Va'era (Hebrew)

Shemot 6:2 - 9:35
Shemot 6:2 וידבר אלהים אל־משׁה ויאמר אליו אני יהוה׃
Shemot 6:3 וארא אל־אברהם אל־יצחק ואל־יעקב באל שׁדי ושׁמי יהוה לא נודעתי להם׃
Shemot 6:4 וגם הקמתי את־בריתי אתם לתת להם את־ארץ כנען את ארץ מגריהם אשׁר־גרו בה׃
Shemot 6:5 וגם אני שׁמעתי את־נאקת בני ישׂראל אשׁר מצרים מעבדים אתם ואזכר את־בריתי׃
Shemot 6:6 לכן אמר לבני־ישׂראל אני יהוה והוצאתי אתכם מתחת סבלת מצרים והצלתי אתכם מעבדתם וגאלתי אתכם בזרוע נטויה ובשׁפטים גדלים׃
Shemot 6:7 ולקחתי אתכם לי לעם והייתי לכם לאלהים וידעתם כי אני יהוה אלהיכם המוציא אתכם מתחת סבלות מצרים׃
Shemot 6:8 והבאתי אתכם אל־הארץ אשׁר נשׂאתי את־ידי לתת אתה לאברהם ליצחק וליעקב ונתתי אתה לכם מורשׁה אני יהוה׃
Shemot 6:9 וידבר משׁה כן אל־בני ישׂראל ולא שׁמעו אל־משׁה מקצר רוח ומעבדה קשׁה׃
Shemot 6:10 וידבר יהוה אל־משׁה לאמר׃
Shemot 6:11 בא דבר אל־פרעה מלך מצרים וישׁלח את־בני־ישׂראל מארצו׃
Shemot 6:12 וידבר משׁה לפני יהוה לאמר הן בני־ישׂראל לא־שׁמעו אלי ואיך ישׁמעני פרעה ואני ערל שׂפתים׃
Shemot 6:13 וידבר יהוה אל־משׁה ואל־אהרן ויצום אל־בני ישׂראל ואל־פרעה מלך מצרים להוציא את־בני־ישׂראל מארץ מצרים׃
Shemot 6:14 אלה ראשׁי בית־אבתם בני ראובן בכר ישׂראל חנוך ופלוא חצרן וכרמי אלה משׁפחת ראובן׃
Shemot 6:15 ובני שׁמעון ימואל וימין ואהד ויכין וצחר ושׁאול בן־הכנענית אלה משׁפחת שׁמעון׃
Shemot 6:16 ואלה שׁמות בני־לוי לתלדתם גרשׁון וקהת ומררי ושׁני חיי לוי שׁבע ושׁלשׁים ומאת שׁנה׃
Shemot 6:17 בני גרשׁון לבני ושׁמעי למשׁפחתם׃
Shemot 6:18 ובני קהת עמרם ויצהר וחברון ועזיאל ושׁני חיי קהת שׁלשׁ ושׁלשׁים ומאת שׁנה׃
Shemot 6:19 ובני מררי מחלי ומושׁי אלה משׁפחת הלוי לתלדתם׃
Shemot 6:20 ויקח עמרם את־יוכבד דדתו לו לאשׁה ותלד לו את־אהרן ואת־משׁה ושׁני חיי עמרם שׁבע ושׁלשׁים ומאת שׁנה׃
Shemot 6:21 ובני יצהר קרח ונפג וזכרי׃
Shemot 6:22 ובני עזיאל מישׁאל ואלצפן וסתרי׃
Shemot 6:23 ויקח אהרן את־אלישׁבע בת־עמינדב אחות נחשׁון לו לאשׁה ותלד לו את־נדב ואת־אביהוא את־אלעזר ואת־איתמר׃
Shemot 6:24 ובני קרח אסיר ואלקנה ואביאסף אלה משׁפחת הקרחי׃
Shemot 6:25 ואלעזר בן־אהרן לקח־לו מבנות פוטיאל לו לאשׁה ותלד לו את־פינחס אלה ראשׁי אבות הלוים למשׁפחתם׃
Shemot 6:26 הוא אהרן ומשׁה אשׁר אמר יהוה להם הוציאו את־בני ישׂראל מארץ מצרים על־צבאתם׃
