Terumah (Hebrew)

Shemot 25:1 - 27:19
Shemot 25:1 וידבר יהוה אל־משׁה לאמר׃
Shemot 25:2 דבר אל־בני ישׂראל ויקחו־לי תרומה מאת כל־אישׁ אשׁר ידבנו לבו תקחו את־תרומתי׃
Shemot 25:3 וזאת התרומה אשׁר תקחו מאתם זהב וכסף ונחשׁת׃
Shemot 25:4 ותכלת וארגמן ותולעת שׁני ושׁשׁ ועזים׃
Shemot 25:5 וערת אילם מאדמים וערת תחשׁים ועצי שׁטים׃
Shemot 25:6 שׁמן למאר בשׂמים לשׁמן המשׁחה ולקטרת הסמים׃
Shemot 25:7 אבני־שׁהם ואבני מלאים לאפד ולחשׁן׃
Shemot 25:8 ועשׂו לי מקדשׁ ושׁכנתי בתוכם׃
Shemot 25:9 ככל אשׁר אני מראה אותך את תבנית המשׁכן ואת תבנית כל־כליו וכן תעשׂו׃
Shemot 25:10 ועשׂו ארון עצי שׁטים אמתים וחצי ארכו ואמה וחצי רחבו ואמה וחצי קמתו׃
Shemot 25:11 וצפית אתו זהב טהור מבית ומחוץ תצפנו ועשׂית עליו זר זהב סביב׃
Shemot 25:12 ויצקת לו ארבע טבעת זהב ונתתה על ארבע פעמתיו ושׁתי טבעת על־צלעו האחת ושׁתי טבעת על־צלעו השׁנית׃
Shemot 25:13 ועשׂית בדי עצי שׁטים וצפית אתם זהב׃
Shemot 25:14 והבאת את־הבדים בטבעת על צלעת הארן לשׂאת את־הארן בהם׃
Shemot 25:15 בטבעת הארן יהיו הבדים לא יסרו ממנו׃
Shemot 25:16 ונתת אל־הארן את העדת אשׁר אתן אליך׃
Shemot 25:17 ועשׂית כפרת זהב טהור אמתים וחצי ארכה ואמה וחצי רחבה׃
Shemot 25:18 ועשׂית שׁנים כרבים זהב מקשׁה תעשׂה אתם משׁני קצות הכפרת׃
Shemot 25:19 ועשׂה כרוב אחד מקצה מזה וכרוב־אחד מקצה מזה מן־הכפרת תעשׂו את־הכרבים על־שׁני קצותיו׃
Shemot 25:20 והיו הכרבים פרשׂי כנפים למעלה סככים בכנפיהם על־הכפרת ופניהם אישׁ אל־אחיו אל־הכפרת יהיו פני הכרבים׃
Shemot 25:21 ונתת את־הכפרת על־הארן מלמעלה ואל־הארן תתן את־העדת אשׁר אתן אליך׃
Shemot 25:22 ונועדתי לך שׁם ודברתי אתך מעל הכפרת מבין שׁני הכרבים אשׁר על־ארון העדת את כל־אשׁר אצוה אותך אל־בני ישׂראל׃
Shemot 25:23 ועשׂית שׁלחן עצי שׁטים אמתים ארכו ואמה רחבו ואמה וחצי קמתו׃
Shemot 25:24 וצפית אתו זהב טהור ועשׂית לו זר זהב סביב׃
Shemot 25:25 ועשׂית לו מסגרת טפח סביב ועשׂית זר־זהב למסגרתו סביב׃
Shemot 25:26 ועשׂית לו ארבע טבעת זהב ונתת את־הטבעת על ארבע הפאת אשׁר לארבע רגליו׃
Shemot 25:27 לעמת המסגרת תהיין הטבעת לבתים לבדים לשׂאת את־השׁלחן׃
Shemot 25:28 ועשׂית את־הבדים עצי שׁטים וצפית אתם זהב ונשׂא־בם את־השׁלחן׃
Shemot 25:29 ועשׂית קערתיו וכפתיו וקשׂותיו ומנקיתיו אשׁר יסך בהן זהב טהור תעשׂה אתם׃
Shemot 25:30 ונתת על־השׁלחן לחם פנים לפני תמיד׃
Shemot 25:31 ועשׂית מנרת זהב טהור מקשׁה תיעשׂה המנורה ירכה וקנה גביעיה כפתריה ופרחיה ממנה יהיו׃
Shemot 25:32 ושׁשׁה קנים יצאים מצדיה שׁלשׁה קני מנרה מצדה האחד ושׁלשׁה קני מנרה מצדה השׁני׃
Shemot 25:33 שׁלשׁה גבעים משׁקדים בקנה האחד כפתר ופרח ושׁלשׁה גבעים משׁקדים בקנה האחד כפתר ופרח כן לשׁשׁת הקנים היצאים מן־המנרה׃
Shemot 25:34 ובמנרה ארבעה גבעים משׁקדים כפתריה ופרחיה׃
