Vayechi (Hebrew)

B'reisheet 47:28 - 50:26
B’reisheet 47:28 ויחי יעקב בארץ מצרים שׁבע עשׂרה שׁנה ויהי ימי־יעקב שׁני חייו שׁבע שׁנים וארבעים ומאת שׁנה׃
B’reisheet 47:29 ויקרבו ימי־ישׂראל למות ויקרא לבנו ליוסף ויאמר לו אם־נא מצאתי חן בעיניך שׂים־נא ידך תחת ירכי ועשׂית עמדי חסד ואמת אל־נא תקברני במצרים׃
B’reisheet 47:30 ושׁכבתי עם־אבתי ונשׂאתני ממצרים וקברתני בקברתם ויאמר אנכי אעשׂה כדברך׃
B’reisheet 47:31 ויאמר השׁבעה לי וישׁבע לו וישׁתחו ישׂראל על־ראשׁ המטה׃
B’reisheet 48:1 ויהי אחרי הדברים האלה ויאמר ליוסף הנה אביך חלה ויקח את־שׁני בניו עמו את־מנשׁה ואת־אפרים׃
B’reisheet 48:2 ויגד ליעקב ויאמר הנה בנך יוסף בא אליך ויתחזק ישׂראל וישׁב על־המטה׃
B’reisheet 48:3 ויאמר יעקב אל־יוסף אל שׁדי נראה־אלי בלוז בארץ כנען ויברך אתי׃
B’reisheet 48:4 ויאמר אלי הנני מפרך והרביתך ונתתיך לקהל עמים ונתתי את־הארץ הזאת לזרעך אחריך אחזת עולם׃
B’reisheet 48:5 ועתה שׁני־בניך הנולדים לך בארץ מצרים עד־באי אליך מצרימה לי־הם אפרים ומנשׁה כראובן ושׁמעון יהיו־לי׃
B’reisheet 48:6 ומולדתך אשׁר־הולדת אחריהם לך יהיו על שׁם אחיהם יקראו בנחלתם׃
B’reisheet 48:7 ואני בבאי מפדן מתה עלי רחל בארץ כנען בדרך בעוד כברת־ארץ לבא אפרתה ואקברה שׁם בדרך אפרת הוא בית לחם׃
B’reisheet 48:8 וירא ישׂראל את־בני יוסף ויאמר מי־אלה׃
B’reisheet 48:9 ויאמר יוסף אל־אביו בני הם אשׁר־נתן־לי אלהים בזה ויאמר קחם־נא אלי ואברכם׃
B’reisheet 48:10 ועיני ישׂראל כבדו מזקן לא יוכל לראות ויגשׁ אתם אליו וישׁק להם ויחבק להם׃
B’reisheet 48:11 ויאמר ישׂראל אל־יוסף ראה פניך לא פללתי והנה הראה אתי אלהים גם את־זרעך׃
B’reisheet 48:12 ויוצא יוסף אתם מעם ברכיו וישׁתחו לאפיו ארצה׃
B’reisheet 48:13 ויקח יוסף את־שׁניהם את־אפרים בימינו משׂמאל ישׂראל ואת־מנשׁה בשׂמאלו מימין ישׂראל ויגשׁ אליו׃
B’reisheet 48:14 וישׁלח ישׂראל את־ימינו וישׁת על־ראשׁ אפרים והוא הצעיר ואת־שׂמאלו על־ראשׁ מנשׁה שׂכל את־ידיו כי מנשׁה הבכור׃
B’reisheet 48:15 ויברך את־יוסף ויאמר האלהים אשׁר התהלכו אבתי לפניו אברהם ויצחק האלהים הרעה אתי מעודי עד־היום הזה׃
B’reisheet 48:16 המלאך הגאל אתי מכל־רע יברך את־הנערים ויקרא בהם שׁמי ושׁם אבתי אברהם ויצחק וידגו לרב בקרב הארץ׃
B’reisheet 48:17 וירא יוסף כי־ישׁית אביו יד־ימינו על־ראשׁ אפרים וירע בעיניו ויתמך יד־אביו להסיר אתה מעל ראשׁ־אפרים על־ראשׁ מנשׁה׃
B’reisheet 48:18 ויאמר יוסף אל־אביו לא־כן אבי כי־זה הבכר שׂים ימינך על־ראשׁו׃
B’reisheet 48:19 וימאן אביו ויאמר ידעתי בני ידעתי גם־הוא יהיה־לעם וגם־הוא יגדל ואולם אחיו הקטן יגדל ממנו וזרעו יהיה מלא־הגוים׃
B’reisheet 48:20 ויברכם ביום ההוא לאמור בך יברך ישׂראל לאמר ישׂמך אלהים כאפרים וכמנשׁה וישׂם את־אפרים לפני מנשׁה׃
