Mishpatim (Hebrew)

Shemot 21:1 - 24:18
Shemot 21:1 ואלה המשׁפטים אשׁר תשׂים לפניהם׃
Shemot 21:2 כי תקנה עבד עברי שׁשׁ שׁנים יעבד ובשׁבעת יצא לחפשׁי חנם׃
Shemot 21:3 אם־בגפו יבא בגפו יצא אם־בעל אשׁה הוא ויצאה אשׁתו עמו׃
Shemot 21:4 אם־אדניו יתן־לו אשׁה וילדה־לו בנים או בנות האשׁה וילדיה תהיה לאדניה והוא יצא בגפו׃
Shemot 21:5 ואם־אמר יאמר העבד אהבתי את־אדני את־אשׁתי ואת־בני לא אצא חפשׁי׃
Shemot 21:6 והגישׁו אדניו אל־האלהים והגישׁו אל־הדלת או אל־המזוזה ורצע אדניו את־אזנו במרצע ועבדו לעלם׃
Shemot 21:7 וכי־ימכר אישׁ את־בתו לאמה לא תצא כצאת העבדים׃
Shemot 21:8 אם־רעה בעיני אדניה אשׁר־לא יעדה והפדה לעם נכרי לא־ימשׁל למכרה בבגדו־בה׃
Shemot 21:9 ואם־לבנו ייעדנה כמשׁפט הבנות יעשׂה־לה׃
Shemot 21:10 אם־אחרת יקח־לו שׁארה כסותה וענתה לא יגרע׃
Shemot 21:11 ואם־שׁלשׁ־אלה לא יעשׂה לה ויצאה חנם אין כסף׃
Shemot 21:12 מכה אישׁ ומת מות יומת׃
Shemot 21:13 ואשׁר לא צדה והאלהים אנה לידו ושׂמתי לך מקום אשׁר ינוס שׁמה׃
Shemot 21:14 וכי־יזד אישׁ על־רעהו להרגו בערמה מעם מזבחי תקחנו למות׃
Shemot 21:15 ומכה אביו ואמו מות יומת׃
Shemot 21:16 וגנב אישׁ ומכרו ונמצא בידו מות יומת׃
Shemot 21:17 ומקלל אביו ואמו מות יומת׃
Shemot 21:18 וכי־יריבן אנשׁים והכה־אישׁ את־רעהו באבן או באגרף ולא ימות ונפל למשׁכב׃
Shemot 21:19 אם־יקום והתהלך בחוץ על־משׁענתו ונקה המכה רק שׁבתו יתן ורפא ירפא׃
Shemot 21:20 וכי־יכה אישׁ את־עבדו או את־אמתו בשׁבט ומת תחת ידו נקם ינקם׃
Shemot 21:21 אך אם־יום או יומים יעמד לא יקם כי כספו הוא׃
Shemot 21:22 וכי־ינצו אנשׁים ונגפו אשׁה הרה ויצאו ילדיה ולא יהיה אסון ענושׁ יענשׁ כאשׁר ישׁית עליו בעל האשׁה ונתן בפללים׃
Shemot 21:23 ואם־אסון יהיה ונתתה נפשׁ תחת נפשׁ׃
Shemot 21:24 עין תחת עין שׁן תחת שׁן יד תחת יד רגל תחת רגל׃
Shemot 21:25 כויה תחת כויה פצע תחת פצע חבורה תחת חבורה׃
Shemot 21:26 וכי־יכה אישׁ את־עין עבדו או־את־עין אמתו ושׁחתה לחפשׁי ישׁלחנו תחת עינו׃
Shemot 21:27 ואם־שׁן עבדו או־שׁן אמתו יפיל לחפשׁי ישׁלחנו תחת שׁנו׃
Shemot 21:28 וכי־יגח שׁור את־אישׁ או את־אשׁה ומת סקול יסקל השׁור ולא יאכל את־בשׂרו ובעל השׁור נקי׃
Shemot 21:29 ואם שׁור נגח הוא מתמל שׁלשׁם והועד בבעליו ולא ישׁמרנו והמית אישׁ או אשׁה השׁור יסקל וגם־בעליו יומת׃
Shemot 21:30 אם־כפר יושׁת עליו ונתן פדין נפשׁו ככל אשׁר־יושׁת עליו׃
Shemot 21:31 או־בן יגח או־בת יגח כמשׁפט הזה יעשׂה לו׃
Shemot 21:32 אם־עבד יגח השׁור או אמה כסף שׁלשׁים שׁקלים יתן לאדניו והשׁור יסקל׃
