Yitro (Hebrew)

Shemot 18:1 - 20:23(26)*
Shemot 18:1 וישׁמע יתרו כהן מדין חתן משׁה את כל־אשׁר עשׂה אלהים למשׁה ולישׂראל עמו כי־הוציא יהוה את־ישׂראל ממצרים׃
Shemot 18:2 ויקח יתרו חתן משׁה את־צפרה אשׁת משׁה אחר שׁלוחיה׃
Shemot 18:3 ואת שׁני בניה אשׁר שׁם האחד גרשׁם כי אמר גר הייתי בארץ נכריה׃
Shemot 18:4 ושׁם האחד אליעזר כי־אלהי אבי בעזרי ויצלני מחרב פרעה׃
Shemot 18:5 ויבא יתרו חתן משׁה ובניו ואשׁתו אל־משׁה אל־המדבר אשׁר־הוא חנה שׁם הר האלהים׃
Shemot 18:6 ויאמר אל־משׁה אני חתנך יתרו בא אליך ואשׁתך ושׁני בניה עמה׃
Shemot 18:7 ויצא משׁה לקראת חתנו וישׁתחו וישׁק־לו וישׁאלו אישׁ־לרעהו לשׁלום ויבאו האהלה׃
Shemot 18:8 ויספר משׁה לחתנו את כל־אשׁר עשׂה יהוה לפרעה ולמצרים על אודת ישׂראל את כל־התלאה אשׁר מצאתם בדרך ויצלם יהוה׃
Shemot 18:9 ויחד יתרו על כל־הטובה אשׁר־עשׂה יהוה לישׂראל אשׁר הצילו מיד מצרים׃
Shemot 18:10 ויאמר יתרו ברוך יהוה אשׁר הציל אתכם מיד מצרים ומיד פרעה אשׁר הציל את־העם מתחת יד־מצרים׃
Shemot 18:11 עתה ידעתי כי־גדול יהוה מכל־האלהים כי בדבר אשׁר זדו עליהם׃
Shemot 18:12 ויקח יתרו חתן משׁה עלה וזבחים לאלהים ויבא אהרן וכל זקני ישׂראל לאכל־לחם עם־חתן משׁה לפני האלהים׃
Shemot 18:13 ויהי ממחרת וישׁב משׁה לשׁפט את־העם ויעמד העם על־משׁה מן־הבקר עד־הערב׃
Shemot 18:14 וירא חתן משׁה את כל־אשׁר־הוא עשׂה לעם ויאמר מה־הדבר הזה אשׁר אתה עשׂה לעם מדוע אתה יושׁב לבדך וכל־העם נצב עליך מן־בקר עד־ערב׃
Shemot 18:15 ויאמר משׁה לחתנו כי־יבא אלי העם לדרשׁ אלהים׃
Shemot 18:16 כי־יהיה להם דבר בא אלי ושׁפטתי בין אישׁ ובין רעהו והודעתי את־חקי האלהים ואת־תורתיו׃
Shemot 18:17 ויאמר חתן משׁה אליו לא־טוב הדבר אשׁר אתה עשׂה׃
Shemot 18:18 נבל תבל גם־אתה גם־העם הזה אשׁר עמך כי־כבד ממך הדבר לא־תוכל עשׂהו לבדך׃
Shemot 18:19 עתה שׁמע בקלי איעצך ויהי אלהים עמך היה אתה לעם מול האלהים והבאת אתה את־הדברים אל־האלהים׃
Shemot 18:20 והזהרתה אתהם את־החקים ואת־התורת והודעת להם את־הדרך ילכו בה ואת־המעשׂה אשׁר יעשׂון׃
Shemot 18:21 ואתה תחזה מכל־העם אנשׁי־חיל יראי אלהים אנשׁי אמת שׂנאי בצע ושׂמת עלהם שׂרי אלפים שׂרי מאות שׂרי חמשׁים ושׂרי עשׂרת׃
Shemot 18:22 ושׁפטו את־העם בכל־עת והיה כל־הדבר הגדל יביאו אליך וכל־הדבר הקטן ישׁפטו־הם והקל מעליך ונשׂאו אתך׃
Shemot 18:23 אם את־הדבר הזה תעשׂה וצוך אלהים ויכלת עמד וגם כל־העם הזה על־מקמו יבא בשׁלום׃
