Va'era Haftarah 2 (Hebrew)

Yeshayahu 66:1-24

Yes 66:1 כה אמר יהוה השׁמים כסאי והארץ הדם רגלי אי־זה בית אשׁר תבנו־לי ואי־זה מקום מנוחתי׃
Yes 66:2 ואת־כל־אלה ידי עשׂתה ויהיו כל־אלה נאם־יהוה ואל־זה אביט אל־עני ונכה־רוח וחרד על־דברי׃
Yes 66:3 שׁוחט השׁור מכה־אישׁ זובח השׂה ערף כלב מעלה מנחה דם־חזיר מזכיר לבנה מברך און גם־המה בחרו בדרכיהם ובשׁקוציהם נפשׁם חפצה׃
Yes 66:4 גם־אני אבחר בתעלליהם ומגורתם אביא להם יען קראתי ואין עונה דברתי ולא שׁמעו ויעשׂו הרע בעיני ובאשׁר לא־חפצתי בחרו׃
Yes 66:5 שׁמעו דבר־יהוה החרדים אל־דברו אמרו אחיכם שׂנאיכם מנדיכם למען שׁמי יכבד יהוה ונראה בשׂמחתכם והם יבשׁו׃
Yes 66:6 קול שׁאון מעיר קול מהיכל קול יהוה משׁלם גמול לאיביו׃
Yes 66:7 בטרם תחיל ילדה בטרם יבוא חבל לה והמליטה זכר׃
Yes 66:8 מי־שׁמע כזאת מי ראה כאלה היוחל ארץ ביום אחד אם־יולד גוי פעם אחת כי־חלה גם־ילדה ציון את־בניה׃
Yes 66:9 האני אשׁביר ולא אוליד יאמר יהוה אם־אני המוליד ועצרתי אמר אלהיך׃
Yes 66:10 שׂמחו את־ירושׁלם וגילו בה כל־אהביה שׂישׂו אתה משׂושׂ כל־המתאבלים עליה׃
Yes 66:11 למען תינקו ושׂבעתם משׁד תנחמיה למען תמצו והתענגתם מזיז כבודה׃
Yes 66:12 כי־כה אמר יהוה הנני נטה־אליה כנהר שׁלום וכנחל שׁוטף כבוד גוים וינקתם על־צד תנשׂאו ועל־ברכים תשׁעשׁעו׃
Yes 66:13 כאישׁ אשׁר אמו תנחמנו כן אנכי אנחמכם ובירושׁלם תנחמו׃
Yes 66:14 וראיתם ושׂשׂ לבכם ועצמותיכם כדשׁא תפרחנה ונודעה יד־יהוה את־עבדיו וזעם את־איביו׃
Yes 66:15 כי־הנה יהוה באשׁ יבוא וכסופה מרכבתיו להשׁיב בחמה אפו וגערתו בלהבי־אשׁ׃
Yes 66:16 כי באשׁ יהוה נשׁפט ובחרבו את־כל־בשׂר ורבו חללי יהוה׃
Yes 66:17 המתקדשׁים והמטהרים אל־הגנות אחר אחד בתוך אכלי בשׂר החזיר והשׁקץ והעכבר יחדו יספו נאם־יהוה׃
Yes 66:18 ואנכי מעשׂיהם ומחשׁבתיהם באה לקבץ את־כל־הגוים והלשׁנות ובאו וראו את־כבודי׃
Yes 66:19 ושׂמתי בהם אות ושׁלחתי מהם פליטים אל־הגוים תרשׁישׁ פול ולוד משׁכי קשׁת תבל ויון האיים הרחקים אשׁר לא־שׁמעו את־שׁמעי ולא־ראו את־כבודי והגידו את־כבודי בגוים׃
Yes 66:20 והביאו את־כל־אחיכם מכל־הגוים מנחה ליהוה בסוסים וברכב ובצבים ובפרדים ובכרכרות על הר קדשׁי ירושׁלם אמר יהוה כאשׁר יביאו בני ישׂראל את־המנחה בכלי טהור בית יהוה׃
Yes 66:21 וגם־מהם אקח לכהנים ללוים אמר יהוה׃
Yes 66:22 כי כאשׁר השׁמים החדשׁים והארץ החדשׁה אשׁר אני עשׂה עמדים לפני נאם־יהוה כן יעמד זרעכם ושׁמכם׃
Yes 66:23 והיה מדי־חדשׁ בחדשׁו ומדי שׁבת בשׁבתו יבוא כל־בשׂר להשׁתחות לפני אמר יהוה׃
Yes 66:24 ויצאו וראו בפגרי האנשׁים הפשׁעים בי כי תולעתם לא תמות ואשׁם לא תכבה והיו דראון לכל־בשׂר׃

