Lech Lecha Haftarah (Hebrew)

Yesha'Yahu 40:27-41:16
Yes 40:27 למה תאמר יעקב ותדבר ישׂראל נסתרה דרכי מיהוה ומאלהי משׁפטי יעבור׃
Yes 40:28 הלוא ידעת אם־לא שׁמעת אלהי עולם יהוה בורא קצות הארץ לא ייעף ולא ייגע אין חקר לתבונתו׃
Yes 40:29 נתן ליעף כח ולאין אונים עצמה ירבה׃
Yes 40:30 ויעפו נערים ויגעו ובחורים כשׁול יכשׁלו׃
Yes 40:31 וקוי יהוה יחליפו כח יעלו אבר כנשׁרים ירוצו ולא ייגעו ילכו ולא ייעפו׃
Yes 41:1 החרישׁו אלי איים ולאמים יחליפו כח יגשׁו אז ידברו יחדו למשׁפט נקרבה׃
Yes 41:2 מי העיר ממזרח צדק יקראהו לרגלו יתן לפניו גוים ומלכים ירד יתן כעפר חרבו כקשׁ נדף קשׁתו׃
Yes 41:3 ירדפם יעבור שׁלום ארח ברגליו לא יבוא׃
Yes 41:4 מי־פעל ועשׂה קרא הדרות מראשׁ אני יהוה ראשׁון ואת־אחרנים אני־הוא׃
Yes 41:5 ראו איים וייראו קצות הארץ יחרדו קרבו ויאתיון׃
Yes 41:6 אישׁ את־רעהו יעזרו ולאחיו יאמר חזק׃
Yes 41:7 ויחזק חרשׁ את־צרף מחליק פטישׁ את־הולם פעם אמר לדבק טוב הוא ויחזקהו במסמרים לא ימוט׃
Yes 41:8 ואתה ישׂראל עבדי יעקב אשׁר בחרתיך זרע אברהם אהבי׃
Yes 41:9 אשׁר החזקתיך מקצות הארץ ומאציליה קראתיך ואמר לך עבדי־אתה בחרתיך ולא מאסתיך׃
Yes 41:10 אל־תירא כי עמך־אני אל־תשׁתע כי־אני אלהיך אמצתיך אף־עזרתיך אף־תמכתיך בימין צדקי׃
Yes 41:11 הן יבשׁו ויכלמו כל הנחרים בך יהיו כאין ויאבדו אנשׁי ריבך׃
Yes 41:12 תבקשׁם ולא תמצאם אנשׁי מצתך יהיו כאין וכאפס אנשׁי מלחמתך׃
Yes 41:13 כי אני יהוה אלהיך מחזיק ימינך האמר לך אל־תירא אני עזרתיך׃
Yes 41:14 אל־תיראי תולעת יעקב מתי ישׂראל אני עזרתיך נאם־יהוה וגאלך קדושׁ ישׂראל׃
Yes 41:15 הנה שׂמתיך למורג חרוץ חדשׁ בעל פיפיות תדושׁ הרים ותדק וגבעות כמץ תשׂים׃
Yes 41:16 תזרם ורוח תשׂאם וסערה תפיץ אותם ואתה תגיל ביהוה בקדושׁ ישׂראל תתהלל׃