Ekev (Hebrew)

Dev 7:12 והיה עקב תשׁמעון את המשׁפטים האלה ושׁמרתם ועשׂיתם אתם ושׁמר יהוה אלהיך לך את־הברית ואת־החסד אשׁר נשׁבע לאבתיך׃
Dev 7:13 ואהבך וברכך והרבך וברך פרי־בטנך ופרי־אדמתך דגנך ותירשׁך ויצהרך שׁגר־אלפיך ועשׁתרת צאנך על האדמה אשׁר־נשׁבע לאבתיך לתת לך׃
Dev 7:14 ברוך תהיה מכל־העמים לא־יהיה בך עקר ועקרה ובבהמתך׃
Dev 7:15 והסיר יהוה ממך כל־חלי וכל־מדוי מצרים הרעים אשׁר ידעת לא ישׂימם בך ונתנם בכל־שׂנאיך׃
Dev 7:16 ואכלת את־כל־העמים אשׁר יהוה אלהיך נתן לך לא־תחוס עינך עליהם ולא תעבד את־אלהיהם כי־מוקשׁ הוא לך׃
Dev 7:17 כי תאמר בלבבך רבים הגוים האלה ממני איכה אוכל להורישׁם׃
Dev 7:18 לא תירא מהם זכר תזכר את אשׁר־עשׂה יהוה אלהיך לפרעה ולכל־מצרים׃
Dev 7:19 המסת הגדלת אשׁר־ראו עיניך והאתת והמפתים והיד החזקה והזרע הנטויה אשׁר הוצאך יהוה אלהיך כן־יעשׂה יהוה אלהיך לכל־העמים אשׁר־אתה ירא מפניהם׃
Dev 7:20 וגם את־הצרעה ישׁלח יהוה אלהיך בם עד־אבד הנשׁארים והנסתרים מפניך׃
Dev 7:21 לא תערץ מפניהם כי־יהוה אלהיך בקרבך אל גדול ונורא׃
Dev 7:22 ונשׁל יהוה אלהיך את־הגוים האל מפניך מעט מעט לא תוכל כלתם מהר פן־תרבה עליך חית השׂדה׃
Dev 7:23 ונתנם יהוה אלהיך לפניך והמם מהומה גדלה עד השׁמדם׃
Dev 7:24 ונתן מלכיהם בידך והאבדת את־שׁמם מתחת השׁמים לא־יתיצב אישׁ בפניך עד השׁמדך אתם׃
Dev 7:25 פסילי אלהיהם תשׂרפון באשׁ לא־תחמד כסף וזהב עליהם ולקחת לך פן תוקשׁ בו כי תועבת יהוה אלהיך הוא׃
Dev 7:26 ולא־תביא תועבה אל־ביתך והיית חרם כמהו שׁקץ תשׁקצנו ותעב תתעבנו כי־חרם הוא׃
Dev 8:1 כל־המצוה אשׁר אנכי מצוך היום תשׁמרון לעשׂות למען תחיון ורביתם ובאתם וירשׁתם את־הארץ אשׁר־נשׁבע יהוה לאבתיכם׃
Dev 8:2 וזכרת את־כל־הדרך אשׁר הוליכך יהוה אלהיך זה ארבעים שׁנה במדבר למען ענתך לנסתך לדעת את־אשׁר בלבבך התשׁמר מצותו אם־לא׃
Dev 8:3 ויענך וירעבך ויאכלך את־המן אשׁר לא־ידעת ולא ידעון אבתיך למען הודיעך כי לא על־הלחם לבדו יחיה האדם כי על־כל־מוצא פי־יהוה יחיה האדם׃
Dev 8:4 שׂמלתך לא בלתה מעליך ורגלך לא בצקה זה ארבעים שׁנה׃
Dev 8:5 וידעת עם־לבבך כי כאשׁר ייסר אישׁ את־בנו יהוה אלהיך מיסרך׃
Dev 8:6 ושׁמרת את־מצות יהוה אלהיך ללכת בדרכיו וליראה אתו׃
Dev 8:7 כי יהוה אלהיך מביאך אל־ארץ טובה ארץ נחלי מים עינת ותהמת יצאים בבקעה ובהר׃