Shemot 6:27 הם המדברים אל־פרעה מלך־מצרים להוציא את־בני־ישׂראל ממצרים הוא משׁה ואהרן׃
Shemot 6:28 ויהי ביום דבר יהוה אל־משׁה בארץ מצרים׃
Shemot 6:29 וידבר יהוה אל־משׁה לאמר אני יהוה דבר אל־פרעה מלך מצרים את כל־אשׁר אני דבר אליך׃
Shemot 6:30 ויאמר משׁה לפני יהוה הן אני ערל שׂפתים ואיך ישׁמע אלי פרעה׃
Shemot 7:1 ויאמר יהוה אל־משׁה ראה נתתיך אלהים לפרעה ואהרן אחיך יהיה נביאך׃
Shemot 7:2 אתה תדבר את כל־אשׁר אצוך ואהרן אחיך ידבר אל־פרעה ושׁלח את־בני־ישׂראל מארצו׃
Shemot 7:3 ואני אקשׁה את־לב פרעה והרביתי את־אתתי ואת־מופתי בארץ מצרים׃
Shemot 7:4 ולא־ישׁמע אלכם פרעה ונתתי את־ידי במצרים והוצאתי את־צבאתי את־עמי בני־ישׂראל מארץ מצרים בשׁפטים גדלים׃
Shemot 7:5 וידעו מצרים כי־אני יהוה בנטתי את־ידי על־מצרים והוצאתי את־בני־ישׂראל מתוכם׃
Shemot 7:6 ויעשׂ משׁה ואהרן כאשׁר צוה יהוה אתם כן עשׂו׃
Shemot 7:7 ומשׁה בן־שׁמנים שׁנה ואהרן בן־שׁלשׁ ושׁמנים שׁנה בדברם אל־פרעה׃
Shemot 7:8 ויאמר יהוה אל־משׁה ואל־אהרן לאמר׃
Shemot 7:9 כי ידבר אלכם פרעה לאמר תנו לכם מופת ואמרת אל־אהרן קח את־מטך והשׁלך לפני־פרעה יהי לתנין׃
Shemot 7:10 ויבא משׁה ואהרן אל־פרעה ויעשׂו כן כאשׁר צוה יהוה וישׁלך אהרן את־מטהו לפני פרעה ולפני עבדיו ויהי לתנין׃
Shemot 7:11 ויקרא גם־פרעה לחכמים ולמכשׁפים ויעשׂו גם־הם חרטמי מצרים בלהטיהם כן׃
Shemot 7:12 וישׁליכו אישׁ מטהו ויהיו לתנינם ויבלע מטה־אהרן את־מטתם׃
Shemot 7:13 ויחזק לב פרעה ולא שׁמע אלהם כאשׁר דבר יהוה׃
Shemot 7:14 ויאמר יהוה אל־משׁה כבד לב פרעה מאן לשׁלח העם׃
Shemot 7:15 לך אל־פרעה בבקר הנה יצא המימה ונצבת לקראתו על־שׂפת היאר והמטה אשׁר־נהפך לנחשׁ תקח בידך׃
Shemot 7:16 ואמרת אליו יהוה אלהי העברים שׁלחני אליך לאמר שׁלח את־עמי ויעבדני במדבר והנה לא־שׁמעת עד־כה׃
Shemot 7:17 כה אמר יהוה בזאת תדע כי אני יהוה הנה אנכי מכה במטה אשׁר־בידי על־המים אשׁר ביאר ונהפכו לדם׃
Shemot 7:18 והדגה אשׁר־ביאר תמות ובאשׁ היאר ונלאו מצרים לשׁתות מים מן־היאר׃
Shemot 7:19 ויאמר יהוה אל־משׁה אמר אל־אהרן קח מטך ונטה־ידך על־מימי מצרים על־נהרתם על־יאריהם ועל־אגמיהם ועל כל־מקוה מימיהם ויהיו־דם והיה דם בכל־ארץ מצרים ובעצים ובאבנים׃
Shemot 7:20 ויעשׂו־כן משׁה ואהרן כאשׁר צוה יהוה וירם במטה ויך את־המים אשׁר ביאר לעיני פרעה ולעיני עבדיו ויהפכו כל־המים אשׁר־ביאר לדם׃
Shemot 7:21 והדגה אשׁר־ביאר מתה ויבאשׁ היאר ולא־יכלו מצרים לשׁתות מים מן־היאר ויהי הדם בכל־ארץ מצרים׃
