Va'era Haftarah 2 (Hebrew)

Yeshayahu 66:1-24

Yes 66:1 כה אמר יהוה השׁמים כסאי והארץ הדם רגלי אי־זה בית אשׁר תבנו־לי ואי־זה מקום מנוחתי׃
Yes 66:2 ואת־כל־אלה ידי עשׂתה ויהיו כל־אלה נאם־יהוה ואל־זה אביט אל־עני ונכה־רוח וחרד על־דברי׃
Yes 66:3 שׁוחט השׁור מכה־אישׁ זובח השׂה ערף כלב מעלה מנחה דם־חזיר מזכיר לבנה מברך און גם־המה בחרו בדרכיהם ובשׁקוציהם נפשׁם חפצה׃
Yes 66:4 גם־אני אבחר בתעלליהם ומגורתם אביא להם יען קראתי ואין עונה דברתי ולא שׁמעו ויעשׂו הרע בעיני ובאשׁר לא־חפצתי בחרו׃
Yes 66:5 שׁמעו דבר־יהוה החרדים אל־דברו אמרו אחיכם שׂנאיכם מנדיכם למען שׁמי יכבד יהוה ונראה בשׂמחתכם והם יבשׁו׃
Yes 66:6 קול שׁאון מעיר קול מהיכל קול יהוה משׁלם גמול לאיביו׃
Yes 66:7 בטרם תחיל ילדה בטרם יבוא חבל לה והמליטה זכר׃
Yes 66:8 מי־שׁמע כזאת מי ראה כאלה היוחל ארץ ביום אחד אם־יולד גוי פעם אחת כי־חלה גם־ילדה ציון את־בניה׃
Yes 66:9 האני אשׁביר ולא אוליד יאמר יהוה אם־אני המוליד ועצרתי אמר אלהיך׃
Yes 66:10 שׂמחו את־ירושׁלם וגילו בה כל־אהביה שׂישׂו אתה משׂושׂ כל־המתאבלים עליה׃
Yes 66:11 למען תינקו ושׂבעתם משׁד תנחמיה למען תמצו והתענגתם מזיז כבודה׃
Yes 66:12 כי־כה אמר יהוה הנני נטה־אליה כנהר שׁלום וכנחל שׁוטף כבוד גוים וינקתם על־צד תנשׂאו ועל־ברכים תשׁעשׁעו׃
Yes 66:13 כאישׁ אשׁר אמו תנחמנו כן אנכי אנחמכם ובירושׁלם תנחמו׃
Yes 66:14 וראיתם ושׂשׂ לבכם ועצמותיכם כדשׁא תפרחנה ונודעה יד־יהוה את־עבדיו וזעם את־איביו׃
Yes 66:15 כי־הנה יהוה באשׁ יבוא וכסופה מרכבתיו להשׁיב בחמה אפו וגערתו בלהבי־אשׁ׃
Yes 66:16 כי באשׁ יהוה נשׁפט ובחרבו את־כל־בשׂר ורבו חללי יהוה׃
Yes 66:17 המתקדשׁים והמטהרים אל־הגנות אחר אחד בתוך אכלי בשׂר החזיר והשׁקץ והעכבר יחדו יספו נאם־יהוה׃
Yes 66:18 ואנכי מעשׂיהם ומחשׁבתיהם באה לקבץ את־כל־הגוים והלשׁנות ובאו וראו את־כבודי׃
Yes 66:19 ושׂמתי בהם אות ושׁלחתי מהם פליטים אל־הגוים תרשׁישׁ פול ולוד משׁכי קשׁת תבל ויון האיים הרחקים אשׁר לא־שׁמעו את־שׁמעי ולא־ראו את־כבודי והגידו את־כבודי בגוים׃
Yes 66:20 והביאו את־כל־אחיכם מכל־הגוים מנחה ליהוה בסוסים וברכב ובצבים ובפרדים ובכרכרות על הר קדשׁי ירושׁלם אמר יהוה כאשׁר יביאו בני ישׂראל את־המנחה בכלי טהור בית יהוה׃
Yes 66:21 וגם־מהם אקח לכהנים ללוים אמר יהוה׃
Yes 66:22 כי כאשׁר השׁמים החדשׁים והארץ החדשׁה אשׁר אני עשׂה עמדים לפני נאם־יהוה כן יעמד זרעכם ושׁמכם׃
Yes 66:23 והיה מדי־חדשׁ בחדשׁו ומדי שׁבת בשׁבתו יבוא כל־בשׂר להשׁתחות לפני אמר יהוה׃
Yes 66:24 ויצאו וראו בפגרי האנשׁים הפשׁעים בי כי תולעתם לא תמות ואשׁם לא תכבה והיו דראון לכל־בשׂר׃

Shemot Gospel (Hebrew)

Mark 1-2

Mar 1:1 תחלת בשורת ישוע המשיח בן־האלהים׃
Mar 1:2 ככתוב בנביאים הנני שלח מלאכי לפניך ופנה דרכך׃
Mar 1:3 קול קורא במדבר פנו דרך יהוה ישרו מסלותיו׃
Mar 1:4 יוחנן היה טבל במדבר וקורא טבילת התשובה לסליחת חטאים׃
Mar 1:5 ותצא אליו כל־ארץ יהודה ובני ירושלים ויטבלו כלם על־ידו בנהר הירדן מתודים את־חטאתם׃
Mar 1:6 ויוחנן לבוש שער גמלים ואזור עור במתניו ומאכלו חגבים ודבש היער׃
Mar 1:7 ויקרא לאמר בוא יבא אחרי החזק ממני אשר קטנתי מלכרע להתיר את־שרוך נעליו׃
Mar 1:8 אנכי טבלתי אתכם במים והוא יטבל אתכם ברוח הקדש׃
Mar 1:9 ויהי בימים ההם ויבא ישוע מנצרת אשר בגליל ויטבל על־ידי יוחנן בירדן׃
Mar 1:10 ויהי אך־עלה עלה מן־המים וירא השמים והנה נפתחו והרוח כיונה ירדת עליו׃
Mar 1:11 ויהי קול מן־השמים אתה בני ידידי אשר רציתי־בו׃
Mar 1:12 ומהר הוציאו הרוח המדברה׃
Mar 1:13 ויהי שם במדבר ארבעים יום והשטן נסהו ויהי עם־החיות והמלאכים שרתוהו׃
Mar 1:14 ואחרי אשר הסגר יוחנן בא ישוע הגלילה ויקרא את־בשורת מלכות האלהים ויאמר׃
Mar 1:15 מלאה העת וקרבה מלכות האלהים שובו והאמינו בבשורה׃
Mar 1:16 ויהי בהתהלכו על־יד ים־הגליל וירא והנה שמעון ואנדרי אחי שמעון פרשים מצודה בים כי דיגים היו׃
Mar 1:17 ויאמר אליהם ישוע לכו אחרי ואתנכם דיגי אנשים׃
Mar 1:18 ויעזבו מהר את־מכמרתיהם וילכו אחריו׃
Mar 1:19 ויהי כעברו מעט משם וירא את־יעקב בן־זבדי ואת־יוחנן אחיו וגם־המה באניה ומתקנים את־המכמרות׃
Mar 1:20 וימהר ויקרא אליהם ויעזבו את־זבדי אביהם באניה עם־השכירים וילכו אחריו׃
Mar 1:21 ויבאו אל־כפר נחום וימהר לבוא בשבת לבית הכנסת וילמד׃
Mar 1:22 וישתוממו על־תורתו כי־היה מלמדם כאיש שלטון ולא כספרים׃
Mar 1:23 ואיש היה שם בבית הכנסת שלהם אשר־רוח טמאה בו ויזעק לאמר׃
Mar 1:24 אהה מה־לנו ולך ישוע הנצרי להאבידנו באת ידעתיך מי אתה קדוש האלהים׃
Mar 1:25 ויגער־בו ישוע לאמר האלם וצא ממנו׃
Mar 1:26 ויסחבהו רוח הטמאה ויזעק בקול גדול ויצא ממנו׃
Mar 1:27 ויבהלו כלם וישאלו איש את־רעהו לאמר מה־זאת מה־היא התורה החדשה אשר אף־לרוחות הטמאה מצוה הוא בגבורה והנה שמעות לו׃
Mar 1:28 ויצא שמעו מהר בכל־סביבות ארץ הגליל׃
Mar 1:29 ויהי אחרי צאתם מבית הכנסת ויבאו ביתה שמעון ואנדרי עם יעקב ויוחנן׃
Mar 1:30 וחותנת שמעון שכבה אחוזת הקדחת וימהרו וידברו אליו עליה׃
Mar 1:31 ויגש ויאחז בידה ויקימה ותרף ממנה הקדחת פתאם ותשרת אותם׃
Mar 1:32 ויהי בערב כבוא השמש ויביאו אליו את כל־החולים ואת אחוזי השדים׃
Mar 1:33 וכל־העיר נאספו יחדו פתח הבית׃
Mar 1:34 וירפא רבים אשר היו חולים חליים שונים ויגרש שדים הרבה ולא־נתן את־השדים לדבר כי ידעהו׃
Mar 1:35 וישכם בבקר בעוד נשף ויצא וילך אל־מקום חרבה ויתפלל שם׃
Mar 1:36 וירדפו אחריו שמעון והאנשים אשר אתו׃
Mar 1:37 וימצאהו ויאמרו אליו הנה כלם מבקשים אותך׃
Mar 1:38 ויאמר אליהם לכו ונלכה אל־ערי הפרזות הקרבות ואקרא גם־שם כי בעבור־זאת יצאתי׃
Mar 1:39 ויהי קרא בכנסיותיהם בכל־הגליל ויגרש את־השדים׃
Mar 1:40 ויבוא אליו איש מצרע ויתחנן אליו ויכרע על־ברכיו ויאמר לו אם־תרצה תוכל לטהרני׃
Mar 1:41 וירחם עליו ישוע וישלח ידו ויגע־בו ויאמר רצה אנכי טהר׃
Mar 1:42 עודנו מדבר והצרעת סרה ממנו ויטהר׃
Mar 1:43 ויגער־בו וימהר להוציאו החוצה׃
Mar 1:44 ויאמר אליו ראה אל־תגיד לאיש דבר ולך הראה אל־הכהן והקרב לטהרתך את אשר־צוה משה לעדות להם׃
Mar 1:45 והוא יצא ויחל לקרא הרבה ולהשמיע הדבר עד אשר לא־יכל לבוא עוד אל־עיר לעיני העם וישב מחוץ לעיר במקמות חרבה ויבאו אליו מכל־עבריו מסביב׃
Mar 2:1 ויהי מימים ויבא שנית אל־כפר נחום וישמעו כי־הוא בבית׃
Mar 2:2 ויאספו רבים מהרה עד־אפס מקום לעמד אף־לפני הפתח וידבר אליהם את־הדבר׃
Mar 2:3 ויבאו אליו אנשים נשאים איש נכה אברים וישאהו בארבעה׃
Mar 2:4 ולא יכלו לגשת אליו מפני העם ויסירו את־הגג במקום אשר היה שם ויחתרו חתירה ויורידו את־המשכב אשר שכב עליה נכה האברים׃
Mar 2:5 ויהי כראות ישוע את־אמונתם ויאמר אל־נכה האברים בני נסלחו־לך חטאתיך׃
Mar 2:6 ושם אנשים מן־הסופרים ישבים ויאמרו בלבם׃
Mar 2:7 מה־לזה כי ידבר גדופים כאלה מי יכל לסלח לחטאים כי אם האלהים לבדו׃
Mar 2:8 וידע ישוע ברוחו כי־כן חשבים בלבבם ויאמר אליהם מדוע תחשבו כאלה בלבבכם׃
Mar 2:9 מה הנקל האמר אל־נכה האברים נסלחו־לך חטאתיך אם־אמור קום שא את משכבך והתהלך׃
Mar 2:10 ולמען תדעון כי בן־האדם יש־לו השלטן לסלח לחטאים בארץ ויאמר אל־נכה האברים׃
Mar 2:11 לך אני אמר קום שא את־משכבך ולך אל־ביתך׃
Mar 2:12 ויקם פתאם וישא את־משכבו ויצא לעיני כלם עד כי־תמהו כלם וישבחו את־האלהים לאמר מעולם לא־ראינו כזאת׃
Mar 2:13 וישב ויצא אל־יד הים ויבאו אליו כל־העם וילמדם׃
Mar 2:14 ויהי בעברו וירא את־לוי בן־חלפי ישב בבית המכס ויאמר אליו לכה אחרי ויקם וילך אחריו׃
Mar 2:15 ויהי כאשר הסב בביתו ויסבו מוכסים וחטאים רבים עם־ישוע ועם־תלמידיו כי רבים היו ההלכים אחריו׃
Mar 2:16 והסופרים והפרושים ראו אתו אכל עם־המוכסים והחטאים ויאמרו אל־תלמידיו מה־לרבכם כי אכל ושתה הוא עם־המוכסים והחטאים׃
Mar 2:17 וישמע ישוע ויאמר החזקים אינם צריכים לרפא כי אם־החלים לא באתי לקרא הצדיקים כי אם־החטאים (לתשובה)׃
Mar 2:18 ותלמידי יוחנן ותלמידי הפרושים היו מרבים לצום ויבאו ויאמרו אליו מדוע תלמידי יוחנן ותלמידי הפרושים צמים ותלמידיך אינם צמים׃
Mar 2:19 ויאמר אליהם ישוע איך יוכלו בני החפה לצום בעוד החתן עמהם כל־ימי היות החתן עמהם לא יוכלו לצום׃
Mar 2:20 הנה ימים באים ולקח מאתם החתן ואז יצומו בימים ההם׃
Mar 2:21 אין־אדם תפר טלאי בד חדש על־שמלה בלה כי אם־כן ינתק מלויו החדש מן־הבלה ויתרחב הקרע׃
Mar 2:22 ואין אדם נתן יין חדש בנאדות בלים כי אם־כן יבקע היין החדש את־הנאדות והיין ישפך והנאדות יאבדו אבל יין חדש ינתן בנאדות חדשים׃
Mar 2:23 ויהי כעברו בשבת בין השדות ויחלו תלמידיו לקטף מלילת בלכתם׃
Mar 2:24 ויאמרו אליו הפרושים ראה מה־המה עשים בשבת את אשר־לא יעשה׃
Mar 2:25 ויאמר אליהם הכי לא קראתם את־אשר עשה דוד בהיתו חסר ורעב הוא ואנשיו׃
Mar 2:26 אשר בא אל־בית אלהים בימי אביתר הכהן הגדול ויאכל את־לחם הפנים אשר לא נתן לאכלה כי אם־לכהנים ויתן גם־לאנשים אשר אתו׃
Mar 2:27 ויאמר אליהם השבת נתנה בעבור האדם ולא האדם בעבור השבת׃
Mar 2:28 לכן אדון בן־האדם גם לשבת׃