Dev 8:8 ארץ חטה ושׂערה וגפן ותאנה ורמון ארץ־זית שׁמן ודבשׁ׃
Dev 8:9 ארץ אשׁר לא במסכנת תאכל־בה לחם לא־תחסר כל בה ארץ אשׁר אבניה ברזל ומהרריה תחצב נחשׁת׃
Dev 8:10 ואכלת ושׂבעת וברכת את־יהוה אלהיך על־הארץ הטבה אשׁר נתן־לך׃
Dev 8:11 השׁמר לך פן־תשׁכח את־יהוה אלהיך לבלתי שׁמר מצותיו ומשׁפטיו וחקתיו אשׁר אנכי מצוך היום׃
Dev 8:12 פן־תאכל ושׂבעת ובתים טבים תבנה וישׁבת׃
Dev 8:13 ובקרך וצאנך ירבין וכסף וזהב ירבה־לך וכל אשׁר־לך ירבה׃
Dev 8:14 ורם לבבך ושׁכחת את־יהוה אלהיך המוציאך מארץ מצרים מבית עבדים׃
Dev 8:15 המוליכך במדבר הגדל והנורא נחשׁ שׂרף ועקרב וצמאון אשׁר אין־מים המוציא לך מים מצור החלמישׁ׃
Dev 8:16 המאכלך מן במדבר אשׁר לא־ידעון אבתיך למען ענתך ולמען נסתך להיטבך באחריתך׃
Dev 8:17 ואמרת בלבבך כחי ועצם ידי עשׂה לי את־החיל הזה׃
Dev 8:18 וזכרת את־יהוה אלהיך כי הוא הנתן לך כח לעשׂות חיל למען הקים את־בריתו אשׁר־נשׁבע לאבתיך כיום הזה׃
Dev 8:19 והיה אם־שׁכח תשׁכח את־יהוה אלהיך והלכת אחרי אלהים אחרים ועבדתם והשׁתחוית להם העדתי בכם היום כי אבד תאבדון׃
Dev 8:20 כגוים אשׁר יהוה מאביד מפניכם כן תאבדון עקב לא תשׁמעון בקול יהוה אלהיכם׃
Dev 9:1 שׁמע ישׂראל אתה עבר היום את־הירדן לבא לרשׁת גוים גדלים ועצמים ממך ערים גדלת ובצרת בשׁמים׃
Dev 9:2 עם־גדול ורם בני ענקים אשׁר אתה ידעת ואתה שׁמעת מי יתיצב לפני בני ענק׃
Dev 9:3 וידעת היום כי יהוה אלהיך הוא־העבר לפניך אשׁ אכלה הוא ישׁמידם והוא יכניעם לפניך והורשׁתם והאבדתם מהר כאשׁר דבר יהוה לך׃
Dev 9:4 אל־תאמר בלבבך בהדף יהוה אלהיך אתם מלפניך לאמר בצדקתי הביאני יהוה לרשׁת את־הארץ הזאת וברשׁעת הגוים האלה יהוה מורישׁם מפניך׃
Dev 9:5 לא בצדקתך ובישׁר לבבך אתה בא לרשׁת את־ארצם כי ברשׁעת הגוים האלה יהוה אלהיך מורישׁם מפניך ולמען הקים את־הדבר אשׁר נשׁבע יהוה לאבתיך לאברהם ליצחק וליעקב׃
Dev 9:6 וידעת כי לא בצדקתך יהוה אלהיך נתן לך את־הארץ הטובה הזאת לרשׁתה כי עם־קשׁה־ערף אתה׃
Dev 9:7 זכר אל־תשׁכח את אשׁר־הקצפת את־יהוה אלהיך במדבר למן־היום אשׁר־יצאת מארץ מצרים עד־באכם עד־המקום הזה ממרים הייתם עם־יהוה׃
Dev 9:8 ובחרב הקצפתם את־יהוה ויתאנף יהוה בכם להשׁמיד אתכם׃
Dev 9:9 בעלתי ההרה לקחת לוחת האבנים לוחת הברית אשׁר־כרת יהוה עמכם ואשׁב בהר ארבעים יום וארבעים לילה לחם לא אכלתי ומים לא שׁתיתי׃