Shemot 18:24 וישׁמע משׁה לקול חתנו ויעשׂ כל אשׁר אמר׃
Shemot 18:25 ויבחר משׁה אנשׁי־חיל מכל־ישׂראל ויתן אתם ראשׁים על־העם שׂרי אלפים שׂרי מאות שׂרי חמשׁים ושׂרי עשׂרת׃
Shemot 18:26 ושׁפטו את־העם בכל־עת את־הדבר הקשׁה יביאון אל־משׁה וכל־הדבר הקטן ישׁפוטו הם׃
Shemot 18:27 וישׁלח משׁה את־חתנו וילך לו אל־ארצו׃
Shemot 19:1 בחדשׁ השׁלישׁי לצאת בני־ישׂראל מארץ מצרים ביום הזה באו מדבר סיני׃
Shemot 19:2 ויסעו מרפידים ויבאו מדבר סיני ויחנו במדבר ויחן־שׁם ישׂראל נגד ההר׃
Shemot 19:3 ומשׁה עלה אל־האלהים ויקרא אליו יהוה מן־ההר לאמר כה תאמר לבית יעקב ותגיד לבני ישׂראל׃
Shemot 19:4 אתם ראיתם אשׁר עשׂיתי למצרים ואשׂא אתכם על־כנפי נשׁרים ואבא אתכם אלי׃
Shemot 19:5 ועתה אם־שׁמוע תשׁמעו בקלי ושׁמרתם את־בריתי והייתם לי סגלה מכל־העמים כי־לי כל־הארץ׃
Shemot 19:6 ואתם תהיו־לי ממלכת כהנים וגוי קדושׁ אלה הדברים אשׁר תדבר אל־בני ישׂראל׃
Shemot 19:7 ויבא משׁה ויקרא לזקני העם וישׂם לפניהם את כל־הדברים האלה אשׁר צוהו יהוה׃
Shemot 19:8 ויענו כל־העם יחדו ויאמרו כל אשׁר־דבר יהוה נעשׂה וישׁב משׁה את־דברי העם אל־יהוה׃
Shemot 19:9 ויאמר יהוה אל־משׁה הנה אנכי בא אליך בעב הענן בעבור ישׁמע העם בדברי עמך וגם־בך יאמינו לעולם ויגד משׁה את־דברי העם אל־יהוה׃
Shemot 19:10 ויאמר יהוה אל־משׁה לך אל־העם וקדשׁתם היום ומחר וכבסו שׂמלתם׃
Shemot 19:11 והיו נכנים ליום השׁלישׁי כי ביום השׁלשׁי ירד יהוה לעיני כל־העם על־הר סיני׃
Shemot 19:12 והגבלת את־העם סביב לאמר השׁמרו לכם עלות בהר ונגע בקצהו כל־הנגע בהר מות יומת׃
Shemot 19:13 לא־תגע בו יד כי־סקול יסקל או־ירה יירה אם־בהמה אם־אישׁ לא יחיה במשׁך היבל המה יעלו בהר׃
Shemot 19:14 וירד משׁה מן־ההר אל־העם ויקדשׁ את־העם ויכבסו שׂמלתם׃
Shemot 19:15 ויאמר אל־העם היו נכנים לשׁלשׁת ימים אל־תגשׁו אל־אשׁה׃
Shemot 19:16 ויהי ביום השׁלישׁי בהית הבקר ויהי קלת וברקים וענן כבד על־ההר וקל שׁפר חזק מאד ויחרד כל־העם אשׁר במחנה׃
Shemot 19:17 ויוצא משׁה את־העם לקראת האלהים מן־המחנה ויתיצבו בתחתית ההר׃
Shemot 19:18 והר סיני עשׁן כלו מפני אשׁר ירד עליו יהוה באשׁ ויעל עשׁנו כעשׁן הכבשׁן ויחרד כל־ההר מאד׃
Shemot 19:19 ויהי קול השׁפר הולך וחזק מאד משׁה ידבר והאלהים יעננו בקול׃
Shemot 19:20 וירד יהוה על־הר סיני אל־ראשׁ ההר ויקרא יהוה למשׁה אל־ראשׁ ההר ויעל משׁה׃
Shemot 19:21 ויאמר יהוה אל־משׁה רד העד בעם פן־יהרסו אל־יהוה לראות ונפל ממנו רב׃