Shemot 7:22 ויעשׂו־כן חרטמי מצרים בלטיהם ויחזק לב־פרעה ולא־שׁמע אלהם כאשׁר דבר יהוה׃
Shemot 7:23 ויפן פרעה ויבא אל־ביתו ולא־שׁת לבו גם־לזאת׃
Shemot 7:24 ויחפרו כל־מצרים סביבת היאר מים לשׁתות כי לא יכלו לשׁתת ממימי היאר׃
Shemot 7:25 וימלא שׁבעת ימים אחרי הכות־יהוה את־היאר׃
Shemot 8:1 (7:26) ויאמר יהוה אל־משׁה בא אל־פרעה ואמרת אליו כה אמר יהוה שׁלח את־עמי ויעבדני׃
Shemot 8:2 (7:27) ואם־מאן אתה לשׁלח הנה אנכי נגף את־כל־גבולך בצפרדעים׃
Shemot 8:3 (7:28) ושׁרץ היאר צפרדעים ועלו ובאו בביתך ובחדר משׁכבך ועל־מטתך ובבית עבדיך ובעמך ובתנוריך ובמשׁארותיך׃
Shemot 8:4 (7:29) ובכה ובעמך ובכל־עבדיך יעלו הצפרדעים׃
Shemot 8:5 (8:1) ויאמר יהוה אל־משׁה אמר אל־אהרן נטה את־ידך במטך על־הנהרת על־היארים ועל־האגמים והעל את־הצפרדעים על־ארץ מצרים׃
Shemot 8:6 (8:2) ויט אהרן את־ידו על מימי מצרים ותעל הצפרדע ותכס את־ארץ מצרים׃
Shemot 8:7 (8:3) ויעשׂו־כן החרטמים בלטיהם ויעלו את־הצפרדעים על־ארץ מצרים׃
Shemot 8:8 (8:4) ויקרא פרעה למשׁה ולאהרן ויאמר העתירו אל־יהוה ויסר הצפרדעים ממני ומעמי ואשׁלחה את־העם ויזבחו ליהוה׃
Shemot 8:9 (8:5) ויאמר משׁה לפרעה התפאר עלי למתי אעתיר לך ולעבדיך ולעמך להכרית הצפרדעים ממך ומבתיך רק ביאר תשׁארנה׃
Shemot 8:10 (8:6) ויאמר למחר ויאמר כדברך למען תדע כי־אין כיהוה אלהינו׃
Shemot 8:11 (8:7) וסרו הצפרדעים ממך ומבתיך ומעבדיך ומעמך רק ביאר תשׁארנה׃
Shemot 8:12 (8:8) ויצא משׁה ואהרן מעם פרעה ויצעק משׁה אל־יהוה על־דבר הצפרדעים אשׁר־שׂם לפרעה׃
Shemot 8:13 (8:9) ויעשׂ יהוה כדבר משׁה וימתו הצפרדעים מן־הבתים מן־החצרת ומן־השׂדת׃
Shemot 8:14 (8:10) ויצברו אתם חמרם חמרם ותבאשׁ הארץ׃
Shemot 8:15 (8:11) וירא פרעה כי היתה הרוחה והכבד את־לבו ולא שׁמע אלהם כאשׁר דבר יהוה׃
Shemot 8:16 (8:12) ויאמר יהוה אל־משׁה אמר אל־אהרן נטה את־מטך והך את־עפר הארץ והיה לכנם בכל־ארץ מצרים׃
Shemot 8:17 (8:13) ויעשׂו־כן ויט אהרן את־ידו במטהו ויך את־עפר הארץ ותהי הכנם באדם ובבהמה כל־עפר הארץ היה כנים בכל־ארץ מצרים׃
Shemot 8:18 (8:14) ויעשׂו־כן החרטמים בלטיהם להוציא את־הכנים ולא יכלו ותהי הכנם באדם ובבהמה׃
Shemot 8:19 (8:15) ויאמרו החרטמם אל־פרעה אצבע אלהים הוא ויחזק לב־פרעה ולא־שׁמע אלהם כאשׁר דבר יהוה׃