Dev 9:10 ויתן יהוה אלי את־שׁני לוחת האבנים כתבים באצבע אלהים ועליהם ככל־הדברים אשׁר דבר יהוה עמכם בהר מתוך האשׁ ביום הקהל׃
Dev 9:11 ויהי מקץ ארבעים יום וארבעים לילה נתן יהוה אלי את־שׁני לחת האבנים לחות הברית׃
Dev 9:12 ויאמר יהוה אלי קום רד מהר מזה כי שׁחת עמך אשׁר הוצאת ממצרים סרו מהר מן־הדרך אשׁר צויתם עשׂו להם מסכה׃
Dev 9:13 ויאמר יהוה אלי לאמר ראיתי את־העם הזה והנה עם־קשׁה־ערף הוא׃
Dev 9:14 הרף ממני ואשׁמידם ואמחה את־שׁמם מתחת השׁמים ואעשׂה אותך לגוי־עצום ורב ממנו׃
Dev 9:15 ואפן וארד מן־ההר וההר בער באשׁ ושׁני לוחת הברית על שׁתי ידי׃
Dev 9:16 וארא והנה חטאתם ליהוה אלהיכם עשׂיתם לכם עגל מסכה סרתם מהר מן־הדרך אשׁר־צוה יהוה אתכם׃
Dev 9:17 ואתפשׂ בשׁני הלחת ואשׁלכם מעל שׁתי ידי ואשׁברם לעיניכם׃
Dev 9:18 ואתנפל לפני יהוה כראשׁנה ארבעים יום וארבעים לילה לחם לא אכלתי ומים לא שׁתיתי על כל־חטאתכם אשׁר חטאתם לעשׂות הרע בעיני יהוה להכעיסו׃
Dev 9:19 כי יגרתי מפני האף והחמה אשׁר קצף יהוה עליכם להשׁמיד אתכם וישׁמע יהוה אלי גם בפעם ההוא׃
Dev 9:20 ובאהרן התאנף יהוה מאד להשׁמידו ואתפלל גם־בעד אהרן בעת ההוא׃
Dev 9:21 ואת־חטאתכם אשׁר־עשׂיתם את־העגל לקחתי ואשׂרף אתו באשׁ ואכת אתו טחון היטב עד אשׁר־דק לעפר ואשׁלך את־עפרו אל־הנחל הירד מן־ההר׃
Dev 9:22 ובתבערה ובמסה ובקברת התאוה מקצפים הייתם את־יהוה׃
Dev 9:23 ובשׁלח יהוה אתכם מקדשׁ ברנע לאמר עלו ורשׁו את־הארץ אשׁר נתתי לכם ותמרו את־פי יהוה אלהיכם ולא האמנתם לו ולא שׁמעתם בקלו׃
Dev 9:24 ממרים הייתם עם־יהוה מיום דעתי אתכם׃
Dev 9:25 ואתנפל לפני יהוה את ארבעים היום ואת־ארבעים הלילה אשׁר התנפלתי כי־אמר יהוה להשׁמיד אתכם׃
Dev 9:26 ואתפלל אל־יהוה ואמר אדני יהוה אל־תשׁחת עמך ונחלתך אשׁר פדית בגדלך אשׁר־הוצאת ממצרים ביד חזקה׃
Dev 9:27 זכר לעבדיך לאברהם ליצחק וליעקב אל־תפן אל־קשׁי העם הזה ואל־רשׁעו ואל־חטאתו׃
Dev 9:28 פן־יאמרו הארץ אשׁר הוצאתנו משׁם מבלי יכלת יהוה להביאם אל־הארץ אשׁר־דבר להם ומשׂנאתו אותם הוציאם להמתם במדבר׃
Dev 9:29 והם עמך ונחלתך אשׁר הוצאת בכחך הגדל ובזרעך הנטויה׃
Dev 10:1 בעת ההוא אמר יהוה אלי פסל־לך שׁני־לוחת אבנים כראשׁנים ועלה אלי ההרה ועשׂית לך ארון עץ׃
Dev 10:2 ואכתב על־הלחת את־הדברים אשׁר היו על־הלחת הראשׁנים אשׁר שׁברת ושׂמתם בארון׃