Shemot 21:33 וכי־יפתח אישׁ בור או כי־יכרה אישׁ בר ולא יכסנו ונפל־שׁמה שׁור או חמור׃
Shemot 21:34 בעל הבור ישׁלם כסף ישׁיב לבעליו והמת יהיה־לו׃
Shemot 21:35 וכי־יגף שׁור־אישׁ את־שׁור רעהו ומת ומכרו את־השׁור החי וחצו את־כספו וגם את־המת יחצון׃
Shemot 21:36 או נודע כי שׁור נגח הוא מתמול שׁלשׁם ולא ישׁמרנו בעליו שׁלם ישׁלם שׁור תחת השׁור והמת יהיה־לו׃
Shemot 22:1 (21:37) כי יגנב־אישׁ שׁור או־שׂה וטבחו או מכרו חמשׁה בקר ישׁלם תחת השׁור וארבע־צאן תחת השׂה׃
Shemot 22:2 (22:1) אם־במחתרת ימצא הגנב והכה ומת אין לו דמים׃
Shemot 22:3 (22:2) אם־זרחה השׁמשׁ עליו דמים לו שׁלם ישׁלם אם־אין לו ונמכר בגנבתו׃
Shemot 22:4 (22:3) אם־המצא תמצא בידו הגנבה משׁור עד־חמור עד־שׂה חיים שׁנים ישׁלם׃
Shemot 22:5 (22:4) כי יבער־אישׁ שׂדה או־כרם ושׁלח את־בעירה ובער בשׂדה אחר מיטב שׂדהו ומיטב כרמו ישׁלם׃
Shemot 22:6 (22:5) כי־תצא אשׁ ומצאה קצים ונאכל גדישׁ או הקמה או השׂדה שׁלם ישׁלם המבער את־הבערה׃
Shemot 22:7 (22:6) כי־יתן אישׁ אל־רעהו כסף או־כלים לשׁמר וגנב מבית האישׁ אם־ימצא הגנב ישׁלם שׁנים׃
Shemot 22:8 (22:7) אם־לא ימצא הגנב ונקרב בעל־הבית אל־האלהים אם־לא שׁלח ידו במלאכת רעהו׃
Shemot 22:9 (22:8) על־כל־דבר־פשׁע על־שׁור על־חמור על־שׂה על־שׂלמה על־כל־אבדה אשׁר יאמר כי־הוא זה עד האלהים יבא דבר־שׁניהם אשׁר ירשׁיען אלהים ישׁלם שׁנים לרעהו׃
Shemot 22:10 (22:9) כי־יתן אישׁ אל־רעהו חמור או־שׁור או־שׂה וכל־בהמה לשׁמר ומת או־נשׁבר או־נשׁבה אין ראה׃
Shemot 22:11 (22:10) שׁבעת יהוה תהיה בין שׁניהם אם־לא שׁלח ידו במלאכת רעהו ולקח בעליו ולא ישׁלם׃
Shemot 22:12 (22:11) ואם־גנב יגנב מעמו ישׁלם לבעליו׃
Shemot 22:13 (22:12) אם־טרף יטרף יבאהו עד הטרפה לא ישׁלם׃
Shemot 22:14 (22:13) וכי־ישׁאל אישׁ מעם רעהו ונשׁבר או־מת בעליו אין־עמו שׁלם ישׁלם׃
Shemot 22:15 (22:14) אם־בעליו עמו לא ישׁלם אם־שׂכיר הוא בא בשׂכרו׃
Shemot 22:16 (22:15) וכי־יפתה אישׁ בתולה אשׁר לא־ארשׂה ושׁכב עמה מהר ימהרנה לו לאשׁה׃
Shemot 22:17 (22:16) אם־מאן ימאן אביה לתתה לו כסף ישׁקל כמהר הבתולת׃
Shemot 22:18 (22:17) מכשׁפה לא תחיה׃
Shemot 22:19 (22:18) כל־שׁכב עם־בהמה מות יומת׃
Shemot 22:20 (22:19) זבח לאלהים יחרם בלתי ליהוה לבדו׃
Shemot 22:21 (22:20) וגר לא־תונה ולא תלחצנו כי־גרים הייתם בארץ מצרים׃
Shemot 22:22 (22:21) כל־אלמנה ויתום לא תענון׃
Shemot 22:23 (22:22) אם־ענה תענה אתו כי אם־צעק יצעק אלי שׁמע אשׁמע צעקתו׃
Shemot 22:24 (22:23) וחרה אפי והרגתי אתכם בחרב והיו נשׁיכם אלמנות ובניכם יתמים׃
