Va'era Haftarah (Hebrew)

Yechezkel 28:25 - 29:21
Yech 28:25 כה־אמר אדני יהוה בקבצי את־בית ישׂראל מן־העמים אשׁר נפצו בם ונקדשׁתי בם לעיני הגוים וישׁבו על־אדמתם אשׁר נתתי לעבדי ליעקב׃
Yech 28:26 וישׁבו עליה לבטח ובנו בתים ונטעו כרמים וישׁבו לבטח בעשׂותי שׁפטים בכל השׁאטים אתם מסביבותם וידעו כי אני יהוה אלהיהם׃
Yech 29:1 בשׁנה העשׂירית בעשׂרי בשׁנים עשׂר לחדשׁ היה דבר־יהוה אלי לאמר׃
Yech 29:2 בן־אדם שׂים פניך על־פרעה מלך מצרים והנבא עליו ועל־מצרים כלה׃
Yech 29:3 דבר ואמרת כה־אמר אדני יהוה הנני עליך פרעה מלך־מצרים התנים הגדול הרבץ בתוך יאריו אשׁר אמר לי יארי ואני עשׂיתני׃
Yech 29:4 ונתתי חחיים בלחייך והדבקתי דגת־יאריך בקשׂקשׂתיך והעליתיך מתוך יאריך ואת כל־דגת יאריך בקשׂקשׂתיך תדבק׃
Yech 29:5 ונטשׁתיך המדברה אותך ואת כל־דגת יאריך על־פני השׂדה תפול לא תאסף ולא תקבץ לחית הארץ ולעוף השׁמים נתתיך לאכלה׃
Yech 29:6 וידעו כל־ישׁבי מצרים כי אני יהוה יען היותם משׁענת קנה לבית ישׂראל׃
Yech 29:7 בתפשׂם בך בכפך תרוץ ובקעת להם כל־כתף ובהשׁענם עליך תשׁבר והעמדת להם כל־מתנים׃
Yech 29:8 לכן כה אמר אדני יהוה הנני מביא עליך חרב והכרתי ממך אדם ובהמה׃
Yech 29:9 והיתה ארץ־מצרים לשׁממה וחרבה וידעו כי־אני יהוה יען אמר יאר לי ואני עשׂיתי׃
Yech 29:10 לכן הנני אליך ואל־יאריך ונתתי את־ארץ מצרים לחרבות חרב שׁממה ממגדל סונה ועד־גבול כושׁ׃
Yech 29:11 לא תעבר־בה רגל אדם ורגל בהמה לא תעבר־בה ולא תשׁב ארבעים שׁנה׃
Yech 29:12 ונתתי את־ארץ מצרים שׁממה בתוך ארצות נשׁמות ועריה בתוך ערים מחרבות תהיין שׁממה ארבעים שׁנה והפצתי את־מצרים בגוים וזריתים בארצות׃
Yech 29:13 כי כה אמר אדני יהוה מקץ ארבעים שׁנה אקבץ את־מצרים מן־העמים אשׁר־נפצו שׁמה׃
Yech 29:14 ושׁבתי את־שׁבות מצרים והשׁבתי אתם ארץ פתרוס על־ארץ מכורתם והיו שׁם ממלכה שׁפלה׃
Yech 29:15 מן־הממלכות תהיה שׁפלה ולא־תתנשׂא עוד על־הגוים והמעטתים לבלתי רדות בגוים׃
Yech 29:16 ולא יהיה־עוד לבית ישׂראל למבטח מזכיר עון בפנותם אחריהם וידעו כי אני אדני יהוה׃
Yech 29:17 ויהי בעשׂרים ושׁבע שׁנה בראשׁון באחד לחדשׁ היה דבר־יהוה אלי לאמר׃
Yech 29:18 בן־אדם נבוכדראצר מלך־בבל העביד את־חילו עבדה גדלה אל־צר כל־ראשׁ מקרח וכל־כתף מרוטה ושׂכר לא־היה לו ולחילו מצר על־העבדה אשׁר־עבד עליה׃
Yech 29:19 לכן כה אמר אדני יהוה הנני נתן לנבוכדראצר מלך־בבל את־ארץ מצרים ונשׂא המנה ושׁלל שׁללה ובזז בזה והיתה שׂכר לחילו׃
Yech 29:20 פעלתו אשׁר־עבד בה נתתי לו את־ארץ מצרים אשׁר עשׂו לי נאם אדני יהוה׃
Yech 29:21 ביום ההוא אצמיח קרן לבית ישׂראל ולך אתן פתחון־פה בתוכם וידעו כי־אני יהוה׃