Dev 10:3 ואעשׂ ארון עצי שׁטים ואפסל שׁני־לחת אבנים כראשׁנים ואעל ההרה ושׁני הלחת בידי׃
Dev 10:4 ויכתב על־הלחת כמכתב הראשׁון את עשׂרת הדברים אשׁר דבר יהוה אליכם בהר מתוך האשׁ ביום הקהל ויתנם יהוה אלי׃
Dev 10:5 ואפן וארד מן־ההר ואשׂם את־הלחת בארון אשׁר עשׂיתי ויהיו שׁם כאשׁר צוני יהוה׃
Dev 10:6 ובני ישׂראל נסעו מבארת בני־יעקן מוסרה שׁם מת אהרן ויקבר שׁם ויכהן אלעזר בנו תחתיו׃
Dev 10:7 משׁם נסעו הגדגדה ומן־הגדגדה יטבתה ארץ נחלי מים׃
Dev 10:8 בעת ההוא הבדיל יהוה את־שׁבט הלוי לשׂאת את־ארון ברית־יהוה לעמד לפני יהוה לשׁרתו ולברך בשׁמו עד היום הזה׃
Dev 10:9 על־כן לא־היה ללוי חלק ונחלה עם־אחיו יהוה הוא נחלתו כאשׁר דבר יהוה אלהיך לו׃
Dev 10:10 ואנכי עמדתי בהר כימים הראשׁנים ארבעים יום וארבעים לילה וישׁמע יהוה אלי גם בפעם ההוא לא־אבה יהוה השׁחיתך׃
Dev 10:11 ויאמר יהוה אלי קום לך למסע לפני העם ויבאו ויירשׁו את־הארץ אשׁר־נשׁבעתי לאבתם לתת להם׃
Dev 10:12 ועתה ישׂראל מה יהוה אלהיך שׁאל מעמך כי אם־ליראה את־יהוה אלהיך ללכת בכל־דרכיו ולאהבה אתו ולעבד את־יהוה אלהיך בכל־לבבך ובכל־נפשׁך׃
Dev 10:13 לשׁמר את־מצות יהוה ואת־חקתיו אשׁר אנכי מצוך היום לטוב לך׃
Dev 10:14 הן ליהוה אלהיך השׁמים ושׁמי השׁמים הארץ וכל־אשׁר־בה׃
Dev 10:15 רק באבתיך חשׁק יהוה לאהבה אותם ויבחר בזרעם אחריהם בכם מכל־העמים כיום הזה׃
Dev 10:16 ומלתם את ערלת לבבכם וערפכם לא תקשׁו עוד׃
Dev 10:17 כי יהוה אלהיכם הוא אלהי האלהים ואדני האדנים האל הגדל הגבר והנורא אשׁר לא־ישׂא פנים ולא יקח שׁחד׃
Dev 10:18 עשׂה משׁפט יתום ואלמנה ואהב גר לתת לו לחם ושׂמלה׃
Dev 10:19 ואהבתם את־הגר כי־גרים הייתם בארץ מצרים׃
Dev 10:20 את־יהוה אלהיך תירא אתו תעבד ובו תדבק ובשׁמו תשׁבע׃
Dev 10:21 הוא תהלתך והוא אלהיך אשׁר־עשׂה אתך את־הגדלת ואת־הנוראת האלה אשׁר ראו עיניך׃
Dev 10:22 בשׁבעים נפשׁ ירדו אבתיך מצרימה ועתה שׂמך יהוה אלהיך ככוכבי השׁמים לרב׃
Dev 11:1 ואהבת את יהוה אלהיך ושׁמרת משׁמרתו וחקתיו ומשׁפטיו ומצותיו כל־הימים׃
Dev 11:2 וידעתם היום כי לא את־בניכם אשׁר לא־ידעו ואשׁר לא־ראו את־מוסר יהוה אלהיכם את־גדלו את־ידו החזקה וזרעו הנטויה׃
Dev 11:3 ואת־אתתיו ואת־מעשׂיו אשׁר עשׂה בתוך מצרים לפרעה מלך־מצרים ולכל־ארצו׃
