Lech Lecha (Hebrew)

B'reisheet 12:1-17:27
B’reisheet 12:1 ויאמר יהוה אל־אברם לך־לך מארצך וממולדתך ומבית אביך אל־הארץ אשׁר אראך׃
B’reisheet 12:2 ואעשׂך לגוי גדול ואברכך ואגדלה שׁמך והיה ברכה׃
B’reisheet 12:3 ואברכה מברכיך ומקללך אאר ונברכו בך כל משׁפחת האדמה׃
B’reisheet 12:4 וילך אברם כאשׁר דבר אליו יהוה וילך אתו לוט ואברם בן־חמשׁ שׁנים ושׁבעים שׁנה בצאתו מחרן׃
B’reisheet 12:5 ויקח אברם את־שׂרי אשׁתו ואת־לוט בן־אחיו ואת־כל־רכושׁם אשׁר רכשׁו ואת־הנפשׁ אשׁר־עשׂו בחרן ויצאו ללכת ארצה כנען ויבאו ארצה כנען׃
B’reisheet 12:6 ויעבר אברם בארץ עד מקום שׁכם עד אלון מורה והכנעני אז בארץ׃
B’reisheet 12:7 וירא יהוה אל־אברם ויאמר לזרעך אתן את־הארץ הזאת ויבן שׁם מזבח ליהוה הנראה אליו׃
B’reisheet 12:8 ויעתק משׁם ההרה מקדם לבית־אל ויט אהלה בית־אל מים והעי מקדם ויבן־שׁם מזבח ליהוה ויקרא בשׁם יהוה׃
B’reisheet 12:9 ויסע אברם הלוך ונסוע הנגבה׃
B’reisheet 12:10 ויהי רעב בארץ וירד אברם מצרימה לגור שׁם כי־כבד הרעב בארץ׃
B’reisheet 12:11 ויהי כאשׁר הקריב לבוא מצרימה ויאמר אל־שׂרי אשׁתו הנה־נא ידעתי כי אשׁה יפת־מראה את׃
B’reisheet 12:12 והיה כי־יראו אתך המצרים ואמרו אשׁתו זאת והרגו אתי ואתך יחיו׃
B’reisheet 12:13 אמרי־נא אחתי את למען ייטב־לי בעבורך וחיתה נפשׁי בגללך׃
B’reisheet 12:14 ויהי כבוא אברם מצרימה ויראו המצרים את־האשׁה כי־יפה הוא מאד׃
B’reisheet 12:15 ויראו אתה שׂרי פרעה ויהללו אתה אל־פרעה ותקח האשׁה בית פרעה׃
B’reisheet 12:16 ולאברם היטיב בעבורה ויהי־לו צאן־ובקר וחמרים ועבדים ושׁפחת ואתנת וגמלים׃
B’reisheet 12:17 וינגע יהוה את־פרעה נגעים גדלים ואת־ביתו על־דבר שׂרי אשׁת אברם׃
B’reisheet 12:18 ויקרא פרעה לאברם ויאמר מה־זאת עשׂית לי למה לא־הגדת לי כי אשׁתך הוא׃
B’reisheet 12:19 למה אמרת אחתי הוא ואקח אתה לי לאשׁה ועתה הנה אשׁתך קח ולך׃
B’reisheet 12:20 ויצו עליו פרעה אנשׁים וישׁלחו אתו ואת־אשׁתו ואת־כל־אשׁר־לו׃
B’reisheet 13:1 ויעל אברם ממצרים הוא ואשׁתו וכל־אשׁר־לו ולוט עמו הנגבה׃
B’reisheet 13:2 ואברם כבד מאד במקנה בכסף ובזהב׃
B’reisheet 13:3 וילך למסעיו מנגב ועד־בית־אל עד־המקום אשׁר־היה שׁם אהלה בתחלה בין בית־אל ובין העי׃
B’reisheet 13:4 אל־מקום המזבח אשׁר־עשׂה שׁם בראשׁנה ויקרא שׁם אברם בשׁם יהוה׃
B’reisheet 13:5 וגם־ללוט ההלך את־אברם היה צאן־ובקר ואהלים׃
