Vayigash (Hebrew)

B'reisheet 44:18 - 47:27
B’reisheet 44:18 ויגשׁ אליו יהודה ויאמר בי אדני ידבר־נא עבדך דבר באזני אדני ואל־יחר אפך בעבדך כי כמוך כפרעה׃
B’reisheet 44:19 אדני שׁאל את־עבדיו לאמר הישׁ־לכם אב או־אח׃
B’reisheet 44:20 ונאמר אל־אדני ישׁ־לנו אב זקן וילד זקנים קטן ואחיו מת ויותר הוא לבדו לאמו ואביו אהבו׃
B’reisheet 44:21 ותאמר אל־עבדיך הורדהו אלי ואשׂימה עיני עליו׃
B’reisheet 44:22 ונאמר אל־אדני לא־יוכל הנער לעזב את־אביו ועזב את־אביו ומת׃
B’reisheet 44:23 ותאמר אל־עבדיך אם־לא ירד אחיכם הקטן אתכם לא תספון לראות פני׃
B’reisheet 44:24 ויהי כי עלינו אל־עבדך אבי ונגד־לו את דברי אדני׃
B’reisheet 44:25 ויאמר אבינו שׁבו שׁברו־לנו מעט־אכל׃
B’reisheet 44:26 ונאמר לא נוכל לרדת אם־ישׁ אחינו הקטן אתנו וירדנו כי־לא נוכל לראות פני האישׁ ואחינו הקטן איננו אתנו׃
B’reisheet 44:27 ויאמר עבדך אבי אלינו אתם ידעתם כי שׁנים ילדה־לי אשׁתי׃
B’reisheet 44:28 ויצא האחד מאתי ואמר אך טרף טרף ולא ראיתיו עד־הנה׃
B’reisheet 44:29 ולקחתם גם־את־זה מעם פני וקרהו אסון והורדתם את־שׂיבתי ברעה שׁאלה׃
B’reisheet 44:30 ועתה כבאי אל־עבדך אבי והנער איננו אתנו ונפשׁו קשׁורה בנפשׁו׃
B’reisheet 44:31 והיה כראותו כי־אין הנער ומת והורידו עבדיך את־שׂיבת עבדך אבינו ביגון שׁאלה׃
B’reisheet 44:32 כי עבדך ערב את־הנער מעם אבי לאמר אם־לא אביאנו אליך וחטאתי לאבי כל־הימים׃
B’reisheet 44:33 ועתה ישׁב־נא עבדך תחת הנער עבד לאדני והנער יעל עם־אחיו׃
B’reisheet 44:34 כי־איך אעלה אל־אבי והנער איננו אתי פן אראה ברע אשׁר ימצא את־אבי׃
B’reisheet 45:1 ולא־יכל יוסף להתאפק לכל הנצבים עליו ויקרא הוציאו כל־אישׁ מעלי ולא־עמד אישׁ אתו בהתודע יוסף אל־אחיו׃
B’reisheet 45:2 ויתן את־קלו בבכי וישׁמעו מצרים וישׁמע בית פרעה׃
B’reisheet 45:3 ויאמר יוסף אל־אחיו אני יוסף העוד אבי חי ולא־יכלו אחיו לענות אתו כי נבהלו מפניו׃
B’reisheet 45:4 ויאמר יוסף אל־אחיו גשׁו־נא אלי ויגשׁו ויאמר אני יוסף אחיכם אשׁר־מכרתם אתי מצרימה׃
B’reisheet 45:5 ועתה אל־תעצבו ואל־יחר בעיניכם כי־מכרתם אתי הנה כי למחיה שׁלחני אלהים לפניכם׃
B’reisheet 45:6 כי־זה שׁנתים הרעב בקרב הארץ ועוד חמשׁ שׁנים אשׁר אין־חרישׁ וקציר׃
B’reisheet 45:7 וישׁלחני אלהים לפניכם לשׂום לכם שׁארית בארץ ולהחיות לכם לפליטה גדלה׃
B’reisheet 45:8 ועתה לא־אתם שׁלחתם אתי הנה כי האלהים וישׂימני לאב לפרעה ולאדון לכל־ביתו ומשׁל בכל־ארץ מצרים׃
B’reisheet 45:9 מהרו ועלו אל־אבי ואמרתם אליו כה אמר בנך יוסף שׂמני אלהים לאדון לכל־מצרים רדה אלי אל־תעמד׃
B’reisheet 45:10 וישׁבת בארץ־גשׁן והיית קרוב אלי אתה ובניך ובני בניך וצאנך ובקרך וכל־אשׁר־לך׃