Dev 11:4 ואשׁר עשׂה לחיל מצרים לסוסיו ולרכבו אשׁר הציף את־מי ים־סוף על־פניהם ברדפם אחריכם ויאבדם יהוה עד היום הזה׃
Dev 11:5 ואשׁר עשׂה לכם במדבר עד־באכם עד־המקום הזה׃
Dev 11:6 ואשׁר עשׂה לדתן ולאבירם בני אליאב בן־ראובן אשׁר פצתה הארץ את־פיה ותבלעם ואת־בתיהם ואת־אהליהם ואת כל־היקום אשׁר ברגליהם בקרב כל־ישׂראל׃
Dev 11:7 כי עיניכם הראת את־כל־מעשׂה יהוה הגדל אשׁר עשׂה׃
Dev 11:8 ושׁמרתם את־כל־המצוה אשׁר אנכי מצוך היום למען תחזקו ובאתם וירשׁתם את־הארץ אשׁר אתם עברים שׁמה לרשׁתה׃
Dev 11:9 ולמען תאריכו ימים על־האדמה אשׁר נשׁבע יהוה לאבתיכם לתת להם ולזרעם ארץ זבת חלב ודבשׁ׃
Dev 11:10 כי הארץ אשׁר אתה בא־שׁמה לרשׁתה לא כארץ מצרים הוא אשׁר יצאתם משׁם אשׁר תזרע את־זרעך והשׁקית ברגלך כגן הירק׃
Dev 11:11 והארץ אשׁר אתם עברים שׁמה לרשׁתה ארץ הרים ובקעת למטר השׁמים תשׁתה־מים׃
Dev 11:12 ארץ אשׁר־יהוה אלהיך דרשׁ אתה תמיד עיני יהוה אלהיך בה מרשׁית השׁנה ועד אחרית שׁנה׃
Dev 11:13 והיה אם־שׁמע תשׁמעו אל־מצותי אשׁר אנכי מצוה אתכם היום לאהבה את־יהוה אלהיכם ולעבדו בכל־לבבכם ובכל־נפשׁכם׃
Dev 11:14 ונתתי מטר־ארצכם בעתו יורה ומלקושׁ ואספת דגנך ותירשׁך ויצהרך׃
Dev 11:15 ונתתי עשׂב בשׂדך לבהמתך ואכלת ושׂבעת׃
Dev 11:16 השׁמרו לכם פן יפתה לבבכם וסרתם ועבדתם אלהים אחרים והשׁתחויתם להם׃
Dev 11:17 וחרה אף־יהוה בכם ועצר את־השׁמים ולא־יהיה מטר והאדמה לא תתן את־יבולה ואבדתם מהרה מעל הארץ הטבה אשׁר יהוה נתן לכם׃
Dev 11:18 ושׂמתם את־דברי אלה על־לבבכם ועל־נפשׁכם וקשׁרתם אתם לאות על־ידכם והיו לטוטפת בין עיניכם׃
Dev 11:19 ולמדתם אתם את־בניכם לדבר בם בשׁבתך בביתך ובלכתך בדרך ובשׁכבך ובקומך׃
Dev 11:20 וכתבתם על־מזוזות ביתך ובשׁעריך׃
Dev 11:21 למען ירבו ימיכם וימי בניכם על האדמה אשׁר נשׁבע יהוה לאבתיכם לתת להם כימי השׁמים על־הארץ׃
Dev 11:22 כי אם־שׁמר תשׁמרון את־כל־המצוה הזאת אשׁר אנכי מצוה אתכם לעשׂתה לאהבה את־יהוה אלהיכם ללכת בכל־דרכיו ולדבקה־בו׃
Dev 11:23 והורישׁ יהוה את־כל־הגוים האלה מלפניכם וירשׁתם גוים גדלים ועצמים מכם׃
Dev 11:24 כל־המקום אשׁר תדרך כף־רגלכם בו לכם יהיה מן־המדבר והלבנון מן־הנהר נהר־פרת ועד הים האחרון יהיה גבלכם׃
Dev 11:25 לא־יתיצב אישׁ בפניכם פחדכם ומוראכם יתן יהוה אלהיכם על־פני כל־הארץ אשׁר תדרכו־בה כאשׁר דבר לכם׃