Vayera Gospel (Hebrew)

Mattithyahu 8-10
Mat 8:1 וירד מן־ההר וילך אחריו המון עם רב׃
Mat 8:2 והנה איש מצרע בא וישתחו־לו ויאמר אדני אם־תרצה תוכל לטהרני׃
Mat 8:3 וישלח ישוע את־ידו ויגע־בו ויאמר חפץ אנכי טהר וברגע נרפאה צרעתו׃
Mat 8:4 ויאמר אליו ישוע ראה אל־תספר לאיש ולך הראה אל־הכהן והקרבת את־הקרבן אשר צוה משה לעדות להם׃
Mat 8:5 ויהי כבאו אל־כפר־נחום ויגש אליו שר־מאה אחד ויתחנן־לו לאמר׃
Mat 8:6 אדני הנה נערי נפל למשכב בביתי והוא נכה אברים ומענה עד־מאד׃
Mat 8:7 ויאמר ישוע אליו אבא ורפאתיו׃
Mat 8:8 ויען שר־המאה ויאמר אדני נקלתי מאשר תבא בצל קורתי רק דבר־נא דבר ונרפא נערי׃
Mat 8:9 כי אנכי איש אשר תחת ממשלה וגם־יש תחת ידי אנשי צבא ואמרתי לזה לך והלך ולזה בוא ובא ולעבדי עשה־זאת ועשה׃
Mat 8:10 וישמע ישוע ויתמה ויאמר אל־ההלכים אחריו אמן אמר אני לכם גם־בישראל לא־מצאתי אמונה רבה כזאת׃
Mat 8:11 ואני אמר לכם רבים יבאו ממזרח וממערב ויסבו עם־אברהם ויצחק ויעקב במלכות השמים׃
Mat 8:12 אבל בני המלכות המה יגרשו אל־החשך החיצון שם תהיה היללה וחרוק השנים׃
Mat 8:13 ויאמר ישוע אל־שר־המאה לך וכאמונתך כן יהיה־לך וירפא נערו בשעה ההיא׃
Mat 8:14 ויבא ישוע ביתה פטרוס וירא את־חמותו נפלת למשכב וחולת קדחת׃
Mat 8:15 ויגע בידה ותרף ממנה הקדחת ותקם ותשרתם׃
Mat 8:16 ויהי לעת ערב ויביאו אליו רבים אחוזי שדים ויגרש את־הרוחות בדבר פיו וירפא את כל־החולים׃
Mat 8:17 למלאת את אשר דבר ישעיהו הנביא לאמר חלינו הוא נשא ומכאבינו סבלם׃
Mat 8:18 ויהי כראות ישוע המון עם רב סביבתיו ויצו לעבר משם אל־עבר הים׃
Mat 8:19 ויגש אליו אחד הסופרים ויאמר אליו רבי אלכה אחריך אל כל־אשר תלך׃
Mat 8:20 ויאמר אליו ישוע לשועלים יש־חורים ולעוף השמים קנים ובן־האדם אין לו מקום להניח את־ראשו׃
Mat 8:21 ואיש אחר מן־התלמידים אמר אליו אדני הניחה־לי ואלך בראשונה לקבר את־אבי׃
Mat 8:22 ויאמר אליו ישוע לך אחרי והנח למתים לקבר את־מתיהם׃
Mat 8:23 וירד אל־האניה וירדו אתו תלמידיו׃
Mat 8:24 והנה סער גדול היה בים עד־אשר כסו הגלים את־האניה והוא ישן׃
Mat 8:25 ויגשו אליו תלמידיו ויעירו אותו לאמר הושיענו אדנינו אבדנו׃
Mat 8:26 ויאמר אליהם קטני אמונה מה חרדים אתם ויקם ויגער ברוחות ובים ותהי דממה רבה׃
Mat 8:27 ויתמהו האנשים ויאמרו מי אפוא הוא אשר גם־הרוחות והים אליו ישמעון׃
Mat 8:28 ויהי כבאו אל־עבר הים אל־ארץ הגדרים ויפגשוהו שני אנשים אחוזי שדים יצאים מבתי הקברות והמה רגזנים מאד עד אשר לא־יכל איש לעבר בדרך ההוא׃
