Terumah Gospel (Hebrew)

Mark 10 - 11
Mar 10:1 ויקם משם וילך אל־גבול יהודה מעבר הירדן ויקהלו עוד אליו המון עם וילמדם כפעם בפעם׃
Mar 10:2 ויגשו אליו הפרושים לנסותו וישאלהו ויאמרו היוכל איש לשלח את־אשתו׃
Mar 10:3 ויען ויאמר אליהם מה־צוה אתכם משה׃
Mar 10:4 ויאמרו משה התיר לכתב ספר כריתת ולשלח׃
Mar 10:5 ויען ישוע ויאמר אליהם מפני קשי לבבכם כתב לכם את־המצוה הזאת׃
Mar 10:6 אבל מראשית הבריאה זכר ונקבה ברא אתם אלהים׃
Mar 10:7 על־כן יעזב־איש את־אביו ואת־אמו ודבק באשתו׃
Mar 10:8 והיו שניהם לבשר אחד ואם־כן אפוא אינם עוד שנים כי אם־בשר אחד׃
Mar 10:9 לכן את אשר־חבר אלהים לא יפרידנו אדם׃
Mar 10:10 ויהי בבית וישובו תלמידיו לשאל אתו על־זאת׃
Mar 10:11 ויאמר אליהם המשלח את־אשתו ולקח אחרת נאף הוא עליה׃
Mar 10:12 ואשה כי תעזב אישה והיתה לאיש אחר נאפת היא׃
Mar 10:13 ויביאו אליו ילדים למען יגע בהם ויגערו התלמידים במביאים אתם׃
Mar 10:14 וירא ישוע וירע לו ויאמר אליהם הניחו לילדים לבוא אלי ואל־תמנעום כי לאלה מלכות האלהים׃
Mar 10:15 אמן אמר אני לכם כל אשר־לא יקבל את־מלכות האלהים כילד לא־יבא בה׃
Mar 10:16 ויחבקם וישת ידיו עליהם ויברכם׃
Mar 10:17 ויהי בצאתו לדרך והנה־איש רץ לקראתו ויכרע לפניו וישאל אותו לאמר רבי הטוב מה אעשה ואירש חיי עולם׃
Mar 10:18 ויאמר לו ישוע מדוע קראת לי טוב אין טוב כי אם אחד והוא האלהים׃
Mar 10:19 הן ידעת את־המצות לא תנאף לא תרצח לא תגנב לא־תענה עד שקר לא תעשק כבד את־אביך ואת־אמך׃
Mar 10:20 ויען ויאמר אליו רבי את־כל־אלה שמרתי מנעורי׃
Mar 10:21 ויבט־בו ישוע ויאהבהו ויאמר אליו אחת חסרת לך מכר את־כל־אשר־לך ותן לעניים ויהי־לך אוצר בשמים ובוא שא את־הצלוב ולך אחרי׃
Mar 10:22 ויצר־לו על־הדבר הזה ויעצב וילך לו כי־הון רב היה לו׃
Mar 10:23 ויבט ישוע סביב ויאמר אל־תלמידיו כמה יקשה לבעלי נכסים לבוא במלכות האלהים׃
Mar 10:24 ויבהלו התלמידים על־דבריו ויסף ישוע ויען ויאמר להם בני מה קשה לבטחים על־חילם לבוא אל־מלכות האלהים׃
Mar 10:25 נקל לגמל לעבר בנקב המחט מבוא עשיר אל־מלכות האלהים׃
Mar 10:26 ויוסיפו עוד להשתומם ויאמרו איש אל־אחיו ומי־אפוא יוכל להושע׃
Mar 10:27 ויבט־בם ישוע ויאמר מבני אדם תפלא זאת אך לא מאלהים כי מאלהים לא יפלא כל־דבר׃
Mar 10:28 ויחל פטרוס לאמר אליו הן אנחנו עזבנו את־הכל ונלך אחריך׃
Mar 10:29 ויען ישוע ויאמר אמן אמר אני לכם כי אין איש אשר עזב את־ביתו או את־אחיו או את־אחיותיו או את־אביו או את־אמו או את־אשתו או את־בניו או את שדותיו למעני ולמען הבשורה׃