Shemot Haftarah (Hebrew)

Yeshayahu 27:6-28:13, 29:22-23

Yes 27:6 הבאים ישׁרשׁ יעקב יציץ ופרח ישׂראל ומלאו פני־תבל תנובה׃
Yes 27:7 הכמכת מכהו הכהו אם־כהרג הרגיו הרג׃
Yes 27:8 בסאסאה בשׁלחה תריבנה הגה ברוחו הקשׁה ביום קדים׃
Yes 27:9 לכן בזאת יכפר עון־יעקב וזה כל־פרי הסר חטאתו בשׂומו כל־אבני מזבח כאבני־גר מנפצות לא־יקמו אשׁרים וחמנים׃
Yes 27:10 כי עיר בצורה בדד נוה משׁלח ונעזב כמדבר שׁם ירעה עגל ושׁם ירבץ וכלה סעפיה׃
Yes 27:11 ביבשׁ קצירה תשׁברנה נשׁים באות מאירות אותה כי לא עם־בינות הוא על־כן לא־ירחמנו עשׂהו ויצרו לא יחננו׃
Yes 27:12 והיה ביום ההוא יחבט יהוה משׁבלת הנהר עד־נחל מצרים ואתם תלקטו לאחד אחד בני ישׂראל׃
Yes 27:13 והיה ביום ההוא יתקע בשׁופר גדול ובאו האבדים בארץ אשׁור והנדחים בארץ מצרים והשׁתחוו ליהוה בהר הקדשׁ בירושׁלם׃
Yes 28:1 הוי עטרת גאות שׁכרי אפרים וציץ נבל צבי תפארתו אשׁר על־ראשׁ גיא־שׁמנים הלומי יין׃
Yes 28:2 הנה חזק ואמץ לאדני כזרם ברד שׂער קטב כזרם מים כבירים שׁטפים הניח לארץ ביד׃
Yes 28:3 ברגלים תרמסנה עטרת גאות שׁכורי אפרים׃
Yes 28:4 והיתה ציצת נבל צבי תפארתו אשׁר על־ראשׁ גיא שׁמנים כבכורה בטרם קיץ אשׁר יראה הראה אותה בעודה בכפו יבלענה׃
Yes 28:5 ביום ההוא יהיה יהוה צבאות לעטרת צבי ולצפירת תפארה לשׁאר עמו׃
Yes 28:6 ולרוח משׁפט ליושׁב על־המשׁפט ולגבורה משׁיבי מלחמה שׁערה׃
Yes 28:7 וגם־אלה ביין שׁגו ובשׁכר תעו כהן ונביא שׁגו בשׁכר נבלעו מן־היין תעו מן־השׁכר שׁגו בראה פקו פליליה׃
Yes 28:8 כי כל־שׁלחנות מלאו קיא צאה בלי מקום׃
Yes 28:9 את־מי יורה דעה ואת־מי יבין שׁמועה גמולי מחלב עתיקי משׁדים׃
Yes 28:10 כי צו לצו צו לצו קו לקו קו לקו זעיר שׁם זעיר שׁם׃
Yes 28:11 כי בלעגי שׂפה ובלשׁון אחרת ידבר אל־העם הזה׃
Yes 28:12 אשׁר אמר אליהם זאת המנוחה הניחו לעיף וזאת המרגעה ולא אבוא שׁמוע׃
Yes 28:13 והיה להם דבר־יהוה צו לצו צו לצו קו לקו קו לקו זעיר שׁם זעיר שׁם למען ילכו וכשׁלו אחור ונשׁברו ונוקשׁו ונלכדו׃
Yes 29:22 לכן כה־אמר יהוה אל־בית יעקב אשׁר פדה את־אברהם לא־עתה יבושׁ יעקב ולא עתה פניו יחורו׃
Yes 29:23 כי בראתו ילדיו מעשׂה ידי בקרבו יקדישׁו שׁמי והקדישׁו את־קדושׁ יעקב ואת־אלהי ישׂראל יעריצו׃

Shemot (Hebrew)