Shemot 22:25 (22:24) אם־כסף תלוה את־עמי את־העני עמך לא־תהיה לו כנשׁה לא־תשׂימון עליו נשׁך׃
Shemot 22:26 (22:25) אם־חבל תחבל שׂלמת רעך עד־בא השׁמשׁ תשׁיבנו לו׃
Shemot 22:27 (22:26) כי הוא כסותה לבדה הוא שׂמלתו לערו במה ישׁכב והיה כי־יצעק אלי ושׁמעתי כי־חנון אני׃
Shemot 22:28 (22:27) אלהים לא תקלל ונשׂיא בעמך לא תאר׃
Shemot 22:29 (22:28) מלאתך ודמעך לא תאחר בכור בניך תתן־לי׃
Shemot 22:30 (22:29) כן־תעשׂה לשׁרך לצאנך שׁבעת ימים יהיה עם־אמו ביום השׁמיני תתנו־לי׃
Shemot 22:31 (22:30) ואנשׁי־קדשׁ תהיון לי ובשׂר בשׂדה טרפה לא תאכלו לכלב תשׁלכון אתו׃
Shemot 23:1 לא תשׂא שׁמע שׁוא אל־תשׁת ידך עם־רשׁע להית עד חמס׃
Shemot 23:2 לא־תהיה אחרי־רבים לרעת ולא־תענה על־רב לנטת אחרי רבים להטת׃
Shemot 23:3 ודל לא תהדר בריבו׃
Shemot 23:4 כי תפגע שׁור איבך או חמרו תעה השׁב תשׁיבנו לו׃
Shemot 23:5 כי־תראה חמור שׂנאך רבץ תחת משׂאו וחדלת מעזב לו עזב תעזב עמו׃
Shemot 23:6 לא תטה משׁפט אבינך בריבו׃
Shemot 23:7 מדבר־שׁקר תרחק ונקי וצדיק אל־תהרג כי לא־אצדיק רשׁע׃
Shemot 23:8 ושׁחד לא תקח כי השׁחד יעור פקחים ויסלף דברי צדיקים׃
Shemot 23:9 וגר לא תלחץ ואתם ידעתם את־נפשׁ הגר כי־גרים הייתם בארץ מצרים׃
Shemot 23:10 ושׁשׁ שׁנים תזרע את־ארצך ואספת את־תבואתה׃
Shemot 23:11 והשׁביעת תשׁמטנה ונטשׁתה ואכלו אביני עמך ויתרם תאכל חית השׂדה כן־תעשׂה לכרמך לזיתך׃
Shemot 23:12 שׁשׁת ימים תעשׂה מעשׂיך וביום השׁביעי תשׁבת למען ינוח שׁורך וחמרך וינפשׁ בן־אמתך והגר׃
Shemot 23:13 ובכל אשׁר־אמרתי אליכם תשׁמרו ושׁם אלהים אחרים לא תזכירו לא ישׁמע על־פיך׃
Shemot 23:14 שׁלשׁ רגלים תחג לי בשׁנה׃
Shemot 23:15 את־חג המצות תשׁמר שׁבעת ימים תאכל מצות כאשׁר צויתך למועד חדשׁ האביב כי־בו יצאת ממצרים ולא־יראו פני ריקם׃
Shemot 23:16 וחג הקציר בכורי מעשׂיך אשׁר תזרע בשׂדה וחג האסף בצאת השׁנה באספך את־מעשׂיך מן־השׂדה׃
Shemot 23:17 שׁלשׁ פעמים בשׁנה יראה כל־זכורך אל־פני האדן יהוה׃
Shemot 23:18 לא־תזבח על־חמץ דם־זבחי ולא־ילין חלב־חגי עד־בקר׃
Shemot 23:19 ראשׁית בכורי אדמתך תביא בית יהוה אלהיך לא־תבשׁל גדי בחלב אמו׃
Shemot 23:20 הנה אנכי שׁלח מלאך לפניך לשׁמרך בדרך ולהביאך אל־המקום אשׁר הכנתי׃
Shemot 23:21 השׁמר מפניו ושׁמע בקלו אל־תמר בו כי לא ישׂא לפשׁעכם כי שׁמי בקרבו׃
Shemot 23:22 כי אם־שׁמוע תשׁמע בקלו ועשׂית כל אשׁר אדבר ואיבתי את־איביך וצרתי את־צרריך׃
Shemot 23:23 כי־ילך מלאכי לפניך והביאך אל־האמרי והחתי והפרזי והכנעני החוי והיבוסי והכחדתיו׃
