Lech Lecha Gospel (Hebrew)

MattitYahu 5-7
Mat 5:1 ויהי כראותו את־המון העם ויעל ההרה וישב שם ויגשו אליו תלמידיו׃
Mat 5:2 ויפתח את־פיו ויורם ויאמר׃
Mat 5:3 אשרי עניי הרוח כי להם מלכות השמים׃
Mat 5:4 אשרי האבלים כי־הם ינחמו׃
Mat 5:5 אשרי הענוים כי־המה יירשו ארץ׃
Mat 5:6 אשרי הרעבים והצמאים לצדקה כי־הם ישבעו׃
Mat 5:7 אשרי הרחמנים כי־הם ירחמו׃
Mat 5:8 אשרי ברי לבב כי־הם יחזו את־האלהים׃
Mat 5:9 אשרי רדפי שלום כי־בני אלהים יקרא להם׃
Mat 5:10 אשרי הנרדפים בגלל הצדקה כי להם מלכות השמים׃
Mat 5:11 אשריכם כי־יחרפו ורדפו אתכם ודברו עליכם בשקר כל־רע בעבורי׃
Mat 5:12 שמחו וגילו כי שכרכם רב בשמים כי־כן רדפו את־הנביאים אשר היו לפניכם׃
Mat 5:13 אתם מלח הארץ ואם־המלח היה תפל במה ימלח הן לא־יצלח עוד לכל כי אם־להשליך חוצה והיה מרמס לבני אדם׃
Mat 5:14 אתם אורו של־עולם עיר ישבת על־ההר לא תסתר׃
Mat 5:15 גם אין מדליקים נר לשום אותו תחת האיפה כי אם־על־המנורה להאיר לכל־אשר בבית׃
Mat 5:16 כן יאר אורכם לפני בני האדם למען יראו מעשיכם הטובים ושבחו את־אביכם שבשמים׃
Mat 5:17 אל־תדמו כי באתי להפר את־התורה או את־דברי הנביאים לא באתי להפר כי אם־למלאת׃
Mat 5:18 כי אמן אמר אני לכם עד כי־יעברו השמים והארץ לא תעבר יוד אחת או־קוץ אחד מן־התורה עד אשר יקים הכל׃
Mat 5:19 לכן האיש אשר יפר אחת מן־המצות הקטנות האלה וילמד את־בני האדם לעשות כמוהו קטון יקרא לו במלכות השמים ואשר יעשה וילמד אותן לזה גדול יקרא במלכות השמים׃
Mat 5:20 כי אני אמר לכם אם לא־תהיה צדקתכם מרבה מצדקת הסופרים והפרושים לא תבאו במלכות השמים׃
Mat 5:21 הלא שמעתם כי נאמר לראשנים לא תרצח ואשר ירצח חיב הוא לבית דין׃
Mat 5:22 ואני אמר לכם כל־אשר יקצף על־אחיו חנם חיב הוא לבית דין ואשר יאמר אל־אחיו רקא חיב הוא לסנהדרין ואשר נבל יקרא לו הוא מחיב אש גיהנם׃
Mat 5:23 לכן אם־תקריב קרבנך אל־המזבח וזכרת כי־יש לאחיך דבר ריב עמך׃
Mat 5:24 הנח שם את־קרבנך לפני המזבח ולך כפר את־פני אחיך ואחרי כן בוא הקרב את־קרבנך׃
Mat 5:25 מהר התרצה לאיש ריבך בעודך בדרך אתו פן־יסגירך איש ריבך אל־השפט והשפט יסגירך לשוטר והשלכת אל־בית הכלא׃
Mat 5:26 אמן אמר אני לך לא תצא משם עד אם־שלמת את־הפרוטה האחרונה׃
Mat 5:27 שמעתם כי נאמר לראשנים לא תנאף׃
Mat 5:28 ואני אמר לכם כל־המסתכל באשה לחמד אותה נאף נאפה בלבו׃