B’reisheet 48:21 ויאמר ישׂראל אל־יוסף הנה אנכי מת והיה אלהים עמכם והשׁיב אתכם אל־ארץ אבתיכם׃
B’reisheet 48:22 ואני נתתי לך שׁכם אחד על־אחיך אשׁר לקחתי מיד האמרי בחרבי ובקשׁתי׃
B’reisheet 49:1 ויקרא יעקב אל־בניו ויאמר האספו ואגידה לכם את אשׁר־יקרא אתכם באחרית הימים׃
B’reisheet 49:2 הקבצו ושׁמעו בני יעקב ושׁמעו אל־ישׂראל אביכם׃
B’reisheet 49:3 ראובן בכרי אתה כחי וראשׁית אוני יתר שׂאת ויתר עז׃
B’reisheet 49:4 פחז כמים אל־תותר כי עלית משׁכבי אביך אז חללת יצועי עלה׃
B’reisheet 49:5 שׁמעון ולוי אחים כלי חמס מכרתיהם׃
B’reisheet 49:6 בסדם אל־תבא נפשׁי בקהלם אל־תחד כבדי כי באפם הרגו אישׁ וברצנם עקרו־שׁור׃
B’reisheet 49:7 ארור אפם כי עז ועברתם כי קשׁתה אחלקם ביעקב ואפיצם בישׂראל׃
B’reisheet 49:8 יהודה אתה יודוך אחיך ידך בערף איביך ישׁתחוו לך בני אביך׃
B’reisheet 49:9 גור אריה יהודה מטרף בני עלית כרע רבץ כאריה וכלביא מי יקימנו׃
B’reisheet 49:10 לא־יסור שׁבט מיהודה ומחקק מבין רגליו עד כי־יבא שׁילה ולו יקהת עמים׃
B’reisheet 49:11 אסרי לגפן עירה ולשׂרקה בני אתנו כבס ביין לבשׁו ובדם־ענבים סותה׃
B’reisheet 49:12 חכלילי עינים מיין ולבן־שׁנים מחלב׃
B’reisheet 49:13 זבולן לחוף ימים ישׁכן והוא לחוף אנית וירכתו על־צידן׃
B’reisheet 49:14 ישׂשכר חמר גרם רבץ בין המשׁפתים׃
B’reisheet 49:15 וירא מנחה כי טוב ואת־הארץ כי נעמה ויט שׁכמו לסבל ויהי למס־עבד׃
B’reisheet 49:16 דן ידין עמו כאחד שׁבטי ישׂראל׃
B’reisheet 49:17 יהי־דן נחשׁ עלי־דרך שׁפיפן עלי־ארח הנשׁך עקבי־סוס ויפל רכבו אחור׃
B’reisheet 49:18 לישׁועתך קויתי יהוה׃
B’reisheet 49:19 גד גדוד יגודנו והוא יגד עקב׃
B’reisheet 49:20 מאשׁר שׁמנה לחמו והוא יתן מעדני־מלך׃
B’reisheet 49:21 נפתלי אילה שׁלחה הנתן אמרי־שׁפר׃
B’reisheet 49:22 בן פרת יוסף בן פרת עלי־עין בנות צעדה עלי־שׁור׃
B’reisheet 49:23 וימררהו ורבו וישׂטמהו בעלי חצים׃
B’reisheet 49:24 ותשׁב באיתן קשׁתו ויפזו זרעי ידיו מידי אביר יעקב משׁם רעה אבן ישׂראל׃
B’reisheet 49:25 מאל אביך ויעזרך ואת שׁדי ויברכך ברכת שׁמים מעל ברכת תהום רבצת תחת ברכת שׁדים ורחם׃
B’reisheet 49:26 ברכת אביך גברו על־ברכת הורי עד־תאות גבעת עולם תהיין לראשׁ יוסף ולקדקד נזיר אחיו׃
B’reisheet 49:27 בנימין זאב יטרף בבקר יאכל עד ולערב יחלק שׁלל׃
B’reisheet 49:28 כל־אלה שׁבטי ישׂראל שׁנים עשׂר וזאת אשׁר־דבר להם אביהם ויברך אותם אישׁ אשׁר כברכתו ברך אתם׃
B’reisheet 49:29 ויצו אותם ויאמר אלהם אני נאסף אל־עמי קברו אתי אל־אבתי אל־המערה אשׁר בשׂדה עפרון החתי׃
B’reisheet 49:30 במערה אשׁר בשׂדה המכפלה אשׁר על־פני־ממרא בארץ כנען אשׁר קנה אברהם את־השׂדה מאת עפרן החתי לאחזת־קבר׃
B’reisheet 49:31 שׁמה קברו את־אברהם ואת שׂרה אשׁתו שׁמה קברו את־יצחק ואת רבקה אשׁתו ושׁמה קברתי את־לאה׃
