Vayechi Haftarah (Hebrew)

Melachim Aleph 2:1-12
Melachim Aleph 2:1 ויקרבו ימי־דוד למות ויצו את־שׁלמה בנו לאמר׃
Melachim Aleph 2:2 אנכי הלך בדרך כל־הארץ וחזקת והיית לאישׁ׃
Melachim Aleph 2:3 ושׁמרת את־משׁמרת יהוה אלהיך ללכת בדרכיו לשׁמר חקתיו מצותיו ומשׁפטיו ועדותיו ככתוב בתורת משׁה למען תשׂכיל את כל־אשׁר תעשׂה ואת כל־אשׁר תפנה שׁם׃
Melachim Aleph 2:4 למען יקים יהוה את־דברו אשׁר דבר עלי לאמר אם־ישׁמרו בניך את־דרכם ללכת לפני באמת בכל־לבבם ובכל־נפשׁם לאמר לא־יכרת לך אישׁ מעל כסא ישׂראל׃
Melachim Aleph 2:5 וגם אתה ידעת את אשׁר־עשׂה לי יואב בן־צרויה אשׁר עשׂה לשׁני־שׂרי צבאות ישׂראל לאבנר בן־נר ולעמשׂא בן־יתר ויהרגם וישׂם דמי־מלחמה בשׁלם ויתן דמי מלחמה בחגרתו אשׁר במתניו ובנעלו אשׁר ברגליו׃
Melachim Aleph 2:6 ועשׂית כחכמתך ולא־תורד שׂיבתו בשׁלם שׁאל׃
Melachim Aleph 2:7 ולבני ברזלי הגלעדי תעשׂה־חסד והיו באכלי שׁלחנך כי־כן קרבו אלי בברחי מפני אבשׁלום אחיך׃
Melachim Aleph 2:8 והנה עמך שׁמעי בן־גרא בן־הימיני מבחרים והוא קללני קללה נמרצת ביום לכתי מחנים והוא־ירד לקראתי הירדן ואשׁבע לו ביהוה לאמר אם־אמיתך בחרב׃
Melachim Aleph 2:9 ועתה אל־תנקהו כי אישׁ חכם אתה וידעת את אשׁר תעשׂה־לו והורדת את־שׂיבתו בדם שׁאול׃
Melachim Aleph 2:10 וישׁכב דוד עם־אבתיו ויקבר בעיר דוד׃
Melachim Aleph 2:11 והימים אשׁר מלך דוד על־ישׂראל ארבעים שׁנה בחברון מלך שׁבע שׁנים ובירושׁלם מלך שׁלשׁים ושׁלשׁ שׁנים׃
Melachim Aleph 2:12 ושׁלמה ישׁב על־כסא דוד אביו ותכן מלכתו מאד׃