Mat 5:29 ואם תכשילך עין ימינך נקר אותה והשלך ממך כי טוב לך אשר יאבד אחד מאבריך מרדת כל־גופך אל־גיהנם׃
Mat 5:30 ואם־ידך הימנית תכשילך קצץ אותה והשלך ממך כי טוב לך אשר יאבד אחד מאבריך מרדת כל־גופך אל־גיהנם׃
Mat 5:31 ונאמר איש כי ישלח את־אשתו ונתן לה ספר כריתות׃
Mat 5:32 ואני אמר לכם המשלח את־אשתו בלתי על־דבר זנות מביאה לידי נאפים והלקח את־הגרושה לו לאשה נאף הוא׃
Mat 5:33 עוד שמעתם כי נאמר לראשנים לא תשבע לשקר ושלם ליהוה שבעותיך׃
Mat 5:34 ואני אמר לכם לא תשבעו כל־שבועה לא בשמים כי־כסא אלהים המה׃
Mat 5:35 ולא בארץ כי־הדום רגליו היא ולא בירושלים כי־היא קרית מלך רב׃
Mat 5:36 אף בחיי ראשך אל־תשבע כי־לא תוכל להפך שערה אחת ללבנה או לשחרה׃
Mat 5:37 אך־יהי דברכם הן הן לא לא והיותר על אלה מן־הרע הוא׃
Mat 5:38 שמעתם כי נאמר עין תחת עין שן תחת שן׃
Mat 5:39 ואני אמר לכם אל־תתקוממו לרשע והמכה אותך על־הלחי הימנית הטה־לו גם את־האחרת׃
Mat 5:40 ואשר יחפץ לריב עמך ולקחת את־כתנתך תן־לו גם את־המעיל׃
Mat 5:41 והאנס אותך ללכת עמו דרך מיל לך אתו שנים׃
Mat 5:42 השאל מאתך תן־לו והבא ללות ממך אל־תשב פניו׃
Mat 5:43 שמעתם כי נאמר ואהבת לרעך ושנאת את־איבך׃
Mat 5:44 ואני אמר לכם אהבו את־איביכם (ברכו את־מקלליכם היטיבו לשנאיכם) והתפללו בעד (מכאיביכם ו) רדפיכם׃
Mat 5:45 למען תהיו בנים לאביכם שבשמים אשר הוא מזריח שמשו לרעים ולטובים וממטיר על־הצדיקים וגם על־הרשעים׃
Mat 5:46 כי אם־תאהבו את־אהביכם מה־שכרכם הלא גם־המכסים יעשו־זאת׃
Mat 5:47 ואם־תשאלו לשלום אחיכם בלבד מה־שבחכם הלא גם־המכסים יעשו־זאת׃
Mat 5:48 לכן היו שלמים כאשר אביכם שבשמים שלם הוא׃
Mat 6:1 השמרו לכם מעשות צדקתכם לפני בני אדם להראות להם כי אם־כן אין־לכם שכר מאת אביכם שבשמים׃
Mat 6:2 לכן בעשותך צדקה אל־תריע לפניך בשופר כאשר יעשו החנפים בבתי כנסיות וברחבות למען יהללו אותם האנשים אמן אמר אני לכם המה נשאו את שכרם׃
Mat 6:3 ואתה בעשותך צדקה אל־תדע שמאלך את אשר עשה ימינך׃
Mat 6:4 למען תהיה צדקתך בסתר ואביך הראה במסתרים הוא (בגלוי) יגמלך׃
Mat 6:5 וכי תתפלל אל־תהי כחנפים האהבים להתפלל בעמדם בבתי כנסיות ובפנות השוקים למען יראו לבני אדם אמן אמר אני לכם המה נשאו את שכרם׃
Mat 6:6 ואתה כי תתפלל בוא בחדרך וסגר דלתך בעדך והתפלל אל־אביך אשר בסתר ואביך הראה במסתרים הוא (בגלוי) יגמלך׃
