Beshalach Gospel (Hebrew)

Mark 6
Mar 6:1 ויצא משם ויבא אל־ארצו וילכו אחריו תלמידיו׃
Mar 6:2 ויהי ביום השבת ויחל ללמד בבית הכנסת וישמעו רבים וישתוממו ויאמרו מאין לאיש הזה כאלה ומה החכמה הנתונה לו עד־אשר נעשו גבורות כאלה על־ידיו׃
Mar 6:3 הלא הוא החרש בן־מרים ואחי יעקב ויוסי ויהודה ושמעון והלא אחיותיו אתנו פה ויהי להם למכשול׃
Mar 6:4 ויאמר אליהם ישוע אין הנביא נקלה כי אם־בארצו ובין קרוביו ובביתו׃
Mar 6:5 ולא יכל לעשות שם כל־גבורה רק חלשים מעטים שם ידיו עליהם וירפאם׃
Mar 6:6 ויתמה על־חסרון אמונתם ויעבר בכפרים מסביב וילמד׃
Mar 6:7 ויקרא אל־שנים העשר ויחל לשלח אותם שנים שנים ויתן להם שלטן על־רוחות הטמאה׃
Mar 6:8 ויצו עליהם אשר לא־יקחו מאומה לדרך זולתי מקל לבדו לא תרמיל ולא לחם ולא מעות בחגורה׃
Mar 6:9 ולהיות נעולי סנדל ושתי כתנות לא ילבשו׃
Mar 6:10 ויאמר אליהם כי תבאו בית־איש באחד המקומות שבו־בו עד כי־תצאו משם׃
Mar 6:11 וכל־אשר לא־יאספו אתכם ולא ישמעו אליכם צאו משם ונערו את־עפר כפות רגליכם לעדות להם (אמן אני אמר לכם לסדם ולעמרה יקל ביום הדין מן־העיר ההיא)׃
Mar 6:12 ויצאו ויקראו לשוב בתשובה׃
Mar 6:13 ויגרשו שדים רבים ויסוכו בשמן חלשים רבים וירפאום׃
Mar 6:14 וישמע המלך הורדוס שמעו כי נודע שמו ויאמר יוחנן המטביל נעור מן־המתים ועל־כן פעלים בו הכחות׃
Mar 6:15 ויש אמרים כי אליהו הוא ואחרים אמרו כי־נביא הוא או כאחד הנביאים׃
Mar 6:16 וישמע הורדוס ויאמר יוחנן אשר אנכי נשאתי את־ראשו מעליו הוא קם מן־המתים׃
Mar 6:17 כי הוא הורדוס שלח ויתפש את־יוחנן ויאסרהו בבית הסהר בגלל הורודיה אשת פילפוס אחיו אשר לקחה לו לאשה׃
Mar 6:18 כי יוחנן אמר אל־הורדוס אשת אחיך איננה מתרת לך׃
Mar 6:19 ותשטם אותו הורודיה ותבקש המיתו ולא מצאה׃
Mar 6:20 כי הורדוס ירא את־יוחנן באשר ידע כי־איש צדיק וקדוש הוא וישמר עליו והרבה עשה ויערב לו לשמע אתו׃
Mar 6:21 ויהי היום המכשר כאשר עשה הורדוס משתה ביום הלדת אתו לגדוליו ולשרי האלפים ולראשי הגליל׃
Mar 6:22 ותבא בת־הורודיה ותרקד ותיטב בעיני הורדוס ובעיני המסבים עמו ויאמר המלך אל־הנערה שאלי ממני את־אשר תחפצי ואתן לך׃
Mar 6:23 וישבע לה לאמר כל־אשר תשאלי ממני אתן־לך עד־חצי המלכות׃
Mar 6:24 ותצא ותאמר לאמה מה אשאל ותאמר את־ראש יוחנן המטביל׃
Mar 6:25 ותמהר מאד לבוא אל־המלך ותשאל לאמר רצוני שתתן לי עתה בקערה את־ראש יוחנן המטביל׃
Mar 6:26 ויתעצב המלך מאד אך בעבור השבועה ובעבור המסבים עמו לא רצה להשיב פניה׃
Mar 6:27 ומיד שלח המלך אחד הטבחים ויצוהו להביא את־ראשו׃