Va'era Haftarah 2

Yeshayahu 66:1-24

Yes 66:1 Thus said יהוה, “The heavens are My throne, and the earth is My footstool. Where is this house that you build for Me? And where is this place of My rest?
Yes 66:2 “And all these My hand have made, and all these that exist,” declares יהוה. “Yet to such a one I look: on him who is poor and bruised of spirit, and who trembles at My Word.
Yes 66:3 “But whoever slaughters the bull slays a man; whoever slaughters the lamb breaks a dog’s neck; whoever brings a grain offering – pig’s blood; whoever burns incense blesses an idol. Indeed, they have chosen their own ways, and their being delights in their abominations.
Yes 66:4 “I shall also choose their punishments, and bring their fears on them. Because I called, but no one answered. I spoke and they did not hear, and they did evil before My eyes, and chose what was displeasing to Me.”
Yes 66:5 Hear the Word of יהוה, you who tremble at His Word, “Your brothers who hate you, who cast you out for My Name’s sake, said, ‘Let יהוה be esteemed, so that we see your joy.’ But they are put to shame.”
Yes 66:6 “A roaring sound from the city, a voice from the Hĕḵal, the voice of יהוה, repaying His enemies!
Yes 66:7 “Before she laboured, she gave birth; before a pain came to her, she was delivered of a male child.
Yes 66:8 “Who has heard the like of this? Who has seen the like of these? Is a land brought forth in one day? Is a nation born at once? For as soon as Tsiyon laboured, she gave birth to her children.
Yes 66:9 “Shall I bring to birth, and not give delivery?” says יהוה. “Shall I who give delivery restrain birth?” said your Elohim.
Yes 66:10 “Rejoice with Yerushalayim, and be glad with her, all you who love her; rejoice greatly with her, all you who mourn for her;
Yes 66:11 so that you feed, and shall be satisfied with the breast of her comforts, so that you drink deeply, and shall delight yourselves in her overflowing esteem.”
Yes 66:12 For thus said יהוה, “See, I am extending peace to her like a river, and the esteem of the goyim like a flowing stream. And you shall feed; you shall be carried on the side, and be fondled on her knees.
Yes 66:13 “As one whom his mother comforts, so I comfort you. And in Yerushalayim you are comforted.”
Yes 66:14 “And you shall see, and your heart shall rejoice, and your bones flourish as tender grass. And the hand of יהוה shall be known to His servants, and His displeasure to His enemies.
Yes 66:15 “For look, יהוה comes with fire and with His chariots, like a whirlwind, to render His displeasure with burning, and His rebuke with flames of fire.
Yes 66:16 “For by fire and by His sword יהוה shall judge all flesh, and the slain of יהוה shall be many –
Yes 66:17 those who set themselves apart and cleanse themselves at the gardens after ‘One’ in the midst, eating flesh of pigs and the abomination and the mouse, are snatched away, together,” declares יהוה.
Yes 66:18 “And I, because of their works and their imaginations, am coming to gather all nations and tongues. And they shall come and see My esteem.
Yes 66:19 “And I shall set a sign among them, and shall send some of those who escape to the nations – Tarshish and Pul and Luḏ, who draw the bow, and Tuḇal and Yawan, the coastlands afar off who have not heard My report nor seen My esteem. And they shall declare My esteem among the goyim.
Yes 66:20 “And they shall bring all your brothers as an offering to יהוה out of all the goyim, on horses and in chariots and in litters, on mules and on camels, to My kadosh mountain Yerushalayim,” declares יהוה, “as the children of Yisra’ĕl bring an offering in a clean vessel into the House of יהוה.
Yes 66:21 “And from them too I shall take for kohanim – for Lĕwites,” declares יהוה.
Yes 66:22 “For as the new heavens and the new earth that I make stand before Me,” declares יהוה, “so your seed and your name shall stand.
Yes 66:23 “And it shall be that from New Moon to New Moon, and from Sabbath to Sabbath, all flesh shall come to worship before Me,” declares יהוה.
Yes 66:24 “And they shall go forth and look upon the corpses of the men who have transgressed against Me. For their worm shall not die, and their fire not be quenched. And they shall be repulsive to all flesh!”

