Shemot Haftarah (Hebrew)

Yeshayahu 27:6-28:13, 29:22-23

Yes 27:6 הבאים ישׁרשׁ יעקב יציץ ופרח ישׂראל ומלאו פני־תבל תנובה׃
Yes 27:7 הכמכת מכהו הכהו אם־כהרג הרגיו הרג׃
Yes 27:8 בסאסאה בשׁלחה תריבנה הגה ברוחו הקשׁה ביום קדים׃
Yes 27:9 לכן בזאת יכפר עון־יעקב וזה כל־פרי הסר חטאתו בשׂומו כל־אבני מזבח כאבני־גר מנפצות לא־יקמו אשׁרים וחמנים׃
Yes 27:10 כי עיר בצורה בדד נוה משׁלח ונעזב כמדבר שׁם ירעה עגל ושׁם ירבץ וכלה סעפיה׃
Yes 27:11 ביבשׁ קצירה תשׁברנה נשׁים באות מאירות אותה כי לא עם־בינות הוא על־כן לא־ירחמנו עשׂהו ויצרו לא יחננו׃
Yes 27:12 והיה ביום ההוא יחבט יהוה משׁבלת הנהר עד־נחל מצרים ואתם תלקטו לאחד אחד בני ישׂראל׃
Yes 27:13 והיה ביום ההוא יתקע בשׁופר גדול ובאו האבדים בארץ אשׁור והנדחים בארץ מצרים והשׁתחוו ליהוה בהר הקדשׁ בירושׁלם׃
Yes 28:1 הוי עטרת גאות שׁכרי אפרים וציץ נבל צבי תפארתו אשׁר על־ראשׁ גיא־שׁמנים הלומי יין׃
Yes 28:2 הנה חזק ואמץ לאדני כזרם ברד שׂער קטב כזרם מים כבירים שׁטפים הניח לארץ ביד׃
Yes 28:3 ברגלים תרמסנה עטרת גאות שׁכורי אפרים׃
Yes 28:4 והיתה ציצת נבל צבי תפארתו אשׁר על־ראשׁ גיא שׁמנים כבכורה בטרם קיץ אשׁר יראה הראה אותה בעודה בכפו יבלענה׃
Yes 28:5 ביום ההוא יהיה יהוה צבאות לעטרת צבי ולצפירת תפארה לשׁאר עמו׃
Yes 28:6 ולרוח משׁפט ליושׁב על־המשׁפט ולגבורה משׁיבי מלחמה שׁערה׃
Yes 28:7 וגם־אלה ביין שׁגו ובשׁכר תעו כהן ונביא שׁגו בשׁכר נבלעו מן־היין תעו מן־השׁכר שׁגו בראה פקו פליליה׃
Yes 28:8 כי כל־שׁלחנות מלאו קיא צאה בלי מקום׃
Yes 28:9 את־מי יורה דעה ואת־מי יבין שׁמועה גמולי מחלב עתיקי משׁדים׃
Yes 28:10 כי צו לצו צו לצו קו לקו קו לקו זעיר שׁם זעיר שׁם׃
Yes 28:11 כי בלעגי שׂפה ובלשׁון אחרת ידבר אל־העם הזה׃
Yes 28:12 אשׁר אמר אליהם זאת המנוחה הניחו לעיף וזאת המרגעה ולא אבוא שׁמוע׃
Yes 28:13 והיה להם דבר־יהוה צו לצו צו לצו קו לקו קו לקו זעיר שׁם זעיר שׁם למען ילכו וכשׁלו אחור ונשׁברו ונוקשׁו ונלכדו׃
Yes 29:22 לכן כה־אמר יהוה אל־בית יעקב אשׁר פדה את־אברהם לא־עתה יבושׁ יעקב ולא עתה פניו יחורו׃
Yes 29:23 כי בראתו ילדיו מעשׂה ידי בקרבו יקדישׁו שׁמי והקדישׁו את־קדושׁ יעקב ואת־אלהי ישׂראל יעריצו׃