Mar 6:28 וילך ויכרת את־ראשו בבית הסהר ויביאהו בקערה ויתנהו לנערה והנערה נתנה אל־אמה׃
Mar 6:29 וישמעו תלמידיו ויבאו וישאו את־גויתו וישימוה בקבר׃
Mar 6:30 ויקהלו השליחים אל־ישוע ויגידו לו את־כל־אשר עשו ואת־כל־אשר למדו׃
Mar 6:31 ויאמר אליהם באו אתם לבדכם אל־מקום חרבה ונוחו מעט כי רבים היו הבאים והיצאים על־לאין־עת להם לאכול׃
Mar 6:32 וילכו משם באניה אל־אחת החרבות לבדד׃
Mar 6:33 וההמון ראה אותם יצאים ויכירהו רבים וירוצו שמה ברגליהם מכל הערים ויעברו אותם ויאספו אליו׃
Mar 6:34 ויצא ישוע וירא המון עם רב ויהמו מעיו להם כי היו כצאן אשר אין־להם רעה ויחל ללמד אותם דברים הרבה׃
Mar 6:35 ויהי כאשר רפה היום לערוב ויגשו אליו תלמידיו ויאמרו הנה המקום חרב והיום רד מאד׃
Mar 6:36 שלח אותם וילכו אל־החצרים והכפרים מסביב לקנות להם לחם כי אין־להם מה־שיאכלו׃
Mar 6:37 ויען ויאמר אליהם תנו אתם להם לאכל ויאמרו אליו הנלך לקנות לחם במאתים דינר לתת להם לאכל׃
Mar 6:38 ויאמר אליהם כמה ככרות־לחם יש לכם לכו וראו וידעו ויאמרו חמש ושני דגים׃
Mar 6:39 ויצו אותם לשבת כלם חברה חברה לבד על־ירק הדשא׃
Mar 6:40 וישבו שורות שורות למאות ולחמשים׃
Mar 6:41 ויקח את־חמשת ככרות הלחם ואת־שני הדגים וישא עיניו השמימה ויברך ויפרס את־הלחם ויתן לתלמידיו לשום לפניהם ואת־שני הדגים חלק לכלם׃
Mar 6:42 ויאכלו כלם וישבעו׃
Mar 6:43 וישאו מן־הפתותים מלוא סלים שנים עשר וגם מן־הדגים׃
Mar 6:44 והאכלים מן־הלחם היו כחמשת אלפי איש׃
Mar 6:45 ואחרי־כן האיץ בתלמידיו לרדת באניה ולעבור לפניו אל־עבר הים אל־בית צידה עד־שלחו את־העם׃
Mar 6:46 ויהי אחר שלחו אתם ויעל ההרה להתפלל׃
Mar 6:47 ויהי־ערב והאניה באה בתוך הים והוא לבדו ביבשה׃
Mar 6:48 וירא אותם מתיגעים בשוטם כי הרוח לנגדם ויהי כעת האשמרת הרביעית ויבא אליהם מתהלך על־פני הים ויואל לעבור לפניהם׃
Mar 6:49 ויראו אתו מתהלך על־פני הים ויאמרו מראה־רוח הוא ויצעקו׃
Mar 6:50 כי־כלם ראוהו ויבהלו אז דבר אתם ויאמר אליהם חזקו כי־אני הוא אל־תיראו׃
Mar 6:51 וירד אליהם באניה והרוח שככה וישתומם לבם עוד־יותר ויתמהו׃
Mar 6:52 כי לא השכילו בדבר־ככרות הלחם מפני קשי לבבם׃
Mar 6:53 ויעברו את־הים ויבאו ארצה גניסר ויקרבו אל־היבשה׃
Mar 6:54 ויהי כצאתם מן־האניה ויכירהו׃
Mar 6:55 וירוצו בכל־הככר ההוא מסביב ויחלו לשאת את־החלים במשכבות אל־כל־מקום אשר שמעו כי הוא שם׃
Mar 6:56 ובכל־מקום אשר יבא אל־הכפרים או אל־הערים ואל־השדות שם שמו את־החולים בחוצות ויתחננו לו שיגעו רק בכנף בגדו והיה כל אשר נגעו־בו ונושעו׃