B’reisheet 13:6 ולא־נשׂא אתם הארץ לשׁבת יחדו כי־היה רכושׁם רב ולא יכלו לשׁבת יחדו׃
B’reisheet 13:7 ויהי־ריב בין רעי מקנה־אברם ובין רעי מקנה־לוט והכנעני והפרזי אז ישׁב בארץ׃
B’reisheet 13:8 ויאמר אברם אל־לוט אל־נא תהי מריבה ביני ובינך ובין רעי ובין רעיך כי־אנשׁים אחים אנחנו׃
B’reisheet 13:9 הלא כל־הארץ לפניך הפרד נא מעלי אם־השׂמאל ואימנה ואם־הימין ואשׂמאילה׃
B’reisheet 13:10 וישׂא־לוט את־עיניו וירא את־כל־ככר הירדן כי כלה משׁקה לפני שׁחת יהוה את־סדם ואת־עמרה כגן־יהוה כארץ מצרים באכה צער׃
B’reisheet 13:11 ויבחר־לו לוט את כל־ככר הירדן ויסע לוט מקדם ויפרדו אישׁ מעל אחיו׃
B’reisheet 13:12 אברם ישׁב בארץ־כנען ולוט ישׁב בערי הככר ויאהל עד־סדם׃
B’reisheet 13:13 ואנשׁי סדם רעים וחטאים ליהוה מאד׃
B’reisheet 13:14 ויהוה אמר אל־אברם אחרי הפרד־לוט מעמו שׂא נא עיניך וראה מן־המקום אשׁר־אתה שׁם צפנה ונגבה וקדמה וימה׃
B’reisheet 13:15 כי את־כל־הארץ אשׁר־אתה ראה לך אתננה ולזרעך עד־עולם׃
B’reisheet 13:16 ושׂמתי את־זרעך כעפר הארץ אשׁר אם־יוכל אישׁ למנות את־עפר הארץ גם־זרעך ימנה׃
B’reisheet 13:17 קום התהלך בארץ לארכה ולרחבה כי לך אתננה׃
B’reisheet 13:18 ויאהל אברם ויבא וישׁב באלני ממרא אשׁר בחברון ויבן־שׁם מזבח ליהוה׃
B’reisheet 14:1 ויהי בימי אמרפל מלך־שׁנער אריוך מלך אלסר כדרלעמר מלך עילם ותדעל מלך גוים׃
B’reisheet 14:2 עשׂו מלחמה את־ברע מלך סדם ואת־ברשׁע מלך עמרה שׁנאב מלך אדמה ושׁמאבר מלך צביים ומלך בלע היא־צער׃
B’reisheet 14:3 כל־אלה חברו אל־עמק השׂדים הוא ים המלח׃
B’reisheet 14:4 שׁתים עשׂרה שׁנה עבדו את־כדרלעמר ושׁלשׁ־עשׂרה שׁנה מרדו׃
B’reisheet 14:5 ובארבע עשׂרה שׁנה בא כדרלעמר והמלכים אשׁר אתו ויכו את־רפאים בעשׁתרת קרנים ואת־הזוזים בהם ואת האימים בשׁוה קריתים׃
B’reisheet 14:6 ואת־החרי בהררם שׂעיר עד איל פארן אשׁר על־המדבר׃
B’reisheet 14:7 וישׁבו ויבאו אל־עין משׁפט הוא קדשׁ ויכו את־כל־שׂדה העמלקי וגם את־האמרי הישׁב בחצצן תמר׃
B’reisheet 14:8 ויצא מלך־סדם ומלך עמרה ומלך אדמה ומלך צביים ומלך בלע הוא־צער ויערכו אתם מלחמה בעמק השׂדים׃
B’reisheet 14:9 את כדרלעמר מלך עילם ותדעל מלך גוים ואמרפל מלך שׁנער ואריוך מלך אלסר ארבעה מלכים את־החמשׁה׃
B’reisheet 14:10 ועמק השׂדים בארת בארת חמר וינסו מלך־סדם ועמרה ויפלו־שׁמה והנשׁארים הרה נסו׃
B’reisheet 14:11 ויקחו את־כל־רכשׁ סדם ועמרה ואת־כל־אכלם וילכו׃