Shemot 8:20 (8:16) ויאמר יהוה אל־משׁה השׁכם בבקר והתיצב לפני פרעה הנה יוצא המימה ואמרת אליו כה אמר יהוה שׁלח עמי ויעבדני׃
Shemot 8:21 (8:17) כי אם־אינך משׁלח את־עמי הנני משׁליח בך ובעבדיך ובעמך ובבתיך את־הערב ומלאו בתי מצרים את־הערב וגם האדמה אשׁר־הם עליה׃
Shemot 8:22 (8:18) והפליתי ביום ההוא את־ארץ גשׁן אשׁר עמי עמד עליה לבלתי היות־שׁם ערב למען תדע כי אני יהוה בקרב הארץ׃
Shemot 8:23 (8:19) ושׂמתי פדת בין עמי ובין עמך למחר יהיה האת הזה׃
Shemot 8:24 (8:20) ויעשׂ יהוה כן ויבא ערב כבד ביתה פרעה ובית עבדיו ובכל־ארץ מצרים תשׁחת הארץ מפני הערב׃
Shemot 8:25 (8:21) ויקרא פרעה אל־משׁה ולאהרן ויאמר לכו זבחו לאלהיכם בארץ׃
Shemot 8:26 (8:22) ויאמר משׁה לא נכון לעשׂות כן כי תועבת מצרים נזבח ליהוה אלהינו הן נזבח את־תועבת מצרים לעיניהם ולא יסקלנו׃
Shemot 8:27 (8:23) דרך שׁלשׁת ימים נלך במדבר וזבחנו ליהוה אלהינו כאשׁר יאמר אלינו׃
Shemot 8:28 (8:24) ויאמר פרעה אנכי אשׁלח אתכם וזבחתם ליהוה אלהיכם במדבר רק הרחק לא־תרחיקו ללכת העתירו בעדי׃
Shemot 8:29 (8:25) ויאמר משׁה הנה אנכי יוצא מעמך והעתרתי אל־יהוה וסר הערב מפרעה מעבדיו ומעמו מחר רק אל־יסף פרעה התל לבלתי שׁלח את־העם לזבח ליהוה׃
Shemot 8:30 (8:26) ויצא משׁה מעם פרעה ויעתר אל־יהוה׃
Shemot 8:31 (8:27) ויעשׂ יהוה כדבר משׁה ויסר הערב מפרעה מעבדיו ומעמו לא נשׁאר אחד׃
Shemot 8:32 (8:28) ויכבד פרעה את־לבו גם בפעם הזאת ולא שׁלח את־העם׃
Shemot 9:1 ויאמר יהוה אל־משׁה בא אל־פרעה ודברת אליו כה־אמר יהוה אלהי העברים שׁלח את־עמי ויעבדני׃
Shemot 9:2 כי אם־מאן אתה לשׁלח ועודך מחזיק בם׃
Shemot 9:3 הנה יד־יהוה הויה במקנך אשׁר בשׂדה בסוסים בחמרים בגמלים בבקר ובצאן דבר כבד מאד׃
Shemot 9:4 והפלה יהוה בין מקנה ישׂראל ובין מקנה מצרים ולא ימות מכל־לבני ישׂראל דבר׃
Shemot 9:5 וישׂם יהוה מועד לאמר מחר יעשׂה יהוה הדבר הזה בארץ׃
Shemot 9:6 ויעשׂ יהוה את־הדבר הזה ממחרת וימת כל מקנה מצרים וממקנה בני־ישׂראל לא־מת אחד׃
Shemot 9:7 וישׁלח פרעה והנה לא־מת ממקנה ישׂראל עד־אחד ויכבד לב פרעה ולא שׁלח את־העם׃
Shemot 9:8 ויאמר יהוה אל־משׁה ואל־אהרן קחו לכם מלא חפניכם פיח כבשׁן וזרקו משׁה השׁמימה לעיני פרעה׃
Shemot 9:9 והיה לאבק על כל־ארץ מצרים והיה על־האדם ועל־הבהמה לשׁחין פרח אבעבעת בכל־ארץ מצרים׃
Shemot 9:10 ויקחו את־פיח הכבשׁן ויעמדו לפני פרעה ויזרק אתו משׁה השׁמימה ויהי שׁחין אבעבעת פרח באדם ובבהמה׃