B’reisheet 45:11 וכלכלתי אתך שׁם כי־עוד חמשׁ שׁנים רעב פן־תורשׁ אתה וביתך וכל־אשׁר־לך׃
B’reisheet 45:12 והנה עיניכם ראות ועיני אחי בנימין כי־פי המדבר אליכם׃
B’reisheet 45:13 והגדתם לאבי את־כל־כבודי במצרים ואת כל־אשׁר ראיתם ומהרתם והורדתם את־אבי הנה׃
B’reisheet 45:14 ויפל על־צוארי בנימן־אחיו ויבך ובנימן בכה על־צואריו׃
B’reisheet 45:15 וינשׁק לכל־אחיו ויבך עלהם ואחרי כן דברו אחיו אתו׃
B’reisheet 45:16 והקל נשׁמע בית פרעה לאמר באו אחי יוסף וייטב בעיני פרעה ובעיני עבדיו׃
B’reisheet 45:17 ויאמר פרעה אל־יוסף אמר אל־אחיך זאת עשׂו טענו את־בעירכם ולכו־באו ארצה כנען׃
B’reisheet 45:18 וקחו את־אביכם ואת־בתיכם ובאו אלי ואתנה לכם את־טוב ארץ מצרים ואכלו את־חלב הארץ׃
B’reisheet 45:19 ואתה צויתה זאת עשׂו קחו־לכם מארץ מצרים עגלות לטפכם ולנשׁיכם ונשׂאתם את־אביכם ובאתם׃
B’reisheet 45:20 ועינכם אל־תחס על־כליכם כי־טוב כל־ארץ מצרים לכם הוא׃
B’reisheet 45:21 ויעשׂו־כן בני ישׂראל ויתן להם יוסף עגלות על־פי פרעה ויתן להם צדה לדרך׃
B’reisheet 45:22 לכלם נתן לאישׁ חלפות שׂמלת ולבנימן נתן שׁלשׁ מאות כסף וחמשׁ חלפת שׂמלת׃
B’reisheet 45:23 ולאביו שׁלח כזאת עשׂרה חמרים נשׂאים מטוב מצרים ועשׂר אתנת נשׂאת בר ולחם ומזון לאביו לדרך׃
B’reisheet 45:24 וישׁלח את־אחיו וילכו ויאמר אלהם אל־תרגזו בדרך׃
B’reisheet 45:25 ויעלו ממצרים ויבאו ארץ כנען אל־יעקב אביהם׃
B’reisheet 45:26 ויגדו לו לאמר עוד יוסף חי וכי־הוא משׁל בכל־ארץ מצרים ויפג לבו כי לא־האמין להם׃
B’reisheet 45:27 וידברו אליו את כל־דברי יוסף אשׁר דבר אלהם וירא את־העגלות אשׁר־שׁלח יוסף לשׂאת אתו ותחי רוח יעקב אביהם׃
B’reisheet 45:28 ויאמר ישׂראל רב עוד־יוסף בני חי אלכה ואראנו בטרם אמות׃
B’reisheet 46:1 ויסע ישׂראל וכל־אשׁר־לו ויבא בארה שׁבע ויזבח זבחים לאלהי אביו יצחק׃
B’reisheet 46:2 ויאמר אלהים לישׂראל במראת הלילה ויאמר יעקב יעקב ויאמר הנני׃
B’reisheet 46:3 ויאמר אנכי האל אלהי אביך אל־תירא מרדה מצרימה כי־לגוי גדול אשׂימך שׁם׃
B’reisheet 46:4 אנכי ארד עמך מצרימה ואנכי אעלך גם־עלה ויוסף ישׁית ידו על־עיניך׃
B’reisheet 46:5 ויקם יעקב מבאר שׁבע וישׂאו בני־ישׂראל את־יעקב אביהם ואת־טפם ואת־נשׁיהם בעגלות אשׁר־שׁלח פרעה לשׂאת אתו׃
B’reisheet 46:6 ויקחו את־מקניהם ואת־רכושׁם אשׁר רכשׁו בארץ כנען ויבאו מצרימה יעקב וכל־זרעו אתו׃
B’reisheet 46:7 בניו ובני בניו אתו בנתיו ובנות בניו וכל־זרעו הביא אתו מצרימה׃
B’reisheet 46:8 ואלה שׁמות בני־ישׂראל הבאים מצרימה יעקב ובניו בכר יעקב ראובן׃
B’reisheet 46:9 ובני ראובן חנוך ופלוא וחצרן וכרמי׃