Mat 6:7 ובהתפללכם אל־תפטפטו כגוים האמרים בלבבם ברב דברינו נשמע׃
Mat 6:8 ואתם אל־תדמו להם כי יודע אביכם כל־צרככם בטרם תשאלו ממנו׃
Mat 6:9 לכן כה תתפללו אבינו שבשמים יתקדש שמך׃
Mat 6:10 תבא מלכותך יעשה רצונך כאשר בשמים גם בארץ׃
Mat 6:11 את־לחם חקנו תן־לנו היום׃
Mat 6:12 ומחל־לנו על־חבותינו כאשר מחלנו גם־אנחנו לחיבינו׃
Mat 6:13 ואל־תביאנו לידי נסיון כי אם־תחלצנו מן־הרע ((כי לך הממלכה והגבורה והתפארת לעולמי עולמים אמן))׃
Mat 6:14 כי אם־תמחלו לבני־אדם על־חטאתם ימחל גם־לכם אביכם שבשמים׃
Mat 6:15 ואם לא תמחלו לבני אדם גם־אביכם לא־ימחל לחטאתיכם׃
Mat 6:16 וכי תצומו אל־תהיו זעפים כחנפים המשנים את־פניהם להראות צמים לבני אדם אמן אמר אני לכם המה נשאו את־שכרם׃
Mat 6:17 ואתה כי תצום סוך את־ראשך ורחץ את־פניך׃
Mat 6:18 אשר לא־תראה צם לבני אדם כי אם־לאביך בסתר ואביך הראה במסתרים הוא (בגלוי) יגמלך׃
Mat 6:19 אל תאצרו לכם אוצרות בארץ אשר יאכלום שם סס ורקב וגנבים יחתרו וגנבו׃
Mat 6:20 אבל תאצרו לכם אוצרות בשמים אשר סס ורקב לא־יאכלום שם וגנבים לא יחתרו ולא יגנבו׃
Mat 6:21 כי במקום אשר־אוצרכם בו שם יהיה גם־לבבכם׃
Mat 6:22 נר הגוף העין ואם־עינך תמימה כל־גופך יאור׃
Mat 6:23 ואם־עינך רעה כל־גופך יחשך ואם יחשך האור אשר בקרבך מה־רב החשך׃
Mat 6:24 לא יוכל איש לעבד שני אדנים כי ישנא את־האחד ויאהב את האחר או ידבק באחד ויבזה את־האחר לא תוכלו עבוד את־האלהים ואת־הממון׃
Mat 6:25 על־כן אמר אני לכם אל תדאגו לנפשכם לאמר מה־נאכל ומה־נשתה ולגופכם לאמר מה־נלבש הלא הנפש היא יקרה מן־המזון והגוף יקר מן־המלבוש׃
Mat 6:26 הביטו אל־עוף השמים וראו הן לא יזרעו ולא יקצרו ולא יאספו לאסמים ואביכם שבשמים מכלכל אתם הלא אתם נעליתם עליהם מאד׃
Mat 6:27 ומי בכם בדאגתו יוכל להוסיף על־קומתו אמה אחת׃
Mat 6:28 וללבוש למה תדאגה התבוזנו־נא אל־שושני השדה הצמחות׃
Mat 6:29 לא יעמלו ולא יטוו ואני אמר לכם כי גם־שלמה בכל־הדרו לא־היה לבוש כאחת מהנה׃
Mat 6:30 ואם־ככה מלביש האלהים את־חציר השדה אשר היום צמח ומחר ישלך לתוך התנור אף כי־אתכם קטני אמונה׃
Mat 6:31 לכן אל־תדאגו לאמר מה־נאכל ומה־נשתה ומה־נלבש׃
Mat 6:32 כי את־כל־אלה מבקשים הגוים הלא ידע אביכם אשר בשמים כי צריכים אתם לכל־אלה׃
Mat 6:33 אך דרשו בראשונה את־מלכות אלהים ואת־צדקתו ונוסף לכם כל־אלה׃