Mat 8:29 והנה הם צעקים לאמר מה לנו ולך ישוע בן האלהים הבאת הלם לענותנו בלא עת׃
Mat 8:30 ושם עדר חזירים רבים רעים הרחק מהם׃
Mat 8:31 ויתחננו אליו השדים לאמר אם תגרשנו תנה לנו לבוא בעדר החזירים׃
Mat 8:32 ויאמר אליהם לכו ויצאו ויבאו בעדר החזירים והנה השתער כל־עדר החזירים מן־המורד אל־הים וימותו במים׃
Mat 8:33 וינוסו הרעים ויבאו העירה ויגידו את־הכל ואת אשר נעשה לאחוזי השדים׃
Mat 8:34 והנה כל־העיר יצאה לקראת ישוע וכראותם אתו ויבקשו ממנו לעבר מגבולם׃
Mat 9:1 וירד באניה ויעבר ויבא אל־עירו׃
Mat 9:2 והנה הם מביאים אליו איש נכה אברים והוא משכב על־המטה ויהי כראות ישוע את־אמונתם ויאמר אל־נכה האברים חזק בני נסלחו־לך חטאתיך׃
Mat 9:3 והנה אנשים מן־הסופרים אמרו בלבבם מגדף הוא׃
Mat 9:4 וישוע ראה את־מחשבתם ויאמר למה תחשבו רעה בלבבכם׃
Mat 9:5 כי מה הנקל האמר נסלחו־לך חטאתיך אם־אמר קום התהלך׃
Mat 9:6 אך למען תדעון כי בן־האדם יש־לו השלטן בארץ לסלח לחטאים ויאמר אל־נכה האברים קום שא את־מטתך ולך־לך אל־ביתך׃
Mat 9:7 ויקם וילך לביתו׃
Mat 9:8 והמון העם ראו וישתוממו וישבחו את־האלהים אשר נתן שלטן כזה לבני אדם׃
Mat 9:9 ויהי בעבר ישוע משם וירא איש ישב בבית־המכס ושמו מתי ויאמר אליו לכה אחרי ויקם וילך אחריו׃
Mat 9:10 ויהי בהסבו בביתו והנה מוכסים וחטאים רבים באו ויסבו עם־ישוע ותלמידיו׃
Mat 9:11 ויראו הפרושים ויאמרו אל־תלמידיו מדוע יאכל רבכם עם־המוכסים והחטאים׃
Mat 9:12 וישמע ישוע ויאמר אליהם החזקים אינם צריכים לרפא כי אם־החולים׃
Mat 9:13 ואתם צאו ולמדו מה הוא שנאמר חסד חפצתי ולא זבח כי לא־באתי לקרא את־הצדיקים כי אם־את־החטאים (לתשובה)׃
Mat 9:14 ויגשו אליו תלמידי יוחנן ויאמרו מדוע אנחנו והפרושים צמים הרבה ותלמידיך אינם צמים׃
Mat 9:15 ויאמר אליהם ישוע איך יוכלו בני החפה להתאבל בעוד החתן עמהם הנה ימים באים ולקח מאתם החתן ואז יצומו׃
Mat 9:16 אין אדם משים טלאי חדש על־שמלה בלה כי ינתק הטלאי מן־השמלה ויתרחב הקרע׃
Mat 9:17 ואין נותנים יין חדש בנאדות בלים פן־יבקעו הנאדות והיין ישפך והנאדות יאבדו אבל נותנים את־היין החדש בנאדות חדשים ושניהם יחדו ישמרו׃
Mat 9:18 ויהי הוא מדבר אליהם את־הדברים האלה והנה אחד השרים בא וישתחו־לו ויאמר עתה זה מתה בתי בא־נא ושים את־ידך עליה ותחיה׃
Mat 9:19 ויקם ישוע וילך אחריו הוא ותלמידיו׃
Mat 9:20 והנה אשה זבת דם שתים עשרה שנה נגשה מאחריו ותגע בכנף בגדו׃
Mat 9:21 כי אמרה בלבה רק אם־אגע בבגדו אושע׃