Noach Haftarah (Hebrew)

Yeshayahu 54:1 - 55:5

Yeshayahu 54:1 רני עקרה לא ילדה פצחי רנה וצהלי לא־חלה כי־רבים בני־שׁוממה מבני בעולה אמר יהוה׃

Yeshayahu 54:2 הרחיבי מקום אהלך ויריעות משׁכנותיך יטו אל־תחשׂכי האריכי מיתריך ויתדתיך חזקי׃

Yeshayahu 54:3 כי־ימין ושׂמאול תפרצי וזרעך גוים יירשׁ וערים נשׁמות יושׁיבו׃

Yeshayahu 54:4 אל־תיראי כי־לא תבושׁי ואל־תכלמי כי לא תחפירי כי בשׁת עלומיך תשׁכחי וחרפת אלמנותיך לא תזכרי־עוד׃

Yeshayahu 54:5 כי בעליך עשׂיך יהוה צבאות שׁמו וגאלך קדושׁ ישׂראל אלהי כל־הארץ יקרא׃

Yeshayahu 54:6 כי־כאשׁה עזובה ועצובת רוח קראך יהוה ואשׁת נעורים כי תמאס אמר אלהיך׃

Yeshayahu 54:7 ברגע קטן עזבתיך וברחמים גדלים אקבצך׃

Yeshayahu 54:8 בשׁצף קצף הסתרתי פני רגע ממך ובחסד עולם רחמתיך אמר גאלך יהוה׃

Yeshayahu 54:9 כי־מי נח זאת לי אשׁר נשׁבעתי מעבר מי־נח עוד על־הארץ כן נשׁבעתי מקצף עליך ומגער־בך׃

Yeshayahu 54:10 כי ההרים ימושׁו והגבעות תמוטנה וחסדי מאתך לא־ימושׁ וברית שׁלומי לא תמוט אמר מרחמך יהוה׃

Yeshayahu 54:11 עניה סערה לא נחמה הנה אנכי מרביץ בפוך אבניך ויסדתיך בספירים׃

Yeshayahu 54:12 ושׂמתי כדכד שׁמשׁתיך ושׁעריך לאבני אקדח וכל־גבולך לאבני־חפץ׃

Yeshayahu 54:13 וכל־בניך למודי יהוה ורב שׁלום בניך׃

Yeshayahu 54:14 בצדקה תכונני רחקי מעשׁק כי־לא תיראי וממחתה כי לא־תקרב אליך׃

Yeshayahu 54:15 הן גור יגור אפס מאותי מי־גר אתך עליך יפול׃

Yeshayahu 54:16 הן אנכי בראתי חרשׁ נפח באשׁ פחם ומוציא כלי למעשׂהו ואנכי בראתי משׁחית לחבל׃

Yeshayahu 54:17 כל־כלי יוצר עליך לא יצלח וכל־לשׁון תקום־אתך למשׁפט תרשׁיעי זאת נחלת עבדי יהוה וצדקתם מאתי נאם־יהוה׃

Yeshayahu 55:1 הוי כל־צמא לכו למים ואשׁר אין־לו כסף לכו שׁברו ואכלו ולכו שׁברו בלוא־כסף ובלוא מחיר יין וחלב׃

Yeshayahu 55:2 למה תשׁקלו־כסף בלוא־לחם ויגיעכם בלוא לשׂבעה שׁמעו שׁמוע אלי ואכלו־טוב ותתענג בדשׁן נפשׁכם׃

Yeshayahu 55:3 הטו אזנכם ולכו אלי שׁמעו ותחי נפשׁכם ואכרתה לכם ברית עולם חסדי דוד הנאמנים׃

Yeshayahu 55:4 הן עד לאומים נתתיו נגיד ומצוה לאמים׃

Yeshayahu 55:5 הן גוי לא־תדע תקרא וגוי לא־ידעוך אליך ירוצו למען יהוה אלהיך ולקדושׁ ישׂראל כי פארך׃

B'reisheet Haftarah (Hebrew)