Mat 6:34 לכן אל־תדאגו ליום מחר כי יום מחר הוא ידאג לו ודיה לצרה בשעתה׃
Mat 7:1 אל־תשפטו למען אשר לא תשפטו׃
Mat 7:2 כי במשפט אשר אתם שפטים תשפטו ובמדה אשר אתם מדדים ימד לכם׃
Mat 7:3 ולמה זה תראה את־הקיסם בעין אחיך ואל־הקורה אשר בעינך לא תביט׃
Mat 7:4 ואיך תאמר אל־אחיך הניחה לי ואסיר את־הקיסם מעינך והנה הקורה בעינך׃
Mat 7:5 החנף הסר בראשונה את־הקורה מעינך ואחרי כן ראה תראה להסיר את־הקיסם מעין אחיך׃
Mat 7:6 אל־תתנו את־הקדש לכלבים ואל־תשליכו פניניכם לפני החזירים פן־ירמסום ברגליהם ופנו וטרפו אתכם׃
Mat 7:7 שאלו וינתן לכם דרשו ותמצאו דפקו ויפתח לכם׃
Mat 7:8 כי כל־השאל יקבל והדרש ימצא והדפק יפתח לו׃
Mat 7:9 היש בכם איש אשר ישאל ממנו בנו לחם ונתן־לו אבן׃
Mat 7:10 וכי ישאל ממנו דג היתן־לו נחש׃
Mat 7:11 הן אתם הרעים ידעים לתת מתנות טבות לבניכם אף כי־אביכם שבשמים יתן אך־טוב לשאלים מאתו׃
Mat 7:12 לכן כל אשר תרצו שיעשו לכם בני האדם עשו להם גם־אתם כי־זאת התורה והנביאים׃
Mat 7:13 באו בפתח הצר כי רחב הפתח ומרוחת דרך האבדון ורבים אשר יבאו בו׃
Mat 7:14 וצר הפתח ומוצק דרך החיים ומעטים הם אשר ימצאוה׃
Mat 7:15 השמרו לכם מנביאי השקר הבאים אליכם בלבוש כבשים ובקרבם זאבים טרפים המה׃
Mat 7:16 הכר תכירו אותם בפרים היאספו ענבים מן־הקצים או תאנים מן־הברקנים׃
Mat 7:17 כן כל־עץ טוב עשה פרי טוב והנשחת עשה פרי רע׃
Mat 7:18 עץ טוב לא־יוכל עשות פרי רע ועץ נשחת לא יעשה פרי טוב׃
Mat 7:19 וכל־עץ אשר־לא יעשה פרי טוב יכרת וישלך באש׃
Mat 7:20 לכן בפרים תכירו אותם׃
Mat 7:21 לא כל־האמר לי אדני אדני יבוא במלכות השמים כי אם־העשה רצון אבי שבשמים׃
Mat 7:22 והיה ביום ההוא יאמרו רבים אלי אדני אדני הלא בשמך נבאנו ובשמך גרשנו שדים ובשמך עשינו נפלאות רבות׃
Mat 7:23 אז אענה־בם לאמר מעולם לא ידעתי אתכם סורו ממני פעלי און׃
Mat 7:24 לכן כל־השמע את־דברי אלה ועשה אתם אדמהו לאיש חכם אשר־בנה את־ביתו על־הצור׃
Mat 7:25 וירד הגשם וישטפו הנחלים וינשבו הרוחות ויגעו בבית ההוא ולא נפל כי יסד על־הצור׃
Mat 7:26 וכל־השמע את־דברי אלה ולא יעשה אתם ידמה לאיש בער אשר־בנה את־ביתו על־החול׃
Mat 7:27 וירד הגשם וישטפו הנחלים וינשבו הרוחות ויפגעו בבית ההוא ויפל ותהי מפלתו גדולה׃
Mat 7:28 ויהי ככלות ישוע לדבר את־הדברים האלה וישתומם המון העם על־תורתו׃
Mat 7:29 כי היה מלמד אותם כאיש שלטון ולא כסופרים׃