Shemot 1:1-6:1

Exo 1:1 ואלה שׁמות בני ישׂראל הבאים מצרימה את יעקב אישׁ וביתו באו׃
Exo 1:2 ראובן שׁמעון לוי ויהודה׃
Exo 1:3 ישׂשכר זבולן ובנימן׃
Exo 1:4 דן ונפתלי גד ואשׁר׃
Exo 1:5 ויהי כל־נפשׁ יצאי ירך־יעקב שׁבעים נפשׁ ויוסף היה במצרים׃
Exo 1:6 וימת יוסף וכל־אחיו וכל הדור ההוא׃
Exo 1:7 ובני ישׂראל פרו וישׁרצו וירבו ויעצמו במאד מאד ותמלא הארץ אתם׃
Exo 1:8 ויקם מלך־חדשׁ על־מצרים אשׁר לא־ידע את־יוסף׃
Exo 1:9 ויאמר אל־עמו הנה עם בני ישׂראל רב ועצום ממנו׃
Exo 1:10 הבה נתחכמה לו פן־ירבה והיה כי־תקראנה מלחמה ונוסף גם־הוא על־שׂנאינו ונלחם־בנו ועלה מן־הארץ׃
Exo 1:11 וישׂימו עליו שׂרי מסים למען ענתו בסבלתם ויבן ערי מסכנות לפרעה את־פתם ואת־רעמסס׃
Exo 1:12 וכאשׁר יענו אתו כן ירבה וכן יפרץ ויקצו מפני בני ישׂראל׃
Exo 1:13 ויעבדו מצרים את־בני ישׂראל בפרך׃
Exo 1:14 וימררו את־חייהם בעבדה קשׁה בחמר ובלבנים ובכל־עבדה בשׂדה את כל־עבדתם אשׁר־עבדו בהם בפרך׃
Exo 1:15 ויאמר מלך מצרים למילדת העברית אשׁר שׁם האחת שׁפרה ושׁם השׁנית פועה׃
Exo 1:16 ויאמר בילדכן את־העבריות וראיתן על־האבנים אם־בן הוא והמתן אתו ואם־בת הוא וחיה׃
Exo 1:17 ותיראן המילדת את־האלהים ולא עשׂו כאשׁר דבר אליהן מלך מצרים ותחיין את־הילדים׃
Exo 1:18 ויקרא מלך־מצרים למילדת ויאמר להן מדוע עשׂיתן הדבר הזה ותחיין את־הילדים׃
Exo 1:19 ותאמרן המילדת אל־פרעה כי לא כנשׁים המצרית העברית כי־חיות הנה בטרם תבוא אלהן המילדת וילדו׃
Exo 1:20 וייטב אלהים למילדת וירב העם ויעצמו מאד׃
Exo 1:21 ויהי כי־יראו המילדת את־האלהים ויעשׂ להם בתים׃
Exo 1:22 ויצו פרעה לכל־עמו לאמר כל־הבן הילוד היארה תשׁליכהו וכל־הבת תחיון׃
Exo 2:1 וילך אישׁ מבית לוי ויקח את־בת־לוי׃
Exo 2:2 ותהר האשׁה ותלד בן ותרא אתו כי־טוב הוא ותצפנהו שׁלשׁה ירחים׃
Exo 2:3 ולא־יכלה עוד הצפינו ותקח־לו תבת גמא ותחמרה בחמר ובזפת ותשׂם בה את־הילד ותשׂם בסוף על־שׂפת היאר׃
Exo 2:4 ותתצב אחתו מרחק לדעה מה־יעשׂה לו׃
Exo 2:5 ותרד בת־פרעה לרחץ על־היאר ונערתיה הלכת על־יד היאר ותרא את־התבה בתוך הסוף ותשׁלח את־אמתה ותקחה׃
Exo 2:6 ותפתח ותראהו את־הילד והנה־נער בכה ותחמל עליו ותאמר מילדי העברים זה׃
Exo 2:7 ותאמר אחתו אל־בת־פרעה האלך וקראתי לך אשׁה מינקת מן העברית ותינק לך את־הילד׃
Exo 2:8 ותאמר־לה בת־פרעה לכי ותלך העלמה ותקרא את־אם הילד׃
Exo 2:9 ותאמר לה בת־פרעה היליכי את־הילד הזה והינקהו לי ואני אתן את־שׂכרך ותקח האשׁה הילד ותניקהו׃
Exo 2:10 ויגדל הילד ותבאהו לבת־פרעה ויהי־לה לבן ותקרא שׁמו משׁה ותאמר כי מן־המים משׁיתהו׃
Exo 2:11 ויהי בימים ההם ויגדל משׁה ויצא אל־אחיו וירא בסבלתם וירא אישׁ מצרי מכה אישׁ־עברי מאחיו׃
Exo 2:12 ויפן כה וכה וירא כי אין אישׁ ויך את־המצרי ויטמנהו בחול׃
Exo 2:13 ויצא ביום השׁני והנה שׁני־אנשׁים עברים נצים ויאמר לרשׁע למה תכה רעך׃
Exo 2:14 ויאמר מי שׂמך לאישׁ שׂר ושׁפט עלינו הלהרגני אתה אמר כאשׁר הרגת את־המצרי ויירא משׁה ויאמר אכן נודע הדבר׃
Exo 2:15 וישׁמע פרעה את־הדבר הזה ויבקשׁ להרג את־משׁה ויברח משׁה מפני פרעה וישׁב בארץ־מדין וישׁב על־הבאר׃
Exo 2:16 ולכהן מדין שׁבע בנות ותבאנה ותדלנה ותמלאנה את־הרהטים להשׁקות צאן אביהן׃
Exo 2:17 ויבאו הרעים ויגרשׁום ויקם משׁה ויושׁען וישׁק את־צאנם׃
Exo 2:18 ותבאנה אל־רעואל אביהן ויאמר מדוע מהרתן בא היום׃
Exo 2:19 ותאמרן אישׁ מצרי הצילנו מיד הרעים וגם־דלה דלה לנו וישׁק את־הצאן׃
Exo 2:20 ויאמר אל־בנתיו ואיו למה זה עזבתן את־האישׁ קראן לו ויאכל לחם׃
Exo 2:21 ויואל משׁה לשׁבת את־האישׁ ויתן את־צפרה בתו למשׁה׃
Exo 2:22 ותלד בן ויקרא את־שׁמו גרשׁם כי אמר גר הייתי בארץ נכריה׃
Exo 2:23 ויהי בימים הרבים ההם וימת מלך מצרים ויאנחו בני־ישׂראל מן־העבדה ויזעקו ותעל שׁועתם אל־האלהים מן־העבדה׃
Exo 2:24 וישׁמע אלהים את־נאקתם ויזכר אלהים את־בריתו את־אברהם את־יצחק ואת־יעקב׃
Exo 2:25 וירא אלהים את־בני ישׂראל וידע אלהים׃
Exo 3:1 ומשׁה היה רעה את־צאן יתרו חתנו כהן מדין וינהג את־הצאן אחר המדבר ויבא אל־הר האלהים חרבה׃
Exo 3:2 וירא מלאך יהוה אליו בלבת־אשׁ מתוך הסנה וירא והנה הסנה בער באשׁ והסנה איננו אכל׃
Exo 3:3 ויאמר משׁה אסרה־נא ואראה את־המראה הגדל הזה מדוע לא־יבער הסנה׃
Exo 3:4 וירא יהוה כי סר לראות ויקרא אליו אלהים מתוך הסנה ויאמר משׁה משׁה ויאמר הנני׃
Exo 3:5 ויאמר אל־תקרב הלם שׁל־נעליך מעל רגליך כי המקום אשׁר אתה עומד עליו אדמת־קדשׁ הוא׃
Exo 3:6 ויאמר אנכי אלהי אביך אלהי אברהם אלהי יצחק ואלהי יעקב ויסתר משׁה פניו כי ירא מהביט אל־האלהים׃
Exo 3:7 ויאמר יהוה ראה ראיתי את־עני עמי אשׁר במצרים ואת־צעקתם שׁמעתי מפני נגשׂיו כי ידעתי את־מכאביו׃
Exo 3:8 וארד להצילו מיד מצרים ולהעלתו מן־הארץ ההוא אל־ארץ טובה ורחבה אל־ארץ זבת חלב ודבשׁ אל־מקום הכנעני והחתי והאמרי והפרזי והחוי והיבוסי׃
Exo 3:9 ועתה הנה צעקת בני־ישׂראל באה אלי וגם־ראיתי את־הלחץ אשׁר מצרים לחצים אתם׃
Exo 3:10 ועתה לכה ואשׁלחך אל־פרעה והוצא את־עמי בני־ישׂראל ממצרים׃
Exo 3:11 ויאמר משׁה אל־האלהים מי אנכי כי אלך אל־פרעה וכי אוציא את־בני ישׂראל ממצרים׃
Exo 3:12 ויאמר כי־אהיה עמך וזה־לך האות כי אנכי שׁלחתיך בהוציאך את־העם ממצרים תעבדון את־האלהים על ההר הזה׃
Exo 3:13 ויאמר משׁה אל־האלהים הנה אנכי בא אל־בני ישׂראל ואמרתי להם אלהי אבותיכם שׁלחני אליכם ואמרו־לי מה־שׁמו מה אמר אלהם׃
Exo 3:14 ויאמר אלהים אל־משׁה אהיה אשׁר אהיה ויאמר כה תאמר לבני ישׂראל אהיה שׁלחני אליכם׃
Exo 3:15 ויאמר עוד אלהים אל־משׁה כה־תאמר אל־בני ישׂראל יהוה אלהי אבתיכם אלהי אברהם אלהי יצחק ואלהי יעקב שׁלחני אליכם זה־שׁמי לעלם וזה זכרי לדר דר׃
Exo 3:16 לך ואספת את־זקני ישׂראל ואמרת אלהם יהוה אלהי אבתיכם נראה אלי אלהי אברהם יצחק ויעקב לאמר פקד פקדתי אתכם ואת־העשׂוי לכם במצרים׃
