Vayigash Haftarah (Hebrew)

Yechezkel 37: 15-28
Yech 37:15 ויהי דבר־יהוה אלי לאמר׃
Yech 37:16 ואתה בן־אדם קח־לך עץ אחד וכתב עליו ליהודה ולבני ישׂראל חברו ולקח עץ אחד וכתוב עליו ליוסף עץ אפרים וכל־בית ישׂראל חברו׃
Yech 37:17 וקרב אתם אחד אל־אחד לך לעץ אחד והיו לאחדים בידך׃
Yech 37:18 וכאשׁר יאמרו אליך בני עמך לאמר הלוא־תגיד לנו מה־אלה לך׃
Yech 37:19 דבר אלהם כה־אמר אדני יהוה הנה אני לקח את־עץ יוסף אשׁר ביד־אפרים ושׁבטי ישׂראל חברו ונתתי אותם עליו את־עץ יהודה ועשׂיתם לעץ אחד והיו אחד בידי׃
Yech 37:20 והיו העצים אשׁר־תכתב עליהם בידך לעיניהם׃
Yech 37:21 ודבר אליהם כה־אמר אדני יהוה הנה אני לקח את־בני ישׂראל מבין הגוים אשׁר הלכו־שׁם וקבצתי אתם מסביב והבאתי אותם אל־אדמתם׃
Yech 37:22 ועשׂיתי אתם לגוי אחד בארץ בהרי ישׂראל ומלך אחד יהיה לכלם למלך ולא יהיה־עוד לשׁני גוים ולא יחצו עוד לשׁתי ממלכות עוד׃
Yech 37:23 ולא יטמאו עוד בגלוליהם ובשׁקוציהם ובכל פשׁעיהם והושׁעתי אתם מכל מושׁבתיהם אשׁר חטאו בהם וטהרתי אותם והיו־לי לעם ואני אהיה להם לאלהים׃
Yech 37:24 ועבדי דוד מלך עליהם ורועה אחד יהיה לכלם ובמשׁפטי ילכו וחקתי ישׁמרו ועשׂו אותם׃
Yech 37:25 וישׁבו על־הארץ אשׁר נתתי לעבדי ליעקב אשׁר ישׁבו־בה אבותיכם וישׁבו עליה המה ובניהם ובני בניהם עד־עולם ודוד עבדי נשׂיא להם לעולם׃
Yech 37:26 וכרתי להם ברית שׁלום ברית עולם יהיה אותם ונתתים והרביתי אותם ונתתי את־מקדשׁי בתוכם לעולם׃
Yech 37:27 והיה משׁכני עליהם והייתי להם לאלהים והמה יהיו־לי לעם׃
Yech 37:28 וידעו הגוים כי אני יהוה מקדשׁ את־ישׂראל בהיות מקדשׁי בתוכם לעולם׃