Mar 10:30 אשר לא יקח עתה בזמן הזה בכל־הרדיפות מאה פעמים כהמה בתים ואחים ואחיות ואמות ובנים ושדות ולעולם הבא חיי עולם׃
Mar 10:31 ואולם רבים מן־הראשונים יהיו אחרונים והאחרונים ראשונים׃
Mar 10:32 ויהי בדרך בעלותם ירושלים וישוע הולך לפניהם והמה נבהלים והולכים אחריו בחרדה ויוסף לקחת אליו את־שנים העשר ויחל להגיד להם את־אשר יקרהו לאמר׃
Mar 10:33 הנה אנחנו עלים ירושלימה ובן־האדם ימסר לראשי הכהנים ולסופרים וירשיעהו למות וימסרו אתו לגוים׃
Mar 10:34 ויהתלו בו ויכהו בשוטים וירקו בפניו וימיתהו וביום השלישי קום יקום׃
Mar 10:35 ויקרבו אליו יעקב ויוחנן בני זבדי ויאמרו רבי חפצים אנחנו שתעשה לנו את־אשר נשאל ממך׃
Mar 10:36 ויאמר אליהם מה־אויתם כי־אעשה לכם׃
Mar 10:37 ויאמרו אליו תנה־לנו לשבת אחד לימינך ואחד לשמאלך בכבודך׃
Mar 10:38 ויאמר אליהם ישוע לא ידעתם את אשר שאלתם התוכלו לשתות את־הכוס אשר אני שתה ולהטבל הטבילה אשר אני נטבל׃
Mar 10:39 ויאמרו אליו נוכל ויאמר אליהם ישוע את־הכוס אשר־אני שתה תשתו והטבילה אשר אני נטבל תטבלו׃
Mar 10:40 אך שבת לימיני ולשמאלי אין בידי לתת בלתי לאשר הוכן להם׃
Mar 10:41 ויהי כשמע זאת העשרה ויחלו לכעוס אל־יעקב ויוחנן׃
Mar 10:42 ויקרא להם ישוע ויאמר אליהם אתם ידעתם כי הנחשבים להשתרר על־הגוים הם רדים בהם וגדוליהם שולטים עליהם׃
Mar 10:43 ולא יהיה כן בקרבכם כי אם־החפץ להיות גדול בכם יהיה לכם למשרת׃
Mar 10:44 והחפץ להיות הראש יהיה עבד לכל׃
Mar 10:45 כי בן־האדם גם־הוא לא בא למען ישרתוהו כי אם־לשרת ולתת את־נפשו כפר תחת רבים׃
Mar 10:46 ויבאו יריחו ויהי כצאתו מיריחו הוא ותלמידיו והמון עם רב והנה ברטימי בן־טימי איש עור ישב על־יד הדרך לבקש צדקה׃
Mar 10:47 וישמע כי הוא ישוע הנצרי ויחל לצעק ויאמר אנא בן־דוד ישוע חנני׃
Mar 10:48 ויגערו־בו רבים להחשתו והוא הרבה עוד לזעק בן־דוד חנני׃
Mar 10:49 ויעמד ישוע ויאמר קראו־לו ויקראו לעור ויאמרו אליו חזק קום קרא־לך׃
Mar 10:50 וישלך את־שמלתו מעליו ויקם ויבא אל־ישוע׃
Mar 10:51 ויען ישוע ויאמר אליו מה־תרצה שאעשה־לך ויאמר אליו העור רבוני אשר אראה׃
Mar 10:52 ויאמר ישוע אליו לך־לך אמונתך הושיעה לך וכרגע נפקחו עיניו וילך אחרי ישוע בדרך׃
Mar 11:1 ויהי כאשר קרבו לירושלים אל־בית־פגי ובית־היני אל־הר הזיתים וישלח שנים מתלמידיו׃
Mar 11:2 ויאמר אליהם לכו אל־הכפר אשר ממולכם והיה כבאכם שמה ומצאתם עיר אסור אשר לא־ישב עליו אדם אותו התירו והביאו׃
Mar 11:3 וכי־יאמר אליכם איש למה תעשו זאת ואמרתם האדון צריך לו והוא מהר ישלחנו הנה׃
Mar 11:4 וילכו וימצאו העיר אסור אל־השער בחוץ על־אם הדרך ויתירוהו׃
Mar 11:5 ואנשים מן־העמדים שם אמרו אליהם מה־זאת עשיתם להתיר את־העיר׃