Exo 3:17 ואמר אעלה אתכם מעני מצרים אל־ארץ הכנעני והחתי והאמרי והפרזי והחוי והיבוסי אל־ארץ זבת חלב ודבשׁ׃
Exo 3:18 ושׁמעו לקלך ובאת אתה וזקני ישׂראל אל־מלך מצרים ואמרתם אליו יהוה אלהי העבריים נקרה עלינו ועתה נלכה־נא דרך שׁלשׁת ימים במדבר ונזבחה ליהוה אלהינו׃
Exo 3:19 ואני ידעתי כי לא־יתן אתכם מלך מצרים להלך ולא ביד חזקה׃
Exo 3:20 ושׁלחתי את־ידי והכיתי את־מצרים בכל נפלאתי אשׁר אעשׂה בקרבו ואחרי־כן ישׁלח אתכם׃
Exo 3:21 ונתתי את־חן העם־הזה בעיני מצרים והיה כי תלכון לא תלכו ריקם׃
Exo 3:22 ושׁאלה אשׁה משׁכנתה ומגרת ביתה כלי־כסף וכלי זהב ושׂמלת ושׂמתם על־בניכם ועל־בנתיכם ונצלתם את־מצרים׃
Exo 4:1 ויען משׁה ויאמר והן לא־יאמינו לי ולא ישׁמעו בקלי כי יאמרו לא־נראה אליך יהוה׃
Exo 4:2 ויאמר אליו יהוה מזה בידך ויאמר מטה׃
Exo 4:3 ויאמר השׁליכהו ארצה וישׁלכהו ארצה ויהי לנחשׁ וינס משׁה מפניו׃
Exo 4:4 ויאמר יהוה אל־משׁה שׁלח ידך ואחז בזנבו וישׁלח ידו ויחזק בו ויהי למטה בכפו׃
Exo 4:5 למען יאמינו כי־נראה אליך יהוה אלהי אבתם אלהי אברהם אלהי יצחק ואלהי יעקב׃
Exo 4:6 ויאמר יהוה לו עוד הבא־נא ידך בחיקך ויבא ידו בחיקו ויוצאה והנה ידו מצרעת כשׁלג׃
Exo 4:7 ויאמר השׁב ידך אל־חיקך וישׁב ידו אל־חיקו ויוצאה מחיקו והנה־שׁבה כבשׂרו׃
Exo 4:8 והיה אם־לא יאמינו לך ולא ישׁמעו לקל האת הראשׁון והאמינו לקל האת האחרון׃
Exo 4:9 והיה אם־לא יאמינו גם לשׁני האתות האלה ולא ישׁמעון לקלך ולקחת ממימי היאר ושׁפכת היבשׁה והיו המים אשׁר תקח מן־היאר והיו לדם ביבשׁת׃
Exo 4:10 ויאמר משׁה אל־יהוה בי אדני לא אישׁ דברים אנכי גם מתמול גם משׁלשׁם גם מאז דברך אל־עבדך כי כבד־פה וכבד לשׁון אנכי׃
Exo 4:11 ויאמר יהוה אליו מי שׂם פה לאדם או מי־ישׂום אלם או חרשׁ או פקח או עור הלא אנכי יהוה׃
Exo 4:12 ועתה לך ואנכי אהיה עם־פיך והוריתיך אשׁר תדבר׃
Exo 4:13 ויאמר בי אדני שׁלח־נא ביד־תשׁלח׃
Exo 4:14 ויחר־אף יהוה במשׁה ויאמר הלא אהרן אחיך הלוי ידעתי כי־דבר ידבר הוא וגם הנה־הוא יצא לקראתך וראך ושׂמח בלבו׃
Exo 4:15 ודברת אליו ושׂמת את־הדברים בפיו ואנכי אהיה עם־פיך ועם־פיהו והוריתי אתכם את אשׁר תעשׂון׃
Exo 4:16 ודבר־הוא לך אל־העם והיה הוא יהיה־לך לפה ואתה תהיה־לו לאלהים׃
Exo 4:17 ואת־המטה הזה תקח בידך אשׁר תעשׂה־בו את־האתת׃
Exo 4:18 וילך משׁה וישׁב אל־יתר חתנו ויאמר לו אלכה נא ואשׁובה אל־אחי אשׁר־במצרים ואראה העודם חיים ויאמר יתרו למשׁה לך לשׁלום׃
Exo 4:19 ויאמר יהוה אל־משׁה במדין לך שׁב מצרים כי־מתו כל־האנשׁים המבקשׁים את־נפשׁך׃
Exo 4:20 ויקח משׁה את־אשׁתו ואת־בניו וירכבם על־החמר וישׁב ארצה מצרים ויקח משׁה את־מטה האלהים בידו׃
Exo 4:21 ויאמר יהוה אל־משׁה בלכתך לשׁוב מצרימה ראה כל־המפתים אשׁר־שׂמתי בידך ועשׂיתם לפני פרעה ואני אחזק את־לבו ולא ישׁלח את־העם׃
Exo 4:22 ואמרת אל־פרעה כה אמר יהוה בני בכרי ישׂראל׃
Exo 4:23 ואמר אליך שׁלח את־בני ויעבדני ותמאן לשׁלחו הנה אנכי הרג את־בנך בכרך׃
Exo 4:24 ויהי בדרך במלון ויפגשׁהו יהוה ויבקשׁ המיתו׃
Exo 4:25 ותקח צפרה צר ותכרת את־ערלת בנה ותגע לרגליו ותאמר כי חתן־דמים אתה לי׃
Exo 4:26 וירף ממנו אז אמרה חתן דמים למולת׃
Exo 4:27 ויאמר יהוה אל־אהרן לך לקראת משׁה המדברה וילך ויפגשׁהו בהר האלהים וישׁק־לו׃
Exo 4:28 ויגד משׁה לאהרן את כל־דברי יהוה אשׁר שׁלחו ואת כל־האתת אשׁר צוהו׃
Exo 4:29 וילך משׁה ואהרן ויאספו את־כל־זקני בני ישׂראל׃
Exo 4:30 וידבר אהרן את כל־הדברים אשׁר־דבר יהוה אל־משׁה ויעשׂ האתת לעיני העם׃
Exo 4:31 ויאמן העם וישׁמעו כי־פקד יהוה את־בני ישׂראל וכי ראה את־ענים ויקדו וישׁתחוו׃
Exo 5:1 ואחר באו משׁה ואהרן ויאמרו אל־פרעה כה־אמר יהוה אלהי ישׂראל שׁלח את־עמי ויחגו לי במדבר׃
Exo 5:2 ויאמר פרעה מי יהוה אשׁר אשׁמע בקלו לשׁלח את־ישׂראל לא ידעתי את־יהוה וגם את־ישׂראל לא אשׁלח׃
Exo 5:3 ויאמרו אלהי העברים נקרא עלינו נלכה נא דרך שׁלשׁת ימים במדבר ונזבחה ליהוה אלהינו פן־יפגענו בדבר או בחרב׃
Exo 5:4 ויאמר אלהם מלך מצרים למה משׁה ואהרן תפריעו את־העם ממעשׂיו לכו לסבלתיכם׃
Exo 5:5 ויאמר פרעה הן־רבים עתה עם הארץ והשׁבתם אתם מסבלתם׃
Exo 5:6 ויצו פרעה ביום ההוא את־הנגשׂים בעם ואת־שׁטריו לאמר׃
Exo 5:7 לא תאספון לתת תבן לעם ללבן הלבנים כתמול שׁלשׁם הם ילכו וקשׁשׁו להם תבן׃
Exo 5:8 ואת־מתכנת הלבנים אשׁר הם עשׂים תמול שׁלשׁם תשׂימו עליהם לא תגרעו ממנו כי־נרפים הם על־כן הם צעקים לאמר נלכה נזבחה לאלהינו׃
Exo 5:9 תכבד העבדה על־האנשׁים ויעשׂו־בה ואל־ישׁעו בדברי־שׁקר׃
Exo 5:10 ויצאו נגשׂי העם ושׁטריו ויאמרו אל־העם לאמר כה אמר פרעה אינני נתן לכם תבן׃
Exo 5:11 אתם לכו קחו לכם תבן מאשׁר תמצאו כי אין נגרע מעבדתכם דבר׃
Exo 5:12 ויפץ העם בכל־ארץ מצרים לקשׁשׁ קשׁ לתבן׃
Exo 5:13 והנגשׂים אצים לאמר כלו מעשׂיכם דבר־יום ביומו כאשׁר בהיות התבן׃
Exo 5:14 ויכו שׁטרי בני ישׂראל אשׁר־שׂמו עלהם נגשׂי פרעה לאמר מדוע לא כליתם חקכם ללבן כתמול שׁלשׁם גם־תמול גם־היום׃
Exo 5:15 ויבאו שׁטרי בני ישׂראל ויצעקו אל־פרעה לאמר למה תעשׂה כה לעבדיך׃
Exo 5:16 תבן אין נתן לעבדיך ולבנים אמרים לנו עשׂו והנה עבדיך מכים וחטאת עמך׃
Exo 5:17 ויאמר נרפים אתם נרפים על־כן אתם אמרים נלכה נזבחה ליהוה׃
Exo 5:18 ועתה לכו עבדו ותבן לא־ינתן לכם ותכן לבנים תתנו׃
Exo 5:19 ויראו שׁטרי בני־ישׂראל אתם ברע לאמר לא־תגרעו מלבניכם דבר־יום ביומו׃
Exo 5:20 ויפגעו את־משׁה ואת־אהרן נצבים לקראתם בצאתם מאת פרעה׃
Exo 5:21 ויאמרו אלהם ירא יהוה עליכם וישׁפט אשׁר הבאשׁתם את־ריחנו בעיני פרעה ובעיני עבדיו לתת־חרב בידם להרגנו׃
Exo 5:22 וישׁב משׁה אל־יהוה ויאמר אדני למה הרעתה לעם הזה למה זה שׁלחתני׃
Exo 5:23 ומאז באתי אל־פרעה לדבר בשׁמך הרע לעם הזה והצל לא־הצלת את־עמך׃
Exo 6:1 ויאמר יהוה אל־משׁה עתה תראה אשׁר אעשׂה לפרעה כי ביד חזקה ישׁלחם וביד חזקה יגרשׁם מארצו׃

