Toldot Gospel (Hebrew)

MattithYahu 13-14
Mat 13:1 ויהי ביום ההוא ויצא ישוע מן־הבית וישב על־הים׃
Mat 13:2 ויקהלו אליו המון עם רב וירד אל־האניה וישב בה וכל־העם עמדים על־שפת הים׃
Mat 13:3 וירב לדבר אליהם במשלים לאמר הנה הזורע יצא לזרע׃
Mat 13:4 ויזרע ויפל מן־הזרע על־יד הדרך ויבאו העוף ויאכלהו׃
Mat 13:5 ויש אשר נפל על־מקם הסלעים אשר אין שם אדמה הרבה וימהר לצמח כי אין לו עמק אדמה׃
Mat 13:6 ויהי כזרח השמש ויצרב וייבש כי אין־לו שרש׃
Mat 13:7 ויש אשר נפל בין הקצים ויעלו הקצים וימעכהו׃
Mat 13:8 ויש אשר נפל על־האדמה הטובה ויתן פרי זה מאה שערים וזה ששים וזה שלשים׃
Mat 13:9 מי אשר לו אזנים לשמע ישמע׃
Mat 13:10 ויגשו אליו התלמידים ויאמרו למה זה במשלים תדבר אליהם׃
Mat 13:11 ויען ויאמר כי לכם נתן לדעת את־סודות מלכות השמים ולהם לא נתן׃
Mat 13:12 כי מי שיש־לו נתן ינתן לו ויעדיף ומי שאין לו גם מה־שיש־לו ינטל ממנו׃
Mat 13:13 על־כן במשלים אדבר אליהם כי בראתם לא יראו ובשמעם לא ישמעו אף־לא יבינו׃
Mat 13:14 ותקים בהם נבואת ישעיהו האמרת שמעו שמוע ואל־תבינו וראו ראו ואל־תדעו׃
Mat 13:15 כי השמן לב־העם הזה ואזניו הכבד ועיניו השע פן־יראה בעיניו ובאזניו ישמע ולבבו יבין ושב ורפא לו׃
Mat 13:16 ואתם אשרי עיניכם כי תראינה ואזניכם כי תשמענה׃
Mat 13:17 כי־אמן אמר אני לכם נביאים וצדיקים רבים נכספו לראת את אשר אתם ראים ולא ראו ולשמע את אשר אתם שמעים ולא שמעו׃
Mat 13:18 לכן אתם שמעו־נא את משל הזורע׃
Mat 13:19 כל־איש שמע את־דבר המלכות ולא יבינהו ובא הרע וחטף את־הזרוע בלבבו הוא הנזרע על־יד הדרך׃
Mat 13:20 והנזרע על־מקום הסלעים הוא השמע את־הדבר ומיד יקחנו בשמחה׃
Mat 13:21 ולו אין שרש תחתיו ויקום רק לשעה ובהיות צרה ורדיפה בגלל הדבר יכשל כרגע׃
Mat 13:22 והנזרע אל־הקצים הוא השמע את־הדבר ודאגת העולם הזה ונכלי העשר ימעכו את־הדבר ופרי לא־יהיה לו׃
Mat 13:23 והנזרע על־האדמה הטובה הוא השמע את־הדבר ומבין אתו אף־יעשה פרי ונתן זה מאה שערים וזה ששים וזה שלשים׃
Mat 13:24 וישם לפניהם משל אחר ויאמר מלכות השמים דומה לאדם אשר זרע זרע טוב בשדהו׃
Mat 13:25 ויהי בהיות האנשים ישנים ויבא איבו ויזרע זונין בין החטים וילך לו׃
Mat 13:26 וכאשר פרח הדשא ויעש פרי ויראו גם־הזונין׃
Mat 13:27 ויגשו עבדי בעל־הבית ויאמרו אליו אדנינו הלא־זרע טוב זרעת בשדך ומאין לו הזונין׃
Mat 13:28 ויאמר להם איש איב עשה זאת ויאמרו אליו העבדים התחפץ כי־נלך ונלקט אתם׃
Mat 13:29 ויאמר לא פן־תלקטו את־הזונין ושרשתם גם את־החטים׃
Mat 13:30 הניחו אתם ויגדלו שניהם יחד עד־הקציר והיה בעת הקציר ואמרתי לקוצרים לקטו בראשונה את־הזונין ואגדו אתם אגדות לשרפם ואת החטים אספו לאוצרי׃