Shemot 25:35 וכפתר תחת שׁני הקנים ממנה וכפתר תחת שׁני הקנים ממנה וכפתר תחת־שׁני הקנים ממנה לשׁשׁת הקנים היצאים מן־המנרה׃
Shemot 25:36 כפתריהם וקנתם ממנה יהיו כלה מקשׁה אחת זהב טהור׃
Shemot 25:37 ועשׂית את־נרתיה שׁבעה והעלה את־נרתיה והאיר על־עבר פניה׃
Shemot 25:38 ומלקחיה ומחתתיה זהב טהור׃
Shemot 25:39 ככר זהב טהור יעשׂה אתה את כל־הכלים האלה׃
Shemot 25:40 וראה ועשׂה בתבניתם אשׁר־אתה מראה בהר׃
Shemot 26:1 ואת־המשׁכן תעשׂה עשׂר יריעת שׁשׁ משׁזר ותכלת וארגמן ותלעת שׁני כרבים מעשׂה חשׁב תעשׂה אתם׃
Shemot 26:2 ארך היריעה האחת שׁמנה ועשׂרים באמה ורחב ארבע באמה היריעה האחת מדה אחת לכל־היריעת׃
Shemot 26:3 חמשׁ היריעת תהיין חברת אשׁה אל־אחתה וחמשׁ יריעת חברת אשׁה אל־אחתה׃
Shemot 26:4 ועשׂית ללאת תכלת על שׂפת היריעה האחת מקצה בחברת וכן תעשׂה בשׂפת היריעה הקיצונה במחברת השׁנית׃
Shemot 26:5 חמשׁים ללאת תעשׂה ביריעה האחת וחמשׁים ללאת תעשׂה בקצה היריעה אשׁר במחברת השׁנית מקבילת הללאת אשׁה אל־אחתה׃
Shemot 26:6 ועשׂית חמשׁים קרסי זהב וחברת את־היריעת אשׁה אל־אחתה בקרסים והיה המשׁכן אחד׃
Shemot 26:7 ועשׂית יריעת עזים לאהל על־המשׁכן עשׁתי־עשׂרה יריעת תעשׂה אתם׃
Shemot 26:8 ארך היריעה האחת שׁלשׁים באמה ורחב ארבע באמה היריעה האחת מדה אחת לעשׁתי עשׂרה יריעת׃
Shemot 26:9 וחברת את־חמשׁ היריעת לבד ואת־שׁשׁ היריעת לבד וכפלת את־היריעה השׁשׁית אל־מול פני האהל׃
Shemot 26:10 ועשׂית חמשׁים ללאת על שׂפת היריעה האחת הקיצנה בחברת וחמשׁים ללאת על שׂפת היריעה החברת השׁנית׃
Shemot 26:11 ועשׂית קרסי נחשׁת חמשׁים והבאת את־הקרסים בללאת וחברת את־האהל והיה אחד׃
Shemot 26:12 וסרח העדף ביריעת האהל חצי היריעה העדפת תסרח על אחרי המשׁכן׃
Shemot 26:13 והאמה מזה והאמה מזה בעדף בארך יריעת האהל יהיה סרוח על־צדי המשׁכן מזה ומזה לכסתו׃
Shemot 26:14 ועשׂית מכסה לאהל ערת אילם מאדמים ומכסה ערת תחשׁים מלמעלה׃
Shemot 26:15 ועשׂית את־הקרשׁים למשׁכן עצי שׁטים עמדים׃
Shemot 26:16 עשׂר אמות ארך הקרשׁ ואמה וחצי האמה רחב הקרשׁ האחד׃
Shemot 26:17 שׁתי ידות לקרשׁ האחד משׁלבת אשׁה אל־אחתה כן תעשׂה לכל קרשׁי המשׁכן׃
Shemot 26:18 ועשׂית את־הקרשׁים למשׁכן עשׂרים קרשׁ לפאת נגבה תימנה׃
Shemot 26:19 וארבעים אדני־כסף תעשׂה תחת עשׂרים הקרשׁ שׁני אדנים תחת־הקרשׁ האחד לשׁתי ידתיו ושׁני אדנים תחת־הקרשׁ האחד לשׁתי ידתיו׃
Shemot 26:20 ולצלע המשׁכן השׁנית לפאת צפון עשׂרים קרשׁ׃
Shemot 26:21 וארבעים אדניהם כסף שׁני אדנים תחת הקרשׁ האחד ושׁני אדנים תחת הקרשׁ האחד׃
Shemot 26:22 ולירכתי המשׁכן ימה תעשׂה שׁשׁה קרשׁים׃
Shemot 26:23 ושׁני קרשׁים תעשׂה למקצעת המשׁכן בירכתים׃
Shemot 26:24 ויהיו תאמם מלמטה ויחדו יהיו תמים על־ראשׁו אל־הטבעת האחת כן יהיה לשׁניהם לשׁני המקצעת יהיו׃
Shemot 26:25 והיו שׁמנה קרשׁים ואדניהם כסף שׁשׁה עשׂר אדנים שׁני אדנים תחת הקרשׁ האחד ושׁני אדנים תחת הקרשׁ האחד׃