B’reisheet 14:12 ויקחו את־לוט ואת־רכשׁו בן־אחי אברם וילכו והוא ישׁב בסדם׃
B’reisheet 14:13 ויבא הפליט ויגד לאברם העברי והוא שׁכן באלני ממרא האמרי אחי אשׁכל ואחי ענר והם בעלי ברית־אברם׃
B’reisheet 14:14 וישׁמע אברם כי נשׁבה אחיו וירק את־חניכיו ילידי ביתו שׁמנה עשׂר ושׁלשׁ מאות וירדף עד־דן׃
B’reisheet 14:15 ויחלק עליהם לילה הוא ועבדיו ויכם וירדפם עד־חובה אשׁר משׂמאל לדמשׂק׃
B’reisheet 14:16 וישׁב את כל־הרכשׁ וגם את־לוט אחיו ורכשׁו השׁיב וגם את־הנשׁים ואת־העם׃
B’reisheet 14:17 ויצא מלך־סדם לקראתו אחרי שׁובו מהכות את־כדר־לעמר ואת־המלכים אשׁר אתו אל־עמק שׁוה הוא עמק המלך׃
B’reisheet 14:18 ומלכי־צדק מלך שׁלם הוציא לחם ויין והוא כהן לאל עליון׃
B’reisheet 14:19 ויברכהו ויאמר ברוך אברם לאל עליון קנה שׁמים וארץ׃
B’reisheet 14:20 וברוך אל עליון אשׁר־מגן צריך בידך ויתן־לו מעשׂר מכל׃
B’reisheet 14:21 ויאמר מלך־סדם אל־אברם תן־לי הנפשׁ והרכשׁ קח־לך׃
B’reisheet 14:22 ויאמר אברם אל־מלך סדם הרמתי ידי אל־יהוה אל עליון קנה שׁמים וארץ׃
B’reisheet 14:23 אם־מחוט ועד שׂרוך־נעל ואם־אקח מכל־אשׁר־לך ולא תאמר אני העשׁרתי את־אברם׃
B’reisheet 14:24 בלעדי רק אשׁר אכלו הנערים וחלק האנשׁים אשׁר הלכו אתי ענר אשׁכל וממרא הם יקחו חלקם׃
B’reisheet 15:1 אחר הדברים האלה היה דבר־יהוה אל־אברם במחזה לאמר אל־תירא אברם אנכי מגן לך שׂכרך הרבה מאד׃
B’reisheet 15:2 ויאמר אברם אדני יהוה מה־תתן־לי ואנכי הולך ערירי ובן־משׁק ביתי הוא דמשׂק אליעזר׃
B’reisheet 15:3 ויאמר אברם הן לי לא נתתה זרע והנה בן־ביתי יורשׁ אתי׃
B’reisheet 15:4 והנה דבר־יהוה אליו לאמר לא יירשׁך זה כי־אם אשׁר יצא ממעיך הוא יירשׁך׃
B’reisheet 15:5 ויוצא אתו החוצה ויאמר הבט־נא השׁמימה וספר הכוכבים אם־תוכל לספר אתם ויאמר לו כה יהיה זרעך׃
B’reisheet 15:6 והאמן ביהוה ויחשׁבה לו צדקה׃
B’reisheet 15:7 ויאמר אליו אני יהוה אשׁר הוצאתיך מאור כשׂדים לתת לך את־הארץ הזאת לרשׁתה׃
B’reisheet 15:8 ויאמר אדני יהוה במה אדע כי אירשׁנה׃
B’reisheet 15:9 ויאמר אליו קחה לי עגלה משׁלשׁת ועז משׁלשׁת ואיל משׁלשׁ ותר וגוזל׃
B’reisheet 15:10 ויקח־לו את־כל־אלה ויבתר אתם בתוך ויתן אישׁ־בתרו לקראת רעהו ואת־הצפר לא בתר׃
B’reisheet 15:11 וירד העיט על־הפגרים וישׁב אתם אברם׃
B’reisheet 15:12 ויהי השׁמשׁ לבוא ותרדמה נפלה על־אברם והנה אימה חשׁכה גדלה נפלת עליו׃
B’reisheet 15:13 ויאמר לאברם ידע תדע כי־גר יהיה זרעך בארץ לא להם ועבדום וענו אתם ארבע מאות שׁנה׃