Noach Gospel (Hebrew)

Mattithyahu 3-4

Mat 3:1 בימים ההם קם יוחנן המטביל ויהי קרא במדבר יהודה לאמר׃

Mat 3:2 שובו כי מלכות השמים קרבה לבוא׃

Mat 3:3 כי זה הוא אשר נבא עליו ישעיהו הנביא לאמר קול קורא במדבר פנו דרך יהוה ישרו מסלותיו׃

Mat 3:4 ויוחנן לבושו שער גמלים ואזור עור במתניו ומאכלו חגבים ודבש היער׃

Mat 3:5 ותצא אליו ירושלים וכל־יהודה וכל־ככר הירדן׃

Mat 3:6 ויטבלו על־ידו בירדן ויתודו את־חטאתם׃

Mat 3:7 ויהי כראותו רבים מן־הפרושים והצדוקים נגשים להטבל ויאמר להם ילדי צפעונים מי השכיל אתכם להמלט מן־הקצף העתיד לבא׃

Mat 3:8 לכן עשו פרי ראוי לתשובה׃

Mat 3:9 ואל־תחשבו בלבבכם לאמר אברהם הוא אבינו כי אני אמר לכם כי מן־האבנים האלה יכול האלהים להקים בנים לאברהם׃

Mat 3:10 וכבר הושם הגרזן על־שרש העצים והנה כל־עץ אשר איננו עשה פרי טוב יכרת וישלך באש׃

Mat 3:11 הן אנכי טובל אתכם במים לתשובה והבא אחרי חזק ממני אשר קטנתי משאת נעליו והוא יטבל אתכם ברוח הקדש ובאש׃

Mat 3:12 ובידו המזרה וזרה את־גרנו ואסף את־דגנו אל־אוצרו ואת־המץ ישרפנו באש אשר לא תכבה׃

Mat 3:13 ויבא ישוע מן־הגליל הירדנה אל־יוחנן להטבל על־ידו׃

Mat 3:14 ויוחנן חשך אותו לאמר אנכי צריך להטבל על־ידך ואתה בא אלי׃

Mat 3:15 ויען ישוע ויאמר אליו הניחה לי כי כן נאוה לשנינו למלא כל־הצדקה וינח לו׃

Mat 3:16 ויהי כאשר נטבל ישוע וימהר ויעל מן־המים והנה השמים נפתחו־לו וירא את־רוח אלהים יורדת כיונה ונחה עליו׃

Mat 3:17 והנה קול מן־השמים אומר זה בני ידידי אשר־רציתי בו׃

Mat 4:1 אז נשא הרוח את־ישוע המדברה למען ינסהו השטן׃

Mat 4:2 ויהי אחרי צומו ארבעים יום וארבעים לילה וירעב׃

Mat 4:3 ויגש אליו המנסה ויאמר אם בן־האלהים אתה דבר לאבנים האלה ותהיינה ללחם׃

Mat 4:4 ויען ויאמר הן כתוב לא על־הלחם לבדו יחיה האדם כי על־כל־מוצא פי־יהוה׃

Mat 4:5 וישאהו השטן אל־עיר הקדש ויעמידהו על־פנת־גג בית המקדש׃

Mat 4:6 ויאמר אליו אם בן־האלהים אתה נפל למטה כי כתוב כי מלאכיו יצוה־לך ועל־כפים ישאונך פן־תגף באבן רגלך׃

Mat 4:7 ויאמר אליו ישוע ועוד כתוב לא תנסה את יהוה אלהיך׃

Mat 4:8 ויוסף השטן וישאהו אל־הר גבה מאד ויראהו את־כל ממלכות תבל וכבודן׃

Mat 4:9 ויאמר אליו כל־זאת לך אתננה אם־תקד ותשתחוה לי׃

Mat 4:10 ויאמר אליו ישוע סור ממני השטן כי כתוב ליהוה אלהיך תשתחוה ואותו לבדו תעבד׃

Mat 4:11 וירף ממנו השטן והנה נגשו אליו מלאכים וישרתוהו׃

Mat 4:12 ויהי כשמע ישוע כי הסגירו את־יוחנן וילך אל ארץ הגליל׃

Mat 4:13 ויצא מנצרת ויבא וישב בכפר־נחום אשר על־שפת הים בגבול זבלון ונפתלי׃

Mat 4:14 למלאת הנאמר על־פי ישעיהו הנביא לאמר׃

Mat 4:15 ארצה זבלון וארצה נפתלי דרך הים עבר הירדן גליל הגוים׃

Mat 4:16 העם ההלכים בחשך ראו אור גדול ישבי בארץ צלמות אור נגה עליהם׃

Mat 4:17 מן־העת ההיא החל ישוע לקרא קרוא ואמור שובו כי מלכות השמים קרבה לבוא׃

Mat 4:18 ויהי בהתהלכו על־יד ים־הגליל וירא והנה שני אנשים אחים שמעון הנקרא פטרוס ואנדרי אחיו משליכים מצודה בים כי דיגים הם׃

Mat 4:19 ויאמר אליהם לכו אחרי ואשימכם לדיגי אנשים׃

Mat 4:20 ויעזבו מהרה את המכמרות וילכו אחריו׃

Mat 4:21 ויהי כעברו משם וירא שני אנשים אחים אחרים את־יעקב בן־זבדי ואת־יוחנן אחיו באניה עם־זבדי אביהם והמה מתקנים את־מכמרותם ויקרא אליהם׃

Mat 4:22 ויעזבו מהרה את־האניה ואת־אביהם וילכו אחריו׃

Mat 4:23 ויסב ישוע בכל־הגליל וילמד בכנסיותיהם ויבשר בשורת המלכות וירפא כל־מחלה וכל־מדוה בעם׃

Mat 4:24 ושמעו יצא בכל־ארץ סוריא ויביאו אליו את כל־החולים המענים בכל־חלים ומכאובים ואחוזי שדים ומכי ירח ונכי אברים וירפאם׃

Mat 4:25 וילכו אחריו המנים המנים מן־הגליל ומן־עשר הערים ומירושלים ויהודה ומעבר לירדן׃

Noach Haftarah (Hebrew)

Yeshayahu 54:1 - 55:5

Yeshayahu 54:1 רני עקרה לא ילדה פצחי רנה וצהלי לא־חלה כי־רבים בני־שׁוממה מבני בעולה אמר יהוה׃

Yeshayahu 54:2 הרחיבי מקום אהלך ויריעות משׁכנותיך יטו אל־תחשׂכי האריכי מיתריך ויתדתיך חזקי׃

Yeshayahu 54:3 כי־ימין ושׂמאול תפרצי וזרעך גוים יירשׁ וערים נשׁמות יושׁיבו׃

Yeshayahu 54:4 אל־תיראי כי־לא תבושׁי ואל־תכלמי כי לא תחפירי כי בשׁת עלומיך תשׁכחי וחרפת אלמנותיך לא תזכרי־עוד׃

Yeshayahu 54:5 כי בעליך עשׂיך יהוה צבאות שׁמו וגאלך קדושׁ ישׂראל אלהי כל־הארץ יקרא׃

Yeshayahu 54:6 כי־כאשׁה עזובה ועצובת רוח קראך יהוה ואשׁת נעורים כי תמאס אמר אלהיך׃

Yeshayahu 54:7 ברגע קטן עזבתיך וברחמים גדלים אקבצך׃

Yeshayahu 54:8 בשׁצף קצף הסתרתי פני רגע ממך ובחסד עולם רחמתיך אמר גאלך יהוה׃

Yeshayahu 54:9 כי־מי נח זאת לי אשׁר נשׁבעתי מעבר מי־נח עוד על־הארץ כן נשׁבעתי מקצף עליך ומגער־בך׃

Yeshayahu 54:10 כי ההרים ימושׁו והגבעות תמוטנה וחסדי מאתך לא־ימושׁ וברית שׁלומי לא תמוט אמר מרחמך יהוה׃

Yeshayahu 54:11 עניה סערה לא נחמה הנה אנכי מרביץ בפוך אבניך ויסדתיך בספירים׃

Yeshayahu 54:12 ושׂמתי כדכד שׁמשׁתיך ושׁעריך לאבני אקדח וכל־גבולך לאבני־חפץ׃

Yeshayahu 54:13 וכל־בניך למודי יהוה ורב שׁלום בניך׃

Yeshayahu 54:14 בצדקה תכונני רחקי מעשׁק כי־לא תיראי וממחתה כי לא־תקרב אליך׃

Yeshayahu 54:15 הן גור יגור אפס מאותי מי־גר אתך עליך יפול׃

Yeshayahu 54:16 הן אנכי בראתי חרשׁ נפח באשׁ פחם ומוציא כלי למעשׂהו ואנכי בראתי משׁחית לחבל׃

Yeshayahu 54:17 כל־כלי יוצר עליך לא יצלח וכל־לשׁון תקום־אתך למשׁפט תרשׁיעי זאת נחלת עבדי יהוה וצדקתם מאתי נאם־יהוה׃

Yeshayahu 55:1 הוי כל־צמא לכו למים ואשׁר אין־לו כסף לכו שׁברו ואכלו ולכו שׁברו בלוא־כסף ובלוא מחיר יין וחלב׃

Yeshayahu 55:2 למה תשׁקלו־כסף בלוא־לחם ויגיעכם בלוא לשׂבעה שׁמעו שׁמוע אלי ואכלו־טוב ותתענג בדשׁן נפשׁכם׃

Yeshayahu 55:3 הטו אזנכם ולכו אלי שׁמעו ותחי נפשׁכם ואכרתה לכם ברית עולם חסדי דוד הנאמנים׃

Yeshayahu 55:4 הן עד לאומים נתתיו נגיד ומצוה לאמים׃

Yeshayahu 55:5 הן גוי לא־תדע תקרא וגוי לא־ידעוך אליך ירוצו למען יהוה אלהיך ולקדושׁ ישׂראל כי פארך׃

Noach (Hebrew)

B’reisheet 6:9 אלה תולדת נח נח אישׁ צדיק תמים היה בדרתיו את־האלהים התהלך־נח׃

B’reisheet 6:10 ויולד נח שׁלשׁה בנים את־שׁם את־חם ואת־יפת׃

B’reisheet 6:11 ותשׁחת הארץ לפני האלהים ותמלא הארץ חמס׃

B’reisheet 6:12 וירא אלהים את־הארץ והנה נשׁחתה כי־השׁחית כל־בשׂר את־דרכו על־הארץ׃

B’reisheet 6:13 ויאמר אלהים לנח קץ כל־בשׂר בא לפני כי־מלאה הארץ חמס מפניהם והנני משׁחיתם את־הארץ׃