Shemot 19:22 וגם הכהנים הנגשׁים אל־יהוה יתקדשׁו פן־יפרץ בהם יהוה׃
Shemot 19:23 ויאמר משׁה אל־יהוה לא־יוכל העם לעלת אל־הר סיני כי־אתה העדתה בנו לאמר הגבל את־ההר וקדשׁתו׃
Shemot 19:24 ויאמר אליו יהוה לך־רד ועלית אתה ואהרן עמך והכהנים והעם אל־יהרסו לעלת אל־יהוה פן־יפרץ־בם׃
Shemot 19:25 וירד משׁה אל־העם ויאמר אלהם׃
Shemot 20:1 וידבר אלהים את כל־הדברים האלה לאמר׃
Shemot 20:2 אנכי יהוה אלהיך אשׁר הוצאתיך מארץ מצרים מבית עבדים׃
Shemot 20:3 לא יהיה־לך אלהים אחרים על־פני׃
Shemot 20:4 לא תעשׂה־לך פסל וכל־תמונה אשׁר בשׁמים ממעל ואשׁר בארץ מתחת ואשׁר במים מתחת לארץ׃
Shemot 20:5 לא־תשׁתחוה להם ולא תעבדם כי אנכי יהוה אלהיך אל קנא פקד עון אבת על־בנים על־שׁלשׁים ועל־רבעים לשׂנאי׃
Shemot 20:6 ועשׂה חסד לאלפים לאהבי ולשׁמרי מצותי׃
Shemot 20:7 לא תשׂא את־שׁם־יהוה אלהיך לשׁוא כי לא ינקה יהוה את אשׁר־ישׂא את־שׁמו לשׁוא׃
Shemot 20:8 זכור את־יום השׁבת לקדשׁו׃
Shemot 20:9 שׁשׁת ימים תעבד ועשׂית כל־מלאכתך׃
Shemot 20:10 ויום השׁביעי שׁבת ליהוה אלהיך לא־תעשׂה כל־מלאכה אתה ובנך־ובתך עבדך ואמתך ובהמתך וגרך אשׁר בשׁעריך׃
Shemot 20:11 כי שׁשׁת־ימים עשׂה יהוה את־השׁמים ואת־הארץ את־הים ואת־כל־אשׁר־בם וינח ביום השׁביעי על־כן ברך יהוה את־יום השׁבת ויקדשׁהו׃
Shemot 20:12 כבד את־אביך ואת־אמך למען יארכון ימיך על האדמה אשׁר־יהוה אלהיך נתן לך׃
Shemot 20:13 לא תרצח׃
Shemot 20:14 לא תנאף׃
Shemot 20:15 לא תגנב׃
Shemot 20:16 לא־תענה ברעך עד שׁקר׃
Shemot 20:17 לא תחמד בית רעך לא־תחמד אשׁת רעך ועבדו ואמתו ושׁורו וחמרו וכל אשׁר לרעך׃
Shemot 20:18 וכל־העם ראים את־הקולת ואת־הלפידם ואת קול השׁפר ואת־ההר עשׁן וירא העם וינעו ויעמדו מרחק׃
Shemot 20:19 ויאמרו אל־משׁה דבר־אתה עמנו ונשׁמעה ואל־ידבר עמנו אלהים פן־נמות׃
Shemot 20:20 ויאמר משׁה אל־העם אל־תיראו כי לבעבור נסות אתכם בא האלהים ובעבור תהיה יראתו על־פניכם לבלתי תחטאו׃
Shemot 20:21 ויעמד העם מרחק ומשׁה נגשׁ אל־הערפל אשׁר־שׁם האלהים׃
Shemot 20:22 ויאמר יהוה אל־משׁה כה תאמר אל־בני ישׂראל אתם ראיתם כי מן־השׁמים דברתי עמכם׃
Shemot 20:23 לא תעשׂון אתי אלהי כסף ואלהי זהב לא תעשׂו לכם׃
Shemot 20:24 מזבח אדמה תעשׂה־לי וזבחת עליו את־עלתיך ואת־שׁלמיך את־צאנך ואת־בקרך בכל־המקום אשׁר אזכיר את־שׁמי אבוא אליך וברכתיך׃
Shemot 20:25 ואם־מזבח אבנים תעשׂה־לי לא־תבנה אתהן גזית כי חרבך הנפת עליה ותחללה׃
Shemot 20:26 ולא־תעלה במעלת על־מזבחי אשׁר לא־תגלה ערותך עליו׃