B’reisheet 46:10 ובני שׁמעון ימואל וימין ואהד ויכין וצחר ושׁאול בן־הכנענית׃
B’reisheet 46:11 ובני לוי גרשׁון קהת ומררי׃
B’reisheet 46:12 ובני יהודה ער ואונן ושׁלה ופרץ וזרח וימת ער ואונן בארץ כנען ויהיו בני־פרץ חצרן וחמול׃
B’reisheet 46:13 ובני ישׂשכר תולע ופוה ויוב ושׁמרן׃
B’reisheet 46:14 ובני זבלון סרד ואלון ויחלאל׃
B’reisheet 46:15 אלה בני לאה אשׁר ילדה ליעקב בפדן ארם ואת דינה בתו כל־נפשׁ בניו ובנותיו שׁלשׁים ושׁלשׁ׃
B’reisheet 46:16 ובני גד צפיון וחגי שׁוני ואצבן ערי וארודי ואראלי׃
B’reisheet 46:17 ובני אשׁר ימנה וישׁוה וישׁוי ובריעה ושׂרח אחתם ובני בריעה חבר ומלכיאל׃
B’reisheet 46:18 אלה בני זלפה אשׁר־נתן לבן ללאה בתו ותלד את־אלה ליעקב שׁשׁ עשׂרה נפשׁ׃
B’reisheet 46:19 בני רחל אשׁת יעקב יוסף ובנימן׃
B’reisheet 46:20 ויולד ליוסף בארץ מצרים אשׁר ילדה־לו אסנת בת־פוטי פרע כהן אן את־מנשׁה ואת־אפרים׃
B’reisheet 46:21 ובני בנימן בלע ובכר ואשׁבל גרא ונעמן אחי וראשׁ מפים וחפים וארד׃
B’reisheet 46:22 אלה בני רחל אשׁר ילד ליעקב כל־נפשׁ ארבעה עשׂר׃
B’reisheet 46:23 ובני־דן חשׁים׃
B’reisheet 46:24 ובני נפתלי יחצאל וגוני ויצר ושׁלם׃
B’reisheet 46:25 אלה בני בלהה אשׁר־נתן לבן לרחל בתו ותלד את־אלה ליעקב כל־נפשׁ שׁבעה׃
B’reisheet 46:26 כל־הנפשׁ הבאה ליעקב מצרימה יצאי ירכו מלבד נשׁי בני־יעקב כל־נפשׁ שׁשׁים ושׁשׁ׃
B’reisheet 46:27 ובני יוסף אשׁר־ילד־לו במצרים נפשׁ שׁנים כל־הנפשׁ לבית־יעקב הבאה מצרימה שׁבעים׃
B’reisheet 46:28 ואת־יהודה שׁלח לפניו אל־יוסף להורת לפניו גשׁנה ויבאו ארצה גשׁן׃
B’reisheet 46:29 ויאסר יוסף מרכבתו ויעל לקראת־ישׂראל אביו גשׁנה וירא אליו ויפל על־צואריו ויבך על־צואריו עוד׃
B’reisheet 46:30 ויאמר ישׂראל אל־יוסף אמותה הפעם אחרי ראותי את־פניך כי עודך חי׃
B’reisheet 46:31 ויאמר יוסף אל־אחיו ואל־בית אביו אעלה ואגידה לפרעה ואמרה אליו אחי ובית־אבי אשׁר בארץ־כנען באו אלי׃
B’reisheet 46:32 והאנשׁים רעי צאן כי־אנשׁי מקנה היו וצאנם ובקרם וכל־אשׁר להם הביאו׃
B’reisheet 46:33 והיה כי־יקרא לכם פרעה ואמר מה־מעשׂיכם׃
B’reisheet 46:34 ואמרתם אנשׁי מקנה היו עבדיך מנעורינו ועד־עתה גם־אנחנו גם־אבתינו בעבור תשׁבו בארץ גשׁן כי־תועבת מצרים כל־רעה צאן׃
B’reisheet 47:1 ויבא יוסף ויגד לפרעה ויאמר אבי ואחי וצאנם ובקרם וכל־אשׁר להם באו מארץ כנען והנם בארץ גשׁן׃
B’reisheet 47:2 ומקצה אחיו לקח חמשׁה אנשׁים ויצגם לפני פרעה׃
B’reisheet 47:3 ויאמר פרעה אל־אחיו מה־מעשׂיכם ויאמרו אל־פרעה רעה צאן עבדיך גם־אנחנו גם־אבותינו׃
B’reisheet 47:4 ויאמרו אל־פרעה לגור בארץ באנו כי־אין מרעה לצאן אשׁר לעבדיך כי־כבד הרעב בארץ כנען ועתה ישׁבו־נא עבדיך בארץ גשׁן׃