B’reisheet 6:14 עשׂה לך תבת עצי־גפר קנים תעשׂה את־התבה וכפרת אתה מבית ומחוץ בכפר׃

B’reisheet 6:15 וזה אשׁר תעשׂה אתה שׁלשׁ מאות אמה ארך התבה חמשׁים אמה רחבה ושׁלשׁים אמה קומתה׃

B’reisheet 6:16 צהר תעשׂה לתבה ואל־אמה תכלנה מלמעלה ופתח התבה בצדה תשׂים תחתים שׁנים ושׁלשׁים תעשׂה׃

B’reisheet 6:17 ואני הנני מביא את־המבול מים על־הארץ לשׁחת כל־בשׂר אשׁר־בו רוח חיים מתחת השׁמים כל אשׁר־בארץ יגוע׃

B’reisheet 6:18 והקמתי את־בריתי אתך ובאת אל־התבה אתה ובניך ואשׁתך ונשׁי־בניך אתך׃

B’reisheet 6:19 ומכל־החי מכל־בשׂר שׁנים מכל תביא אל־התבה להחית אתך זכר ונקבה יהיו׃

B’reisheet 6:20 מהעוף למינהו ומן־הבהמה למינה מכל רמשׂ האדמה למינהו שׁנים מכל יבאו אליך להחיות׃

B’reisheet 6:21 ואתה קח־לך מכל־מאכל אשׁר יאכל ואספת אליך והיה לך ולהם לאכלה׃

B’reisheet 6:22 ויעשׂ נח ככל אשׁר צוה אתו אלהים כן עשׂה׃

B’reisheet 7:1 ויאמר יהוה לנח בא־אתה וכל־ביתך אל־התבה כי־אתך ראיתי צדיק לפני בדור הזה׃

B’reisheet 7:2 מכל הבהמה הטהורה תקח־לך שׁבעה שׁבעה אישׁ ואשׁתו ומן־הבהמה אשׁר לא טהרה הוא שׁנים אישׁ ואשׁתו׃

B’reisheet 7:3 גם מעוף השׁמים שׁבעה שׁבעה זכר ונקבה לחיות זרע על־פני כל־הארץ׃

B’reisheet 7:4 כי לימים עוד שׁבעה אנכי ממטיר על־הארץ ארבעים יום וארבעים לילה ומחיתי את־כל־היקום אשׁר עשׂיתי מעל פני האדמה׃

B’reisheet 7:5 ויעשׂ נח ככל אשׁר־צוהו יהוה׃

B’reisheet 7:6 ונח בן־שׁשׁ מאות שׁנה והמבול היה מים על־הארץ׃

B’reisheet 7:7 ויבא נח ובניו ואשׁתו ונשׁי־בניו אתו אל־התבה מפני מי המבול׃

B’reisheet 7:8 מן־הבהמה הטהורה ומן־הבהמה אשׁר איננה טהרה ומן־העוף וכל אשׁר־רמשׂ על־האדמה׃

B’reisheet 7:9 שׁנים שׁנים באו אל־נח אל־התבה זכר ונקבה כאשׁר צוה אלהים את־נח׃

B’reisheet 7:10 ויהי לשׁבעת הימים ומי המבול היו על־הארץ׃

B’reisheet 7:11 בשׁנת שׁשׁ־מאות שׁנה לחיי־נח בחדשׁ השׁני בשׁבעה־עשׂר יום לחדשׁ ביום הזה נבקעו כל־מעינות תהום רבה וארבת השׁמים נפתחו׃

B’reisheet 7:12 ויהי הגשׁם על־הארץ ארבעים יום וארבעים לילה׃

B’reisheet 7:13 בעצם היום הזה בא נח ושׁם־וחם ויפת בני־נח ואשׁת נח ושׁלשׁת נשׁי־בניו אתם אל־התבה׃

B’reisheet 7:14 המה וכל־החיה למינה וכל־הבהמה למינה וכל־הרמשׂ הרמשׂ על־הארץ למינהו וכל־העוף למינהו כל צפור כל־כנף׃

B’reisheet 7:15 ויבאו אל־נח אל־התבה שׁנים שׁנים מכל־הבשׂר אשׁר־בו רוח חיים׃

B’reisheet 7:16 והבאים זכר ונקבה מכל־בשׂר באו כאשׁר צוה אתו אלהים ויסגר יהוה בעדו׃

B’reisheet 7:17 ויהי המבול ארבעים יום על־הארץ וירבו המים וישׂאו את־התבה ותרם מעל הארץ׃

B’reisheet 7:18 ויגברו המים וירבו מאד על־הארץ ותלך התבה על־פני המים׃

B’reisheet 7:19 והמים גברו מאד מאד על־הארץ ויכסו כל־ההרים הגבהים אשׁר־תחת כל־השׁמים׃

B’reisheet 7:20 חמשׁ עשׂרה אמה מלמעלה גברו המים ויכסו ההרים׃

B’reisheet 7:21 ויגוע כל־בשׂר הרמשׂ על־הארץ בעוף ובבהמה ובחיה ובכל־השׁרץ השׁרץ על־הארץ וכל האדם׃

B’reisheet 7:22 כל אשׁר נשׁמת־רוח חיים באפיו מכל אשׁר בחרבה מתו׃

B’reisheet 7:23 וימח את־כל־היקום אשׁר על־פני האדמה מאדם עד־בהמה עד־רמשׂ ועד־עוף השׁמים וימחו מן־הארץ וישׁאר אך־נח ואשׁר אתו בתבה׃

B’reisheet 7:24 ויגברו המים על־הארץ חמשׁים ומאת יום׃

B’reisheet 8:1 ויזכר אלהים את־נח ואת כל־החיה ואת־כל־הבהמה אשׁר אתו בתבה ויעבר אלהים רוח על־הארץ וישׁכו המים׃

B’reisheet 8:2 ויסכרו מעינת תהום וארבת השׁמים ויכלא הגשׁם מן־השׁמים׃

B’reisheet 8:3 וישׁבו המים מעל הארץ הלוך ושׁוב ויחסרו המים מקצה חמשׁים ומאת יום׃

B’reisheet 8:4 ותנח התבה בחדשׁ השׁביעי בשׁבעה־עשׂר יום לחדשׁ על הרי אררט׃

B’reisheet 8:5 והמים היו הלוך וחסור עד החדשׁ העשׂירי בעשׂירי באחד לחדשׁ נראו ראשׁי ההרים׃

B’reisheet 8:6 ויהי מקץ ארבעים יום ויפתח נח את־חלון התבה אשׁר עשׂה׃

B’reisheet 8:7 וישׁלח את־הערב ויצא יצוא ושׁוב עד־יבשׁת המים מעל הארץ׃

B’reisheet 8:8 וישׁלח את־היונה מאתו לראות הקלו המים מעל פני האדמה׃

B’reisheet 8:9 ולא־מצאה היונה מנוח לכף־רגלה ותשׁב אליו אל־התבה כי־מים על־פני כל־הארץ וישׁלח ידו ויקחה ויבא אתה אליו אל־התבה׃

B’reisheet 8:10 ויחל עוד שׁבעת ימים אחרים ויסף שׁלח את־היונה מן־התבה׃

B’reisheet 8:11 ותבא אליו היונה לעת ערב והנה עלה־זית טרף בפיה וידע נח כי־קלו המים מעל הארץ׃

B’reisheet 8:12 וייחל עוד שׁבעת ימים אחרים וישׁלח את־היונה ולא־יספה שׁוב־אליו עוד׃

B’reisheet 8:13 ויהי באחת ושׁשׁ־מאות שׁנה בראשׁון באחד לחדשׁ חרבו המים מעל הארץ ויסר נח את־מכסה התבה וירא והנה חרבו פני האדמה׃

B’reisheet 8:14 ובחדשׁ השׁני בשׁבעה ועשׂרים יום לחדשׁ יבשׁה הארץ׃

B’reisheet 8:15 וידבר אלהים אל־נח לאמר׃

B’reisheet 8:16 צא מן־התבה אתה ואשׁתך ובניך ונשׁי־בניך אתך׃

B’reisheet 8:17 כל־החיה אשׁר־אתך מכל־בשׂר בעוף ובבהמה ובכל־הרמשׂ הרמשׂ על־הארץ הוצא אתך ושׁרצו בארץ ופרו ורבו על־הארץ׃

B’reisheet 8:18 ויצא־נח ובניו ואשׁתו ונשׁי־בניו אתו׃

B’reisheet 8:19 כל־החיה כל־הרמשׂ וכל־העוף כל רומשׂ על־הארץ למשׁפחתיהם יצאו מן־התבה׃

B’reisheet 8:20 ויבן נח מזבח ליהוה ויקח מכל הבהמה הטהרה ומכל העוף הטהור ויעל עלת במזבח׃

B’reisheet 8:21 וירח יהוה את־ריח הניחח ויאמר יהוה אל־לבו לא־אסף לקלל עוד את־האדמה בעבור האדם כי יצר לב האדם רע מנעריו ולא־אסף עוד להכות את־כל־חי כאשׁר עשׂיתי׃

B’reisheet 8:22 עד כל־ימי הארץ זרע וקציר וקר וחם וקיץ וחרף ויום ולילה לא ישׁבתו׃

B’reisheet 9:1 ויברך אלהים את־נח ואת־בניו ויאמר להם פרו ורבו ומלאו את־הארץ׃

B’reisheet 9:2 ומוראכם וחתכם יהיה על כל־חית הארץ ועל כל־עוף השׁמים בכל אשׁר תרמשׂ האדמה ובכל־דגי הים בידכם נתנו׃

B’reisheet 9:3 כל־רמשׂ אשׁר הוא־חי לכם יהיה לאכלה כירק עשׂב נתתי לכם את־כל׃

B’reisheet 9:4 אך־בשׂר בנפשׁו דמו לא תאכלו׃

B’reisheet 9:5 ואך את־דמכם לנפשׁתיכם אדרשׁ מיד כל־חיה אדרשׁנו ומיד האדם מיד אישׁ אחיו אדרשׁ את־נפשׁ האדם׃