Mar 11:6 ויאמרו אליהם כאשר צוה ישוע ויניחו להם׃
Mar 11:7 ויביאו את־העיר אל־ישוע וישימו עליו את־בגדיהם וישב עליו׃
Mar 11:8 ורבים פרשו את־בגדיהם על־הדרך ואחרים כרתו ענפים מן־העצים וישטחו על־הדרך׃
Mar 11:9 וההלכים לפניו ואחריו צעקו לאמר הושע־נא ברוך הבא בשם יהוה׃
Mar 11:10 ברוכה מלכות דוד אבינו הבאה (בשם יהוה) הושע־נא במרומים׃
Mar 11:11 ויבא ישוע ירושלים אל־בית המקדש וירא ויתבונן על־הכל והיום רפה לערוב ויצא אל־בית־היני עם־שנים העשר׃
Mar 11:12 ויהי ממחרת בצאתם מבית־היני וירעב׃
Mar 11:13 וירא תאנה מרחוק ולה עלים ויבא לראות הימצא־בה פרי ויקרב אליה ולא־מצא בה כי אם־עלים כי לא היתה עת תאנים׃
Mar 11:14 ויען ויאמר אליה מעתה איש אל־יאכל פרי ממך עד־עולם וישמעו תלמידיו׃
Mar 11:15 ויבאו ירושלים ויבא ישוע אל־בית המקדש ויחל לגרש משם את־המוכרים ואת־הקונים במקדש ואת־שלחנות השלחנים ואת־מושבות מכרי היונים הפך׃
Mar 11:16 ולא הניח לאיש לשאת כלי דרך המקדש׃
Mar 11:17 וילמד ויאמר להם הלא כתוב כי ביתי בית תפלה יקרא לכל־העמים ואתם עשיתם אתו מערת פריצים׃
Mar 11:18 וישמעו הסופרים וראשי הכהנים ויתנכלו אתו להשמידו כי יראו מפניו יען אשר כל־העם משתוממים על־תורתו׃
Mar 11:19 ויהי בערב ויצא אל־מחוץ לעיר׃
Mar 11:20 ויהי הם עברים בבקר ויראו את־התאנה כי יבשה משרשיה׃
Mar 11:21 ויזכר פטרוס ויאמר אליו רבי הנה התאנה אשר אררתה יבשה׃
Mar 11:22 ויען ישוע ויאמר אליהם תהי־נא בכם אמונת אלהים׃
Mar 11:23 כי־אמן אמר אני לכם כל־אשר יאמר אל־ההר הזה הנשא והעתק אל־תוך הים ואין ספק בלבבו כי אם־יאמין כי יעשה דברו כן־יהיה־לו כאשר אמר׃
Mar 11:24 על־כן אני אמר לכם כל אשר תשאלו בתפלתכם האמינו כי תקחו ויהי לכם׃
Mar 11:25 וכי תעמדו להתפלל תמחלו לכל־איש את אשר בלבבכם עליו למען יסלח אביכם שבשמים גם־הוא לפשעיכם׃
Mar 11:26 ואתם אם־לא תמחלו אף־אביכם שבשמים לא־יסלח לפשעיכם׃
Mar 11:27 וישובו ויבאו ירושלים ויהי הוא מתהלך במקדש ויבאו אליו ראשי הכהנים והסופרים והזקנים׃
Mar 11:28 ויאמרו אליו באי־זו רשות אתה עשה אלה ומי נתן לך את־הרשות הזאת לעשות את־אלה׃
Mar 11:29 ויען ישוע ויאמר אליהם גם־אני אשאלה אתכם דבר אחד ואתם השיבוני ואמר לכם באי־זו רשות אני עשה אלה׃
Mar 11:30 טבילת יוחנן המשמים היתה אם־מבני אדם השיבוני׃
Mar 11:31 ויועצו יחדו לאמר אם־נאמר משמים יאמר מדוע אפוא לא האמנתם בו׃
Mar 11:32 או הנאמר מבני־אדם וייראו את־העם כי־כלם חשבו את־יוחנן לנביא באמת׃
Mar 11:33 ויענו ויאמרו אל־ישוע לא ידענו ויען ישוע ויאמר אליהם אם־כן גם־אני לא אמר לכם באי־זו רשות אני עשה אלה׃