Mat 9:22 ויפן ישוע וירא אותה ויאמר חזקי בתי אמונתך הושיעה לך ותושע האשה מן־השעה ההיא׃
Mat 9:23 ויבא ישוע אל־בית השר וירא את המחללים בחלילים ואת־העם ההומה ויאמר׃
Mat 9:24 סורו מפה כי לא מתה הילדה אך ישנה היא וישחקו לו׃
Mat 9:25 ויהי כאשר הוציאו את־העם משם ויבא הביתה ויאחז בידה ותקם הנערה׃
Mat 9:26 ותצא השמועה הזאת בכל־הארץ ההיא׃
Mat 9:27 ויעבר ישוע משם וילכו אחריו שני אנשים עורים והמה צעקים ואמרים חננו בן־דוד׃
Mat 9:28 וכבואו הביתה נגשו אליו העורים ויאמר אליהם ישוע המאמינים אתם כי יש־לאל ידי לעשות זאת ויאמרו אליו הן אדנינו׃
Mat 9:29 ויגע בעיניהם ויאמר יהי לכם כאמונתכם׃
Mat 9:30 ותפקחנה עיניהם ויגער־בם ישוע ויאמר ראו פן־יודע לאיש׃
Mat 9:31 והמה בצאתם השמיעו את־שמעו בכל־הארץ ההיא׃
Mat 9:32 המה יצאו והנה הביאו אליו איש אלם אחוז שד׃
Mat 9:33 ויגרש את־השד והאלם החל לדבר ויתמה המון האנשים ויאמרו מעולם לא־נראתה כזאת בישראל׃
Mat 9:34 והפרושים אמרו על־ידי שר השדים מגרש הוא את השדים׃
Mat 9:35 ויסב ישוע בכל־הערים והכפרים וילמד בכנסיותיהם ויבשר בשורת המלכות וירפא כל־מחלה וכל־מדוה בעם׃
Mat 9:36 ובראותו את־ההמנים נכמרו רחמיו עליהם כי הם מתעלפים ונדחים כצאן אשר אין־להם רעה׃
Mat 9:37 אז ידבר לתלמידיו ויאמר רב הקציר והפעלים מעטים׃
Mat 9:38 לכן התחננו אל־בעל הקציר לשלח פעלים לקצירו׃
Mat 10:1 ויקרא אליו את־שנים עשר תלמידיו ויתן להם שלטן על־רוחות הטמאה לגרשם ולרפוא כל־חלי וכל־מדוה׃
Mat 10:2 ואלה שמות שנים עשר השליחים הראשון שמעון הנקרא פטרוס ואנדרי אחיו יעקב בן־זבדי ויוחנן אחיו׃
Mat 10:3 פילפוס ובר־תלמי תומא ומתי המוכס יעקב בן־חלפי ו (לבי המכנה) תדי׃
Mat 10:4 שמעון הקני ויהודה איש־קריות הוא המסר אתו׃
Mat 10:5 את־שנים העשר האלה שלח ישוע ויצו אתם לאמר אל־דרך הגוים אל־תלכו ואל־עיר השמרונים אל־תבאו׃
Mat 10:6 לכו אל־הצאן האבדות אשר לבית־ישראל׃
Mat 10:7 ובלכתכם קראו לאמר מלכות השמים קרבה לבוא׃
Mat 10:8 רפאו את החולים טהרו את המצרעים הקימו את המתים ואת השדים גרשו חנם לקחתם חנם תתנו׃
Mat 10:9 לא־תקחו זהב ולא כסף ולא נחשת בחגוריכם׃
Mat 10:10 ולא תרמיל לדרך ולא שתי כתנות ולא נעלים ולא מטה כי־ראוי לפעל די מחיתו׃
Mat 10:11 וכל־עיר וכפר אשר תבאו שמה דרשו מי הוא הגון לזה בתוכה ושם שבו עד צאתכם׃
Mat 10:12 ובבואכם אל־הבית שאלו־לו לשלום׃
Mat 10:13 והיה אם־הגון הבית יבוא עליו שלומכם ואם־איננו הגון שלומכם אליכם ישוב׃