B’reisheet 15:14 וגם את־הגוי אשׁר יעבדו דן אנכי ואחרי־כן יצאו ברכשׁ גדול׃
B’reisheet 15:15 ואתה תבוא אל־אבתיך בשׁלום תקבר בשׂיבה טובה׃
B’reisheet 15:16 ודור רביעי ישׁובו הנה כי לא־שׁלם עון האמרי עד־הנה׃
B’reisheet 15:17 ויהי השׁמשׁ באה ועלטה היה והנה תנור עשׁן ולפיד אשׁ אשׁר עבר בין הגזרים האלה׃
B’reisheet 15:18 ביום ההוא כרת יהוה את־אברם ברית לאמר לזרעך נתתי את־הארץ הזאת מנהר מצרים עד־הנהר הגדל נהר־פרת׃
B’reisheet 15:19 את־הקיני ואת־הקנזי ואת הקדמני׃
B’reisheet 15:20 ואת־החתי ואת־הפרזי ואת־הרפאים׃
B’reisheet 15:21 ואת־האמרי ואת־הכנעני ואת־הגרגשׁי ואת־היבוסי׃
B’reisheet 16:1 ושׂרי אשׁת אברם לא ילדה לו ולה שׁפחה מצרית ושׁמה הגר׃
B’reisheet 16:2 ותאמר שׂרי אל־אברם הנה־נא עצרני יהוה מלדת בא־נא אל־שׁפחתי אולי אבנה ממנה וישׁמע אברם לקול שׂרי׃
B’reisheet 16:3 ותקח שׂרי אשׁת־אברם את־הגר המצרית שׁפחתה מקץ עשׂר שׁנים לשׁבת אברם בארץ כנען ותתן אתה לאברם אישׁה לו לאשׁה׃
B’reisheet 16:4 ויבא אל־הגר ותהר ותרא כי הרתה ותקל גברתה בעיניה׃
B’reisheet 16:5 ותאמר שׂרי אל־אברם חמסי עליך אנכי נתתי שׁפחתי בחיקך ותרא כי הרתה ואקל בעיניה ישׁפט יהוה ביני וביניך׃
B’reisheet 16:6 ויאמר אברם אל־שׂרי הנה שׁפחתך בידך עשׂי־לה הטוב בעיניך ותענה שׂרי ותברח מפניה׃
B’reisheet 16:7 וימצאה מלאך יהוה על־עין המים במדבר על־העין בדרך שׁור׃
B’reisheet 16:8 ויאמר הגר שׁפחת שׂרי אי־מזה באת ואנה תלכי ותאמר מפני שׂרי גברתי אנכי ברחת׃
B’reisheet 16:9 ויאמר לה מלאך יהוה שׁובי אל־גברתך והתעני תחת ידיה׃
B’reisheet 16:10 ויאמר לה מלאך יהוה הרבה ארבה את־זרעך ולא יספר מרב׃
B’reisheet 16:11 ויאמר לה מלאך יהוה הנך הרה וילדת בן וקראת שׁמו ישׁמעאל כי־שׁמע יהוה אל־עניך׃
B’reisheet 16:12 והוא יהיה פרא אדם ידו בכל ויד כל בו ועל־פני כל־אחיו ישׁכן׃
B’reisheet 16:13 ותקרא שׁם־יהוה הדבר אליה אתה אל ראי כי אמרה הגם הלם ראיתי אחרי ראי׃
B’reisheet 16:14 על־כן קרא לבאר באר לחי ראי הנה בין־קדשׁ ובין ברד׃
B’reisheet 16:15 ותלד הגר לאברם בן ויקרא אברם שׁם־בנו אשׁר־ילדה הגר ישׁמעאל׃
B’reisheet 16:16 ואברם בן־שׁמנים שׁנה ושׁשׁ שׁנים בלדת־הגר את־ישׁמעאל לאברם׃
B’reisheet 17:1 ויהי אברם בן־תשׁעים שׁנה ותשׁע שׁנים וירא יהוה אל־אברם ויאמר אליו אני־אל שׁדי התהלך לפני והיה תמים׃
B’reisheet 17:2 ואתנה בריתי ביני ובינך וארבה אותך במאד מאד׃