B’reisheet 9:6 שׁפך דם האדם באדם דמו ישׁפך כי בצלם אלהים עשׂה את־האדם׃

B’reisheet 9:7 ואתם פרו ורבו שׁרצו בארץ ורבו־בה׃

B’reisheet 9:8 ויאמר אלהים אל־נח ואל־בניו אתו לאמר׃

B’reisheet 9:9 ואני הנני מקים את־בריתי אתכם ואת־זרעכם אחריכם׃

B’reisheet 9:10 ואת כל־נפשׁ החיה אשׁר אתכם בעוף בבהמה ובכל־חית הארץ אתכם מכל יצאי התבה לכל חית הארץ׃

B’reisheet 9:11 והקמתי את־בריתי אתכם ולא־יכרת כל־בשׂר עוד ממי המבול ולא־יהיה עוד מבול לשׁחת הארץ׃

B’reisheet 9:12 ויאמר אלהים זאת אות־הברית אשׁר־אני נתן ביני וביניכם ובין כל־נפשׁ חיה אשׁר אתכם לדרת עולם׃

B’reisheet 9:13 את־קשׁתי נתתי בענן והיתה לאות ברית ביני ובין הארץ׃

B’reisheet 9:14 והיה בענני ענן על־הארץ ונראתה הקשׁת בענן׃

B’reisheet 9:15 וזכרתי את־בריתי אשׁר ביני וביניכם ובין כל־נפשׁ חיה בכל־בשׂר ולא־יהיה עוד המים למבול לשׁחת כל־בשׂר׃

B’reisheet 9:16 והיתה הקשׁת בענן וראיתיה לזכר ברית עולם בין אלהים ובין כל־נפשׁ חיה בכל־בשׂר אשׁר על־הארץ׃

B’reisheet 9:17 ויאמר אלהים אל־נח זאת אות־הברית אשׁר הקמתי ביני ובין כל־בשׂר אשׁר על־הארץ׃

B’reisheet 9:18 ויהיו בני־נח היצאים מן־התבה שׁם וחם ויפת וחם הוא אבי כנען׃

B’reisheet 9:19 שׁלשׁה אלה בני־נח ומאלה נפצה כל־הארץ׃

B’reisheet 9:20 ויחל נח אישׁ האדמה ויטע כרם׃

B’reisheet 9:21 וישׁת מן־היין וישׁכר ויתגל בתוך אהלה׃

B’reisheet 9:22 וירא חם אבי כנען את ערות אביו ויגד לשׁני־אחיו בחוץ׃

B’reisheet 9:23 ויקח שׁם ויפת את־השׂמלה וישׂימו על־שׁכם שׁניהם וילכו אחרנית ויכסו את ערות אביהם ופניהם אחרנית וערות אביהם לא ראו׃

B’reisheet 9:24 וייקץ נח מיינו וידע את אשׁר־עשׂה־לו בנו הקטן׃

B’reisheet 9:25 ויאמר ארור כנען עבד עבדים יהיה לאחיו׃

B’reisheet 9:26 ויאמר ברוך יהוה אלהי שׁם ויהי כנען עבד למו׃

B’reisheet 9:27 יפת אלהים ליפת וישׁכן באהלי־שׁם ויהי כנען עבד למו׃

B’reisheet 9:28 ויחי־נח אחר המבול שׁלשׁ מאות שׁנה וחמשׁים שׁנה׃

B’reisheet 9:29 ויהי כל־ימי־נח תשׁע מאות שׁנה וחמשׁים שׁנה וימת׃

B’reisheet 10:1 ואלה תולדת בני־נח שׁם חם ויפת ויולדו להם בנים אחר המבול׃

B’reisheet 10:2 בני יפת גמר ומגוג ומדי ויון ותבל ומשׁך ותירס׃

B’reisheet 10:3 ובני גמר אשׁכנז וריפת ותגרמה׃

B’reisheet 10:4 ובני יון אלישׁה ותרשׁישׁ כתים ודדנים׃

B’reisheet 10:5 מאלה נפרדו איי הגוים בארצתם אישׁ ללשׁנו למשׁפחתם בגויהם׃

B’reisheet 10:6 ובני חם כושׁ ומצרים ופוט וכנען׃

B’reisheet 10:7 ובני כושׁ סבא וחוילה וסבתה ורעמה וסבתכא ובני רעמה שׁבא ודדן׃

B’reisheet 10:8 וכושׁ ילד את־נמרד הוא החל להיות גבר בארץ׃

B’reisheet 10:9 הוא־היה גבר־ציד לפני יהוה על־כן יאמר כנמרד גבור ציד לפני יהוה׃

B’reisheet 10:10 ותהי ראשׁית ממלכתו בבל וארך ואכד וכלנה בארץ שׁנער׃

B’reisheet 10:11 מן־הארץ ההוא יצא אשׁור ויבן את־נינוה ואת־רחבת עיר ואת־כלח׃

B’reisheet 10:12 ואת־רסן בין נינוה ובין כלח הוא העיר הגדלה׃

B’reisheet 10:13 ומצרים ילד את־לודים ואת־ענמים ואת־להבים ואת־נפתחים׃

B’reisheet 10:14 ואת־פתרסים ואת־כסלחים אשׁר יצאו משׁם פלשׁתים ואת־כפתרים׃

B’reisheet 10:15 וכנען ילד את־צידן בכרו ואת־חת׃

B’reisheet 10:16 ואת־היבוסי ואת־האמרי ואת הגרגשׁי׃

B’reisheet 10:17 ואת־החוי ואת־הערקי ואת־הסיני׃

B’reisheet 10:18 ואת־הארודי ואת־הצמרי ואת־החמתי ואחר נפצו משׁפחות הכנעני׃

B’reisheet 10:19 ויהי גבול הכנעני מצידן באכה גררה עד־עזה באכה סדמה ועמרה ואדמה וצבים עד־לשׁע׃

B’reisheet 10:20 אלה בני־חם למשׁפחתם ללשׁנתם בארצתם בגויהם׃

B’reisheet 10:21 ולשׁם ילד גם־הוא אבי כל־בני־עבר אחי יפת הגדול׃

B’reisheet 10:22 בני שׁם עילם ואשׁור וארפכשׁד ולוד וארם׃

B’reisheet 10:23 ובני ארם עוץ וחול וגתר ומשׁ׃

B’reisheet 10:24 וארפכשׁד ילד את־שׁלח ושׁלח ילד את־עבר׃

B’reisheet 10:25 ולעבר ילד שׁני בנים שׁם האחד פלג כי בימיו נפלגה הארץ ושׁם אחיו יקטן׃

B’reisheet 10:26 ויקטן ילד את־אלמודד ואת־שׁלף ואת־חצרמות ואת־ירח׃

B’reisheet 10:27 ואת־הדורם ואת־אוזל ואת־דקלה׃

B’reisheet 10:28 ואת־עובל ואת־אבימאל ואת־שׁבא׃

B’reisheet 10:29 ואת־אופר ואת־חוילה ואת־יובב כל־אלה בני יקטן׃

B’reisheet 10:30 ויהי מושׁבם ממשׁא באכה ספרה הר הקדם׃

B’reisheet 10:31 אלה בני־שׁם למשׁפחתם ללשׁנתם בארצתם לגויהם׃

B’reisheet 10:32 אלה משׁפחת בני־נח לתולדתם בגויהם ומאלה נפרדו הגוים בארץ אחר המבול׃

B’reisheet 11:1 ויהי כל־הארץ שׂפה אחת ודברים אחדים׃

B’reisheet 11:2 ויהי בנסעם מקדם וימצאו בקעה בארץ שׁנער וישׁבו שׁם׃

B’reisheet 11:3 ויאמרו אישׁ אל־רעהו הבה נלבנה לבנים ונשׂרפה לשׂרפה ותהי להם הלבנה לאבן והחמר היה להם לחמר׃

B’reisheet 11:4 ויאמרו הבה נבנה־לנו עיר ומגדל וראשׁו בשׁמים ונעשׂה־לנו שׁם פן־נפוץ על־פני כל־הארץ׃

B’reisheet 11:5 וירד יהוה לראת את־העיר ואת־המגדל אשׁר בנו בני האדם׃

B’reisheet 11:6 ויאמר יהוה הן עם אחד ושׂפה אחת לכלם וזה החלם לעשׂות ועתה לא־יבצר מהם כל אשׁר יזמו לעשׂות׃

B’reisheet 11:7 הבה נרדה ונבלה שׁם שׂפתם אשׁר לא ישׁמעו אישׁ שׂפת רעהו׃

B’reisheet 11:8 ויפץ יהוה אתם משׁם על־פני כל־הארץ ויחדלו לבנת העיר׃

B’reisheet 11:9 על־כן קרא שׁמה בבל כי־שׁם בלל יהוה שׂפת כל־הארץ ומשׁם הפיצם יהוה על־פני כל־הארץ׃

B’reisheet 11:10 אלה תולדת שׁם שׁם בן־מאת שׁנה ויולד את־ארפכשׁד שׁנתים אחר המבול׃

B’reisheet 11:11 ויחי־שׁם אחרי הולידו את־ארפכשׁד חמשׁ מאות שׁנה ויולד בנים ובנות׃

B’reisheet 11:12 וארפכשׁד חי חמשׁ ושׁלשׁים שׁנה ויולד את־שׁלח׃

B’reisheet 11:13 ויחי ארפכשׁד אחרי הולידו את־שׁלח שׁלשׁ שׁנים וארבע מאות שׁנה ויולד בנים ובנות׃

B’reisheet 11:14 ושׁלח חי שׁלשׁים שׁנה ויולד את־עבר׃

B’reisheet 11:15 ויחי־שׁלח אחרי הולידו את־עבר שׁלשׁ שׁנים וארבע מאות שׁנה ויולד בנים ובנות׃

