשׁר־גר־שׁם אברהם ויצחק׃
B’reisheet 35:28 ויהיו ימי יצחק מאת שׁנה ושׁמנים שׁנה׃
B’reisheet 35:29 ויגוע יצחק וימת ויאסף אל־עמיו זקן ושׂבע ימים ויקברו אתו עשׂו ויעקב בניו׃
B’reisheet 36:1 ואלה תלדות עשׂו הוא אדום׃
B’reisheet 36:2 עשׂו לקח את־נשׁיו מבנות כנען את־עדה בת־אילון החתי ואת־אהליבמה בת־ענה בת־צבעון החוי׃
B’reisheet 36:3 ואת־בשׂמת בת־ישׁמעאל אחות נביות׃
B’reisheet 36:4 ותלד עדה לעשׂו את־אליפז ובשׂמת ילדה את־רעואל׃
B’reisheet 36:5 ואהליבמה ילדה את־יעישׁ ואת־יעלם ואת־קרח אלה בני עשׂו אשׁר ילדו־לו בארץ כנען׃
B’reisheet 36:6 ויקח עשׂו את־נשׁיו ואת־בניו ואת־בנתיו ואת־כל־נפשׁות ביתו ואת־מקנהו ואת־כל־בהמתו ואת כל־קנינו אשׁר רכשׁ בארץ כנען וילך אל־ארץ מפני יעקב אחיו׃
B’reisheet 36:7 כי־היה רכושׁם רב משׁבת יחדו ולא יכלה ארץ מגוריהם לשׂאת אתם מפני מקניהם׃
B’reisheet 36:8 וישׁב עשׂו בהר שׂעיר עשׂו הוא אדום׃
B’reisheet 36:9 ואלה תלדות עשׂו אבי אדום בהר שׂעיר׃
B’reisheet 36:10 אלה שׁמות בני־עשׂו אליפז בן־עדה אשׁת עשׂו רעואל בן־בשׂמת אשׁת עשׂו׃
B’reisheet 36:11 ויהיו בני אליפז תימן אומר צפו וגעתם וקנז׃
B’reisheet 36:12 ותמנע היתה פילגשׁ לאליפז בן־עשׂו ותלד לאליפז את־עמלק אלה בני עדה אשׁת עשׂו׃
B’reisheet 36:13 ואלה בני רעואל נחת וזרח שׁמה ומזה אלה היו בני בשׂמת אשׁת עשׂו׃
B’reisheet 36:14 ואלה היו בני אהליבמה בת־ענה בת־צבעון אשׁת עשׂו ותלד לעשׂו את־יעישׁ ואת־יעלם ואת־קרח׃
B’reisheet 36:15 אלה אלופי בני־עשׂו בני אליפז בכור עשׂו אלוף תימן אלוף אומר אלוף צפו אלוף קנז׃
B’reisheet 36:16 אלוף־קרח אלוף געתם אלוף עמלק אלה אלופי אליפז בארץ אדום אלה בני עדה׃
B’reisheet 36:17 ואלה בני רעואל בן־עשׂו אלוף נחת אלוף זרח אלוף שׁמה אלוף מזה אלה אלופי רעואל בארץ אדום אלה בני בשׂמת אשׁת עשׂו׃
B’reisheet 36:18 ואלה בני אהליבמה אשׁת עשׂו אלוף יעושׁ אלוף יעלם אלוף קרח אלה אלופי אהליבמה בת־ענה אשׁת עשׂו׃
B’reisheet 36:19 אלה בני־עשׂו ואלה אלופיהם הוא אדום׃
B’reisheet 36:20 אלה בני־שׂעיר החרי ישׁבי הארץ לוטן ושׁובל וצבעון וענה׃
B’reisheet 36:21 ודשׁון ואצר ודישׁן אלה אלופי החרי בני שׂעיר בארץ אדום׃
B’reisheet 36:22 ויהיו בני־לוטן חרי והימם ואחות לוטן תמנע׃
B’reisheet 36:23 ואלה בני שׁובל עלון ומנחת ועיבל שׁפו ואונם׃
B’reisheet 36:24 ואלה בני־צבעון ואיה וענה הוא ענה אשׁר מצא את־הימם במדבר ברעתו את־החמרים לצבעון אביו׃
B’reisheet 36:25 ואלה בני־ענה דשׁן ואהליבמה בת־ענה׃
B’reisheet 36:26 ואלה בני דישׁן חמדן ואשׁבן ויתרן וכרן׃
B’reisheet 36:27 אלה בני־אצר בלהן וזעון ועקן׃
B’reisheet 36:28 אלה בני־דישׁן עוץ וארן׃
B’reisheet 36:29 אלה אלופי החרי אלוף לוטן אלוף שׁובל אלוף צבעון אלוף ענה׃
B’reisheet 36:30 אלוף דשׁן אלוף אצר אלוף דישׁן אלה אלופי החרי לאלפיהם בארץ שׂעיר׃
B’reisheet 36:31 ואלה המלכים אשׁר מלכו בארץ אדום לפני מלך־מלך לבני ישׂראל׃
B’reisheet 36:32 וימלך באדום בלע בן־בעור ושׁם עירו דנהבה׃
B’reisheet 36:33 וימת בלע וימלך תחתיו יובב בן־זרח מבצרה׃
B’reisheet 36:34 וימת יובב וימלך תחתיו חשׁם מארץ התימני׃
B’reisheet 36:35 וימת חשׁם וימלך תחתיו הדד בן־בדד המכה את־מדין בשׂדה מואב ושׁם עירו עוית׃
B’reisheet 36:36 וימת הדד וימלך תחתיו שׂמלה ממשׂרקה׃
B’reisheet 36:37 וימת שׂמלה וימלך תחתיו שׁאול מרחבות הנהר׃
B’reisheet 36:38 וימת שׁאול וימלך תחתיו בעל חנן בן־עכבור׃
B’reisheet 36:39 וימת בעל חנן בן־עכבור וימלך תחתיו הדר ושׁם עירו פעו ושׁם אשׁתו מהיטבאל בת־מטרד בת מי זהב׃
B’reisheet 36:40 ואלה שׁמות אלופי עשׂו למשׁפחתם למקמתם בשׁמתם אלוף תמנע אלוף עלוה אלוף יתת׃
B’reisheet 36:41 אלוף אהליבמה אלוף אלה אלוף פינן׃
B’reisheet 36:42 אלוף קנז אלוף תימן אלוף מבצר׃
B’reisheet 36:43 אלוף מגדיאל אלוף עירם אלה אלופי אדום למשׁבתם בארץ אחזתם הוא עשׂו אבי אדום׃