Shemot 26:26 ועשׂית בריחם עצי שׁטים חמשׁה לקרשׁי צלע־המשׁכן האחד׃
Shemot 26:27 וחמשׁה בריחם לקרשׁי צלע־המשׁכן השׁנית וחמשׁה בריחם לקרשׁי צלע המשׁכן לירכתים ימה׃
Shemot 26:28 והבריח התיכן בתוך הקרשׁים מברח מן־הקצה אל־הקצה׃
Shemot 26:29 ואת־הקרשׁים תצפה זהב ואת־טבעתיהם תעשׂה זהב בתים לבריחם וצפית את־הבריחם זהב׃
Shemot 26:30 והקמת את־המשׁכן כמשׁפטו אשׁר הראית בהר׃
Shemot 26:31 ועשׂית פרכת תכלת וארגמן ותולעת שׁני ושׁשׁ משׁזר מעשׂה חשׁב יעשׂה אתה כרבים׃
Shemot 26:32 ונתתה אתה על־ארבעה עמודי שׁטים מצפים זהב וויהם זהב על־ארבעה אדני־כסף׃
Shemot 26:33 ונתתה את־הפרכת תחת הקרסים והבאת שׁמה מבית לפרכת את ארון העדות והבדילה הפרכת לכם בין הקדשׁ ובין קדשׁ הקדשׁים׃
Shemot 26:34 ונתת את־הכפרת על ארון העדת בקדשׁ הקדשׁים׃
Shemot 26:35 ושׂמת את־השׁלחן מחוץ לפרכת ואת־המנרה נכח השׁלחן על צלע המשׁכן תימנה והשׁלחן תתן על־צלע צפון׃
Shemot 26:36 ועשׂית מסך לפתח האהל תכלת וארגמן ותולעת שׁני ושׁשׁ משׁזר מעשׂה רקם׃
Shemot 26:37 ועשׂית למסך חמשׁה עמודי שׁטים וצפית אתם זהב וויהם זהב ויצקת להם חמשׁה אדני נחשׁת׃
Shemot 27:1 ועשׂית את־המזבח עצי שׁטים חמשׁ אמות ארך וחמשׁ אמות רחב רבוע יהיה המזבח ושׁלשׁ אמות קמתו׃
Shemot 27:2 ועשׂית קרנתיו על ארבע פנתיו ממנו תהיין קרנתיו וצפית אתו נחשׁת׃
Shemot 27:3 ועשׂית סירתיו לדשׁנו ויעיו ומזרקתיו ומזלגתיו ומחתתיו לכל־כליו תעשׂה נחשׁת׃
Shemot 27:4 ועשׂית לו מכבר מעשׂה רשׁת נחשׁת ועשׂית על־הרשׁת ארבע טבעת נחשׁת על ארבע קצותיו׃
Shemot 27:5 ונתתה אתה תחת כרכב המזבח מלמטה והיתה הרשׁת עד חצי המזבח׃
Shemot 27:6 ועשׂית בדים למזבח בדי עצי שׁטים וצפית אתם נחשׁת׃
Shemot 27:7 והובא את־בדיו בטבעת והיו הבדים על־שׁתי צלעת המזבח בשׂאת אתו׃
Shemot 27:8 נבוב לחת תעשׂה אתו כאשׁר הראה אתך בהר כן יעשׂו׃
Shemot 27:9 ועשׂית את חצר המשׁכן לפאת נגב־תימנה קלעים לחצר שׁשׁ משׁזר מאה באמה ארך לפאה האחת׃
Shemot 27:10 ועמדיו עשׂרים ואדניהם עשׂרים נחשׁת ווי העמדים וחשׁקיהם כסף׃
Shemot 27:11 וכן לפאת צפון בארך קלעים מאה ארך ועמדו עשׂרים ואדניהם עשׂרים נחשׁת ווי העמדים וחשׁקיהם כסף׃
Shemot 27:12 ורחב החצר לפאת־ים קלעים חמשׁים אמה עמדיהם עשׂרה ואדניהם עשׂרה׃
Shemot 27:13 ורחב החצר לפאת קדמה מזרחה חמשׁים אמה׃
Shemot 27:14 וחמשׁ עשׂרה אמה קלעים לכתף עמדיהם שׁלשׁה ואדניהם שׁלשׁה׃
Shemot 27:15 ולכתף השׁנית חמשׁ עשׂרה קלעים עמדיהם שׁלשׁה ואדניהם שׁלשׁה׃
Shemot 27:16 ולשׁער החצר מסך עשׂרים אמה תכלת וארגמן ותולעת שׁני ושׁשׁ משׁזר מעשׂה רקם עמדיהם ארבעה ואדניהם ארבעה׃
Shemot 27:17 כל־עמודי החצר סביב מחשׁקים כסף וויהם כסף ואדניהם נחשׁת׃
Shemot 27:18 ארך החצר מאה באמה ורחב חמשׁים בחמשׁים וקמה חמשׁ אמות שׁשׁ משׁזר ואדניהם נחשׁת׃
Shemot 27:19 לכל כלי המשׁכן בכל עבדתו וכל־יתדתיו וכל־יתדת החצר נחשׁת׃