B’reisheet 11:16 ויחי־עבר ארבע ושׁלשׁים שׁנה ויולד את־פלג׃

B’reisheet 11:17 ויחי־עבר אחרי הולידו את־פלג שׁלשׁים שׁנה וארבע מאות שׁנה ויולד בנים ובנות׃

B’reisheet 11:18 ויחי־פלג שׁלשׁים שׁנה ויולד את־רעו׃

B’reisheet 11:19 ויחי־פלג אחרי הולידו את־רעו תשׁע שׁנים ומאתים שׁנה ויולד בנים ובנות׃

B’reisheet 11:20 ויחי רעו שׁתים ושׁלשׁים שׁנה ויולד את־שׂרוג׃

B’reisheet 11:21 ויחי רעו אחרי הולידו את־שׂרוג שׁבע שׁנים ומאתים שׁנה ויולד בנים ובנות׃

B’reisheet 11:22 ויחי שׂרוג שׁלשׁים שׁנה ויולד את־נחור׃

B’reisheet 11:23 ויחי שׂרוג אחרי הולידו את־נחור מאתים שׁנה ויולד בנים ובנות׃

B’reisheet 11:24 ויחי נחור תשׁע ועשׂרים שׁנה ויולד את־תרח׃

B’reisheet 11:25 ויחי נחור אחרי הולידו את־תרח תשׁע־עשׂרה שׁנה ומאת שׁנה ויולד בנים ובנות׃

B’reisheet 11:26 ויחי־תרח שׁבעים שׁנה ויולד את־אברם את־נחור ואת־הרן׃

B’reisheet 11:27 ואלה תולדת תרח תרח הוליד את־אברם את־נחור ואת־הרן והרן הוליד את־לוט׃

B’reisheet 11:28 וימת הרן על־פני תרח אביו בארץ מולדתו באור כשׂדים׃

B’reisheet 11:29 ויקח אברם ונחור להם נשׁים שׁם אשׁת־אברם שׂרי ושׁם אשׁת־נחור מלכה בת־הרן אבי־מלכה ואבי יסכה׃

B’reisheet 11:30 ותהי שׂרי עקרה אין לה ולד׃

B’reisheet 11:31 ויקח תרח את־אברם בנו ואת־לוט בן־הרן בן־בנו ואת שׂרי כלתו אשׁת אברם בנו ויצאו אתם מאור כשׂדים ללכת ארצה כנען ויבאו עד־חרן וישׁבו שׁם׃

B’reisheet 11:32 ויהיו ימי־תרח חמשׁ שׁנים ומאתים שׁנה וימת תרח בחרן׃

B'reisheet (parsha) Gospel (Hebrew)

Mattithyahu 1-2

Mat 1:1 ספר תולדת ישוע המשיח בן־דוד בן־אברהם׃

Mat 1:2 אברהם הוליד את־יצחק ויצחק הוליד את־יעקב ויעקב הוליד את־יהודה ואת־אחיו׃

Mat 1:3 ויהודה הוליד את־פרץ ואת־זרח מתמר ופרץ הוליד את־חצרון וחצרון הוליד את־רם׃

Mat 1:4 ורם הוליד את־עמינדב ועמינדב הוליד את־נחשון ונחשון הוליד את־שלמון׃

Mat 1:5 ושלמון הוליד את־בעז מרחב ובעז הוליד את־עובד מרות ועובד הוליד את־ישי׃

Mat 1:6 וישי הוליד את־דוד המלך ודוד המלך הוליד את־שלמה מאשת אוריה׃

Mat 1:7 ושלמה הוליד את־רחבעם ורחבעם הוליד את־אביה ואביה הוליד את־אסא׃

Mat 1:8 ואסא הוליד את־יהושפט ויהושפט הוליד את־יורם ויורם הוליד את עזיהו׃

Mat 1:9 ועזיהו הוליד את־יותם ויותם הוליד את־אחז ואחז הוליד את־יחזקיהו׃

Mat 1:10 ויחזקיהו הוליד את־מנשה ומנשה הוליד את־אמון ואמון הוליד את־יאשיהו׃

Mat 1:11 ויאשיהו הוליד את־יכניהו ואת־אחיו לעת גלות בבל׃

Mat 1:12 ואחרי גלותם בבלה הוליד יכניהו את שאלתיאל ושאלתיאל הוליד את־זרבבל׃

Mat 1:13 וזרבבל הוליד את־אביהוד ואביהוד הוליד את־אליקים ואליקים הוליד את עזור׃

Mat 1:14 ועזור הוליד את־צדוק וצדוק הוליד את־יכין ויכין הוליד את־אליהוד׃

Mat 1:15 ואליהוד הוליד את־אלעזר ואלעזר הוליד את־מתן ומתן הוליד את־יעקב׃

Mat 1:16 ויעקב הוליד את־יוסף בעל מרים אשר ממנה נולד ישוע הנקרא משיח׃

Mat 1:17 והנה כל־הדרות מן־אברהם עד־דוד ארבעה עשר דרות ומן־דוד עד־גלות בבל ארבעה עשר דרות ומגלות בבל עד־המשיח ארבעה עשר דרות׃

Mat 1:18 וזה דבר הלדת ישוע המשיח מרים אמו היתה מארשה ליוסף ובטרם יבא אליה נמצאת הרה מרוח הקדש׃

Mat 1:19 ויוסף בעלה איש צדיק ולא אבה לתתה לחרפה ויאמר אשלחנה בסתר׃

Mat 1:20 הוא חשב כזאת והנה מלאך יהוה נראה אליו בחלום ויאמר יוסף בן־דוד אל־תירא מקחת את מרים אשתך כי הנוצר בקרבה מרוח הקדש הוא׃

Mat 1:21 והיא ילדת בן וקראת את־שמו ישוע כי הוא יושיע את־עמו מחטאתיהם׃

Mat 1:22 וכל־זאת היתה למלאת את־דבר יהוה אשר־דבר ביד הנביא לאמר׃

Mat 1:23 הנה העלמה הרה וילדת בן וקראו שמו עמנואל אשר פרושו האל עמנו׃

Mat 1:24 וייקץ יוסף משנתו ויעש כאשר צוהו מלאך יהוה ויאסף את־אשתו אל ביתו׃

Mat 1:25 ולא ידעה עד כי־ילדה בן (את־בכורה) ויקרא את־שמו ישוע׃

Mat 2:1 ויהי בימי הורדוס המלך כאשר נולד ישוע בבית־לחם יהודה ויבאו מגושים מארץ מזרח ירושלים׃

Mat 2:2 ויאמרו איה מלך היהודים אשר ילד כי ראינו את־כוכבו במזרח ונבא להשתחות לו׃

Mat 2:3 ויהי כשמע הורדוס המלך את־דבריהם ויחרד הוא וכל־ירושלים עמו׃

Mat 2:4 ויקהל את־כל־ראשי הכהנים וסופרי העם וישאל אתם לאמר איפה יולד המשיח׃

Mat 2:5 ויאמרו לו בבית־לחם יהודה כי־כן כתוב ביד הנביא׃

Mat 2:6 ואתה בית־לחם ארץ יהודה אינך צעיר באלפי יהודה כי ממך יצא מושל אשר ירעה את־עמי ישראל׃

Mat 2:7 אז קרא הורדוס למגושים בסתר ויחקר לדעת העת אשר נראה הכוכב׃

Mat 2:8 וישלחם בית־לחם ויאמר לכו חקרו היטב על־דבר הנער והיה כי־תמצאון אתו והגדתם לי ואבאה להשתחות־לו גם־אני׃

Mat 2:9 ויהי כשמעם את־דברי המלך וילכו והנה הכוכב אשר־ראו במזרח הלך לפניהם עד אשר־בא ויעמד ממעל לאשר־היה שם הילד׃

Mat 2:10 ויראו את־הכוכב וישמחו שמחה גדולה עד־מאד׃

Mat 2:11 ויבאו הביתה וימצאו את־הילד עם־מרים אמו ויפלו על־פניהם וישתחוו־לו ויפתחו את־אוצרותם ויקריבו לו מנחה זהב ולבונה ומר׃

Mat 2:12 ויצוו בחלום לבלתי שוב אל־הורדוס וילכו בדרך אחר אל־ארצם׃

Mat 2:13 הם הלכו משם והנה מלאך יהוה נראה אל־יוסף בחלום לאמר קום קח את־הילד ואת־אמו וברח־לך מצרימה והיה־שם עד־אם אמרתי אליך כי הורדוס מבקש את־נפש הנער לקחתה׃

Mat 2:14 ויקם ויקח את־הילד ואת־אמו לילה ויברח מצרימה׃

Mat 2:15 ויהי־שם עד מות הורדוס למלאת את־דבר יהוה ביד הנביא לאמר ממצרים קראתי לבני׃

Mat 2:16 וירא הורדוס כי התלו בו המגושים ויקצף מאד וישלח ויהרג את־כל־הילדים אשר בבית־לחם ובכל־גבוליה למבן־שנתים ולמטה לפי העת אשר חקר מפי המגושים׃

Mat 2:17 אז הוקם הנאמר בפי ירמיהו הנביא לאמר׃

Mat 2:18 קול ברמה נשמע נהי ובכי תמרורים רחל מבכה על־בניה מאנה להנחם על־בניה כי איננו׃

Mat 2:19 ויהי אחרי מות הורדוס והנה מלאך יהוה נראה בחלום אל־יוסף בארץ מצרים׃

Mat 2:20 ויאמר אליו קום קח את־הילד ואת־אמו ולך שוב אל־ארץ ישראל כי מתו המבקשים את־נפש הילד׃

Mat 2:21 ויקם ויקח את־הילד ואת־אמו ויבא ארצה ישראל׃

Mat 2:22 וכשמעו כי ארכלוס מלך ביהודה תחת הורדוס אביו ויירא ללכת שמה ויצוה בחלום וילך לו אל־ארצות הגליל׃

Mat 2:23 ויבא וישב בעיר הנקראת נצרת למלאת הדבר הנאמר על־פי הנביאים כי נצרי יקרא לו׃