Shemot 23:24 לא־תשׁתחוה לאלהיהם ולא תעבדם ולא תעשׂה כמעשׂיהם כי הרס תהרסם ושׁבר תשׁבר מצבתיהם׃
Shemot 23:25 ועבדתם את יהוה אלהיכם וברך את־לחמך ואת־מימיך והסרתי מחלה מקרבך׃
Shemot 23:26 לא תהיה משׁכלה ועקרה בארצך את־מספר ימיך אמלא׃
Shemot 23:27 את־אימתי אשׁלח לפניך והמתי את־כל־העם אשׁר תבא בהם ונתתי את־כל־איביך אליך ערף׃
Shemot 23:28 ושׁלחתי את־הצרעה לפניך וגרשׁה את־החוי את־הכנעני ואת־החתי מלפניך׃
Shemot 23:29 לא אגרשׁנו מפניך בשׁנה אחת פן־תהיה הארץ שׁממה ורבה עליך חית השׂדה׃
Shemot 23:30 מעט מעט אגרשׁנו מפניך עד אשׁר תפרה ונחלת את־הארץ׃
Shemot 23:31 ושׁתי את־גבלך מים־סוף ועד־ים פלשׁתים וממדבר עד־הנהר כי אתן בידכם את ישׁבי הארץ וגרשׁתמו מפניך׃
Shemot 23:32 לא־תכרת להם ולאלהיהם ברית׃
Shemot 23:33 לא ישׁבו בארצך פן־יחטיאו אתך לי כי תעבד את־אלהיהם כי־יהיה לך למוקשׁ׃
Shemot 24:1 ואל־משׁה אמר עלה אל־יהוה אתה ואהרן נדב ואביהוא ושׁבעים מזקני ישׂראל והשׁתחויתם מרחק׃
Shemot 24:2 ונגשׁ משׁה לבדו אל־יהוה והם לא יגשׁו והעם לא יעלו עמו׃
Shemot 24:3 ויבא משׁה ויספר לעם את כל־דברי יהוה ואת כל־המשׁפטים ויען כל־העם קול אחד ויאמרו כל־הדברים אשׁר־דבר יהוה נעשׂה׃
Shemot 24:4 ויכתב משׁה את כל־דברי יהוה וישׁכם בבקר ויבן מזבח תחת ההר ושׁתים עשׂרה מצבה לשׁנים עשׂר שׁבטי ישׂראל׃
Shemot 24:5 וישׁלח את־נערי בני ישׂראל ויעלו עלת ויזבחו זבחים שׁלמים ליהוה פרים׃
Shemot 24:6 ויקח משׁה חצי הדם וישׂם באגנת וחצי הדם זרק על־המזבח׃
Shemot 24:7 ויקח ספר הברית ויקרא באזני העם ויאמרו כל אשׁר־דבר יהוה נעשׂה ונשׁמע׃
Shemot 24:8 ויקח משׁה את־הדם ויזרק על־העם ויאמר הנה דם־הברית אשׁר כרת יהוה עמכם על כל־הדברים האלה׃
Shemot 24:9 ויעל משׁה ואהרן נדב ואביהוא ושׁבעים מזקני ישׂראל׃
Shemot 24:10 ויראו את אלהי ישׂראל ותחת רגליו כמעשׂה לבנת הספיר וכעצם השׁמים לטהר׃
Shemot 24:11 ואל־אצילי בני ישׂראל לא שׁלח ידו ויחזו את־האלהים ויאכלו וישׁתו׃
Shemot 24:12 ויאמר יהוה אל־משׁה עלה אלי ההרה והיה־שׁם ואתנה לך את־לחת האבן והתורה והמצוה אשׁר כתבתי להורתם׃
Shemot 24:13 ויקם משׁה ויהושׁע משׁרתו ויעל משׁה אל־הר האלהים׃
Shemot 24:14 ואל־הזקנים אמר שׁבו־לנו בזה עד אשׁר־נשׁוב אליכם והנה אהרן וחור עמכם מי־בעל דברים יגשׁ אלהם׃
Shemot 24:15 ויעל משׁה אל־ההר ויכס הענן את־ההר׃
Shemot 24:16 וישׁכן כבוד־יהוה על־הר סיני ויכסהו הענן שׁשׁת ימים ויקרא אל־משׁה ביום השׁביעי מתוך הענן׃
Shemot 24:17 ומראה כבוד יהוה כאשׁ אכלת בראשׁ ההר לעיני בני ישׂראל׃
Shemot 24:18 ויבא משׁה בתוך הענן ויעל אל־ההר ויהי משׁה בהר ארבעים יום וארבעים לילה׃