Re'eh Haftarah (Hebrew)

YeshaYahu 54:11-55:5

Yes 54:11 עניה סערה לא נחמה הנה אנכי מרביץ בפוך אבניך ויסדתיך בספירים׃
Yes 54:12 ושׂמתי כדכד שׁמשׁתיך ושׁעריך לאבני אקדח וכל־גבולך לאבני־חפץ׃
Yes 54:13 וכל־בניך למודי יהוה ורב שׁלום בניך׃
Yes 54:14 בצדקה תכונני רחקי מעשׁק כי־לא תיראי וממחתה כי לא־תקרב אליך׃
Yes 54:15 הן גור יגור אפס מאותי מי־גר אתך עליך יפול׃
Yes 54:16 הן אנכי בראתי חרשׁ נפח באשׁ פחם ומוציא כלי למעשׂהו ואנכי בראתי משׁחית לחבל׃
Yes 54:17 כל־כלי יוצר עליך לא יצלח וכל־לשׁון תקום־אתך למשׁפט תרשׁיעי זאת נחלת עבדי יהוה וצדקתם מאתי נאם־יהוה׃
Yes 55:1 הוי כל־צמא לכו למים ואשׁר אין־לו כסף לכו שׁברו ואכלו ולכו שׁברו בלוא־כסף ובלוא מחיר יין וחלב׃
Yes 55:2 למה תשׁקלו־כסף בלוא־לחם ויגיעכם בלוא לשׂבעה שׁמעו שׁמוע אלי ואכלו־טוב ותתענג בדשׁן נפשׁכם׃
Yes 55:3 הטו אזנכם ולכו אלי שׁמעו ותחי נפשׁכם ואכרתה לכם ברית עולם חסדי דוד הנאמנים׃
Yes 55:4 הן עד לאומים נתתיו נגיד ומצוה לאמים׃
Yes 55:5 הן גוי לא־תדע תקרא וגוי לא־ידעוך אליך ירוצו למען יהוה אלהיך ולקדושׁ ישׂראל כי פארך׃