Mat 10:14 וכל אשר לא־יקבל אתכם ולא ישמע לדבריכם ויצאתם מן־הבית ההוא ומן־העיר ההיא ונערתם את־עפר רגליכם׃
Mat 10:15 אמן אמר אני לכם כי יקל לארץ־סדום ועמרה ביום הדין מן־העיר ההיא׃
Mat 10:16 הנה אנכי שלח אתכם כשלח כבשים בין זאבים לכן היו ערומים כנחשים ותמימים כיונים׃
Mat 10:17 והשמרו לכם מבני האדם כי ימסרו אתכם לסנהדריות ויכו אתכם בשוטים בכנסיותיהם׃
Mat 10:18 ולפני משלים ומלכים תובאו למעני לעדות להם ולגוים׃
Mat 10:19 וכי ימסרו אתכם אל־תדאגו איך תדברו ומה תדברו כי ינתן לכם בשעה ההיא את אשר תדברון׃
Mat 10:20 כי לא אתם הם המדברים כי רוח אביכם הוא המדבר בפיכם׃
Mat 10:21 ואח ימסר את־אחיו למות ואב ימסר את־בנו וקמו בנים באבותם וימיתו אותם׃
Mat 10:22 והייתם שנואים לכל־אדם למען שמי והמחכה עד־עת קץ הוא יושע׃
Mat 10:23 ואם־ירדפו אתכם בעיר אחת נוסו לעיר אחרת כי אמן אמר אני לכם לא תכלו לעבר ערי ישראל עד כי־יבוא בן־האדם׃
Mat 10:24 אין תלמיד נעלה על־רבו ועבד על־אדניו׃
Mat 10:25 דיו לתלמיד להיות כרבו ולעבד להיות כאדניו אם־לבעל הבית קראו בעל־זבול אף כי־לאנשי ביתו׃
Mat 10:26 על־כן לא תיראו מפניהם כי אין דבר מכסה אשר לא יגלה ואין נעלם אשר לא יודע׃
Mat 10:27 את אשר אני אמר לכם בחשך דברו באור ואשר ילחש לאזניכם השמיעו מעל הגגות׃
Mat 10:28 ואל־תיראו מן־ההרגים את־הגוף ואת־הנפש לא־יוכלו להרג אך תיראו את אשר־יוכל לאבד גם את־הנפש גם את־הגוף בגיהנם׃
Mat 10:29 הלא תמכרנה שתי צפרים באסר ואחת מהנה לא תפול ארצה מבלעדי אביכם׃
Mat 10:30 ואתם גם־שערות ראשכם נמנות כלן׃
Mat 10:31 לכן אל־תיראו הנה יקרתם מצפרים רבות׃
Mat 10:32 הן כל־אשר יודה בי לפני האדם אודה־בו גם־אני לפני אבי שבשמים׃
Mat 10:33 ואשר יכחש בי לפני האדם אכחש־בו גם־אני לפני אבי שבשמים׃
Mat 10:34 אל־תחשבו כי באתי להטיל שלום בארץ לא באתי להטיל שלום כי אם־חרב׃
Mat 10:35 כי באתי להפריד בין איש ואביו ובין בת ואמה ובין כלה וחמותה׃
Mat 10:36 ואיבי איש אנשי ביתו׃
Mat 10:37 האהב את־אביו ואת־אמו יותר ממני אינו כדי לי והאהב את־בנו ובתו יותר ממני אינו כדי לי׃
Mat 10:38 ואשר לא־יקח את־צלובו והלך אחרי אינו כדי לי׃
Mat 10:39 המצא את־נפשו יאבדנה והמאבד את־נפשו למעני הוא ימצאנה׃
Mat 10:40 המקבל אתכם אותי הוא מקבל והמקבל אותי הוא מקבל את אשר שלחני׃
Mat 10:41 המקבל נביא לשם נביא שכר נביא יקח והמקבל צדיק לשם צדיק שכר צדיק יקח׃
Mat 10:42 והמשקה את־אחד הקטנים האלה רק כוס מים קרים לשם תלמיד אמן אמר אני לכם כי לא־יאבד שכרו׃