Mat 13:31 וישם לפניהם משל אחר ויאמר מלכות השמים דומה לגרגר של־חרדל אשר לקחו איש ויזרע בשדהו׃
Mat 13:32 והוא קטן מכל־הזרועים וכאשר צמח גדול הוא מן־הירקות והיה לעץ עד־אשר יבאו עוף השמים וקננו בענפיו׃
Mat 13:33 וישא עוד משלו ויאמר אליהם מלכות השמים דומה לשאר אשר לקחתו אשה ותטמן בשלש סאים קמח עד כי־יחמץ כלו׃
Mat 13:34 כל־אלה דבר ישוע במשלים אל־המון העם ובבלי משל לא דבר אליהם דבר׃
Mat 13:35 למלאת את אשר דבר הנביא לאמר אפתחה במשל פי אביעה חידות מני־קדם׃
Mat 13:36 אז שלח ישוע את־המון העם ויבא הביתה ויגשו אליו תלמידיו ויאמרו באר־נא לנו את־משל זוני השדה׃
Mat 13:37 ויען ויאמר אליהם הזורע את־הזרע הטוב הוא בן־האדם׃
Mat 13:38 והשדה הוא העולם והזרע הטוב בני המלכות הם והזונין בני הרע המה׃
Mat 13:39 והאיב אשר זרעם הוא השטן והקציר הוא קץ העולם והקצרים הם המלאכים׃
Mat 13:40 והנה כאשר ילקטו הזונין ונשרפו באש כן יהיה לקץ העולם הזה׃
Mat 13:41 בן־האדם ישלח את־מלאכיו ולקטו ממלכותו את כל־המכשלות ואת כל־פעלי האון׃
Mat 13:42 והשליכו אתם אל־תנור האש שם תהיה היללה וחרק השנים׃
Mat 13:43 אז יזהירו הצדיקים כשמש במלכות אביהם מי אשר לו אזנים לשמע ישמע׃
Mat 13:44 עוד דומה מלכות השמים לאוצר טמון בשדה אשר מצאו איש ויטמנהו ובשמחתו ילך ומכר את־כל־אשר־לו וקנה את־השדה ההוא׃
Mat 13:45 עוד דומה מלכות השמים לאיש סחר המבקש מרגליות טבות׃
Mat 13:46 וכאשר מצא מרגלית אחת יקרה מאד הלך וימכר את־כל־אשר־לו ויקן אתה׃
Mat 13:47 עוד דומה מלכות השמים למכמרת אשר השלכה לים ומינים שונים יאספו לתוכה׃
Mat 13:48 וכאשר נמלאה העלו אתה אל־שפת הים וישבו וילקטו את־המינים הטובים לתוך הכלים ואת הרעים השליכו׃
Mat 13:49 כן יהיה לקץ העולם המלאכים יצאו והבדילו את־הרשעים מתוך הצדיקים׃
Mat 13:50 והשליכום אל־תנור האש שם תהיה היללה וחרק השנים׃
Mat 13:51 ויאמר אליהם ישוע התבינו את־כל־אלה ויאמרו אליו הן אדנינו׃
Mat 13:52 ויאמר אליהם על־כן כל־סופר מלמד למלכות השמים דומה לאיש בעל־בית המוציא מאוצרו חדשות וגם ישנות׃
Mat 13:53 ויהי ככלות ישוע לדבר את־המשלים האלה ויעבר משם׃
Mat 13:54 ויבא אל־ארצו וילמד אתם בבית הכנסת שלהם וישתוממו ויאמרו מאין לזה החכמה הזאת והגבורות׃
Mat 13:55 הלא זה הוא בן־החרש הלא שם אמו מרים ואחיו יעקב ויוסי ושמעון ויהודה׃
Mat 13:56 ואחיותיו הלא כלן אתנו הן ומאין איפוא לו כל־אלה׃
Mat 13:57 ויהי להם למכשול ויאמר ישוע אליהם אין הנביא נקלה אם־לא בארצו ובביתו׃
Mat 13:58 ולא־עשה שם גבורות רבות מפני חסר אמונתם׃
Mat 14:1 בעת ההיא שמע הורדוס שר־רבע המדינה את שמע ישוע׃
Mat 14:2 ויאמר אל־נעריו זה הוא יוחנן המטביל אשר נעור מן־המתים על־כן הכחות פעלים בו׃