B’reisheet 47:5 ויאמר פרעה אל־יוסף לאמר אביך ואחיך באו אליך׃
B’reisheet 47:6 ארץ מצרים לפניך הוא במיטב הארץ הושׁב את־אביך ואת־אחיך ישׁבו בארץ גשׁן ואם־ידעת וישׁ־בם אנשׁי־חיל ושׂמתם שׂרי מקנה על־אשׁר־לי׃
B’reisheet 47:7 ויבא יוסף את־יעקב אביו ויעמדהו לפני פרעה ויברך יעקב את־פרעה׃
B’reisheet 47:8 ויאמר פרעה אל־יעקב כמה ימי שׁני חייך׃
B’reisheet 47:9 ויאמר יעקב אל־פרעה ימי שׁני מגורי שׁלשׁים ומאת שׁנה מעט ורעים היו ימי שׁני חיי ולא השׂיגו את־ימי שׁני חיי אבתי בימי מגוריהם׃
B’reisheet 47:10 ויברך יעקב את־פרעה ויצא מלפני פרעה׃
B’reisheet 47:11 ויושׁב יוסף את־אביו ואת־אחיו ויתן להם אחזה בארץ מצרים במיטב הארץ בארץ רעמסס כאשׁר צוה פרעה׃
B’reisheet 47:12 ויכלכל יוסף את־אביו ואת־אחיו ואת כל־בית אביו לחם לפי הטף׃
B’reisheet 47:13 ולחם אין בכל־הארץ כי־כבד הרעב מאד ותלה ארץ מצרים וארץ כנען מפני הרעב׃
B’reisheet 47:14 וילקט יוסף את־כל־הכסף הנמצא בארץ־מצרים ובארץ כנען בשׁבר אשׁר־הם שׁברים ויבא יוסף את־הכסף ביתה פרעה׃
B’reisheet 47:15 ויתם הכסף מארץ מצרים ומארץ כנען ויבאו כל־מצרים אל־יוסף לאמר הבה־לנו לחם ולמה נמות נגדך כי אפס כסף׃
B’reisheet 47:16 ויאמר יוסף הבו מקניכם ואתנה לכם במקניכם אם־אפס כסף׃
B’reisheet 47:17 ויביאו את־מקניהם אל־יוסף ויתן להם יוסף לחם בסוסים ובמקנה הצאן ובמקנה הבקר ובחמרים וינהלם בלחם בכל־מקנהם בשׁנה ההוא׃
B’reisheet 47:18 ותתם השׁנה ההוא ויבאו אליו בשׁנה השׁנית ויאמרו לו לא־נכחד מאדני כי אם־תם הכסף ומקנה הבהמה אל־אדני לא נשׁאר לפני אדני בלתי אם־גויתנו ואדמתנו׃
B’reisheet 47:19 למה נמות לעיניך גם־אנחנו גם אדמתנו קנה־אתנו ואת־אדמתנו בלחם ונהיה אנחנו ואדמתנו עבדים לפרעה ותן־זרע ונחיה ולא נמות והאדמה לא תשׁם׃
B’reisheet 47:20 ויקן יוסף את־כל־אדמת מצרים לפרעה כי־מכרו מצרים אישׁ שׂדהו כי־חזק עלהם הרעב ותהי הארץ לפרעה׃
B’reisheet 47:21 ואת־העם העביר אתו לערים מקצה גבול־מצרים ועד־קצהו׃
B’reisheet 47:22 רק אדמת הכהנים לא קנה כי חק לכהנים מאת פרעה ואכלו את־חקם אשׁר נתן להם פרעה על־כן לא מכרו את־אדמתם׃
B’reisheet 47:23 ויאמר יוסף אל־העם הן קניתי אתכם היום ואת־אדמתכם לפרעה הא־לכם זרע וזרעתם את־האדמה׃
B’reisheet 47:24 והיה בתבואת ונתתם חמישׁית לפרעה וארבע הידת יהיה לכם לזרע השׂדה ולאכלכם ולאשׁר בבתיכם ולאכל לטפכם׃
B’reisheet 47:25 ויאמרו החיתנו נמצא־חן בעיני אדני והיינו עבדים לפרעה׃
B’reisheet 47:26 וישׂם אתה יוסף לחק עד־היום הזה על־אדמת מצרים לפרעה לחמשׁ רק אדמת הכהנים לבדם לא היתה לפרעה׃
B’reisheet 47:27 וישׁב ישׂראל בארץ מצרים בארץ גשׁן ויאחזו בה ויפרו וירבו מאד׃