Shemot 9:11 ולא־יכלו החרטמים לעמד לפני משׁה מפני השׁחין כי־היה השׁחין בחרטמם ובכל־מצרים׃
Shemot 9:12 ויחזק יהוה את־לב פרעה ולא שׁמע אלהם כאשׁר דבר יהוה אל־משׁה׃
Shemot 9:13 ויאמר יהוה אל־משׁה השׁכם בבקר והתיצב לפני פרעה ואמרת אליו כה־אמר יהוה אלהי העברים שׁלח את־עמי ויעבדני׃
Shemot 9:14 כי בפעם הזאת אני שׁלח את־כל־מגפתי אל־לבך ובעבדיך ובעמך בעבור תדע כי אין כמני בכל־הארץ׃
Shemot 9:15 כי עתה שׁלחתי את־ידי ואך אותך ואת־עמך בדבר ותכחד מן־הארץ׃
Shemot 9:16 ואולם בעבור זאת העמדתיך בעבור הראתך את־כחי ולמען ספר שׁמי בכל־הארץ׃
Shemot 9:17 עודך מסתולל בעמי לבלתי שׁלחם׃
Shemot 9:18 הנני ממטיר כעת מחר ברד כבד מאד אשׁר לא־היה כמהו במצרים למן־היום הוסדה ועד־עתה׃
Shemot 9:19 ועתה שׁלח העז את־מקנך ואת כל־אשׁר לך בשׂדה כל־האדם והבהמה אשׁר־ימצא בשׂדה ולא יאסף הביתה וירד עלהם הברד ומתו׃
Shemot 9:20 הירא את־דבר יהוה מעבדי פרעה הניס את־עבדיו ואת־מקנהו אל־הבתים׃
Shemot 9:21 ואשׁר לא־שׂם לבו אל־דבר יהוה ויעזב את־עבדיו ואת־מקנהו בשׂדה׃
Shemot 9:22 ויאמר יהוה אל־משׁה נטה את־ידך על־השׁמים ויהי ברד בכל־ארץ מצרים על־האדם ועל־הבהמה ועל כל־עשׂב השׂדה בארץ מצרים׃
Shemot 9:23 ויט משׁה את־מטהו על־השׁמים ויהוה נתן קלת וברד ותהלך אשׁ ארצה וימטר יהוה ברד על־ארץ מצרים׃
Shemot 9:24 ויהי ברד ואשׁ מתלקחת בתוך הברד כבד מאד אשׁר לא־היה כמהו בכל־ארץ מצרים מאז היתה לגוי׃
Shemot 9:25 ויך הברד בכל־ארץ מצרים את כל־אשׁר בשׂדה מאדם ועד־בהמה ואת כל־עשׂב השׂדה הכה הברד ואת־כל־עץ השׂדה שׁבר׃
Shemot 9:26 רק בארץ גשׁן אשׁר־שׁם בני ישׂראל לא היה ברד׃
Shemot 9:27 וישׁלח פרעה ויקרא למשׁה ולאהרן ויאמר אלהם חטאתי הפעם יהוה הצדיק ואני ועמי הרשׁעים׃
Shemot 9:28 העתירו אל־יהוה ורב מהית קלת אלהים וברד ואשׁלחה אתכם ולא תספון לעמד׃
Shemot 9:29 ויאמר אליו משׁה כצאתי את־העיר אפרשׂ את־כפי אל־יהוה הקלות יחדלון והברד לא יהיה־עוד למען תדע כי ליהוה הארץ׃
Shemot 9:30 ואתה ועבדיך ידעתי כי טרם תיראון מפני יהוה אלהים׃
Shemot 9:31 והפשׁתה והשׂערה נכתה כי השׂערה אביב והפשׁתה גבעל׃
Shemot 9:32 והחטה והכסמת לא נכו כי אפילת הנה׃
Shemot 9:33 ויצא משׁה מעם פרעה את־העיר ויפרשׂ כפיו אל־יהוה ויחדלו הקלות והברד ומטר לא־נתך ארצה׃
Shemot 9:34 וירא פרעה כי־חדל המטר והברד והקלת ויסף לחטא ויכבד לבו הוא ועבדיו׃
Shemot 9:35 ויחזק לב פרעה ולא שׁלח את־בני ישׂראל כאשׁר דבר יהוה ביד־משׁה׃