Mat 14:3 כי הורדוס תפש את־יוחנן ויאסרהו וישימהו בבית הסהר בגלל הורודיה אשת פילפוס אחיו׃
Mat 14:4 כי אמר יוחנן אליו אסורה היא לך׃
Mat 14:5 ויבקש להרגו ויירא את־ההמון כי לנביא חשבהו׃
Mat 14:6 ויהי ביום הלדת הורדוס ותרקד בת־הורודיה בתוכם ותיטב בעיני הורדוס׃
Mat 14:7 וישבע לה ויאמר מה־תשאל נפשך ואתן לך׃
Mat 14:8 ואמה שמה את־הדברים בפיה ותשאל לאמר תנה־לי פה בקערה את־ראש יוחנן המטביל׃
Mat 14:9 ויצר למלך אך בעבור השבועה והמסבים עמו צוה לתת לה׃
Mat 14:10 וישלח וישא את־ראש יוחנן מעליו בבית הסהר׃
Mat 14:11 ויביאו את־ראשו בקערה ויתנו בידי הנערה ותביאהו אל־אמה׃
Mat 14:12 ויגשו תלמידיו וישאו את־גויתו ויקברוה וילכו ויגידו לישוע׃
Mat 14:13 ויהי כשמעו את־זאת ויסר משם באניה אל־מקום חרבה ואין־איש אתו וישמעו המון העם וילכו אחריו ברגליהם מן־הערים׃
Mat 14:14 ויצא ישוע וירא המון עם־רב ויהמו מעיו להם וירפא את־החלשים אשר בהם׃
Mat 14:15 ויהי לעת ערב ויגשו אליו תלמידיו ויאמרו המקום חרב וגם־נטה היום שלחה את־המון העם וילכו אל־הכפרים לקנות להם אכל׃
Mat 14:16 ויאמר אליהם אינם צריכים ללכת תנו־אתם להם לאכל׃
Mat 14:17 ויאמרו אליו אין־לנו פה כי אם־חמשת ככרות־לחם ושני דגים׃
Mat 14:18 ויאמר הביאום אלי הנה׃
Mat 14:19 ויצו את־העם לשבת על־הדשא ויקח את־חמשת ככרות־הלחם ואת־שני הדגים וישא עיניו השמימה ויברך ויפרס ויתן את־הלחם לתלמידים והתלמידים נתנו לעם׃
Mat 14:20 ויאכלו כלם וישבעו וישאו מן־הפתותים הנותרים שנים עשר סלים מלאים׃
Mat 14:21 והאכלים כחמשת אלפים איש מלבד הנשים והטף׃
Mat 14:22 ויאץ ישוע בתלמידיו לרדת באניה לעבר לפניו אל־עבר הים עד אשר־ישלח את־העם׃
Mat 14:23 וישלח את־העם ויעל ההרה בדד להתפלל ויהי־ערב והוא לבדו שמה׃
Mat 14:24 והאניה באה עד חצי הים והגלים יטרפה כי הרוח לנגדה׃
Mat 14:25 ויהי באשמרת הרביעית ויבא אליהם ישוע והוא מהלך על־פני הים׃
Mat 14:26 והתלמידים ראו אותו מהלך על־פני הים ויבהלו ויאמרו מראה־רוח הוא ויצעקו מפחד׃
Mat 14:27 וימהר ישוע וידבר אליהם לאמר חזקו כי־אני הוא אל־תיראו׃
Mat 14:28 ויען פטרוס ויאמר אליו אם־אתה הוא אדני צוה־נא ואבא אליך על־המים׃
Mat 14:29 ויאמר בוא וירד פטרוס מן־האניה ויהלך על־פני המים לבוא אל־ישוע׃
Mat 14:30 ויהי כראתו את־הרוח כי חזקה היא ויירא ויחל לטבע ויצעק ויאמר אדני הושיעני׃
Mat 14:31 וימהר ישוע וישלח את־ידו ויחזק־בו ויאמר אליו קטן אמונה מה־לך כי חלק לבך׃
Mat 14:32 הם עלו אל־האניה והרוח שככה׃
Mat 14:33 ואנשי האניה נגשו וישתחוו־לו ויאמרו אבל בן־אלהים אתה׃
Mat 14:34 ויעברו את־הים ויבאו ארצה גניסר׃
Mat 14:35 ויכירו אתו אנשי המקום ההוא וישלחו אל־כל־סביבותיהם ויביאו אליו את כל־החולים׃
Mat 14:36 ויבקשו ממנו רק לנגע בכנף בגדו וכל־הנגעים נושעו׃