YESHAYAHU 42:5 - 43:10
Isa 42:5 כה־אמר האל יהוה בורא השׁמים ונוטיהם רקע הארץ וצאצאיה נתן נשׁמה לעם עליה ורוח להלכים בה׃
Isa 42:6 אני יהוה קראתיך בצדק ואחזק בידך ואצרך ואתנך לברית עם לאור גוים׃
Isa 42:7 לפקח עינים עורות להוציא ממסגר אסיר מבית כלא ישׁבי חשׁך׃
Isa 42:8 אני יהוה הוא שׁמי וכבודי לאחר לא־אתן ותהלתי לפסילים׃
Isa 42:9 הראשׁנות הנה־באו וחדשׁות אני מגיד בטרם תצמחנה אשׁמיע אתכם׃
Isa 42:10 שׁירו ליהוה שׁיר חדשׁ תהלתו מקצה הארץ יורדי הים ומלאו איים וישׁביהם׃
Isa 42:11 ישׂאו מדבר ועריו חצרים תשׁב קדר ירנו ישׁבי סלע מראשׁ הרים יצוחו׃
Isa 42:12 ישׂימו ליהוה כבוד ותהלתו באיים יגידו׃
Isa 42:13 יהוה כגבור יצא כאישׁ מלחמות יעיר קנאה יריע אף־יצריח על־איביו יתגבר׃
Isa 42:14 החשׁיתי מעולם אחרישׁ אתאפק כיולדה אפעה אשׁם ואשׁאף יחד׃
Isa 42:15 אחריב הרים וגבעות וכל־עשׂבם אובישׁ ושׂמתי נהרות לאיים ואגמים אובישׁ׃
Isa 42:16 והולכתי עורים בדרך לא ידעו בנתיבות לא־ידעו אדריכם אשׂים מחשׁך לפניהם לאור ומעקשׁים למישׁור אלה הדברים עשׂיתם ולא עזבתים׃
Isa 42:17 נסגו אחור יבשׁו בשׁת הבטחים בפסל האמרים למסכה אתם אלהינו׃
Isa 42:18 החרשׁים שׁמעו והעורים הביטו לראות׃
Isa 42:19 מי עור כי אם־עבדי וחרשׁ כמלאכי אשׁלח מי עור כמשׁלם ועור כעבד יהוה׃
Isa 42:20 ראית רבות ולא תשׁמר פקוח אזנים ולא ישׁמע׃
Isa 42:21 יהוה חפץ למען צדקו יגדיל תורה ויאדיר׃
Isa 42:22 והוא עם־בזוז ושׁסוי הפח בחורים כלם ובבתי כלאים החבאו היו לבז ואין מציל משׁסה ואין־אמר השׁב׃
Isa 42:23 מי בכם יאזין זאת יקשׁב וישׁמע לאחור׃
Isa 42:24 מי־נתן למשׁוסה יעקב וישׂראל לבזזים הלוא יהוה זו חטאנו לו ולא־אבו בדרכיו הלוך ולא שׁמעו בתורתו׃
Isa 42:25 וישׁפך עליו חמה אפו ועזוז מלחמה ותלהטהו מסביב ולא ידע ותבער־בו ולא־ישׂים על־לב׃
Isa 43:1 ועתה כה־אמר יהוה בראך יעקב ויצרך ישׂראל אל־תירא כי גאלתיך קראתי בשׁמך לי־אתה׃
Isa 43:2 כי־תעבר במים אתך־אני ובנהרות לא ישׁטפוך כי־תלך במו־אשׁ לא תכוה ולהבה לא תבער־בך׃
Isa 43:3 כי אני יהוה אלהיך קדושׁ ישׂראל מושׁיעך נתתי כפרך מצרים כושׁ וסבא תחתיך׃
Isa 43:4 מאשׁר יקרת בעיני נכבדת ואני אהבתיך ואתן אדם תחתיך ולאמים תחת נפשׁך׃
Isa 43:5 אל־תירא כי אתך־אני ממזרח אביא זרעך וממערב אקבצך׃
Isa 43:6 אמר לצפון תני ולתימן אל־תכלאי הביאי בני מרחוק ובנותי מקצה הארץ׃
Isa 43:7 כל הנקרא בשׁמי ולכבודי בראתיו יצרתיו אף־עשׂיתיו׃
Isa 43:8 הוציא עם־עור ועינים ישׁ וחרשׁים ואזנים למו׃
Isa 43:9 כל־הגוים נקבצו יחדו ויאספו לאמים מי בהם יגיד זאת וראשׁנות ישׁמיענו יתנו עדיהם ויצדקו וישׁמעו ויאמרו אמת׃
Isa 43:10 אתם עדי נאם־יהוה ועבדי אשׁר בחרתי למען תדעו ותאמינו לי ותבינו כי־אני הוא לפני לא־נוצר אל ואחרי לא יהיה׃