B’reisheet 17:3 ויפל אברם על־פניו וידבר אתו אלהים לאמר׃
B’reisheet 17:4 אני הנה בריתי אתך והיית לאב המון גוים׃
B’reisheet 17:5 ולא־יקרא עוד את־שׁמך אברם והיה שׁמך אברהם כי אב־המון גוים נתתיך׃
B’reisheet 17:6 והפרתי אתך במאד מאד ונתתיך לגוים ומלכים ממך יצאו׃
B’reisheet 17:7 והקמתי את־בריתי ביני ובינך ובין זרעך אחריך לדרתם לברית עולם להיות לך לאלהים ולזרעך אחריך׃
B’reisheet 17:8 ונתתי לך ולזרעך אחריך את ארץ מגריך את כל־ארץ כנען לאחזת עולם והייתי להם לאלהים׃
B’reisheet 17:9 ויאמר אלהים אל־אברהם ואתה את־בריתי תשׁמר אתה וזרעך אחריך לדרתם׃
B’reisheet 17:10 זאת בריתי אשׁר תשׁמרו ביני וביניכם ובין זרעך אחריך המול לכם כל־זכר׃
B’reisheet 17:11 ונמלתם את בשׂר ערלתכם והיה לאות ברית ביני וביניכם׃
B’reisheet 17:12 ובן־שׁמנת ימים ימול לכם כל־זכר לדרתיכם יליד בית ומקנת־כסף מכל בן־נכר אשׁר לא מזרעך הוא׃
B’reisheet 17:13 המול ימול יליד ביתך ומקנת כספך והיתה בריתי בבשׂרכם לברית עולם׃
B’reisheet 17:14 וערל זכר אשׁר לא־ימול את־בשׂר ערלתו ונכרתה הנפשׁ ההוא מעמיה את־בריתי הפר׃
B’reisheet 17:15 ויאמר אלהים אל־אברהם שׂרי אשׁתך לא־תקרא את־שׁמה שׂרי כי שׂרה שׁמה׃
B’reisheet 17:16 וברכתי אתה וגם נתתי ממנה לך בן וברכתיה והיתה לגוים מלכי עמים ממנה יהיו׃
B’reisheet 17:17 ויפל אברהם על־פניו ויצחק ויאמר בלבו הלבן מאה־שׁנה יולד ואם־שׂרה הבת־תשׁעים שׁנה תלד׃
B’reisheet 17:18 ויאמר אברהם אל־האלהים לו ישׁמעאל יחיה לפניך׃
B’reisheet 17:19 ויאמר אלהים אבל שׂרה אשׁתך ילדת לך בן וקראת את־שׁמו יצחק והקמתי את־בריתי אתו לברית עולם לזרעו אחריו׃
B’reisheet 17:20 ולישׁמעאל שׁמעתיך הנה ברכתי אתו והפריתי אתו והרביתי אתו במאד מאד שׁנים־עשׂר נשׂיאם יוליד ונתתיו לגוי גדול׃
B’reisheet 17:21 ואת־בריתי אקים את־יצחק אשׁר תלד לך שׂרה למועד הזה בשׁנה האחרת׃
B’reisheet 17:22 ויכל לדבר אתו ויעל אלהים מעל אברהם׃
B’reisheet 17:23 ויקח אברהם את־ישׁמעאל בנו ואת כל־ילידי ביתו ואת כל־מקנת כספו כל־זכר באנשׁי בית אברהם וימל את־בשׂר ערלתם בעצם היום הזה כאשׁר דבר אתו אלהים׃
B’reisheet 17:24 ואברהם בן־תשׁעים ותשׁע שׁנה בהמלו בשׂר ערלתו׃
B’reisheet 17:25 וישׁמעאל בנו בן־שׁלשׁ עשׂרה שׁנה בהמלו את בשׂר ערלתו׃
B’reisheet 17:26 בעצם היום הזה נמול אברהם וישׁמעאל בנו׃
B’reisheet 17:27 וכל־אנשׁי ביתו יליד בית ומקנת־כסף מאת בן־נכר נמלו אתו׃