B’reisheet 49:32 מקנה השׂדה והמערה אשׁר־בו מאת בני־חת׃
B’reisheet 49:33 ויכל יעקב לצות את־בניו ויאסף רגליו אל־המטה ויגוע ויאסף אל־עמיו׃
B’reisheet 50:1 ויפל יוסף על־פני אביו ויבך עליו וישׁק־לו׃
B’reisheet 50:2 ויצו יוסף את־עבדיו את־הרפאים לחנט את־אביו ויחנטו הרפאים את־ישׂראל׃
B’reisheet 50:3 וימלאו־לו ארבעים יום כי כן ימלאו ימי החנטים ויבכו אתו מצרים שׁבעים יום׃
B’reisheet 50:4 ויעברו ימי בכיתו וידבר יוסף אל־בית פרעה לאמר אם־נא מצאתי חן בעיניכם דברו־נא באזני פרעה לאמר׃
B’reisheet 50:5 אבי השׁביעני לאמר הנה אנכי מת בקברי אשׁר כריתי לי בארץ כנען שׁמה תקברני ועתה אעלה־נא ואקברה את־אבי ואשׁובה׃
B’reisheet 50:6 ויאמר פרעה עלה וקבר את־אביך כאשׁר השׁביעך׃
B’reisheet 50:7 ויעל יוסף לקבר את־אביו ויעלו אתו כל־עבדי פרעה זקני ביתו וכל זקני ארץ־מצרים׃
B’reisheet 50:8 וכל בית יוסף ואחיו ובית אביו רק טפם וצאנם ובקרם עזבו בארץ גשׁן׃
B’reisheet 50:9 ויעל עמו גם־רכב גם־פרשׁים ויהי המחנה כבד מאד׃
B’reisheet 50:10 ויבאו עד־גרן האטד אשׁר בעבר הירדן ויספדו־שׁם מספד גדול וכבד מאד ויעשׂ לאביו אבל שׁבעת ימים׃
B’reisheet 50:11 וירא יושׁב הארץ הכנעני את־האבל בגרן האטד ויאמרו אבל־כבד זה למצרים על־כן קרא שׁמה אבל מצרים אשׁר בעבר הירדן׃
B’reisheet 50:12 ויעשׂו בניו לו כן כאשׁר צום׃
B’reisheet 50:13 וישׂאו אתו בניו ארצה כנען ויקברו אתו במערת שׂדה המכפלה אשׁר קנה אברהם את־השׂדה לאחזת־קבר מאת עפרן החתי על־פני ממרא׃
B’reisheet 50:14 וישׁב יוסף מצרימה הוא ואחיו וכל־העלים אתו לקבר את־אביו אחרי קברו את־אביו׃
B’reisheet 50:15 ויראו אחי־יוסף כי־מת אביהם ויאמרו לו ישׂטמנו יוסף והשׁב ישׁיב לנו את כל־הרעה אשׁר גמלנו אתו׃
B’reisheet 50:16 ויצוו אל־יוסף לאמר אביך צוה לפני מותו לאמר׃
B’reisheet 50:17 כה־תאמרו ליוסף אנא שׂא נא פשׁע אחיך וחטאתם כי־רעה גמלוך ועתה שׂא נא לפשׁע עבדי אלהי אביך ויבך יוסף בדברם אליו׃
B’reisheet 50:18 וילכו גם־אחיו ויפלו לפניו ויאמרו הננו לך לעבדים׃
B’reisheet 50:19 ויאמר אלהם יוסף אל־תיראו כי התחת אלהים אני׃
B’reisheet 50:20 ואתם חשׁבתם עלי רעה אלהים חשׁבה לטבה למען עשׂה כיום הזה להחית עם־רב׃
B’reisheet 50:21 ועתה אל־תיראו אנכי אכלכל אתכם ואת־טפכם וינחם אותם וידבר על־לבם׃
B’reisheet 50:22 וישׁב יוסף במצרים הוא ובית אביו ויחי יוסף מאה ועשׂר שׁנים׃
B’reisheet 50:23 וירא יוסף לאפרים בני שׁלשׁים גם בני מכיר בן־מנשׁה ילדו על־ברכי יוסף׃
B’reisheet 50:24 ויאמר יוסף אל־אחיו אנכי מת ואלהים פקד יפקד אתכם והעלה אתכם מן־הארץ הזאת אל־הארץ אשׁר נשׁבע לאברהם ליצחק וליעקב׃
B’reisheet 50:25 וישׁבע יוסף את־בני ישׂראל לאמר פקד יפקד אלהים אתכם והעלתם את־עצמתי מזה׃
B’reisheet 50:26 וימת יוסף בן־מאה ועשׂר שׁנים ויחנטו אתו ויישׂם בארון במצרים׃